Utumbulilu 26
26
Isaka ajenda kutama ku muchi wa Gelali
1Bhela injala ngolongwa jakapitalili mu inchi jeniheji, kujipeta injala jela jejalongoli kupitalila chikahi chaka Ibulahimu. Isaka akapiti ku muchi wa Gelali, kwaka Abimeleki nkolongwa wa Bhafilisti. 2Bambo Chapanga akumpitali Isaka, na kumpwaghila, “Ngawihelela kujenda ku Misili, nambu utamaje mu inchi jenakupwaghilaje. 3Utama kugheni mu inchi jeniheji, nanatu anangubha papamu na wehapa na kukupengalela. Maghambu ananukupekya wehapa na lubheleku lwaku lwokapi inchi yenjenu yokapi. Nanatu ananukutenda kulapa kwangu kutamakila konatendiki na Ibulahimu atati waku. 4Ananyonjukya lubheleku lwaku ngati ndondwa ya kunani, nanatu ananabhapekya inchi yenjenu yokapi, na kubhokana na lubheleku lwaku mataifa ghokapi gha pundema anaghapengalikaje. 5Maghambu Ibulahimu akajowanili sauti jangu, akaghakamwili malaghalakilu ghangu, na amuli yangu, na utemulu wangu na shelia yangu.”
6Bhela Isaka akatami ku muchi wa Gelali. 7Bhandu bha pandu panipala pabhakundalukili malobhi kubhokana na nhwanu wake, akapwaghike, “Hajoju nde ndombu wango,” maghambu akajowipi kupwagha, “Hajoju nde nhwanu wango.” Akaholalili, “Bhandu bha pandu panipala bhaweza kunkoma kwa ndandi jaka Lebeka, maghambu Lebeka akabhi myahi namaa wa sula.” 8Isaka paakabhi atami konihoku kwa machobha ghamaheli, Abimeleki, nkolongwa wa Bhafilisti akalingalili palidilisha, na kumbona Isaka akina kina na nhwanu waki Lebeka. 9Abimeleki akundohiki Isaka na kumpwaghila, “Chakaka hajoju nde nhwanu wako! Bho, mbona ukambwaghi, ‘Hajoju nde ndombu wango?’ ”
Isaka akamuyangike, “Maghambu nakaholali kubha nakabya ngomakike kwa ndandi jaki.”
10Panihapa Abimeleki akamuyangike, “Henu utuhengi kike? Pangi jumu wa bhandu bhangu akabya aweziki kughonela na nhwanu waku kihyegha, nanau ukabya utuleti lihakau panani jitu.” 11Bhela, Abimeleki akabhalaghalaki bhandu bhokapi, akapwaghaje, “Jokapi joanaangusa mundu hajoju au nhwanu waki chakaka anaakomakikaje.”
12Isaka akapandiki imbeju mu inchi jenijela, mu chaka chela chela, na akahuniki mahunu mala mia, maghambu Bambo Chapanga akumpengalile. 13Isaka akabhi mundu mwana hindu yamaheli, akajendali kupata hindu yamaheli mbaka akabhi mundu mwana hindu yamaheli namaa. 14Akabhi na mapogha gha mambelele, na mapogha gha ng'ombi na bhatumika bhamaheli, hata Bhafilisti bhakumboni wihu. 15Bhela hilibha yokapi ya machi yeyakembakiki na bhatumika bhaka Ibulahimu tati waki, Bhafilisti bhakaiyelalili na luhombi.
16Abimeleki akumpwaghi Isaka, “Ubhoka kwitu, maghambu wehapa utupetiki makili namaa.” 17Bhela, Isaka akabhokiki konihoku na kujenda kubheka likambi laki ku libondi la Gelali, na kutama konihoku. 18Panihapa Isaka akaikembiki kabhete hilibha ya machi yela ambayu yakakembakiki mu machobha ghaka Ibulahimu tati waki paakabhi mwome, abhayu Bhafilisti bhakaiyelaili paakapotili Ibulahimu, na kuipekeha mahina ghala ghala abhaghu tati waki akabhi ayipekihe.
