Kubhoka 28

Ingobhu ya kipenganyambiku

Kubhoka 39:1-7

1“Nanau wa Musa, untola Haluni ndongu waku joaletakiki kwaku kuhuma pachilanda ja Bhaizilaeli, papamu na bhana bhaki, Nadabu na Abihu na Eleazali na Itamali, nahuli bhandumakyaje mu lihengu la upenganyambiku. 2Undokila Haluni mbeli waku ingobhu ihuhu ya kipenganyambiku, nahuli yumpekya lujiniku na utopelu. 3Na wehapa ubhapwaghilaje akafunde bhabhaloka wichu, bhala bhanabhapekihi umanyi, bhundokilaje Haluni ingobhu, nahuli abhohakikaje na kundumakila nepani ngati mpenganyambiku. 4Yenjenu nde ingobhu yeanabhalokaje, chifuku cha pachihimba, chizibau, likanzu, likanzu lelilokakiki wichu, mbumbu na lughoji. Ingobhu heyi anaalokiwaje ndongu waku Haluni na bhana bhaki nahuli bhandumakya nepani ngati bhapenganyambiku. 5Bhalokaje ingobhu ya langi ja buluu, zambalau, na langi ikeli papamu na ingowu jinyahi jihuhu, kwa kutumila uzi wa langi ja zahabu.”

6“Lenganakyaje chizibau cha ingobhu jinyahi jihuhu, uchilenganakyaje kwa langi ja buluu, na zambalau, na langi jikeli, jejilokakiki wichu na fundi kwa kutumila uzi wa langi ja zahabu. 7Chikubhaje na mighoji jibheli ja mumabhegha yeilombaniki pandu pabheli mu makeghi ja chizibau nahuli kukongela chizibahu hechi. 8Lughoji lwa muchibhunu lolulenganakiwi wichu ambalu nde chindu chimu na chizibahu, ulenganakyaje kwa langi ja buluu, na zambalau, na langi jikeli, jejilokakiki wichu na fundi kwa kutumila uzi wa langi ja zahabu. 9Tolaje maganga ghabheli gha shohamu na ulembaje panani jaki mahina komi na ghabheli gha bhana bha Izilaeli, 10mahina sita mu liganga la kutumbula, na mahina sita ghaghahighalili mu liganga la kabheli, mahina ghajengalanyaje kubhokana na kubhelakeka kwabhu. 11Ughalemba mahina gha bhana bha chikambaku bha Izilaeli panani ja maganga ghabheli hagha ngati bhela fundi sonala moahongulela muhuli. Bhela ughabhekaje maganga ghanihagha mu hikamulakilu ya zahabu. 12Maganga ghabheli hagha ghabhekakikaje panani ja mighoji jibheli ja chizibahu ngati ukombukelu wa makabila komi na ghabheli gha Izilaeli. Haluni anawataje mahina ghanihagha mumabhegha ghaki ngati ukombukelu palongi jangu nepani Bambo Chapanga. 13Lenganakyaje hikamulakilu ibheli ya zahabu, 14na mikufu jibheli ja zahabu jinyahi, jejilokakiki ngati ngoji, na ujikongaye mikufu heji mu hikamulakilu.”

Chifuku cha pachihimba

Kubhoka 39:8-21

15“Lenganakyaje chifuku cha pachihimba cha kutemulila, lenganakyaje wichu ngati chizibau chela, uchilenganakyaje kwa nyuzi ja langi ja buluu, na zambalau, na langi jikeli, na ingobhu jinyahi jihuhu, jejilokakiki wichu na fundi kwa kutumila uzi wa langi ja zahabu. 16Chifuku chechikunjakiki hechi, anachikubhaje na ipambala nchechi yeilengana ya sentimita ishilini na ibheli, ulachu waki na upana waki ilenganaje. 17Bhela ubhekaje misitali nchechi ja maganga gha mbija yamaheli. Msitali wa kutumbula ubhekaje maganga gha akiki, topazi na alumasi jikeli. 18Msitali wa kabheli ubhekaje maganga gha zumalidi, yakuti samawi na alumasi. 19Msitali wa katatu ubhekaje maganga gha hiakinto, na akiki jikeli na amesisto. 20Msitali wa kachechi ubhekaje maganga gha zabalajadi, shohamu, na yasipi. Maganga ghanihagha ghokapi ughabhekaje mu hikamulakilu ya zahabu. 21Panihapa anapakubhaje na maganga komi na ghabheli, na kila liganga analikubhaje lilembakiki lihina limu laka mwana jumu waka Izilaeli. Kila lihina lakalembakiki kwa kuchola ngati muhuli, nahuli kughamanyiha makabila komi na ghabheli gha Izilaeli. 22Kwa ndandi ja chifuku cha pachihimba hechi, ulenganakyaje mikufu ja zahabu jinyahi, jejilokakiki ngati ngoji. 23Bhelabhela ulenganakyaje peti ibheli ya zahabu kwa ndandi ja chifuku cha pachihimba na kujibheka mu kona ibheli ya chifuku hechi. 24Ukongaje mikufu jibheli ja zahabu heji mu peti ibheli yela yeibhili mu kona ya chifuku cha pachihimba. 25Ujomukelu ghongi wa mikufu jibheli ja zahabu jela ulombanishaje mighoji heji mu hikamulakilu ibheli yela ya chizibau upambala wa palongi. 26Lenganakyaje peti ibheli ya zahabu wikongaje mu kona ibheli ya pahi upambala wa mkati wa chifuku cha pachihimba pambipi na chizibau. 27Bhela ulenganakyaje peti yengi ibheli ya zahabu na kuijeghela palongi mu kona ya pahi ya hipandi ya chizibau, pandu chizibau pachilombana na ulamba ghoulokakiki kwa unyahi. 28Chifuku cha pachihimba anachikongakikaje pa chizibau kwa kulombanesha peti yaki na chizibau kwa ngoji wa langi ja buluu, nahuli chifuku hechi cha pachihimba ngachileghaleka nambu chitamilaje ulamba ghoulokakiki wichu.”

