Utumbulilu 19
19
Mahoku gha bhandu bha ku Sodoma
1Bhatumika bha kunani kumahundi bhabheli bhala bhakahikiki ku muchi wa Sodoma chikahi cha pakamihe. Na Lutu akabhi atami pundyangu wa kujingalila mu muchi wa Sodoma. Chikahi paakabhaweni, akabhokiki kujenda kubhajopalela na kuchikama na jinama mbaka pahi. 2Lutu akapwaghike, “Bambo bhangu, chondi nunjopa njingalaje munyumba jaka mtumika winu. Muweza kuchamba magholu ghinu na kughonela pambani na lukela pachibhombu kujendalela na mwanja wino.”
Nambu bhombi bhakayangike, “Ngabhela, tepani anatughonila palubhanja pani ikilu jokapi.”
3Nambu Lutu akabhapembalaki namaa, nabhombi bhakapiti na kujingila munyumba jake. Lutu akabhaandali chilebhi, akabhatelaki mabumunda ghangakujeghaleka amila, na bhakakulike.
4Nambu mangani ja kujenda kughonela, bhandu bhokapi kuhuma mu muchi wa Sodoma, bhakajiyongalwiti nyumba jaka Lutu, akakombu kwa bhazee, bhandu bhabhakahumiki ku ipambala yokapi. 5Bhakundohiki Lutu bhakapwaghaje, “Bho, bhabhi kwako bhandu bhala bhabhahikiki kwako ikilu jeno? Ubhapiha kwitu, nahuli tughonila nabhu kihyegha.”
6Lutu akapitiki kunja kubhonana nabhu, na kujighila ndyangu kunyuma jake. 7Lutu akapwaghike, “Ngabhela, bhakochi bhangu, ngamwihenga lijambu aleli lihakau. 8Lingalya, nepani mi na akamwali bhabheli ambabhu ngachebhalabhali kughonela na mwanalomi kihyegha. Nunjopa nyetakalya nabhapiha kwino, nanamu muweza kubhahengela lijambu lokapi lemulipala. Nambu ngamwihenga lijambu lokapi lela kwa bhandu abhabha, maghambu bhombi nde bhagheni bhango.”
9Nambu bhombi bhakayangike, “Ubhoka pambane! Wehapa ungeni pa muchi ghongone. Ngacheikupalika kutupwaghila tepani chetupalika kuchihenga. Ulilingalyaje, maghambu tuweza kukuhengela wehapa mahakau kupeta bhombe.” Panihapa bhakunkangiki Lutu kunyuma na kujendalela kulongi nahuli kubhombola ndyango. 10Nambu bhandu bhabheli bhabhakabhi munyumba bhala bhakahowi ndyandu na kuhatambula mabhoku ghabhu, na kumhutila Lutu mkati na kujighila ndyango. 11Panihapa bhakabhalapwi bhandu bhabhakabhi pundyango bhala kwa ungalola, bhachoku kwa bhakolongwa, hata bhakang'ahakiki kuulonda ndyango, na kulepalela kuubhona.
Lutu abhoka ku Sodoma
12Bhandu bhabheli bhala bhakumpwaghi Lutu, “Bho, ubhi na mundu jongi nakanopi pambane? Ngati, akaakowanu bhaku, akakombu bhaku, akakamwali bhaku au mundu jongi jokapi jola mu muchi ghongone? Ubhabhohaje mu muchi ghongone, 13maghambu tepani anatupayonanga pandu pambane. Chilelu kwaka Bambo Chapanga kwa ndandi ja bhandu bha pambane nde chikolongwa nakanope, najombi Bambo atutumiki tupayonangaje.”
14Bhela, Lutu akapiti kulongela na akaakowanu bhaki, bhabhakabhi bhabhoki chilipa bhana bhaki bha chimbomba, akapwaghaje, “Ntendaje manyata mbokanyaje pandu pambane, maghambu Bambo anauyonangaje muchi ghongone.” Nambu bhombi bhakaholaki kubha Lutu ahenga utane.
15Pakwahiki lukela pachibhombu, bhatumika bha kunani kumahundi bhala bhakunjomalaki Lutu, bhakapwaghaje, “Ubhokaje, untola nhwanu waku, na akakamwali bhaku bhabheli bhabhabhi pambane, nanga bhela anauyonangikaje chikahi muchi ghongoni pawiyonangikaje.” 16Lutu paakabhi akabhakila, bhandu bhala bhakunkamwi Lutu chiwoku, na chiwoku chaka nhwanu waki, na mabhoku gha bhana bhaki bhabheli bha chimbomba, na kubhalongoha lukwale kunja ja muchi, maghambu Bambo akabhabhoni chiha namaa. 17Pabhakajomwi kubhapiha kunja ja muchi, mtumika jumu wabhu wa kunani kumahunde akabhapwaghile, “Ntilaje kwa lukwale lwinu! Ngamwilinga kunyumba, wala ngamwijema pandu pokapi mu libondi. Ntililaje kuitombi, nanga bhela anamyonangikaje.”
