Utumbulilu 27
27
Isaka ampengalela Yakobo
1Isaka paakabhi asejike, na mihu ghaki paghakabhi ghakosiki makili gha kubhona kabhete, akundohiki Esau mwana waki nkolongwa, na kumpwaghila, “Mwanango!”
Najombi akayangike, “Naam atati.”
2Isaka akapwaghike, “Lingalya, nepani sajenu nzejike, wala lichobha la kupotela kwangu ngechenilimanye. 3Henu utolaje mshali waku, na ujenda kuchitengu ukabhenga chinyama kwa ndandi jango. 4Ukaandalya chilebhi chinohu kwa ntundu ghola ghonupala, ukanetila nahuli ngulaje, na panihapa ananukupengalyaje, mangane ngachembotile.”
5Bhela Lebeka akabhi ajowanela chikahi Isaka paakabhi alongela na Esau mwana waki. Panihapa Esau akapiti kuchitengu kubhenga chinyama nahuli aletaje, 6Lebeka akumpwaghi Yakobo mwana waki, “Lingalya, nunjowini tati waku akalongilaje na mbeli waku Esau, akapwaghaje, 7‘Ukanetila chinyama, na ukaandalya chilebhi chinohu nahuli ngulaje, nanatu ananukupengalya palongi jaka Bambo Chapanga mangane ja kupotela kwangu.’ 8Henu wa mwana wangu, unyowanyaje malobhi ghangu ghanukupwaghila. 9Ujendaje sajenu kulipogha ukanetila makenda manyahi ghabheli gha imbuhi, nahuli nhandiya chilebhi chinohu kwa ndandi jaka tati waku, kwa ntundu ghola ghoaupala. 10Bhela anaumpelakya tati waku, apata kula, nahuli akupengalyaje mangane ja kupotela kwaki.”
11Yakobo akumpwaghi Lebeka mabhu waki, “Ukombuka kubha mbeli wangu Esau atweli majunjo muhyegha jaki, nambu nepani njeta. 12Pangi tati wangu anaambapihaje, nanatu anamya ngati ndehi kungolowa pamapihu jaki, nanatu ananililetila masolu panani jangu pandu pa mbengalelo.”
13Mabhu waki akumpwaghile, “Mwanango, masolu ghaku na ghakubha panani jangu nepani, unyowanya sauti jangu pela, ujendaje ukanetila makenda ghabheli gha imbuhi.” 14Bhela, Yakobo akapiti kughatola makenda ghabheli gha imbuhi na kundetela mabhu waki, najombi akaandii chilebhi chinohu, ngati moakapali tati waki. 15Bhela Lebeka akatoliki ingobhu hinyahi yaka Esau mwana waki nkolongwa, yeakabhi nayu munyumba, na kunhwatika Yakobo mwana waki nchoku. 16Bhelabhela akamuwatiki chingumba cha imbuhi mumabhoku ghaki, na muhingu jaki. 17Panihapa akumpeki Yakobo chilebhi chinohu hechi, papamu na libumunda leakalenganakile.
18Yakobo akapiti kwaka tati waki, akapwaghaje, “Tati wangu!”
Najombi akayangike, “Naam, mwanango, wehapa wa nane?”
19Yakobo akumpwaghi tati waki, “Nepani nde Esau mbelakeka waku wa kutumbula. Ndendiki ngati mowambwaghile. Chondi atati, ujumukaje na utama wichu, na ukulaje chinyama changu chemengike, nahuli umbengalyaje.”
20Nambu Isaka akundaluki mwana waki, “Bho, upatiki bhole manyata ntundu aghogho?”
Yakobo akayangike, “Maghambu Bambo, Chapanga waku, atehi kunyangatila.”
21Isaka akumpwaghi Yakobo, “Mwanango, chondi uheghalya pambipi na nepani nahuli nukupapihaje, mbala kubhona ngati chakaka wehapa nde wa Esau mwana wangu, au ngabhela.” 22Bhela Yakobo akaheghalili pambipi jaka Isaka tati waki, najombu akumpapihe, na kupwagha, “Sauti jaka Yakobo, nambu mabhoku nde ghaka Esau.” 23Isaka ngacheakummanye Yakobo, kwa ndandi mabhoku ghaki ghakabhi ngati ghaka Esau, mbeli waki, bhela akumpengalile. 24Isaka akundaluki kabhete, “Bho, chakaka le wehapa wa mwana wangu wa Esau?”
Yakobo akayangike, “Ena.”
