Utumbulilu 24
24
Isaka antoghola Labeka
1Bhela Ibulahimu akabhi asejike na akabhi na hyaka yamaheli, na Bambo Chapanga ampengalile mu kila chindu. 2Lichobha limu Ibulahimu akumpwaghi mtumika waki nkolongwa wa kujemalela hindu yokapi ya munyumba jaki, “Chondi ubheka chibhoku chaku pahi ja lipaja lango. 3Mbala ulapaje kwaka Bambo Chapanga wa kunani na Chapanga wa ndema, kubha ngawantoleli mwana wangu mbomba wa kuntoghola kuhuma kwa akakamwali bha Bhakanaani, ambabhu ndama nabhu pachilanda jabhu. 4Nambu wijendaje ku inchi jangu, na bhalongu bhangu, na ukuntolila mwana wangu Isaka mbomba wa kuntoghola.” 5Mtumika jola akundaluki Ibulahimu, “Anakubhi, mbomba hoju anaakaniki kuhika papamu na nepani mu inchi jenjeno? Bho, nampelaka le mwana waku ku inchi jaku kouhumile?” 6Ibulahimu akayangike, “Ngabhela! Ngawankelabhua mwana wangu konihoko. 7Bambo Chapanga wa kunani, joakamohiki munyumba ja atati wangu na inchi jangu jenabhelakiki na joakalongi na nepani na kunaghila kwa kulapa, akapwaghaje, ‘Ananabhapekya bhana bhaku inchi jenjeno,’ anaabhatuma bhatumika bhaki bha kunani bhakulongulyaje nahuli undetilaje mwana wangu mbomba wa kuntoghola kuhuma konihoko. 8Ngati mbomba jonihoju anaakaniki kulongana na wehapa, bhela anaubhopuliwaje kuhuma mu kulapa kwango. Nambu ngawankelabhua mwana wangu konihoko.” 9Bhela mtumika hoju akabhekiki chiwoku chaki pahi ja lipaja laka Ibulahimu bambo waki, na kundapila kubhokana na lijambu lenihele.
10Panihapa mtumika hoju akatoliki ngamia komi pachilanda ja ngamia yaka bambo waki na kubhoka, akatoliki kila ntundu wa nhupu inyahi kuhuma kwaka bambo waki. Akapiti mbaka ku Mesopotamia, mbaka ku muchi wa Naholi. 11Paakahikiki konihoku, akaitendiki ngamia yela kuchikama pambipi na chilibha cha machi kunja ja muchi chikahi cha pakamihe, chikahi ambachu akambomba bhajenda kuteka machi. 12Bhela akalobhike, “Wenga wa Bambo Chapanga, Chapanga waka bambo wangu Ibulahimu, nukulobha unyangatyaje kuweza laleno, na undangiha chiha bambo wangu Ibulahimu. 13Nyemiki pambane pambipi na chilibha chenjenu cha machi, na akakamwali bha bhandu bha muchi ghongoni bhahika kuteka machi. 14Bhela na kubya ana, mwali jola jonampwaghilaje, ‘Chondi uheliya chihulu chaku mbata kunywa machi.’ Najombi anaapwaghiki, ‘Kunywaje, na kuikenga ngamia yangu bhelabhela,’ jonihoju nde abyaje mbomba jounhawile kwa ndandi jaka mtumika waku Isaka. Na kwa lijambu aleli anamanya kubha umboni chiha bambo wangu.”
15Kukabhi mangani ja kujomola kulongela, lingalya, Lebeka akapitalile, mwali waka Besueli, mwana waka Milika, nhwanu waka Naholi, ndongu waka Ibulahimu, akahikiki koni atotwi chihuli palibhegha laki. 16Mwali hoju akabhi mnyahi namaa kwa sula jaki, na akabhi bikila ambaju ngachealabhalili kughonela na mwanalomi kihyegha. Akahelili kuchilibha, akatwelakili machi chihulu chaki, na kukwela kabhete. 17Panihapa mtumika jola akajombatiki kuhimangana naku na kumpwaghila, “Chondi umbekya machi machokopi kuhuma mu chihulu chaku ngunywaje.”
18Mwali jola akapwaghike, “Kunywaje, nkolongwa wango.” Akahulwi manyata chihulu mumabhoku ghaki na kumpekeha akunywaje. 19Paakajomwi kumpekeha mtumika jola machi, akumpwaghile, “Anandeka machi ghangi kwa ndandi ja ngamia yaku bhelabhela mbaka yokapi itupilaje.” 20Bhela, kamwali jola akatendiki manyata kupongola machi jajakabhili mu chihulu jala na kupongulela mu liteleku la kukengela hinyama, na kukembela kujenda kuchilibha kuteka machi ghangi na kuikenga ngamia yaki yokapi. 21Mundu jola akabhi andingalakila namaa panga kulongela chindu chokapi, nahuli amanyaje ngati Bambo auwezishi mwanja waki, au ngabhela.
