Kubhoka 39

Kulenganakela ingobhu ya bhapenganyambiku

Kubhoka 28:1-14

1Bhakatumili uzi wa langi ya buluu, zambalau, na jikeli kulenganakela ingobhu ya kuwata chikahi cha kutumika mu Lihema Lihuhu. Bhelabhela bhakundokili Haluni ingobhu ihuhu, ngati Bambo Chapanga moakundaghalakili Musa.

2Akalenganakili chizibau cha ingobhu jinyahi jihuhu, akachilenganakili kwa langi ja buluu, zambalau, na langi jikeli, jejilokakiki wichu. 3Bhakajipondiki kwa nyundu ipandi ipepandau ya zahabu na kulenganakela uzi upepandau nahuli kuloka papamu na uzi wa langi ja buluu, zambalau, jikeli na ingobhu jinyahi jihuhu, jejakalokakiki wichu. 4Chakabhili na mighoji jibheli ja mumabhegha yeyalombaniki pandu pabheli mu makeghi gha chizibau nahuli kukongela chizibahu hechi. 5Bhakalenganakili lughoji lwa muchibhunu lolulenganakiwi wichu ambalu lukabhili chindu chimu na chizibahu, akachilenganakili kwa langi ja buluu, zambalau, na langi jikeli, jejilokakiki wichu ngati Bambi Chapanga moakundaghalakili Musa. 6Bhela bhakatoliki maganga ghabheli gha shohamu na bhakalembiki panani jaki mahina komi na ghabheli gha makabila komi na ghabheli gha Izilaeli, ngati muhuli moulembakeka. 7Bhela bhakabhekiki maganga ghabheli hagha panani ja mighoji jibheli ja chizibahu ngati ukombukelu wa makabila komi na ghabheli gha Izilaeli, ngati Bambo moakundaghalakili Musa.

Kulenganakela chifuku cha pachihimba

Kubhoka 28:15-30

8Bhela akalenganakili chifuku cha pachihimba, akalenganakili wichu ngati chizibau chela, akachilenganakili kwa langi ja buluu, zambalau, na langi jikeli, na ingobhu jinyahi jihuhu, jejilokakiki wichu. 9Bhela chifuku hechi chakatehi kukunjakika, na chakabhili na ipambala ncheche yeilengana, ulachu waki chakabhili sentimita ishilini na ibheli, na upana waki chakabhili sentimita ishilini na ibheli. 10Bhela akabhekiki misitali nchechi ja maganga gha mbija yamaheli. Msitali wa kutumbula akabhekiki maganga gha akiki, topazi na alumasi jikeli. 11Msitali wa kabheli ukabhili na maganga gha zumalidi, yakuti samawi na alumasi. 12Msitali wa katatu ukabhili na maganga gha hiakinto, na akiki jikeli na ametisto. 13Msitali wa kachechi ukabhili na maganga gha zabalajadi, shohamu, na yasipi. Maganga ghanihagha ghokapi akaghabhekiki mu hikamulakilu ya zahabu. 14Bhela, kukabhili na maganga komi na ghabheli, na kila liganga lakabhili lilembakiki lihina limu laka mwana jumu wa likabila la Izilaeli. Kila lihina lakalembakiki kwa kuchola ngati muhuli, nahuli kughamanyiha makabila komi na ghabheli gha Izilaeli. 15Kwa ndandi ja chifuku cha pachihimba hechi, bhakachilenganakili mikufu ja zahabu jinyahi, jejilokakiki ngati ngoji. 16Bhelabhela bhakalenganakili peti ibheli ya zahabu na kuibheka kwa ndandi ja chifuku cha pachihimba na kujibheka mu kona ibheli ya chifuku hechi. 17Bhakajikongiki mikufu jibheli ja zahabu heji mu peti ibheli yela yeibhili mu kona ya chifuku cha pachihimba. 18Na kona ibheli ya mikufu ja zahabu bhakalombanishi mighoji heji mu hikamulakilu ibheli yela ya chizibau upambala wa palongi. 19Bhakalenganakili peti ibheli ya zahabu na kuikonga mu kona ibheli ya pahi upambala wa mkati wa chifuku cha pachihimba pambipi na chizibau. 20Bhela bhakalenganakili peti yengi ibheli ya zahabu na kubheka palongi mu kona ya pahi ja hipandi ya chizibau, pandu chizibau pachilombana na ulamba ghoulokakiki kwa unyahi. 21Chifuku cha pachihimba akachikongiki pa chizibau kwa kulombanesha peti yaki na peti ya chizibau kwa ngoji wa langi ja buluu, nahuli chifuku hechi cha pachihimba ngachileghaleka nambu chitamilaje ulamba ghoulokakiki wichu, ngati Bambo Chapanga moakundaghalakili Musa.

