Kubhoka 4
4
Chapanga ampekeha Musa lujiniku lwa kutenda ngangachu
1Bhela Musa akamuyangiki Bambo Chapanga, “Anakukubha bhole ngati Bhaizilaeli ngabhihobhaleli na ngabhijowaneli chenikipwagha, maghambu anabhapwaghaje, ‘Bambo Chapanga ngacheakupitalile’?”
2Panihapa Bambo Chapanga akundalukili Musa, “Ukamwi kike mu mabhoku ghako?”
Musa akayangike, “Ndonga.”
3Bambo Chapanga akumpwaghi Musa, “Jilekalaje pahi.” Musa akajilekili pahi ndonga jela, najombi jakang'anambwiki kubha lijoka, Musa akatilike. 4Bhela Bambo Chapanga akumpwaghi Musa, “Hatambulaje chiwoku chaku, unkamulaje nkela.” Henu Musa akahatambwili chiwoku chaki akalikamwili lijoka lela, panihapa lijoka heli lakang'anambwiki kabheti kubha ndonga mumabhoku ghaki. 5Bambo Chapanga akapwaghike, “Utendaje anana nahuli Bhaizilaeli bhahobhalyaje kubha Bambo Chapanga, Chapanga wa akahokulu bhabhu, Chapanga waka Ibulahimu, Chapanga waka Isaka, na Chapanga waka Yakobo, nukupitalili wehapa.”
6Kabheti Bambo Chapanga akumpwaghili Musa, “Ubhekaje chiwoku chaku pachihimba mkati ja likanzu laku.” Panihapa Musa akabhekiki chiwoku chaki pachihimba mkati ja likanzu laki, nambu paakachipihiki, chakabhi na chitamu cha malohi, chihuhu kupukupu. 7Chapanga akumpwaghile, “Henu ukelabhuhaje kabheti chiwoku chaku hechi pachihimba mkati ja likanzu laku.” Musa akachikelawihi chiwoku chaki pachihimba mkati ja likanzu laki na paakachipiiki, ukabhi ulamike, ngati pandu pangi pa hyegha jaki. 8Bambo Chapanga akumpwaghi Musa, “Ngati ngabhakuhobhaleli wehapa, wala kujowanela sauti ja nginyulila ja kutumbula, pangi anabhahobhalyaje nginyulila ja kabheli. 9Nambu ngati ngabhahobhaleli nginyulila ibheli heyi au kughahobhalela malobhi ghaku, teka machi gha mu nkoka Naili na kughajitila panani ja luhombi. Machi hagha anaghakubha mwahe panani ja luhombi.”
10Nambu Musa akumpwaghili Bambo Chapanga, “Wenga wa Bambo Chapanga, nepani ngachemili na uwezu wa kulongela wichu kutumbula pakutumbula, wala kutumbu chikahi wehapa pautumbula kulongela na nepani mtumika waku. Nepani ndopiki kulongela, na lulimi lwangu lutehi kutopa.”
11Bambo Chapanga akundalukile, “Nde nane joabhombiki ndomu waka mundu? Nde nane joantenda mundu kubha ngapwagha au ngajowa? Nde nane joampekeha mundu kulola au ngalola? Bho, nga nepani, Bambo Chapanga? 12Bhela jendaje, nepani namwete ananukujangatyaje kupwagha, nanatu ananukubholaje lijambu la kupwagha.”
13Nambu Musa akapwaghike, “Wenga wa Bambo Chapanga, chondi untumaje mundu jonge kutenda lihengu lenihele.”