22Chikahi ngamia payatupili kunywa machi, mundu jola akatoliki hibangili ya zahabu na kumpekeha mwali jola, kutopa kwa hibangili heji kukabhi ngati gilamu sita, na bangili ibheli ya zahabu ya gilamu komi kila jimu. 23Mtumika jola akalalukile, “Chondi umbwaghilaje, bho, wehapa wa mwali waka nane? Bho, kubhi le na pandu mu nyumba ja atati waku patuweza kutama kwa chikahi?”
24Mwali jola akayangike, “Nepani nde mwali waka Besueli, mwana waka Milika joakumbelakile Naholi.” 25Akajendali kupwagha, “Kunyumba jitu kubhi na manyonyoli ghamaheli na pandu pa kulekeha hinyama, kabhete kubhi na pandu pa kutama bhaghene.”
26Panihapa mtumika jola akachikimi na kunjojabhela Bambo Chapanga. 27Akapwaghaje, “Alumbalikaje Bambo Chapanga, Chapanga waka bambo wangu Ibulahimu, ambaju ngacheakabhohiki wamboni waki na ulongwana waki kwaka bambo wangu. Nepani nanatu, Bambo unongwihi mu mwanja wangu na kunhikisha kunyumba ja bhalongu bhaka bambo wangu.”
28Bhela, mwali jola akakembili imbelu, na kubhapwaghila bhandu bha munyumba ja mabhu waki kubhokana na mambu ghanihagha ghokapi. 29Lebeka akabhi na mbeli waki joakalowakiki Labani. Labani akabhokiki imbelu na kujenda kuhimangana na mtumika jola kuchilibha. 30Labani akabhi ajiweni bangili ja muimbunu jela na bangili mumabhoku ghaka ndombu waki, na kujowana mambu ambaghu Lebeka akapwaghakiki na mundu jola. Labani akunhimani mundu jola ajemiki pambipi na ngamia yaki pambipi na chilibha. 31Labani akumpwaghile, “Uhikaje kunyumba wenga weupengaliki na Bambo, bho, maghambu kiki ujema kunja hoko? Nepani nukuandali wichu nyumba na pandu pangi kwa ndandi ja ngamia yako.”
32Panihapa mtumika jola akapiti kunyumba kujitamakaje Labani. Na bhatumika bhaka Labani bhakabhohiki ibwahila panani ja ngamia na kuipekeha ngamia manyonyoli, na kubhapekeha jombi na bhandu bhaki machi gha kuchamba magholo. 33Bhela, bhatumika bhaka Labani bhakundeti chilebhe, nambu jombi akapwaghike, “Nepani nganguli chilebhe mbaka nongila hoti malobhi ghango.”
Labani akumpwaghile, “Haya upwaghaje.”
34Mtumika jola akapwaghike, “Nepani nde mtumika waka Ibulahimu.” 35“Bambo Chapanga ampengalili namaa bambo wangu Ibulahimu, najombi abhi mundu mwana hindu yamaheli. Ampekihi mambelele na ng'ombi, madini gha feza na zahabu, bhatumika bha chikambaku na bha chimbomba, ngamia na maponda. 36Sala nhwanu waka bambo wangu Ibulahimu ambelakili mwana wa chikambaku mu useja wake, najombi ampekihi kila chindu cheabhi nachu. 37Bhela, bambo wangu atehi kunapisha na kupwagha, ‘Ngawantolela mwana wangu mbomba kubha nhwanu waki pachilanda ja akakamwali bha Bhakanaani ambabhu nepani ndama mu inchi jabhu. 38Nambu ujendaje mbaka kunyumba ja atati wangu, na kwa bhalongu bhangu, ukuntolila mwana wangu nhwanu waki.’ 39Panihapa nakumpwaghi bambo wangu, ‘Bho, ngati mbomba hoju anaakaniki kuhika papamu na nepani?’ 40Nambu jombi akambwaghile, ‘Bambo Chapanga ambaju jonitii machubha jokapi, anaabhatuma bhatumika bhaki bha kunani kumahunde bhakubha papamu na wehapa nahuli kukulongoha na kukujangatila nahuli mwanja waku ubya unyahi, nahuli uwezaje kupata mbomba kwa ndandi jaka mwana wangu mu lukolu lwangu na kuhuma mu bhalongu bha atati wangu. 41Ngati anauhikiti kwa bhandu bhangu na bhakalepalili kukupekeha kamwali hoju, ngaulekakewi mu kulapa kwagu.’
