Utumbulilu 21
21
Kubhelakeka kwaka Isaka
1Bambo Chapanga akunkombwiki Sala ngati moakapwaghile, na Bambo akunhengi ngati moakapwaghile. 2Sala akapatiki chitumbu, na akumbelakili Ibulahimu mwana wa chikambaku mu useja waki, mu chikahi chela chela cheakapwaghiki Bambo. 3Ibulahimu akundohiki mwana joakumbeliki Sala jola lihina laki Isaka. 4Isaka paakabhi na machobha nane, Ibulahimu akunhekiti jando ngati Chapanga moakundaghalakile. 5Ibulahimu akabhi na hyaka mia moja chikahi paakumbeliki mwana waki Isaka. 6Sala akapwaghike, “Chapanga anetili chiheko, na kila mundu joanajowanaje lijambu lenu anahekaje papamu na nepani.” 7Kabhete akajonjuki kupwagha, “Bho, nde nane joakumpwaghila Ibulahimu kubha Sala anaajongiha bhana? Kwa ndandi numbelaki mwana mu useja wake.”
8Mwana akakoliki na kulekeshwa kujonga, na mu lichobha lekalekishwi kujonga, Ibulahimu akahengi uwangalalu ukolongwa.
Kutopuleka kwaka Hajili na Ishimaeli
9Nambu Sala akumbweni Ishimaeli mwana waka Hajili mundu waku Mmisili ambaju akumbelaki Ibulahimu, andongama Isaka. 10Panihapa Sala akumpwaghi Ibulahimu, “Untopulya kutali mbomba ajoju mtumwa na mwana wake. Maghambu mwana waka mbomba mtumwa ngaipweleli papamu na mwana wangu, nepani Isaka ng'o.” 11Lijambu aleli lakumbiniki namaa Ibulahimu mtima, maghambu Ishimaeli najombi akabhi mwana wake. 12Nambu Chapanga akumpwaghi Ibulahimu, “Ngawakubhina mtima kwa ndandi jaka mwana wako na mtumika waku wa chimbomba. Ujowanyaje kila lilobhi leakupwaghi Sala, maghambu lubheleku lwaku analupitalyaje kupetela Isaka ngati monakakuleghili. 13Ananuntenda mwana ajoju waka mtumika waku wa chimbomba kubha na bhandu bhamaheli, maghambu najombi nde lubheleku lwaku.”
14Bhela, Ibulahimu akajumwiki lukela pachibhombu, akatoliki libumunda na nteku wa machi, na kumpekeha Hajili. Akuntwekiki Hajili mumabhegha ghaki, na kubhatopola papamu na mwana waki. Hajili akatumbwi mwanja, na kupotokapotoka mu lipololu la Beel Sheba. 15Chikahi machi paghajomwiki mu nteku mola, Hajili akungoniki mwana waki pahi ja chitutu. 16Panihapa akapiti kutama cha patali, ngati utali wa mita mia moja, na kulipwaghila, “Ngachenhweza kundingalila mwana wangu paapotela.” Na paakabhi atami panipala, mbomba jola akajamalili na kulela.
17Chapanga akunjowini mwana jola akalelaje, mtumika wa kunani waka Chapanga akundohiki Hajili kuhuma kunani kumahundi na kumpwaghila, “Bho, kubhi na kyane, Hajili? Ngawijoghopa, maghambu Chapanga ajowini sauti jaka nkombu waku akabya aghoni pala. 18Ujumukaje, na unjumuhaje nkombu waku, maghambu ananuntenda kubha tati bha inchi ngolongwa.” 19Panihapa Chapanga akamuyekwi Hajili mihu ghaki, najombi akaweni chilibha cha machi. Bhela akapiti kutwelakela nteku waki wa machi na kumpekeha nkombu waki akunywaje. 20Chapanga akabhi papamu na nkombu jonihoju paakabhi ajendale kukola. Nkombu hoju akabhi atama kulipololu, na ahoma wichu namaa mshali. 21Chikahi nkombu paakabhi atama kulipololu la Palani, mabhu waki akuntoghuki mbomba kuhuma ku Misili.
Majonganu pachilanda jaka Ibulahimu na Abimeleki
22Chikahi chenihechi Abimeleki na Fikoli nkolongwa wa manjolinjoli ghaki bhakumpwaghi Ibulahimu, “Chapanga abhi papamu na wehapa mu kila chindu cheuchihenga. 23Bhela sajenu unapilaje kwaka Chapanga kubha ngawitendi mambu ja kungoloha nepani, wala bhana bhangu, wala bhachokolu bhangu. Undendila nepani na inchi ambaju utama ngati ungeni wamboni ghola ghola ambau nepani nukuhengile.”
24Ibulahimu akapwaghike, “Ena napa.”
25Palapala Ibulahimu akang'ong'utiki kwaka Abimeleki kubhokana na chilibha cha machi ambachu bhatumika bhaka Abimeleki bhakabhi bhachinyaghwile. 26Abimeleki akapwaghike, “Nepani ngachemanyi joahengiki lijambu lenihele. Wala wehapa ngachewambwaghile, lalenu pela nde panyowana lijambu lendeno.” 27Ibulahimu akatoliki mambelele na ng'ombi na kumpekeha Abimeleki, na bhabheli habha bhakatendiki majonganu. 28Ibulahimu akabhekiki bhanambelele saba bha chimbomba kanjika jabhu. 29Na Abimeleki akumpwaghi Ibulahimu, “Bho, bhanambelele saba abhabha, bhaubhabhekiki pakanjika jabhu, ndandi jaki kike?”
30Ibulahimu akayangike, “Utolaje bhanambelele saba bha chimbomba abhabha ghanikupekeha nepani, ngati ulandilu kubha chilibha achechi nakahembiki nepani.” 31Bhela pandu panihapa akapalohiki Beel Sheba, maghambu bhandu bhabheli habha bhakalapiki panihapa.
32Panihapa bhakatendiki majonganu ku Beel Sheba hoku. Abimeleki na Fikoli, nkolongwa wa manjolinjoli bhaki, bhakabhokiki kukelabhuka ku inchi ja Bhafilisti. 33Ibulahimu akapandiki nkongu wa nkwachu ku Beel Sheba hoku, na panihapa akalilohiki lihina laka Bambo, Chapanga wa mileli. 34Najombi Ibulahimu akatami ku inchi ja Bhafilisti kwa chikahi chilachu.
Currently Selected:
Utumbulilu 21: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
