Kubhoka 34
34
Hibau yengi yeilembakiki Amuli yaka Chapanga
Kombukombu la Tolati 10:1-5
1Bhela Bambo Chapanga akumpwaghi Musa, “Uhongulaje hibau ibheli ya maganga ngati yela ya kutumbula, nanatu ananembaje panani ja hibau heyi malobhi ghala ghala ghaghakabhili panani ja hibau yela ya kutumbula, yela yewahekite. 2Ubyaje tayali chilabhu lukela, nanau wikwelaje panani ja Chitombi cha Sinai. Wihikaje kuhimangana na nepani kunani ja chitombi. 3Ngayikwela mundu jokapi jola papamu na wehapa, wala ngayibhonikana mundu jokapi jola panani ja chitombi hechi. Wala mambeleli na ng'ombi ngayidimakika pambipi na chitombi hechi.” 4Bhela, Musa akahongwili hibau ibheli ya maganga ngati yela ya kutumbula. Akabhokiki lukela pachibhombu, na kukwela panani ja Chitombi cha Sinai, ngati Bambo Chapanga moakundaghalakile, koni akabyaje na hibau ibheli ya maganga yela mumabhoku ghaki.
5Bhela Bambo Chapanga akahelili mu lihundi na kujema papamu na Musa, na kulitangaza lihina laki, Bambo Chapanga. 6Bambo Chapanga akapetiki palongi jaka Musa, akatangazaje, “Nepani Bambo Chapanga, nepani Bambo Chapanga, nepani nde Chapanga joabhili na chiha na chihomu, ngachealabhalila kubha na inyela, abhili na upalu wamaheli na chakaka, 7nabhabhonela chiha bhandu maelufu elufu, nekakela uhakau wabhu, makosa ghabhu na mahoku ghabhu. Wala ngachenumbalangila mundu muhakau kubha abhili na mahoku. Nabhatemula bhana na bhachokolu bhabhu kwa ndandi ja mahoku ghabhakahengiki akatati na akahokolu bhabhu, hata chibheleku cha katatu na cha kacheche.”
8Palapala Musa akachikimi na kujinamisha mmutu waki mbaka pahi, na kunjojabhela Bambo Chapanga. 9Musa akapwaghike, “Wenga wa Bambo Chapanga, ngati anambatiki chihomu palongi jaku, Bambo Chapanga, nukulobha ujendaje papamu na tepane. Hata ngati bhandu abhabha nde bhandu bhabhabhili na mitima jejinonwipe, utulekakyaje uhakau witu na mahoku ghitu, ututolaje kubha upwelelu wako.”
Lulaghilu luhengakeka kabhete
Kubhoka 23:14-19; Kombukombu la Tolati 7:1-5; 16:1-17
10Bhela Bambo Chapanga akumpwaghi Musa, “Lingalyaje, sajenu ndenda Lulaghilu na bhandu bhokapi. Anandendaje ngangachu ikolongwa palongi jabhu ambayu ngacheihengakiki mu litaifa lokapi lela pundema wokapi. Bhandu bhala bhamtama pachilanda jabhu anabhabhonaje moghabhelile gha kukangacha mahengu ghala ghanunhengilaje nepani Bambo Chapanga winu. Maghambu anandendaje lijambu la kujoghoha kwa ndandi jaku wehapa. 11Mkamulaje Shelia yangu yenumpekeha lalenu. Lingalyaje, palongi jinu ananabhatopulaje Bhaamoli, Bhakanaani, Bhahiti, Bhapelizi, Bhahivi na Bhayebusi. 12Mlilingalyaje ngamwitenda lulaghilu na bhenei bhabhatama mu inchi jela jemujijendela, maghambu leniheli analikubhaje chimbenda pachilanda jino. 13Nambu ubhombulaje pandu pabhu pa kubhokeha nyambiku, na kuitunyulana nguzu yabhu ya maganga gha kujojabhela, uhekatanaje ichapanga yabhu ya Ashela.
14“Ngamwanjojabhela chapanga jongi, kwa kubha nepani Bambo Chapanga, manyikana kwa lihina, ‘Joabhi na Wihu,’ nepani nde Chapanga nemili na wihu. 15Mlilingalyaje ngamwitenda majetanganelu na bhenei bha inchi jeniheji, maghambu bhandu pabhajenda kutenda ukemi na kuibhokeha nyambiku ichapanga yabhu, bhandu anabhundohaje, nanamu anamkulaje nhupu yabhu. 16Anamubhatoghukili akakombu bhinu kwa akakamwali bhabhu, na akakamwali bhabhu anabhapiti kuhenga ukemi na ichapanga yabhu, anabhalonguhaje bhana bhinu bha chikambaku kuijengalela ichapanga yabhu.
17“Ngamwalilenganakela ichapanga ya upuhi ya choma cha kuyeyusha.
