Kubhoka 25

Nhupu kwa ndandi ja Lihema Lihuhu

Kubhoka 35:4-9

1Bambo Chapanga akumpwaghi Musa, 2“Ubhapwaghilaje Bhaizilaeli bhanetilaje nhupu. Anyopilaje nhupu yangu kuhuma kwaka mundu jokapi joanaabhohaje kwa mtima wa upalu. 3Unyopilaje nhupu yenjenu, zahabu, madini gha feza na shaba, 4nyuzi ya langi ya buluu, ya zambalau, na ya langi jikeli, papamu na ingobhu jinyahi jihuhu, na ingobhu jejilenganakiki kwa mangoma gha imbuhi, 5ingumba ya mambeleli makambaku yeijeghaliki langi jikeli, na ingumba ya hinyama ya mumachi, mbau ya nkongu ghoulowakeka mshita, 6mahuta gha mzeituni kwa ndandi ja taa, hiungu kwa ndandi ja mahuta gha kupaka, na kwa ndandi ja uvumba ghounungila wichu, 7na maganga gha mbija yamaheli ghaghalowakeka shohamu, na maganga ghangi gha mbija yamaheli kwa ndandi ja mapambu gha chizibau chaka mpenganyambiku na mfuku wa pachihimba. 8Ubhapwaghilaje bhandu bhalenganakyaje lihema lihuhu kwa ndandi jangu, nahuli nepani nhweza kutama pachilanda jabhu. 9Lenganakya lihema heli na hindu yaki kulengana na uwananganu ghonakulangihaje.

Lisanduku la Lulaghilu

Kubhoka 37:1-9

10“Ubhapwaghilaje Bhaizilaeli bhanenganakyaje Lisanduku la mbau ya mshita, lelibhili na ulachu wa sentimita mia moja na komi, upana wa sentimita sitini na sita, na kimu cha sentimita sitini na sita. 11Na wehapa uliyekalyaje lisanduku heli kwa zahabu jinyahi mkati na kunja, na kulenganakela ukengu wa zahabu ipambala yokapi. 12Wilenganakyaje peti nchechi ya zahabu na kuiwatika mu magholu ghaki, kila chigholu peti jimu. 13Panihapa anaulenganakya mipeku jilachu ja mshita na kujiyeka kwa zahabu. 14Wijingihaje mipeku heji mu peti yeibhili ipambala ibheli ya lisanduku nahuli kulitotola. 15Mipeku heji anajihighalyaje mu peti ya lisanduku heli, ngajibhohakeka. 16Mkati ja lisanduku la lulaghilu heli wibhekaje hibau ibheli ya maganga yenakupektaje yeilembakiki amuli yangu.

17“Bhela ulenganakyaje chifuniku chechilowakeka chitehu cha chiha cha zahabu jinyahi, ulachu waki ukubhaje sentimita mia moja na komi, na upana waki sentimita sitini na sita. 18Na ulenganakyaje ulenganesu wa ihumbi ibheli yeibhi na mapapanila yeilowakeka makelubi kwa zahabu jejigholulike, na kughabheka pa ujomukelu ubheli wa chifuniku hechi. 19Ubhekaje kelubi jumu upambala ghumu na jongi upambala ghongi, na ughalombanishaje makelubi hagha kubha chindu chimu na chifuniku cha chiha hechi, jumu akoku na jongi akoku. 20Makelubi hagha ghalingalanyaje, na mapapanilu ghabhu ghahatambuliwaje kunani, na nhwili wabhu uyekalyaje pa chifuniku hechi. Pamihu jabhu pajinamyaje pa chifuniku cha lisanduku heli. 21Mkati ja lisanduku wibhekaje hibau ibheli ya maganga na kuchibheka chifuniku cha chiha panani jaki. 22Nepani ananhimangana na wehapa panihapa, pandu pa chiha pachilanda ja makelubi ghabheli hagha ghaghabhili panani ja chifuniku cha Lisanduku la Lulaghilu, ananongila na wehapa na kukupekeha shelia yangu yokapi kwa ndandi ja Bhaizilaeli.

Meza ja kubhekela mabumunda ghaghabhekakiki palongi jaka Chapanga

Kubhoka 37:10-16

23“Ulenganakya meza kwa mbau ya nkongu wa mshita jejibhili na ulachu wa sentimita semanini na nane, na upana wa sentimita alobaini na ncheche, na kimu cha sentimita sitini na sita. 24Ujiyekaje meza heji kwa zahabu jinyahi na kujiyongoloha na ukengu wa zahabu. 25Bhela ulenganakyaje ukengu wa ubau wa zahabu na kuyongoloha upambala wokapi, ghoubhili na upana wa milimita sabini na nhwanu. 26Lenganakya peti nchechi ya zahabu kwa ndandi ja meza heji, ukongaje mu ipambala nchechi, mu magholu nchechi hagha. 27Peti heyi anaikubhaje pambipi na ukengu ghola wa kujiyongolota meza na anaikubhaje ya kujingakila mipeku ja kujitotulela meza heji. 28Uhongulaje mipeku ja nkongu wa mshita, ujiyekaje zahabu, mipeku heji anajikubhaje ja kutotulela meza heji. 29Lenganakyaje mbali na hikombi ya kubhekela ubani pameza, papamu na bilika na bakuli ya kujeghalela nhupu ya hindu ya kunywa. Lenganakyaje yombu yokapi heyi kwa zahabu jinyahi. 30Panani ja meza ubhekaje mabumunda ghala ghawamokihe. Mabumunda hagha ghahighalyaje panihapa palongi jangu machobha ghokapi.

Chinala cha taa

Kubhoka 37:17-24

31“Lenganakyaje chinala taa kwa zahabu jinyahi. Chitamilu chaki na ufitu wa chindu cha kubhekela taa hechi anaikubhaje chindu chimu, bhelabhela na ingonyu yaki, na lihundwa laki, ilenganaje na malobha ghaki, yokapi anailenganikikaje kwa zahabu na kubha chindu chimu. 32Mambandi sita anaghapitalyaje mu upambala wa ufitu waki, mambandi ghatatu upambala ghumu na mambandi ghatatu upambala ghongi. 33Kila limbandi analikubhaje na ingonyu itatu yeilengana na malobha gha mlozi, kila chimu na lihundwa laki na lilobha laki. 34Mu ufitu hoghu kukubhaje na ingonyu nchechi yeilengana na malobha gha mlozi, papamu na mahundwa ghaki na malobha ghaki. 35Kila pandu paghapitalila mambandi ghabheli pachilanda ja mambandi sita ghala, anapakubhaje na lihundwa limu lelilombanishwi na ufitu wa chindu cha kubhekela taa heji. 36Mahundwa ghanihagha na mambandi ghaki anaghakubhaje chindu chimu na chinala cha taa hechi, na chokapi anachilenganikiwaje kwa zahabu jinyahi. 37Bhela lenganakyaje taa saba ubhekaje panani ja chinala cha taa hechi nahuli iwezaje kumulika palongi jaki. 38Mikasi ja kulenganakela utambi na mbali yake, ikubhaje yeilenganakiki kwa zahabu jinyahi. 39Utumilaje kilu selasini na nhwanu ya zahabu jinyahi, kulenganakela chinala cha taa hechi papamu na hindu yaki yokapi. 40Lingalyaje, ulenganakyaje chindu cha kubhekela taa hechi ngati chelachela monukulangihe pachitombi pala.

Currently Selected:

Kubhoka 25: MpBV

Highlight

Compare

Copy