Kubhoka 7
7
1Bhela Bambo Chapanga akumpwaghi Musa, “Lingalyaje, nukutendiki kubha ngati Chapanga kwaka Falao, najombi Haluni mbeli waku anakubhaje mlota wako. 2Umpwaghilaje Haluni kila chindu chenukulaghalakile, najombi Haluni mbeli waku anaampwaghilaje Falao abhalekakyaje Bhaizilaeli bhabhokaje mu inchi jaki. 3Nambu ananutendaje mtima waka Falao kubha wa kunonopa, na hata ngati ananyonjukili nginyulila na ngangachu mu inchi ja ku Misili, 4nambu Falao ngaanjowaneli mwehapa. Nanatu anamekaje chiwoku chechibhi na makili na kujilapula inchi ja Misili, na kubhapiha bhandu bhangu, Bhaizilaeli, bhabhokaje mu inchi ja Misili kwa utemulu ukolongwa. 5Chikahi panihatambula chiwoku changu Bhamisili anabhamanyaje kubha nepani nde Bambo Chapanga, na kubhapiha Bhaizilaeli bhapita monihomu.” 6Musa na Haluni bhakatendiki ngati Bambo Chapanga moakabhalaghalakile. 7Musa akabhi na hyaka semanini, na Haluni akabhi na hyaka semanini na itatu chikahi pabhakalongili na Falao.
Ndonga jaka Haluni
8Bambo Chapanga akumpwaghili Musa na Haluni, 9“Ngati Falao anaampwaghili, ‘Mtenda ngangachu,’ panihapa umpwaghila Haluni, ‘Tola ndonga jaku na ujilekalaje pahi palongi jaka Falao,’ najombi ndonga heji anajing'anambukaje na kubha lijoka.” 10Panihapa Musa na Haluni bhakapiti kwaka Falao na kutenda ngati mobhakalaghalakiwi na Bambo Chapanga. Haluni akajilekili ndonga jela pahi palongi jaka Falao na bhatumika bhaki, najombi jakabhi lijoka. 11Bhela Falao najombi akabhalohiki bhabhabhili na mbulau na bhahabhi na bhaganga bha ku Misili, nabhombi bhakatendiki bhelabhela kwa uhabhi wabhu. 12Kila jumu akajilekili ndonga jaki pahi, nayombi yakang'anambwiki kubha lijoka. Nambu ndonga jaka Haluni jakaimiliki ndonga yabhu. 13Hata bhela mtima waka Falao ukajendalili kubha wa kunonopa namaa, najombi ngacheanjowanile Musa na Haluni, ngati Bambo Chapanga moakapwaghile.
Lilapuliku la kutumbula: Machi ghang'anambuka kubha mwahi
14Bhela Bambo Chapanga akumpwaghi Musa, “Mtima waka Falao utehi kunonopa, akana kubhalekakela Bhaizilaeli bhabhokaje. 15Henu ujendaje ukahimangana na Falao chilabhu lukela, chikahi payijenda kunkoka Naili. Undendalyaje munkeghi ja nkoka. Utotulaje ndonga jela jejang'anambwiki kubha lijoka jela mu chiwoku chaku. 16Bhela umpwaghila Falao, ‘Bambo Chapanga, Chapanga wa Bhaebulania, andumiki nukupwaghilaje: Ubhalekaje bhandu bhangu bhajendaje, nahuli bhapata kunyojabhela kuchingwenje. Nambu mbaka sajenu ngacheunyowanela. 17Haleli nde leapwagha Bambo Chapanga: Kwa lijambu aleli anaumanyaje kubha nepani nde Bambo Chapanga. Lingalyaje, ananaghalapulaje machi gha nkoka Naili kwa ndonga jenjenu, na machi ghokapi anaghang'anambukaje kubha mwahi. 18Homba yeibhi mu nkoka Naili anaikuwaje, na nkoka hoghu anaunungaje chihakau, na Bhamisili ngabhiwezi kunywa machi ghaki.’ ”
19Bambo Chapanga akumpwaghi Musa, “Umpwaghila Haluni, ‘Utola ndonga jaku jela uhatambula chiwoku chaku panani ja machi gha Misili, na panani ja mikoka jokapi, panani ja mikolulela, panani ja hilibha na panani ja matanda ghokapi, nayombi anaikubha mwahi. Anakubya na mwahi inchi jokapi ja ku Misili, mbaka mu yombu ya mikongu na ihulu ya lutopi.’ ”
20Musa na Haluni bhakatendiki ngati Bambo Chapanga moakalaghalakile. Haluni akajukwihi ndonga jaki kunani palongi jaka Falao na bhatumika bhaki na kughalapula machi gha nkoka Naili, na machi ghokapi ghakang'anambwiki kubha mwahi. 21Homba yeyakabhi mu nkoka Naili yakahwile, na machi ghakanungiki chihakau namaa mbaka Bhamisili ngachebhakaweziki kunywa machi ghaki. Mwahi ukabhi kila pandu mu inchi ja ku Misili. 22Nambu bhahabhi bha ku Misili kwa kutumila uhabhi wabhu bhakahengiki bhelabhela, na mtima waka Falao ukabhi unonwipe, ngacheabhajowanile Musa na Haluni, ngati bhela Bambo Chapanga moakapwaghile. 23Bhela, Falao akakelawiki na kujenda mu nyumba jaki, na mambu ghokapi ghaghapitalili hagha ngacheaghabhekiki muntima waki. 24Bhamisili bhokapi bhakahembikihembiki munkeghi ja nkoka Naili nahuli bhapata machi gha kunywa, kwa ndandi ngachebhaweziki kunywa machi gha nkoka hoghu.
25Ghakapetiki machobha saba kutumbula Bambo Chapanga paakaghalapwi machi gha nkoka Naili.
Currently Selected:
Kubhoka 7: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