14Panihapa Bambo Chapanga akumbonili inyela Musa, na akumpwaghile, “Bho, si ubhi na mbeli waku, Haluni, Mlawi? Manyi jombi aweza kulongela wichu. Papamu na ghanihagha, lingalyaje, sajenu ahika kuhimangana na wehapa, najombi paanaakubhonaje, anahekalyaje muntima waki. 15Wehapa anaulongila naku na kumpwaghila ghala ghaapalika kughalongela. Nepani namwete ananunjangataje mwehapa mwabheli kupwagha, nanatu ananumbolaje lijambu la kuhenga. 16Haluni anaalongilaje na Bhaizilaeli kwa kupetela wehapa. Jombi anakubha ngati ndomu waku, na wehapa anaukubha ngati Chapanga kwaki. 17Henu utolaje ndonga jenjenu mu chiwoku chaku, nahuli kwa ndonga jeniheji anautendaje nginyulila yela.”
Musa akelabhuka ku Misili
18Bhela Musa akakelawiki kwaka Yesulo, nkowanu wake, na kumpwaghila, “Chondi unyetakyaje ngelabhukaje ku Misili kwa bhalongu bhangu, nakalolaje ngati bhakona bhomi.” Yesulo akumpwaghile, “Ujendaje kwa lukwale.”
19Bambo Chapanga akumpwaghi Musa akabya akali ku Midiani hoku, “Ukelabhukaje ku Misili kwa ndandi bhandu bhokapi bhabhapalikaje kukukoma bhapotile.” 20Panihapa Musa akuntoliki nhwanu waki na bhana bhaki, akabhakwehiki panani ja liponda na kutumbula mwanja kukelabhuka ku Misili. Najombi akajitoliki ndonga jaka Chapanga jela mu chiwoku chaki.
21Kabheti Bambo Chapanga akumpwaghi Musa, “Pawihikaje ku Misili, ukatendaje palongi jaka Falao ngangachu yokapi yenukupekihi lujiniku lwa kuihenga. Nambu anandendaje mtima waka Falao kubha unonopi nahuli ngayijetakela kubhalekakela bhandu bhabhokaje. 22Na wehapa umpwaghila Falao, Bambo Chapanga apwagha anana, ‘Izilaeli nde mwana wangu nepani wa chikambaku, mbelakeka wangu wa kutumbula. 23Nanatu nakakupwaghili: Undekaje mwana wangu abhokaje, nahuli awezaje kunyojabhela nepani. Nambu wehapa ukakaniki kundeka ajendaje, henu lingalyaje, ananunkomaje mwana waku mbelakeka waku wa kutumbula.’ ”
24Chikahi Musa paakabhi akona mwindela kukelabhuka ku Misili, akabhi pandu pa kughonela bhagheni, henu, Bambo Chapanga akahimangini naku na kupala kunkoma. 25Nambu Sipola akatondwili liganga la kutema, akahekiti ligovi laka mwana waki na kulibheka pamagholu ghaka Musa. Sipola akapwaghike, “Chakaka wehapa nde undomi wangu wa mwahi.” 26Panihapa Bambo Chapanga akundekiki Musa kubha mwome. Maghambu Sipola paakabhi anheketa mwana jando akabhi apwagha, “Chakaka wehapa nde undomi wangu wa mwahi.”
27Bambo Chapanga akumpwaghi Haluni, “Jendaje kuchingwenje ukahimangana na Musa.” Henu, Haluni akapiti, akahimangini na Musa ku chitombi chaka Chapanga, na kundamukila kwa kunkumbatila. 28Bhela Musa akumpwaghili Haluni mambu ghokapi ghaakalaghalakiwi na Bambo Chapanga apwaghaje, na nginyulila yokapi yeakalaghalakiwi kutenda. 29Musa na Haluni bhakapiti ku Misili na kubhabhongana bhazee bhokapi bha Bhaizilaeli. 30Haluni akabhapwaghili kila chindu Bambo Chapanga cheakabhi ampwaghili Musa. Bhelabhela akatendiki nginyulila yokapi palongi ja bhandu bhokapi. 31Bhandu bhakahobhalili, na pabhakajowini kubha Bambo Chapanga abhahikili Bhaizilaeli, na kubha aghaweni mang'ahiku ghabhu, bhandu bhokapi bhakachikimi na kujojabhela.
Currently Selected:
Kubhoka 4: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
