Utumbulilu 29
29
Yakobo ahika kunyumba jaka Labani
1Bhela Yakobo akajendalili na mwanja waki, na kuhika ku inchi ya bhandu bha Kolipita lyobha. 2Konihoku akaweni chilibha cha machi kuchitengo, papamu na mapogha ghatatu gha mambelele ghaghonili pambipi na chilibhi hechi, maghambu ghakabhi ghapekewa machi kuhuma mu chilibha hechi, na pakabhili na liganga likolongwa pundomu wa chilibha hechi. 3Chikahi mambelele paghakubha ghalibhongini panihapa, bhadima bhalihingaliya liganga heli kuhuma pundomu wa chilibha na kughakenga mambelele. Anabhajomwi kughakenga bhalikelabhua liganga heli na kuchiyekalela chilibha hechi.
4Yakobo akabhalalukile, “Bhalongu bhango, mabhanganya nhumiki kwako?”
Bhakayangiki, “Tuhumiki ku muchi wa Halani.”
5Yakobo akabhalalukile, “Bho, mummanyi le Labani mwana waka Naholi?”
Bhakayangiki, “Ena, tummanye.”
6Bhela Yakobo akabhalalukile, “Bho, alama lelo?”
Bhakayangike, “Alama, na hata mwali waki Laheli, jo kola ahikiki na mambelele ghaki.”
7Yakobo akapwaghike, “Lingalya, mona kwakali muhe, wala nga chikahi cha kubhongana hinyama. Nkenga mambelele machi, na njenda mkaghadimaje.”
8Bhakayangike, “Ngachetuweza kuhenga bhenibhela mbaka mapogha ghokapi ghalibhonganaje papamu, na liganga libya likangakiki kuhuma pundomu wa chilibha, panihapa nde patwikenga mambelele.”
9Yakobo paakabhi alonge nabhu, Laheli akahikiki papamu na mambelele ghaka tati waki, maghambu akabhi mdima wa mambelele. 10Yakobo paakumbweni Laheli mwali waka Labani, mbeli waka mabhu waki, papamu na mambelele ghaka Labani, akapiti kulihingaliya liganga kuhuma pundomu wa chilibha na kughakenga mambelele ghaka nijaja waki. 11Bhela Yakobo akundamukili Laheli kwa upalu, na kulela kwa sauti ngolongwa, kwa ndandi ja chiheku. 12Panihapa Yakobo akumpwaghi Laheli kubha jombi nde ndongu waka tati waki, na kubha nde mwana waka Lebeka.
Bhela Laheli akakembili kujenda kumpwaghila tati waki. 13Palapala Labani paakajowini malobhi panani jaka Yakobo, nijaja waki, akakembili kujenda kunjopalela. Akunjobhatili na kundamukila kwa upalu, na kundeta kunyumba jaki. Panihapa Yakobo akumpwaghi Labani mambu ghanihagha ghokapi. 14Labani akumpwaghile, “Chakaka wehapa nde undongu wangu wa mwahi ghumo.” Yakobo akatami naku kwa chikahi cha mwehi ghumu.
Yakobo abhatoghola akakamwali bhaka Labani
15Labani akumpwaghile, “Hata ngati wehapa undongu wangu, ngacheipalika undumakya waka. Henu umbwaghilaje, bho, upala nukulepa kyane?” 16Henu, Labani akabhi na akakamwali bhabheli, mwali nkolongwa akalowakiki Lea, na mwali nchoku akalowakiki Laheli. 17Lea akabhi na mihu ghanga kulinga wichu, nambu Laheli akabhi na umbu linyahi, na akabhi mnyahi namaa kwa sula.
18Yakobo akumpaliki Laheli, bhela, akumpwaghi Labani, “Ananukutumakya kwa hyaka saba kwa ndandi ja kumpata Laheli, mwali waku nchoku.”
19Labani akapwaghike, “Mbanga nukutoghuke wehapa kuliku kuntoghuke mundu jongi jokapi. Ujendalya kutama pambani na nepani.” 20Bhela, Yakobo akuntumakili Labani kwa hyaka saba nahuli kumpata Laheli, nambu kwaki chikahi chenihechi chakabhi ngati machobha machokopi pela, maghambu akumpaliki namaa Laheli.
21Bhela Yakobo akumpwaghi Labani, “Umbekya nhwanu wango, ndandi machobha ghangu ghajomwike, nanatu mbala kuhimangana naku kihyegha.” 22Bhela, Labani akabhabhongini bhandu bhokapi bha pandu panipala, na kutenda uwangalalu. 23Nambu pakwahiki pakamihi, Labani akuntoliki Lea, mwali waki nkolongwa, na kumpeleka kwaka Yakobo, najombi akaghoni naku kihyegha. 24Labani akumbohiki Zilipa mtumika waki wa chimbomba kubha mtumika waka Lea. 25Chilabhu jaki lukela, Yakobo akakangichi kumbi Lea! Bhela Yakobo akumpwaghi Labani, “Bho, aleli nde lijambu bhole leundendile? Bho, si nakukutumakili kwa ndandi jaka Laheli? Bho, maghambu kiki utehi kungolowa?”
26Labani akayangike, “Nga ntetu witu kuntoghukela mwali nchoku mangani jaka mwali nkolongwa. 27Ujomulya hoti machobha saba gha ukwati waka mwali ajoju, natatu anatukupekya na Laheli kwa kundumakila hyaka yengi saba.”
28Yakobo akahengiki bhenibhela. Akajomulili machobha saba na Lea, na panihapa Labani akumpeki Laheli mwali waki abya nhwanu waki. 29Labani akumbohiki Biliha, mtumika waki wa chimbomba nahuli kubha mtumika waka Laheli. 30Bhelabhela Yakobo akaghoni na Laheli kihyegha, najombi akumpaliki nakanopi Laheli kuliku Lea. Yakobo akuntumakili Labani kwa hyaka yengi saba.
Bhana bha chikambaku bhaka Yakobo
31Bambo Chapanga akaweni kubha Lea ngacheakapalakike, akunjangatili kupata bhana, nambu Laheli akabhi ngulumba. 32Lea akapatiki chitumbu na kumbeleka mwana wa chikambaku, akundohiki lihina laki Leubeni, akapwaghaje, “Chakaka Bambo Chapanga aweni mang'ahiku ghangu, sajenu ndomi wangu anaambalaje.” 33Lea akapatiki kabhete chitumbu, akumbeliki mwana wa chikambaku, akapwaghaje, “Kwa kubha Bambo Chapanga ajowini kubha nepani ngachenapalakiki, bhelabhela ambeki kabhete mwana ajoju.” Bhela akundohiki lihina laki Simeoni. 34Lea akapatiki kabhete chitumbu, na kumbeleka mwana wa chikambaku, akapwaghaje, “Bhela chikahi chenjenu ndomi wangu anaakubha papamu na nepani, maghambu numbelakili bhana bhatatu.” Bhela akundohiki lihina laki Lawi. 35Lea akapatiki kabhete chitumbu, akumbeliki mwana wa chikambaku, akapwaghaje, “Chikahi chenjenu ananundumbalya Bambo Chapanga.” Bhela akundohiki lihina laki Yuda, na kukotoka kubheleka bhana.
Currently Selected:
Utumbulilu 29: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
