Kubhoka 33

Bambo Chapanga abhalaghalakila Bhaizilaeli kubhoka pa Chitombi cha Sinai

1Bhela Bambo Chapanga akumpwaghi Musa, “Haya, ubhokaje pandu panihapa, wehapa papamu na bhandu bhaubhabhohiki kuhuma ku inchi ja Misili, nkwelaje mbaka ku inchi jenakundapile Ibulahimu, Isaka na Yakobo, nakapwaghaje, ‘Ananabhapekyaje bhabhelakeka bhinu inchi jenjeno.’ 2Nepani ananuntumaje mtumika wangu wa kunani andongulyaje, nanatu ananabhatopulaje Bhakanaani, Bhaamoli, Bhahiti, Bhapelizi, Bhahivi na Bhayebusi. 3Njendaje ku inchi jela jejitwelile mahibha na buse. Nambu nepani nganyendi papamu na mwehapa, maghambu mwehapa nde mabhandu mwembili na mitima jejinonwipe, nganihika kunkoma mwindela.”

4Bhandu pabhakajowini malobhi ghanihagha mahakau, bhakatumbwili kuombuleza wala njeta mundu joakawatiki hindu yaki inyahi ya kulipamba. 5Bhakahengiki bhenibhela maghambu Bambo Chapanga akumpwaghi Musa, “Ubhapwaghila Bhaizilaeli, ‘Mwehapa nde mabhandu mwembili na mitima jejinonwipe. Anambiti papamu na mwehapa hata kwa chikahi chijipe, ananunkomaje. Sajenu muhulaje hindu hinu inyahi ya kulipamba, nanatu anamanyaje leananuntendilaje.’ ” 6Bhela Bhaizilaeli bhakahuliki hindu yabhu inyahi ya kulipamba, kutumbula pabhakabhokiki ku Chitombi cha Holebu, yani Sinai.

Lihema Lihuhu

7Bhela Musa akabhili na ntetu wa kulitola lihema na kulijemeka kunja ja likambi patali pachokopi, kokapi kobhakabhekiki likambi, akalilohiki, “Lihema Lihuhu.” Kila mundu joakabhi apala kumanya lijambu lokapi lela kwaka Bambo Chapanga, akapiti ku Lihema Lihuhu kunja ja likambi. 8Kila chikahi Musa paakapitiki kujenda ku Lihema heli, bhandu bhokapi bhakajemiki pundyangu wa mahema ghabhu, na kundingalila Musa mbaka ajingalaje mkati ja Lihema heli. 9Kila chikahi Musa paakajingili mkati ja Lihema heli, nguzu ja lihundi jela jakahelili, na kujema pundyangu wa Lihema, na panihapa Bambo Chapanga akalongili na Musa. 10Kila chikahi bhandu pabhakajiweni nguzu ja lihundi jijemiki pundyangu wa Lihema, bhandu bhokapi bhakajemiki kujojabhela, kila mundu pundyangu wa Lihema laki. 11Bhenibhela nde Bambo Chapanga moakabhelile alongela na Musa pamihu kwa pamihu, ngati mundu moalongalela na nkochi waki. Panihapa Musa akabhili akelabhuka kabheti kulikambi, nambu Yoshua, joakabhi anjangatila, mwana waka Nuni ngacheakabhokiki mu Lihema mola.

Bambo Chapanga alaghila kubha papamu na bhandu bhake

12Musa akumpwaghi Bambo Chapanga, “Lingalyaje, wehapa ukambwaghili, ‘Ubhalonguhaje bhandu abhabha,’ nambu ngacheumbwaghile nde nane joanauntumaje ajangatanaje papamu na nepane. Hata bhela ukapwaghiki, ‘Nukumanyi wehapa kwa lihina lako, nanau upatiki chihomu palongi jango.’ 13Bhela, sajenu nukulobha, ngati anachakaka nepani mbatiki chihomu palongi jaku, unangihaje indela yaku, nahuli mbataje kukumanya, na kujendalela kupata chihomu palongi jako. Ukombukaje kubha litaifa lendenu nde bhandu bhako.”

14Bambo Chapanga akapwaghike, “Nepani namwete ananyendaje papamu na wehapa, nanatu ananukupekyaje chiheko.”

15Bhela, Musa akumpwaghile, “Ngati wehapa ngaujendi papamu na tepani, ngawatubhoha kuhuma pandu pambane. 16Bho, anamanya bhole kubha nepani na bhandu bhaku tupatiki chihomu palongi jako, ngati wehapa ngaujendi papamu na tepane? Bho, chindu bholi chengi chechiwezaje kututenda tepani kulekana nepani na bhandu bhaku bhabhabhile pachilanda ja bhandu bhangi bhokapi bhabhabhile pundema wokapi?”

17Bambo Chapanga akumpwaghi Musa, “Ananukutendilaje lijambu lela leukanobhike, kwa ndandi upatiki chihomu palongi jangu, nanatu nukumanyi kwa lihina lako.”

18Panihapa Musa akapwaghike, “Chonde nukulobha unangihaje ulumbalilu wako.”

19Bambo Chapanga akamuyangiki Musa, “Anambetaje palongi jaku na kukulangiha wamboni wangu wokapi, nanatu ananilitangazaje lihina langu Bambo Chapanga, palongi ja pamihu ghako. Nepani ananundangihaje wamboni wangu mundu jola jombala kundangiha wamboni, na kumbonela chiha mundu jola jombala kumbonela chiha.” 20Panihapa Chapanga akapwaghike, “Ngauwezi kumona pamihu jangu, kwa ndandi njeta mundu jokapi joaweza kumona nepani, na kujendalela kubha mwome.” 21Bhela Bambo Chapanga akumpwaghi Musa, “Lingalyaje, apapa pabhili na pandu pambipi na nepani, uweza kujenda kujema panani ja litalaghu. 22Ulumbalilu wangu pawipetaje, ananukubhekaje mu limbaku mu litalaghu na kukuyekalela kwa chiwoku changu, mbaka panikubhaje nyomwili kupeta. 23Panihapa anamohaje chiwoku changu, nanau anaumonaje kungongu wango, nambu pamihu jangu ngapibhonikane.”

Currently Selected:

Kubhoka 33: MpBV

Highlight

Compare

Copy