Utumbulilu 20
20
Ibulahimu na Abimeleki
1Kuhuma ku Mamile, Ibulahimu akapiti ku upambala wa Negebu, na kutenda matamu ghaki pachilanda ja Kadeshi na Shuli. Na kwa chikahi chijipi akapiti kutama ku muchi wa Gelali ngati ngeni. 2Ibulahimu paakabhi konihoko, akapwaghiki panani jaka nhwanu waki Sala kubha nde ndombu waki. Bhela, Abimeleki nkolongwa wa ku Gelali akabhatumiki bhandu bhakundeta Sala, najombi akuntolike. 3Nambu Chapanga akunhiki Abimeleki ikilu na kumpwaghila, “Wehapa anaupotilaje kwa ndandi jaka mbomba jountolike, maghambu jombi nde nhwanu waka mundu.”
4Chikahi chenihechi Abimeleki akabhi akali ngacheaghoni na Sala, bhela, akayangike, “Bambo, bho, anauliyonanga le bhandu bhangakubha na mahakau? 5Bho, ngacheakambwaghi mweni kubha ajoju nde ndombu waki? Kabhete hata Sala najombi akapwaghiki kubha Ibulahimu nde mbeli waki? Nepani nhengiki aghagha kwa ulongwana wangu, na kwa wamboni wangu.”
6Bhela, Chapanga akamuyangiki mu mabhono, “Ena, manyi kubha ughahengiki aghagha kwa mtima wambone, nanatu nukuhibhalili ngawihenga lihoku. Nde ndandi ngachenukulekiki ugonalaje naku. 7Henu unkelabhua nhwanu waka mundu, maghambu nde mlota, najombi anaakulobhila wehapa, nahuli upata kubha wamwome. Nambu nangakunkelabhua, umanya kubha chakaka anaupotilaje wehapa papamu na bhandu bhaku bhokapi.”
8Mu lichobha lelijengalyaje, Abimeleki akajumwiki lukela pachibhombu, akabhalohiki bhatumika bhaki bhokapi, na kubhapwaghila malobhi ghanihagha ghokapi ghaghapitalile mu ndotu, na bhandu bhanihabha bhakajowipi namaa. 9Panihapa Abimeleki akundohiki Ibulahimu, na kumpwaghila, “Bho, utendiki kike? Nepani nukuhengiki kiki wehapa hata ukaletiki lihoku likolongwa anana kwangu nepani na ukolongwa wangu? Unhengili mambu ambaghu ngacheghapalika kuhengakeka. 10Abimeleki akumpwaghi kabhete Ibulahimu, ‘Bho, chindu bhole chechukutendiki mbaka ukahengiki bhenibhela?’ ”
11Ibulahimu akapwaghike, “Nakahengiki bhenibhela maghambu nikaholalili kubha njeta bhandu bhabhabhi na choghohi na Chapanga pandu pambane, nabhombi anabhangomaje kwa ndandi jaka nhwanu wangu. 12Papamu na ghanihagha, chakaka jombi nde ndombu wangu. Tati waki na tati wangu nde jumo, nambu mawu kutalikutali, nde ndandi abhi nhwanu wangu. 13Chikahi Bambo Chapanga paakandendiki mokaje kutali na nyumba ja atati wangu, nakumpwaghile, ‘Anana nde mowilangihaje upalu waku kwangu nepani: Kila pandu patwijendaje, chondi wipwaghaje kubha ajoju nde mbeli wangu.’ ”
14Bhela, Abimeleki akatoliki mambelele, na ng'ombi, na bhatumwa bha chikambaku na bha chimbomba, na kumpekeha Ibulahimu na kunkelabhua Sala kwaka ndomi waki Ibulahimu. 15Abimeleki akapwaghike, “Inchi jangu jibhi palongi jaku, utamaje pandu pokapi paupala.” 16Na akumpwaghi Sala, “Lingalya, numpekeha mbeli waku ipandi elufu jimu ya madini gha feza nahuli kubhalangiha bhokapi bhabhabhi papamu na wehapa kubha ngacheubhi na lihakau palongi ja bhandu bhokapi.” 17Ibulahimu akundobhiki Chapanga, najombi Chapanga akundamihi Abimeleki, na nhwanu waki, na bhatumika bhaki bha chimbomba, nahuli bhaweza kupata bhana kabhete, 18maghambu Bambo akabhi aghakongike matumbu gha bhakambomba bha munyumba jaka Abimeleki nahuli ngabhibheleka bhana, kwa ndandi akuntoliki Sala nhwanu waka Ibulahimu.
Currently Selected:
Utumbulilu 20: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