42“Panahikiki kuchilibha lalenu, nakalobhike, ‘Wenga wa Bambo Chapanga, Chapanga waka bambo wangu Ibulahimu, chondi unyangatyaje mu mwanja wangu ghonhikile. 43Lingalyaje, nyemiki pambani pambipi na chilibha cha machi. Bhela, na kubya ana, mwali joanahikaje kuteka machi, nanatu ananumpwaghili umbekya machi machokopi gha kunywa kuhuma mu chihulu chaku.’ 44Najombi ngati anaambwaghi, ‘Kunywa machi, nanatu ananitekila machi ngamia yaku, jonihoju nde abya nhwanu wangu ambaju wehapa wa Bambo Chapanga, unihaulile mwana bhambo wangu.’ 45Panakabhi nakali ngakujomola kulobha muntima wangu, Lebeka akapitalili, koni atotwi chihuli mumabegha ghaki. Akahelili kuchilibha na kuteka machi, nanatu nakumpwaghile, ‘Chondi umbekya machi ngunywaje.’ 46Akajombatiki kuheleya chihulu chaki pahi, na kupwagha, ‘Kunywaje, na ngamia yaku ananikenga bhela bhela.’ Bhela nepani nakakunywiki na ngamia yangu nayombi akaipeki machi. 47Nepani nakundalukile, ‘Bho, wehapa wa mwali waka nane?’ Najombi akayangike, ‘Nepani nde mwali waka Besueli, mwana waka Milika, nhwanu waka Naholi.’ Nanatu nakunhwatiki pete paimbulu jaki na bangili mumabhoku ghaki. 48Nakachikimi na kunjojabhela Bambo Chapanga, nakundumbalili Bambo Chapanga waka bambo wangu Ibulahimu, joakanongwihe muindela, nahuli nuntolila mwana waka bambo wangu mbomba wa kutoghola kuhuma mu lukolu lwaki. 49Henu mbwaghilaje ngati anamlangihi wamboni na ulongwana kwaka bambo wangu, nanga bhela, mbwaghilaje, nahuli ng'anambukyaje upambala wa kumalelelu au kumangeja.”
50Panihapa Labani na Besueli bhakayangiki, bhakapwaghaje, “Lijambu aleli lihumiki kwaka Bambo Chapanga, na tepani ngatuwezi kukupwaghila lijambu lokapi lela lihakau au lambone. 51Lingalyaje, Lebeka abhi pambane, untolaje na ujenda naku, akabya nhwanu waka mwana waka bambo waku, ngati na Bambo moakulonguhile.” 52Panihapa mtumika waka Ibulahimu paakajowini malobhi ghanihagha, akachikimi mbaka pahi palongi jaka Bambo Chapanga. 53Panihapa mtumika hoju akabhohiki hindu yeyalenganakiki kwa madini gha zahabu na madini gha feza papamu na ingobhu, na kumpekeha Lebeka. Bhela bhela akabhapeki nhupu ya mbija yamaheli mbeli waki na mabhu waki.
54Bhela, jombi papamu na bhala bhabhakabhi papamu naku bhakakuliki, bhakakunywiki na kughonela ikilu kola kola. Pabhakajumwiki lukela, mtumika jola akapwaghike, “Nyetakalyaje nyendaje kwaka bambo wangu.”
55Nambu mbeli waka Lebeka na mabhu waki bhakayangike, “Undeka mwali atama kwitu machobha komi au nakanope, panihapa nde mwibhokaje.”
56Mtumika jola akabhapwaghile, “Ngamwinjelewesha, kwa kubha Bambo anhwezishi mwanja wangu, nyetakalyaje ngelabhukaje kwaka bambo wangu.”
57Bhombi bhakayangike, “Leka tundoha mwali hoju, tundalukya mwene moapwaghila.” 58Bhakundohiki Lebeka na kundalukila, “Bho, anaujenda na mundu ajojo?”
Lebeka akayangiki, “Ena, ananyendaje.”
59Panihapa bhanjetakela Lebeka, papamu na mabhu joangohikaje Lebeka kutumbula paakabhili mwana, na mtumika waka Ibulahimu na bhandu bhaki. 60Bhakumpengali Lebeka, bhakapwaghaje:
“Ndongu witu, wehapa ubyaje mabhu wa bhandu bahamaheli bhangakubhalangi,
na bhabhelakeka bhaku bhapwelilaje michi ja bhandu bhabhunhakalila.”
61Panihapa Lebeka akabhokiki na bhatumika bhaki bha chimbomba, koni bhakabya bhakweliki ngamia na kunjengalela mtumika waka Ibulahimu jola, na bhokapi bhakabhokiti.
62Bhela Isaka akabhi ahikiki kwa indela ja Beli Lahai Loi, maghambu akabhi atama ku inchi ja Negebu upambala wa kolijibhi lyoba. 63Isaka akabhokiki kujenda kungonda nahuli kuholalela mu chikahi cha pakamihi, akajwinwi mihu ghaki, akaiweni ngamia ihika. 64Lebeka akajinwi mihu ghaki, najombi paakumbweni Isaka, akahulwiki panani ja ngamia jaki. 65Na kundalukila mtumika jola, “Bho, mundu jola joabhi kungonda kola nde nane joahika kutujopalela?”
Mtumika jola akayangike, “Jonihoju nde bambo wangu.” Panihapa Lebeka akatoliki chitambala chaki na kuliyeka pamihu.
66Mtumika jola akumpwaghi Isaka mambu ghokapi ghaakahengike. 67Bhela Isaka akumpeliki Lebeka mu lihema la mabhu waki Sala, na Isaka akuntoliki Lebeka na kubha nhwanu waki. Isaka akumpaliki Lebeka, na kupata chiheku kabheti ngati pahekalyaje mangani ja kupotela mawu waki.
Currently Selected:
Utumbulilu 24: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
