Kubhoka 40

Lihema Lihuhu lichengakeka na kubhekakeka palongi jaka Bambo Chapanga

1Bhela Bambo Chapanga akumpwaghi Musa, 2“Mu lichobha la kutumbula la mwehi wa kutumbula, ulichengaje Lihema Lihuhu la kuhimanganila. 3Ubhekaje Lisanduku la Lulaghilu mkati ja Lihema heli na kulihibhalakila kwa lipazia. 4Panihapa ujingihaje meza na kupanga yombu yaki panani. Ujingihaje chinala cha taa chela, na kujibheka taa panani jaki. 5Lisanduku la zahabu la kuhukila ubani ulibhekaje palongi ja Lisanduku la Lulaghilu, na kubheka lipazia pundyangu wa Lihema Lihuhu. 6Ubhekaje lisanduku la kujochela nyambiku hechi palongi ja ndyangu wa Lihema Lihuhu. 7Panihapa ulibhekaye liteleku la shaba, pachilanda ja Lihema Lihuhu na chihanja cha nyambiku ja kujochakeka, na ubhekaje machi mkati jaki. 8Uchengaje liwangala kuyongolota Lihema lokapi na ubhekaje lipazia pundyangu wa liwangala.

9“Utolaje mahuta gha zeituni, na ulipakaje Lihema laka Chapanga papamu na kila chindu chechibhili mkati jaki, ibhekaje palongi jaka Bambo Chapanga papamu na hindu yokapi yeibhili mkati jaki, nalombi analikubha lihuhu. 10Panihapa ulipakaje mahuta lisanduku la kujochela nyambiku heli papamu na hindu yaki yokapi, ulibhekaje palongi jaka Bambo Chapanga, nalombi lisanduku heli analikubha lihuhu namaa. 11Bhelabhela liteleku la shaba na chitamilu chaki uibhekaje palongi jaka Bambo Chapanga, na kulitenda kubha lihuhu.

12“Bhela undetaje Haluni na bhana bhaki pundyangu wa Lihema Lihuhu, na ubhagholulaje kwa machi ngati moibhapalakila. 13Panihapa unhwatikaje Haluni ingobhu ihuhu, na wehapa unjeghalaje mahuta, na kumbeka akubha mhuhu, nahuli apata kundumakila nepani ngati mpenganyambiku. 14Ubhalohaje bhana bhaka Haluni na kubhawatika makanzu ghanihagha. 15Nanau ubhajeghalaje mahuta ngati moukunjeghalili tati wabhu, nahuli bhanhengilaje lihengu la upenganyambiku. Kujeghalewa mahuta hoku anakubhatendaje bhakubhaje bhapenganyambiku mileli kwa hibheleku yabhu yokapi.”

16Bhela, Musa akatendi ghanihagha ghokapi wichu, ngati Bambo Chapanga moakundaghalakile. 17Mu lichobha la kutumbula la mwehi wa kutumbula chaka cha kabheli baada ja kubhoka ku Misili, Lihema Lihuhu lakachengakike. 18Musa akalichengiki Lihema, akabhekiki hitamilu yaki, akajemiki mapali ghaki na kujingiha fitu yaki, na kughajemeka mapali ghaki. 19Akayekalili lipazia panani ja Lihema Lihuhu na kubheka chifuniku cha Lihema panani jaki, ngati Bambo Chapanga moakundaghalakile. 20Bhela akatoliki hibau ibheli ya maganga yela na kuibheka mkati ja Lisanduku la Lulaghilu lela, akabhekiki mipeku ja kutotulela lisanduku, na akabhekiki chifuniku cha chiha panani ja lisanduku heli. 21Panihapa Musa akaletiki Lisanduku la Lulaghilu na kulibheka mkati ja Lihema Lihuhu, na kubheka lipazia kulihibhalila Lisanduku la Lulaghilu heli, ngati Bambo Chapanga moakundaghalakili Musa.

22Bhela Musa akabhekiki meza mkati ja Lihema Lihuhu, upambala wa kungondi wa Lihema kunja ja lipazia, 23na panani jaki akabhekiki mabumunda ghaghabhohakiki kwaka Bambo Chapanga, ngati Bambo Chapanga moakundaghalaki Musa. 24Akachibhekiki chinala cha taa mkati ja Lihema Lihuhu kulingalanila na meza upambala wa kunkachi wa Lihema. 25Bhela akapambakili taa yaki palongi jaka Bambo Chapanga, ngati Bambo Chapanga moakundaghalakili Musa. 26Bhela Musa akabhekiki lisanduku la zahabu la kuhukila ubani mkati ja Lihema Lihuhu palongi ja lipazia, 27na kulihukila ubani ghounungila wichu, ngati Bambo Chapanga moakundaghalakili Musa. 28Panihapa akabhekiki lipazia pundyangu wa Lihema Lihuhu. 29Musa akabhekiki lisanduku la nyambiku ja kujochakeka pundyangu wa Lihema Lihuhu, akabhohiki nyambiku ja kujochakeka panani jaki, na nhupu ya uhembi, ngati Bambo Chapanga moakundaghalaki Musa. 30Akabhekiki liteleku la shaba pachilanda ja Lihema Lihuhu na lisanduku la nyambiku ja kujochakeka, na kubheka machi mkati jaki. 31Musa na Haluni, na bhana bhaki bhokapi bhakachambiki mabhoku na magholu ghabhu kwa machi ghanihagha. 32Kila pabhajingalaje mkati ja Lihema Lihuhu au pabhakabhili bhajenda pa lisanduku la kubhokeha nyambiku ja kujochakeka lela, bhakachambiki machi, ngati Bambo Chapanga moakundaghalaki Musa. 33Bhela Musa akalenganakili liwangala kuliyongolota Lihema Lihuhu na lisanduku la kubhokeha nyambiku ja kujochakeka, na kubheka lipazia pundyangu wa liwangala. Bhela Musa akajomwili lihengu heli lokapi.

Lihundi panani ja Lihema Lihuhu

Hesabu 9:15-23

34Bhela lihundi lela lakayekalili Lihema Lihuhu, na ulumbalilu waka Bambo Chapanga ukatwelili mu Lihema. 35Musa akalepalili kujingila mkati ja Lihema Lihuhu kwa ndandi lihundi heli lakatemi panani ja Lihema heli, na ulumbalilu waka Bambo Chapanga ukatwelili mu Lihema. 36Mu mwanja wokapi wa Bhaizilaeli, chikahi lihundi palakatumbwili kujinuliwa kuhuma panani ja Lihema, nabhombi bhandu bha Izilaeli bhakajendalili na mwanja wabhu. 37Ngati lihundi heli ngachelajinuliwi, nabhombi Bhaizilaeli ngachebhakatumbwi mwanja, bhakalendalili mbaka chikahi lihundi heli palajinuliwe. 38Kwa ndandi lihundi laka Bambo Chapanga lela lakabhili panani ja Lihema chikahi cha muhi, na kukabhili na moto mkati ja lihundi chikahi cha ikilu, palongi ja bhandu bha Izilaeli mu mwanja wabhu wokapi.

Currently Selected:

Kubhoka 40: MpBV

Highlight

Compare

Copy