Utumbulilu 11
11
Mnala wa Babeli
1Kutumbula, bhandu bhokapi bha pundema bhakabhi na lugha jimu na bhakatumili malobhi ghalaghala. 2Bhela, chikahi bhandu pabhakabhi bhajenda ku upambala wa kolipita lyobha, bhakajiweni inchi jejibhi na uwanda mu inchi ja Shinali, bhakatami konihoku. 3Bhakapwaghanile, “Haya! Na tulenganakya matofale tukaghajocha kwa moto.” Bhakabhi na matofale pandu pa maganga, na lami pandu pa chokaa. 4Bhela bhakapwaghike, “Haya! Na tulichengila muchi na mnala ambau kunani ja mnala hoghu anakuhika mbaka kunani kumahunde, nahuli tumanyikanaje, ngatwihika kupechangana pundema pokapi.”
5Panihapa Bambo Chapanga akahelili nahuli abhonaje muchi na mnala ghobhakabhi bhauchenga bhandu. 6Bambo Chapanga akapwaghike, “Lingalya, bhandu abhabha nde bhamu, na lugha jabhu nde jimu, na aghagha nde ghabhatumbula kughahenga, wala sajenu ngabhahibhalakiki lilobhi lokapi lebhaholalela kulihenga. 7Haya, na tuhelala konihoku, tukabhachanganya lugha jabhu nahuli ngabhijongana malobhi bheni kwa bheni.” 8Bhela, Bambo Chapanga akabhapechangini kuhuma konihoku bhajendaje pundema pokapi, nabhombi bhakakotwiki kuuchenga muchi ghola. 9Bhenibhela nde ndandi muchi ghonihoghu ukalowakiki Babeli, maghambu panihapa nde Bambo Chapanga paakajichanginyi lugha ja ndema wokapi. Na kuhuma konihoku Bambo Chapanga akabhapechangini bhandu bhajendaje pundema wokapi.
Bhabhelakeka bhaka Shemu
1 Mambu gha Chikahi 1:24-27
10Hayeyi nde ibheleku yaka Shemu. Hyaka ibheli kutumbu pajajomwiki ghalika, Shemu paakabhi na hyaka mia jimu, akumbeliki Alifakisadi. 11Paakumbeliki Alifakisadi, Shemu akatami hyaka yengi mia nhwanu na kupata bhana bhangi bha chikambaku na bha chimbomba.
12Alifakisadi akatami hyaka semanini na nhwanu, na kumbeleka Sela. 13Paakumbeliki Sela, Alifakisadi akatami hyaka yengi mia ncheche na jitatu na kupata bhana bhangi bha chikambaku na bha chimbomba.
14Sela akatami hyaka selasini, na kumbeleka Ebeli. 15Paakumbeliki Ebeli, Sela akatami hyaka yengi mia nchechi na jitatu na kupata bhana bhangi bha chikambaku na bha chimbomba.
16Ebeli akatami hyaka selasini na ncheche, na kumbeleka Pelegi. 17Paakumbeliki Pelegi, Ebeli akatami hyaka mia nchechi na selasini na kupata bhana bhangi bha chikambaku na bha chimbomba.
18Pelegi akatami hyaka selasini, na kumbeleka Leu. 19Paakumbeliki Leu, Pelegi akatami hyaka yengi mia ibheli na tisa na kupata bhana bhangi bha chikambaku na bha chimbomba.
20Leu akatami hyaka selasini na ibheli, na kumbeleka Selugi. 21Paakumbeliki Selugi, Leu akatami hyaka yengi mia ibheli na saba na kupata bhana bhangi bha chikambaku na bha chimbomba.
22Selugi akatami hyaka selasini, na kumbeleka Naholi. 23Paakumbeliki Naholi, Selugi akatami hyaka yengi mia ibheli na kupata bhana bhangi bha chikambaku na bha chimbomba.
24Naholi akatami hyaka ishilini na tisa, na kumbeleka Tela. 25Paakumbeliki Tela, Naholi akatami hyaka yengi mia jimu komi na tisa na kupata bhana bhangi bha chikambaku na bha chimbomba.
26Tela akatami hyaka sabini, na kubhabheleka Abulamu, Naholi na Halani.
Bhabhelakeka bhaka Tela
27Hayeyi nde ibheleku yaka Tela. Tela akabhabheliki Abulamu, Naholi na Halani. Halani akumbeliki Lutu. 28Halani akapotili chikahi Tela tati waki paakabhi atama ku inchi jeakabhelakike, yani mu inchi ja Ulu ja Bhakalidayo. 29Abulamu na Naholi bhakatowile. Nhwanu waka Abulamu akalowakiki Salai, na lihina laka nhwanu waka Naholi akalowakiki Milika, mwali waka Halani, joakabhi tati waka Milika na Isika. 30Salai akabhi ngulumba, ngacheakabhi na mwana.
31Tela akuntoliki Abulamu mwana waki, Lutu nchokolu waki, joakabhi mwana waka Halani, na Salai nkowanu waki, na nhwanu waka Abulamu mwana waki, bhakabhokiki bhokapi kuhuma mu inchi ja Ulu ja Bhakalidayo, na kujenda ku inchi ja Kanaani. Nambu pabhakahikiki ku inchi ja Halani, bhakatami panihapa. 32Tela akapotili ku inchi ja Halani, chikahi paakabhi na hyaka mia ibheli na nhwanu.
Currently Selected:
Utumbulilu 11: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