25Isaka akapwaghike, “Unetila pambipi inyama heji jeubhengiki wa mwanango, nahuli nukupengalyaje.” Yakobo akundetili najombi akakulike, na akundetili na divai, akakunywike. 26Panihapa Isaka tati waki akumpwaghile, “Uhika pambani mwanango, unamukyaje kwa upalu.” 27Bhela, Yakobo akapiti na kundamukila tati waki kwa upalu. Najombi tati waki paakajowini kunungila kwa ingobhu yaki, akumpengalili akapwaghaje, “Lingalya, kunungila kwaka mwana wangu nde ngati kunungila kwa ngonda ghoaupengali Bambo Chapanga. 28Chapanga na akupekya lyangame la kunani kumahunde, na wamaheli wa pundema, na wamaheli wa mahunu na divai. 29Bhandu bha mataifa ghokapi na bhakutumakya wehapa, na bhandu bha mataifa ghokapi bhakuchikamya wehapa. Ubyaje mtawala panani ja bhalongu bhako, na bhana bha chikambaku bhaka mabhu waku bhakujojabya wehapa. Kila joakupeke masolu na apata masolu, na kila joakupengalela na apengaliwaje.”
Esau ajopa kupengalewa na Isaka
30Bhela Isaka paakajomwi kumpengalela Yakobo, najombi Yakobo paakabhi abhokiki pela palongi jaka Isaka tati waki, Esau najombi akahikiki kuhuma kubhenga. 31Najombi akalenganaki chilebhi chinohu na kumpelakela tati waki, na kumpwaghila, “Tati wango, ujumukaje na ukulaje pandu pa chinyama chemengiki nepani mwana waku, nahuli upata kumbengalela.”
32Isaka, tati waki, akundalukile, “Wehapa wa nane?”
Najombi akayangike, “Nepani nde mwana waku Esau, mbelakeka waku wa kutumbula.”
33Isaka akabhaghiji namaa, akapwaghaje, “Bho, akabhi nane jola joakatoliki chinyama cheabhengiki na kunetela? Nanatu nyomwi kula mangani ngacheuhikiki pambane, na nakumpengalile, najombi chakaka anaapengaliwaje!”
34Esau paakajowini malobhi ghanihagha ghaka tati waki, akaleliki chilelu chikolongwa, na cha mabhinilu, na kumpwaghila tati waki, “Chondi tati wango, umbengalya na nepane bhelabhela!”
35Nambu Isaka akayangike, “Ndongu waku akahikiki kwa kukolowa, najombi atoliki mbengalelu jaku.”
36Esau akapwaghike, “Nde ndandi alowakeka Yakobo! Atoliki pandu pangu mala pabheli. Akatoliki haki jangu jaka mbelakeka wa kutumbula, na sajenu atoliki mbengalelu jangu.” Kabhete akundaluki tati waki, “Bho, ngachewameki mbengalelu jokapi jela?”
37Isaka akayangike, “Nyomwili kuntenda Yakobo kubha mtawala waku, na bhalongu bhaki bhokapi numpekihi bhakubha bhatumika bhaki. Numpekihi mahunu na divai, henu nukuhengila kyani wehapa wa mwanango?”
38Esau akumpwaghi tati waki, “Bho, wa tati wangu ubhi le na mbengalelu jimu pela? Umbengalya na nepani bhelabhela, chondi tati wango. Bhela Esau akajamalili, na kulela.”
39Panihapa Isaka, tati waki akayangike,
“Matamu ghaku anaghakubha kutali na luhombi lolubholalanile,
na kutali na lyangami la kunani kumahunde.
40Anautamaje kwa lipanga lako,
nanau anaukubha mtumika waka ndongu wako.
Nambu pawibya ulikombwile,
wibya ulihekiti lingolingoli laki pahingu jako.”
41Panihapa Esau akunhakali Yakobo kwa ndandi ja mbengalelu ambaju tati waki akabhi ampengalile. Esau akapwaghiki muntima waki, “Machobha gha kundelela tati wangu ghaheghalile, panihapa nde ananunkoma ndongu wangu Yakobo.”
42Lebeka paakajowini malobhi ghaakalongi Esau mwana waki nkolongwa, akundohiki Yakobo mwana waki nchoku, na kumpwaghila, “Ulilingalyaje, ndongu waku Esau alijeghe mtima kwa liholalelu la kupala kukukoma. 43Henu, wa mwana wangu, ujowanyaje malobhi ghango, ubhokaje, utililaje manyata kwaka Labani, mbeli wango joatama ku Halani. 44Ukatama naku kwa machobha machokope mbaka inyela yaka ndongu waku paijomukaje. 45Chikahi ndongu wako inyela yaki payikubha ijomwike na alibhalili ghauntendile, ananukutumila ubholu ukelabhukaje. Bho, maghambu kiki nunhoa mabhokapi mwabheli kwa lichobha limo?”
Isaka antuma Yakobo kwaka Labani
46Bhela Lebeka akumpwaghi Isaka, “Muntima wangu ngachemi na chiheko kwa ndandi ja akambomba bhaka Esau Bhahiti. Anangati Yakobo anatowi jumu wa akambomba ngati abhabha Bhahiti, bho, matamu ghangu anaghakubha na ndandi bhole ja kujendalela kubha mwome?”
Currently Selected:
Utumbulilu 27: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