18Nambu Lutu akabhayangike, “Ngabhela, chondi akabambo ngamwihenge bhenibhela. 19Lingalya, mtumika winu mmonili chiha palongi ja mihu ghinu, nanamu ndangihi wamboni ukolongwa kwangu nepane kwa kukengalela matamu ghango. Nambu ngachenhweza kutilila kuchitombi, lijambu aleli analimbataje, nanatu anambotilaje. 20Lingalya, kola kubhi na muchi uchoku ambau nhweza kutilila konihoku maghambu ubhi pambipe. Nyetakalyaje ndilila konihoku, nawombi nde muchi uchoku namaa, mbona uchoku pela? Konihoku nhweza kulama.”
21Mtumika wa kunani kumahundi jola akumpwaghile, “Ena, nyetakile lilobhu lako. Nganauyonangi muchi hoghu ghoupwaghike. 22Nambu ujombatikaje, utilila konihoku manyata, maghambu ngachenhweza kuhenga lijambu lokapi lela mbaka pawihika ku muchi ghonihogho.” Nde ndandi muchi ghonihogho ukalowakiki Soali.
Kuyonangeka kwa Sodoma na Gomola
23Chikahi lyobha palakabhi lipita, Lutu akabhi ahikiki ku muchi wa Soali. 24Panihapa Bambo akajitendiki ihula ja moto ukali na maganga woujaka wa bhaluti kutonya panani ja Sodoma na Gomola, kuhuma kunani kwaka Bambo. 25Bhela, akajiyoningi michi jeniheji na libondi lokapi, papamu na bhandu bhokapi bhabhatamika mu muchi ghonihogho, na kila chindu chechameliki mu michi jeniheje. 26Nambu paakabhi mwindela nhwanu waka Lutu akang'anambwiki kunyuma, na akabhi nguzu ja mwinyo.
27Lukela pachibhombo mu lichobha lelijengalyaje, Ibulahimu akapiti pandu paakabhi ajemike palongi jaka Bambo. 28Akalingalili upambala wa ku Sodoma na Gomola, na pandu pokapi pa libondi, akaweni lyohi likolongwa lakakwelaje kuhuma pa inchi, lyohi ngati la mvuni ukolongwa. 29Chapanga paakajiyoningi michi ja kulibondi koakabhi atama Lutu, akunkombwiki Ibulahimu kwa kumboha Lutu kuhuma mu michi jeniheji, nahuli Lutu ngaiyonangeka papamu naju.
Kutumbula kwa Bhaamoli na Bhamoabu
30Lutu na akakamwali bhaki bhabheli bhakabhokiki ku Soali na kujenda kutama kuchitombi, maghambu akajowipi kutama ku muchi wa Soali. Akatami mu limbako, jombi papamu na akakamwali bhaki bhabheli. 31Lichobha limu mwali waki nkolongwa akumpwaghi nchoku jola, “Atati witu asejike, na njeta mwanalomi jongi pandu pambane joanahimangana na tepani kihyegha, ngati moubheli ntetu wa pandu pokapi pundema. 32Haya, tunkenga atati witu divai, ikale na tughonila naku, nahuli kulenda lubheleku lwitu kupetela atati witu.” 33Ikilu jela bhakunkengiki atati wabhu divai ikale, paakalobhile mwali waki nkolongwa akajingili na kughonela na atati waki. Nambu atati waki ngacheakamanyi chikahi mwali waki paakajingili kughonela naku wala paakabhokike.
34Lichobha lelijengalyaje, mwali waki wa kutumbula akumpwaghi nchoku jola, “Lichu ikilu nepani nakaghonili na atati wangu, lalenu tunkenga divai ikalekabhete, na ikilu jenu nanau ukajingalaje na kughonela naku, nahuli tuwezaje kulenda lubheleku lwitu kupetela atati witu.” 35Bhakunkengiki kabhete atati wabhu divai ikale ikilu jela, na mwali waki nchoku akajingile na kughonela naku. Nambu atati wabhu ngacheakamanyi chikahi mwali waki paakaghoni naku, wala paakabhokike. 36Bhela, akakamwali bhokapi bhaka Lutu bhakapatiki itumbo kupetela kwa atati wabhu. 37Mwali waki wa kutumbula akumbeliki mwana wa chikambaku, akundohiki Moabu. Jonihoju nde atati wa Bhamoabu, mbaka laleno. 38Mwali waki nchoku najombi akumbeliki mwana wa chikambaku, akundohiki lihina Benami. Jonihoju nde atati wa Bhaamoni, mbaka laleno.
Currently Selected:
Utumbulilu 19: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
