Utumbulilu 25
25
Bhabhelakeka bhangi bhaka Ibulahimu
1 Mambu gha Chikahi 1:32-33
1Ibulahimu akatowi mbomba jongi, lihina laki akalowakiki Ketula. 2Ketula najombi akumbelakili Ibulahimu bhana, Zimulani, na Yokishani, na Medani, na Midiani, na Ishibaki na Shua. 3Yokishani akumbeliki Sheba na Dedani, na bhabheleka bhaka Dedani bhakabhi Bhaashulu, na Bhatelushi na Bhaleumi. 4Bhana bhaka Midiani bhakabhi Efa, na Efeli, na Hanoki, na Abida na Elida. Bhokapi abhabha bhakabhi bhabhelakeka bhaka Ketula.
5Ibulahimu akumpeki Isaka upwelelu wa kila chindu cheakabhi nachu. 6Nambu Ibulahimu paakabhi akali mwome, akabhapeki bhana bha bhatumika bhaki bha chimbomba nhupu, na kubhabhoha bhajenda kutama upambala wa kolipita lyobha, kutali na mwana waki Isaka.
Kupotela kwaka Ibulahimu
7Ibulahimu akatemi, hyaka mia moja na sabini na nhwanu. 8Ibulahimu akapotile mu useja wambone, akabhi asejike akabya atupi machobha, najombi akabhonginwi papamu na bhaseja bhaki. 9Bhana bhaki bhabheli, Isaka na Ishimaeli bhakuntaghiki mu limbaku la Makipela pambipi na Mamile, mu ngonda ghoukabhi waka Efiloni mwana waka Sohali Mhiti, 10Ngonda ambau Ibulahimu akauhemi kwa Bhahiti. Konihoku nde ambaku Ibulahimu akataghakiki na nhwanu waki Sala. 11Na Ibulahimu paakapotile, Chapanga akumpengali Isaka mwana wake. Najombi Isaka akatami pambipi na Beli Lahai Loi. Ndandi jaki jola joabhona
Bhabhelakeka bhaka Ishimaeli
1 Mambu gha Chikahi 1:28-31
12Hayeyi nde ibheleku yaka Ishimaeli mwana waka Ibulahimu, bhabhakabhelakiki kwaka Hajili mundu wa ku Misili ambaju akabhili mtumika wa chimbomba waka Sala. 13Aghagha nde mahina gha bhana bhaka Ishimaeli, kwa mahina ghabhu, na kwa ibheleku yabhu: Mbelakeka wa kutumbula waka Ishimaeli akabhi Nebayoti, akajengalili Kedali, na Abideeli na Mibusamu, 14na Mishima, na Duma na Masa, 15na Hadadi, na Tema, na Yetuli, na Nafishi na Kedema. 16Bhanihabha bhakabhi nde bhana bha chikambaku bhaka Ishimaeli, na bhanihabha bhakabhi nde ihongozi bha makabila komi na ghabheli kulengana na matamu ghabhu na bhalongu bhabhu. 17Ishimaeli, akabhili na hyaka mia moja na selasini na saba. Akapotile, najombi akabhonginwi papamu na bhandu bhaki. 18Bhabhelakeka bhaka Ishimaeli bhakatami pachilanda ja Havila mbaka ku Shuli, pambipi na malindakanilu gha Misili, kwa indela jejijenda ku Ashulu. Bhakatami kwa kughabhanika na bhabhelakeka bhangi bhokapi.
Kubhelakeka kwaka Esau na Yakobo
19Hayeyi nde ibheleku yaka Isaka mwana waka Ibulahimu. 20Isaka akabhi na hyaka alobaini chikahi paakuntowi Lebeka, mwali waka Besueli, Mshami, wa ku Padani Alamu. Labeka akabhili ndombu waka Labani. 21Isaka akundobhiki Bambo Chapanga kwa ndandi jaka nhwanu wake, maghambu akabhi ngulumba. Najombi Bambo Chapanga akayangiki malobhu ghaki, na Lebeka nhwanu waka Isaka akapatiki chitumbu. 22Chitumbu hechi chakabhili mapaha. Bhana habha anabhapengini mulutumbu lwaku, “Ngati anakubhi anana, bho, maghambu kiki kutama?” Bhela akapiti kundaluki Bambo.
23Bambo Chapanga akumpwaghile,
“Bhana bhabheli bhabhabhili mulutumbu lwako,
Na makabila ghabheli gha bhandu anaghaghabhanikaje kutumbu mulutumbu lwako.
Chibheleku chaka nchoku anakibya na makili kupeta chibheleku chaka nkolongwa,
na chibheleku chaka nkolongwa anachihengilaje lihengu nchoku.”
24Chikahi chaki cha kulibhopola pachahikiki, Labheka akalibhopwili bhana mabhela bha chikambaku. 25Wa kutumbula kubhelakeka akabhi nkeli, hyegha jaki jokapi jakabhi ngati ingobhu ja majunjo. Bhakundohiki lihina laki Esau. 26Palongi, akabhelakiki wa kabheli, na chiwoku chaki chakunkamwi chinjekinjeki chaka Esau. Akundohiki lihina laki Yakobo. Isaka akabhi na hyaka sitini chikahi nhwanu waki Lebeka paakalibhopwile.
Esau ahemalela ubhelakeka waki wa kutumbula
27Bhana bhakakolike, na Esau akabhi mundu joamanyi kubhenga hinyama, mundu wa muitengo, nambu Yakobo akabhi mundu wa chinunu, na wa kutama panyumba. 28Bhela, Isaka akumpaliki Esau, maghambu akayobhali kula hinyama yeakabhi abhenga, nambu Lebeka akumpaliki Yakobo.
29Lichobha limu Yakobo akateliki chilebhi cha chimpunyuli cha ngondi, na Esau akabhi akelabhuka kuhuma kuchitengu akabya na injala namaa. 30Akumpwaghi Yakobo, “Chondi, umbekya chilebhi chikeli hechi ngulaje, maghambu ndondiki namaa.” Nde ndandi bhakundohiki lihina laki Edomu.
31Yakobo akayangike, “Unombasya hoti ubhelakeka waku wa kutumbula.”
32Esau akapwaghike, “Lingalya, nepani mi pambipi kupotela, bho, anajinyangatya kike ubhelakeka waku wa kutumbula?”
33Yakobo akumpwaghile, “Unapila hoti.” Najombi Esau akundapile, na kundombasela Yakobo ubhelakeka waku wa kutumbula. 34Panihapa Yakobo akumpeki Esau libumunda na chimpunyuli cha ngondi, najombi akakuliki, akakunywiki, na akabhokiki na kujenda. Bhela, Esau akajijojwii haki jaki jaka mbelakeka wa kutumbula.
Currently Selected:
Utumbulilu 25: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