18“Muhengaje Uwangalalu wa Mabumunda Ghangakujeghaleka Amila. Kwa machobha saba anamkulaje mabumunda ghangakujeghaleka amila, ngati monundaghalakile. Muhengaje bhenibhela kwa chikahi chela chenundaghalakile, mu mwehi wa Abibu, yani mwehi wa kachechi, kwa kubha mu mwehi ghonihoghu wa Abibu, mwehapa nukumbohiki kuhuma mu inchi ja Misili.
19“Kila mbelakeka wa kutumbula wa chikambaku nde wangu nepani, papamu na bhabhelakeka bhaku bha kutumbula bha chikambaku bha hinyama yaku yokapi, bhabhelakeka bha kutumbula bha ng'ombi, mambeleli na imbuhi. 20Mbelakeka wa kutumbula wa liponda munkombulaje kwa kumokeha nepani mwanambeleli. Nambu ngati ngachempala kulikombola, mtunyulaje hingu jaki. Bhelabhela anamubhakombulaje bhabhelakeka bhinu bha kutumbula bha chikambaku.
“Mundu jokapi ngayihika palongi jangu mabhoku matopu.
21“Mtendaje mahengu ghinu machobha sita, nambu lichobha la saba nde mpomulyaje. Hata ngati anachibhili chikahi cha kulema mighonda, na chikahi cha kuhuna mahunu, impalika mpomulyaje.
22“Mtendaje Uwangalalu wa Majuma, najombi nde ja mahunu gha kutumbula gha ingano, na mtendaje Uwangalalu wa Kubhongana mahunu mu ujomukelu wa chaka.
23“Mala patatu kwa chaka akanalomi bhokapi anabhalibhonganaje palongi jangu nepani Bambo Chapanga, Chapanga wa Izilaeli. 24Kwa kubha nepani ananaghatopulaje mataifa palongi jinu, na kujonjukela malindakanilu gha inchi jinu, wala njeta mundu jokapi joanatokulyaje inchi jinu, chikahi panjenda kunyojabhela palongi jangu nepani Bambo Chapanga, Chapanga winu mala patatu kwa kila chaka.
25“Ngamwimokeha mwahi wa nyambiku papamu na libumunda lelijeghaliki amila, wala ngamwihighakila nyambiku ja Uwangalalu wa Pasaka heji mbaka lukela.
26“Uletaje mahunu gha kutumbula ghaghabhili manyahi nakanope gha mighonda jinu, na kughaleta mkati ja nyumba jangu nepani Bambo Chapanga, Chapanga waku.
“Ngawitutuha mwanambuhi mu mahibha ghaka mabhu waki.”
27Panihapa Bambo Chapanga akumpwaghi Musa, “Ulembaje malobhi ghangane, maghambu kubhokana na malobhi ghangani, nepani ndendiki Lulaghilu na wehapa, papamu na bhandu bha Izilaeli.” 28Musa akatemi konihoku papamu na Bambo Chapanga kwa machobha alobaini ikilu na muhi panga kula, wala kunywa machi. Najombi akalembiki panani ya hibau malobhi gha Lulaghilu, na Amuli Komi yela.
Musa ahelela kuhuma ku Chitombi Sinai
29Musa paakahelili kuhuma ku Chitombi Sinai koni akabya na hibau ibheli ya Amuli yela mu mabhoku ghaki, ngacheakamanyi kubha pamihu jaki pakabhi pang'anya, maghambu akabhi alongela na Bambo Chapanga. 30Bhela Haluni na Bhaizilaeli bhokapi pabhakumbweni Musa, kubha ngozi ja pamihu paki patenda pang'anya, bhakajowipi kunheghalela. 31Nambu Musa akundohiki Haluni na hiongozi bhokapi bha uhimanganu wa Bhaizilaeli bhajendaje pambipi jake, najombi Musa akatehi kulongela nabhu. 32Palongi Bhaizilaeli bhokapi bhakunheghalile, najombi akabhapekihi Amuli yokapi ambayu Bambo Chapanga akumpekihi pa Chitombi cha Sinai. 33Musa paakajomwili kulongela na bhandu, akayekalili pamihu jaki kwa chitambala chechinang'ana. 34Nambu kila chikahi Musa paakapiti kulongela na Bambo Chapanga mu Lihema leli, akachibhohiki chitambala hechi mbaka paapitikaje kunja. Paakabhili ajomwili kupita kunja akabhapwaghi Bhaizilaeli mambu ghokapi ghaakalaghalakiwe, 35nabhombi Bhaizilaeli bhakaweni pamihu jaka Musa pang'anya. Panihapa Musa akayekalili kabheti pamihu jaki kwa chitambala hechi, mbaka paakapiti kulongela na Bambo Chapanga.
Currently Selected:
Kubhoka 34: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
