Kubhoka 24

Bhaizilaeli bhabheka lulaghilu na Chapanga

1Bhela Bambo Chapanga akumpwaghi Musa, “Mkwelaje panani ja chitombi changu, wehapa na Haluni, Nadabu na Abihu, papamu na bhazee sabini bha Izilaeli. Munyojabyaje kwa kutali, 2nambu wa Musa kanjika jaku unheghalyaje pambipi jangu nepani Bambo Chapanga, nambu bhajaku ngabhihika pambipi. Na Bhaizilaeli ngabhikwela pachitombi papamu na wehapa.”

3Musa paakapiti kubhapwaghila bhandu mambu ghokapi na shelia yokapi yaka Bambo Chapanga, bhakajetakili kwa sauti jimu, “Kila chindu cheapwaghiki Bambo Chapanga anatuhengaje.” 4Musa akalembiki kila chindu Bambo Chapanga cheakabhi apwaghike. Akajumwiki chilabhu jaki lukela pachibhombu na kuchenga pandu pa kubhokeha nyambiku pachitumbula chitombi na kujemeka nguzu komi na ibheli ya maganga kumanyiha makabila komi na ghabheli gha Izilaeli. 5Bhela Musa akabhatumiki akakombu bha Bhaizilaeli, bhakumbokihaje nyambiku ja kujochakeka na kuchinja mapongu gha ng'ombi kubha nyambiku ja lukwali kwaka Bambo Chapanga. 6Musa akatoliki nusu ja mwahi wa hinyama yela na kuubheka mu mabakuli na nusu jengi ja mwahi akaumichiki panani ja pandu pa kubhokeha nyambiku. 7Panihapa akachitoliki chitabu cha lulaghilu chela na kubhasomela bhandu. Nabhombi bhakayangiki, “Anatutendaje kila chindu cheapwaghiki Bambo Chapanga, na tepani anatukubha bhatii kwaki.”

8Bhela Musa akatoliki mwahi ghola, akamichiki panani ja bhandu, akapwaghaje, “Ghongoni nde mwahi ghoulangiha kubha mwehapa njetakili lulaghilu loatendiki Bambo Chapanga na mwehapa kulengana na malobhi aghagha ghokapi.”

9Panihapa Musa na Haluni, Nadabu na Abihu, papamu na bhazee sabini bha Izilaeli bhakakweliki pachitombi, 10nabhombi bhakumbweni Chapanga wa Izilaeli. Pahi ja magholu ghaki pakabhili na chindu ngati lubhanja lwa maganga gha yakuti samawi, ghaghabhili manyahi ngati lianga moling'anyila. 11Nambu Chapanga ngacheakabhayoningi ihongozi bha Izilaeli habha. Bhakumbweni Chapanga, nabhombi bhakakuliki na kunywa.

Musa pa Chitombi Sinai

12Bambo Chapanga akumpwaghi Musa, “Ukwelaje uhika kwangu kunani kuchitombi na utama pambane, nanatu ananukupekyaje hibau ya maganga, yeibhili na shelia na amuli yenembiki nahuli kubhabhola bhandu.” 13Panihapa Musa akabhokiki papamu na Yoshua, joakabhi anjangatila, najombi Musa akakweliki kunani ku chitombi chaka Chapanga. 14Musa akabhapwaghili bhazee bha Izilaeli, “Mtulendalyaje pambane mbaka patwikelabhukaje kwinu. Haluni na Huli bhabhili papamu na mwehapa, na kila joabhili na lijambu ajendaje kwa bhanihabha.”

15Bhela Musa akakweliki pachitombi cha Sinai, na lihundi likachiyekiki chitombi hechi. 16Na ulumbalilu waka Bambo Chapanga ukabhili panani ja Chitombi cha Sinai. Kwa chikahi cha machobha sita lihundi likachiyekiki chitombi, na lichobha la saba Bambo Chapanga akundohiki Musa kuhuma pachilanda ja lihundi heli. 17Ulumbalilu waka Bambo Chapanga ukabhonakini palongi ja mihu gha bhandu bha Izilaeli ngati moto ghoubhelela panani ja chitombi. 18Musa akajingili mkati ja lihundi lela, paakabhili akwela pachitombi. Akatemi konihoku chikahi cha machobha alobaini, muhi na kilu.

Currently Selected:

Kubhoka 24: MpBV

Highlight

Compare

Copy