Kubhoka Ulongulelo
Ulongulelo
Chitabu cha Kubhoka chijendalela kulongalela Histolia jejatumbwile mu chitabu cha Utumbulilu chechakabhili chilongalela lukolu lwaka Ibulahimu. Lilobhi Kutoka lelitafusiliwi ngati Kubhoka lilandila kihengu cha bhandu bha Izilaeli kulemangana kuhuma mu utumwa wa Misili na kukelabhuka mu inchi ambaju Chapanga akabhili andaghili kumpekeha Ibulahimu. Kulengana na majopalelu, bhasomi bhahobhalela kubha pandu pakolongwa pa chitabu chenu chakalembakiki na mlota Musa, na lijambu lenu lilandiwa na chitabu chenu. Chitabu cha Utumbulilu 24:4, chilandila ntundu Musa moakalembile pandu pakumu pa chitabu chenu. Mu chifungu cha chitabu chaka Yoshua 8:31, chiloghola amuli jejibhili mu Sula 20:25, na kupwagha, “Ngati moilembakike mu chitabu cha tolati jaka Musa.” Mu itabu ya Lulaghilu Lwahenu iloghola mala pamaheli na kukelabhukila kulemba mambu ghaghakalembakiki na Musa, kwa ulenganesu mu chitabu chaka Mako 12:26 kubhili na malobhi ghaghalongalela chitutu chechibhelela moto panga kutinyika. Malobhi ghani ghakalembakiki mkati ja “Chitabu chaka Musa” (Mako 12:26). Chilandila kubha chitendu cha bhana bha Izilaeli kubhoka mu inchi ja Misili chakapitalili pachilanda ja hyaka 1,300 au 1,400 K. K. (Mangani jaka Kristo). Mu chitabu cha 1 Bhakolongwa 6:1, chihobhaleka kubha chitendu cha kubhoka chakahengakiki ngati hyaka ya 480, mangani ja chaka cha kachechi cha utawala waka Solomoni ngati nkolongwa wa Izilaeli.
Chitabu cha Kubhoka chibhoha msisitizu wa ntundu ambau Chapanga moakahengile nahuli kukamulakila ulongwana waki panani ja chilanga cheakundaghile Ibulahimu, Isaka na Yakobo. Chitabu chilandila kubhokana na matendu makolongwa gha ukombola waka Chapanga kwa bhana bhaka Ibulahimu ambabhu nde bhandu bha Izilaeli, pabhakabhili bhabhoka mu inchi ja Misili (Sula 1-12). Kuhuma konihoku Chapanga akabhalongwihi bhandu bhaki mbaka mu uwanda ghoukabhili pahi ja chitombi cha Sinai, pandu ambapu Chapanga akumpekihi Musa shelia yamaheli nahuli Bhaizilaeli bhaijengalyaje (Sula 12-19). Shelia ayeyi ilandila ntundu moibhapalakila kutenda, ntundu moibhapalakila kubhoha nyambiku (nhupu), na malaghalakilu gha kuchenga Lihema Lihuhu (pandu ambapu pakapaliki kubha matamu ghaka Chapanga pachilanda jabhu), bhelabhela Lisanduku la Lulaghilu na hindu yengi ya kuhengela lihengu la kujojabhela mkati ja Lihema Lihuhu, na ingobhu ya kipenganyambiku (Sula 20-31). Bhela, baada ja kihengu cha kuasi kwa bhana bha Izilaeli kwa kulilenganakela chimong'umong'u cha ng'ombi ja zahabu, Musa akahimangini na Chapanga kabhete baada ja kuasi hoku (Sula 32-33). Mu pandu pa kujomukela pa chitabu chenu, tusoma ntundu hindu heyi yeyatumiki kwa ndandi ja kunjojabhela Chapanga moyalenganakike (Sula 33-40).
Ghaghabhihomu
Maelezu gha bhana bha Izilaeli ntundu mobhajeghalakile mu utumwa mu inchi ja Misili (Sula 1).
Malobhi ghaka Musa kutumbula umwana waki mbaka pala paakalowakiki kubhakombola bhandu bhaka Chapanga (Sula 2-4).
Bhela mlemba wa chitabu alandila ntundu Chapanga moakahengile ngangachu na kujilapula inchi ja Misili kwa malapuliku makolongwa kwa lengu la kubhakombola bhandu bhaki kuhuma mu inchi jenijela, na bhelabhela mu ujoghuheku wa manjolinjoli ghaka Falao (Sula 5-15:21).
Kuhuma panihapa bhandu bha Izilaeli bhakatendiki mwanja na kuhika pandu pa chitombi cha Sinai (Sula 15-19:22).
Tusoma ntundu Chapanga moakumpekihe Tolati Musa, shelia jejakabhili na maelezu gha mkati ghaghalandili ntundu bhandu bhaka Chapanga, Bhaizialeli, moaibhapalakile kutama na kujojabhela (Sula 20-31).
Tusoma ntundu bhana bha Izilaeli mobhakahengile uasi kwaka Chapanga, pala pabhakundobhiki mbeli waka Musa joakalowakiki Haluni abhalenganakyaje chimong'umong'u chechabhili na liumbu la ng'ombi ja zahabu (Sula ja 32).
Tusoma ntundu Musa moakaubhonile ulumbalilu au ung'anyi waka Chapanga, na kubhabhola Bhaizilaeli shelia yaka Chapanga, papamu na kubhaelekeza ntundu wa kulenganakela Lihema Lihuhu, Lisanduku la Lulaghilu na hindu yengi ya kujojabhela yeitumika mu Lihema Lihuhu, na ingobhu yeipalika kuwatakika na bhapenganyambiku (Sula 33-40).
Currently Selected:
Kubhoka Ulongulelo: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.