Kubhoka 5
5
Musa na Haluni palongi jaka Falao
1Bhela Musa na Haluni bhakapiti kwaka Falao, na kumpwaghila, “Bambo Chapanga, Chapanga wa Izilaeli apwagha anana, ‘Waleka bhandu bhangu bhabhokaje, nahuli bhakandendila uwangalalu kuchingwenje.’ ”
2Nambu Falao akabhalalukile, “Bambo Chapanga nde nane, mbaka nunjowanyaje na kubhaleka Bhaizilaeli bhabhokaje? Nepani ngachenummanye Bambo Chapanga hujo, wala nganabhalekakeli Bhaizilaeli bhabhokaje.”
3Musa na Haluni bhakamuyangike, “Chapanga wa Bhaebulania ahimangini na tepani. Henu utulekaje tujendaje mwanja wa machobha ghatatu kuchingwenje nahuli kumbokela Bambo Chapanga witu nyambiku, ngati ngachetutendiki bhenibhela jombi anaatulapula kwa chitamu au kwa ngondo.”
4Nambu nkolongwa wa ku Misili akapwaghike, “Mbona wa Musa na Haluni mpala kubhatenda bhandu ngabhihenga lihengo? Njendanyaje mu mahengu ghino!” 5Panihapa Falao akapwaghike, “Lingalyaje, sajenu bhandu abhabha nde bhamaheli kuliku bhandu bhango, na mwehapa mubhahibhalila kuhenga lihengu!”
6Lichobha lelalela Falao akabhalaghalakili hiongozi bha bhatumwa na bhajemalela bha bhandu akapwaghaje, 7“Kutumbu sajenu ngamwapekeha bhandu abhabha manyonyoli majomu gha kulenganakela matofali ngati mokwabheli pakutumbula. Ibhapalika bhakabhongana manyonyoli majomu bhene. 8Nambu ubhalangiku wa matofali ghaghakabhi ghalenganakewa kila lichobha ghakubha bhelabhela, panga na kukepakewa litofali hata limu. Kwa ndandi bhandu abhabha nde bhakata ndemana bhalapu ngomela, bhakapwaghaje, ‘Utulekaje tujendaje kumbokeha Chapanga witu nyambiku.’ 9Mwajonjukyaje lihengu linonopi bhandu abhabha nahuli bhakangamalaje na lihengu na bhakotukaje kujowanela malobhi gha upuhi kuhuma kwa ihongozi bhabhu.”
10Henu ihongozi bha bhatumwa na bhajemalela bhakapiti kubhapwaghila bhandu, “Anana nde Falao moapwaghila, ‘Nepani nganyendaleli kundetela manyonyoli majomu. 11Njendanyanye mkalondaje manyonyoli majomu mabheni pokapi pamwiwezaje kughapata, nambu lihengu linu ngalikepakewi hata pachokopi.’ ” 12Panihapa bhandu bhokapi bhakapechangini kila pandu ku inchi ja ku Misili kubhongana manyonyoli majomu. 13Bhajemalela bha bhatumwa bhakakangamili, bhakapwaghaje, “Muhengaje lihengu linu la kila lichobha la kufyatula matofali ngati pakutumbu hapa pamukabhi mpekewa manyonyoli majomu.” 14Bhajemalela bha Bhaizilaeli bhabhahaghuliwi na hiongozi bha bhatumwa bhaka Falao bhakalapuliki na kulalukiwa, “Maghambu kiki ngachemuhikishi ubhalangiku wa matofali ghinu lichu na lalenu, ngati pakutumbula?”
15Panihapa bhajemalela bha Bhaizilaeli bhakapiti kundelela Falao bhakapwaghaje, “Maghambu kiki utuhengili anana, tepani tabhatumika bhako? 16Bhatumika bhaku ngachetupekewa manyonyoli majomu, hata bhela bhatupwaghila, ‘Mfyatulaje matofali!’ Lingalyaje, tepani bhatumika bhaku tulapulika, nambu lihakau nde la bhandu bhaku wamwete.”
17Nambu Falao akapwaghike, “Mwehapa nde mwakata nde ndandi mpwagha, ‘Utuleka tujenda kumbokela Bambo Chapanga nyambiku.’ 18Bhela, njendanyaje henu, mkahenga lihengo. Nganumpekehi manyonyoli majomu, na papamu na ghanihagha impalika kulenganakela ubhalangiku gholaghola wa matofali.” 19Bhajemalela bha Bhaizilaeli bhakamanyi kubha bhabhili mu mang'ahiku pabhakapwaghakiwi, “Ngacheimpalika kupunguza ubhalangiku wa matofali ghampalika kufyatula kila lichobha.”
20Pabhakabhokiki kwaka Falao, bhakahimangini na Musa na Haluni bhakabhili bhalendalela kuhimangana nabhu. 21Bhakabhapwaghili Musa na Haluni, “Bambo Chapanga na andingalyaje na kuntemula mwehapa. Mtutendiki tuhakaliwaje palongi jaka Falao, na hiongozi bhaki, nanamu mwapekihi ndandi ja kutukoma tepane.”
Musa andalamakila Bambo Chapanga
22Bhela Musa akakelawiki kwaka Bambo Chapanga, akapwaghaje, “Wenga wa Bambo, maghambu kiki waletili mang'ahiku bhandu abhabha? Maghambu kiki undumiki nepane? 23Maghambu kutumbula panakapiti kwaka Falao, na kulongela naku kwa lihina laku, abhapekihi mang'ahiku bhandu abhabha, na wehapa ngacheutendiki chokapi kubhakombola bhandu bhako!”
Currently Selected:
Kubhoka 5: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