29“Chikahi chokapi Haluni pajingila Pandu Pahuhu, anawataje pachihimba jaki chizibau chela cha kutemulila chechilembakiki mahina gha makabila gha bhana bha chikambaku bha Izilaeli, kwa kutenda bhenibhela nepani Bambo Chapanga ananabhakombukaje bhandu bhangu mileli. 30Ubhekaje hindu yeilowakeka Ulimu na Sumimu pa chifuku cha pachihimba, ghakubhaje pachihimba chaka Haluni kila pajingila palongi jangu nepani Bambo Chapanga. Bhela machobha ghokapi Haluni anakubhaje na uwezu wa kutenda utemulo muntima waki kwa ndandi ja bhana bha Izilaeli palongi jangu nepani Bambo Chapanga.”

Ingobhu yengi ya kipenganyambiku

Kubhoka 39:22-31

31“Ulokaje likanzu la kuwatila chizibau kwa chitambala cha langi ja buluu pela. 32Pachilanda jaki ubhekaje mbekenyu ja kujingakiha mmutu, na mbekenyu heji jiyongalutwaje na upindo ghoulokakiki nahuli ngalikachuka. 33Pa upindo wa pahi upambaje kwa hindu ngati makomamanga gha langi ja buluu, na zambalau, na gha langi jikeli kuyongolota munkeghi ja likanzu heli, anakukubhaje na mangengecha gha zahabu pachilanda ja makomamanga ghanihagha. 34Komamanga na mangengecha gha zahabu, komamanga na mangengecha gha zahabu, kuliyongolota likanzu lokapi. 35Haluni anaawataje likanzu heli kuhenga lihengu laki la upenganyambiku na sauti ja mangengecha ghanihagha anajijowanikaje chikahi pajingila Pandu Pahuhu palongi jangu nepani Bambo Chapanga, na paapita kunja, nahuli ngayipotela.”

36“Lenganakyaje chibati cha zahabu jinyahi na kulemba panani jaki ngati mundu joabacha muhuli, ‘Mhuhu kwaka Bambo Chapanga.’ 37Chibati hechi anauchikongaje palongi ja mbumbu kwa lughoji lwa langi ja buluu. 38Haluni achiwataje chibati hechi pachibhongi chaki, na kwa chibati chenihechi Haluni anaatolaje mahoku ambaghu Bhaizilaeli bhaweza kubha bhaghahengike mu chikahi cha kumokeha nyambiku jihuhu, nahuli bhajetakaliwaje palongi jangu nepani Bambo Chapanga.”

39“Undenganakyaje Haluni likanzu lelilenganakiki wichu kwa ingobhu jinyahi jihuhu, na undenganakyaje mbumbu kwa ingobhu jinyahi jihuhu na luhunga lolulenganakiki wichu na mshona.”

40“Lenganakyaje makanzu kwa ndandi ja bhana bhaka Haluni, na luhunga na kofia nahuli bhabhonikanaje bhabhili na lujiniku na unyahi. 41Unhwatikaje ndongu waku Haluni na bhana bhaki ingobhu yenjenu, na bhela ubhajeghalaje mahuta gha zeituni, na kubhabheka kwa lihengu lihuhu. Ubhabhekaje palongi jangu nepani Bambo Chapanga nahuli bhanhengilaje lihengu la upenganyambiku. 42Ubhalenganakyaje mabundulo manyahi mahuhu, nahuli kuhyekalela utopu wa hyegha yabhu, kutumbula mu chibhunu mbaka mu mapaja. 43Haluni na bhana bhaki anabhawataje mabundulu ghanihagha kila pabhijingalaje mu Lihema Lihuhu, au pabhiheghalyaje pandu pa kubhokeha nyambiku na kutenda lihengu la upenganyambiku mu Pandu Pahuhu. Kwa indela jeniheji ngabhilangihi utopu wabhu nahuli ngabhikomakeka. Jeniheji anajikubhaje amuli ja mileli kwaka Haluni na hibheleku yaki.

Currently Selected:

Kubhoka 28: MpBV

Highlight

Compare

Copy