Kulenganakela ingobhu yengi ya kuwata mpenganyambiku

Kubhoka 28:31-43

22Bhela Bezaleli akalenganakili likanzu la kuwatila chizibau kwa chitambala cha langi ja buluu pena. 23Pachilanda ja likanzu heli akabhekiki mbekenyu ja kujingakiha mmutu, na mbekenyu heji jakayongalitwi na upindo ghoulokakiki nahuli ngalikachuka. 24Pa upindo wa pahi akapambiki mapambu gha makomamanga gha langi ja buluu, na zambalau, na ya langi jikeli, na ingobhu jinyahi jihuhu jejilokakiki wichu, kuyongolota munkeghi ja likanzu heli. 25Panihapa bhakalenganakili mangengecha gha zahabu jinyahi na kughabheka kuyongolota upindo wa pahi pachilanda ja makomamanga. 26Mangengecha ghanihagha na makomamanga yakajengalanili kwa kuuyongolota upindu wa likanzu nahuli liwatakikaje kwa lihengu, ngati Bambo Chapanga moakandaghalakili Musa.

27Bhelabhela bhakundenganakili Haluni na bhana bhaki makanzu majipi gha ingobhu jinyahi jihuhu, 28na mbumbu ja ingobhu jinyahi jihuhu, kofia ja ingobhu jinyahi jihuhu, mabundulu manyahi mahuhu gha mkati, ghaghalokakiki wichu, 29na luhunga lukabhili lwa ingobhu jinyahi jihuhu jejalokakiki wichu kwa langi ya buluu, zambalau, na jikeli, kwa lihengu laka fundi joaloka wichu, ngati Bambo Chapanga moakundaghalakili Musa. 30Bhela bhakalenganakili chibati cha zahabu jinyahi na kulemba panani jaki ngati mundu joabacha muhuli, “Mhuhu kwaka Bambo Chapanga.” 31Bhakachikongiki chibati hechi palongi ja mbumbu kwa uzi wa langi ja buluu, ngati Bambo moakundaghalakili Musa.

Kujomoka kwa lihengu

Kubhoka 35:10-19

32Bhela, lihengu lokapi la kulenganakela Lihema Lihuhu lakajomwike. Bhaizilaeli bhakahengiki ghokapi ngati Bambo Chapanga moakundaghalakili Musa. 33Nabhombi bhakundetili Musa Lihema Lihuhu, chiyekalelu chaki, hikamulakilu, mbau yaki, na fitu yaki, mapali na hitamilu yaki, 34na chiyekalelu cha ingumba ya mambeleli makambaku yeijeghaliki langi jikeli, na chiyekalelu cha hinyama ya mumachi, na lipazila la Lihema Lihuhu, 35na Lisanduku la Lulaghilu papamu na mipeku jaki, na chifuniku chaki chechibhili na pandu pa chiha, 36na meza papamu na yombu yaki yokapi na mabumunda ghaghabhohakiki kwaka Bambo Chapanga, 37na chinala cha taa cha zahabu jinyahi, na taa yaki papamu na mahuta kwa ndandi ja taa heyi, 38na lisanduku la zahabu la kuhukila ubani, mahuta gha kujitaliwa, ubani ghounungila wichu, na lipazia la pundyangu wa Lihema, 39na lisanduku la shaba na waya waki wa shaba, mipeku jaki na yombu yaki yokapi, liteleku na chitamilu chaki, 40na mapazia gha liwangala papamu na mapali ghaki na hitamilu yaki, lipazia kwa ndandi ja ndyangu wa liwangala na ngoji waki, na hingingi yaki, na hindu yokapi yeyapalakike kutumika mu Lihema Lihuhu, 41na ingobhu yokapi yeyalokakiki wichu kwa ndandi ja lihengu la Pandu Pahuhu, ingobhu ihuhu yaka mpenganyambiku Haluni, na ingobhu ya bhana bhaki kwa ndandi ja lihengu la upenganyambiku. 42Bhaizilaeli bhakahengiki kila chindu ngati Bambo Chapanga moakundaghalakili Musa. 43Musa akakaghulili lihengu na kubhona kubha bhakabhili bhatendiki kila chindu wichu, ngati Bambo Chapanga moakabhili alaghalakile. Bhela Musa akabhapengalile.

Currently Selected:

Kubhoka 39: MpBV

Highlight

Compare

Copy