19Bhela bhatumika bhaka Isaka bhakakembiki ku libondi lela na kupata chilibha cha machi manyahi gha chemuchemu. 20Nambu bhadima bha ku Gelali bhakalochini na bhadima bhaka Isaka, bhakapwaghaje, “Machi ghangani nde ghito.” Bhela Isaka akachilohiki chilibha hechi Eseki, Eseki ndandi jaki, “Kulochana.”
21Panihapa bhakakembiki chilibha chengi, nambu hata chenihechi nachombi bhakachilochanile, akachilohiki Sitina, Sitina ndandi jaki, “Kulochana.” 22Isaka akabhokiki konihoku na kujenda pandu pangi, na kukemba chilibha chengi. Nambu chenihechi ngachebhalochanile, bhela, Isaka akachilohiki Lebohoti, akapwaghaje, “Sajenu Bambo Chapanga atupekihi mbekenyu, natatu anatujonjukikaje mu inchi jenjeno.”
23Kuhuma konihoku, Isaka akakweliki kujenda ku muchi wa Beeli Sheba. 24Ikilu jela Bambo Chapanga akumpitalili, na kumpwaghila, “Nepani nde Chapanga waka tati waku Ibulahimu. Ngawijoghopa, kwa ndandi nepani mi papamu na wehapa, ananukupengalyaje na kubhajonjukela bhabhelakeka bhaku kwa ndandi jaka Ibulahimu, mtumika wango.” 25Isaka akachengiki chihanja cha nyambiku konihoku, na kulobha kwa lihina laka Bambo Chapanga. Akachengiki lihema laki konihoku, na bhatumika bhaki bhakakembiki chilibha.
Isaka na Abimeleki bhajongana
26Chikahi chenihechi Abimeleki akahikiki kuhuma ku muchi wa Gelali akabya papamu na Ahuzati nkochi waki, papamu na Fikoli nkolongwa wa manjolinjoli ghaki na kujenda kwaka Isaka. 27Isaka akabhalalukile, “Bho, mbona nhwikiki kwangu nepani, koni mkanhakalili na kundopola kwino?”
28Bhakayangike, “Chakaka tukaweni kubha Bambo Chapanga abhi papamu na wehapa. Bhela tukapwaghiki, ‘Itupalika kulapilana, tepani na wehapa, na kutenda lulaghilo, 29kubha ngawatuhengeli mahakau, ngati tepani natatu ngachetukuhengile mahakau, nambu tukakuhengili ghamboni pela. Tukakulekiki ubhokaje kwa lukwale, nanau sajenu upengaliwi na Bambo Chapanga.’ ” 30Panihapa Isaka akabhahengili uwangalalu, nabhombi bhakakuliki na kunywa. 31Chilabhu jaki lukela pachibhombu, bhakalapiki bheni kwa bheni. Na panihapa Isaka akabhahindakili na kulaghana nabhu kwa lukwale.
32Mu lichobha lela lela bhatumika bhaka Isaka bhakahikiki kumpekeha ubholu kubhokana na chilibha chebhakabhi bhachikembike, “Tupatiki machi.” 33Najombi akachilohiki lihina laki Shiba, Shiba ndandi jaki nde, “Kulapilana.” Bhela lihina la muchi ghonihoghu nde Beeli Sheba mbaka laleno.
Akabhahanu bhaka Esau
34Esau paakabhi na hyaka alobaini, akuntowi Yudisi, mwali waka Beeli, wa likabila la Wahiti na Besemati, mwali waka Eloni, wa likabila la Wahiti. 35Akambomba bhanihabha bhakatendiki matamu ghaka Isaka na Lebeka kubha mabhabha.
Currently Selected:
Utumbulilu 26: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
