Utumbulilu 31
31
Yakobo antila Labani
1Bhela, Yakobo akabhajowini bhana bhaka Labani bhakapwaghaje, “Yakobo atoliki kila chindu chechakabhili chaka tati witu, najombi apatiki kubha na hindu yamaheli kubhokana na hindu yaka tati witu.” 2Yakobo akapaweni pamihu jaka Labani, kubha ngacheakabhi andingalila ngati lichu na lakwichu. 3Bambo Chapanga akumpwaghi Yakobo, “Ukelabhukaje ku inchi ja akatati bhaku na bhalongu bhako, nanatu anangubha papamu na wehapa.”
4Bhela, Yakobo akatumiki ubholu kwaka Laheli na Lea kubhaloha bhahikaje koakabhi adima mabhongelu gha hinyama yake. 5Yakobo akabhapwaghile, “Mona pamihu jaka tati winu, kubha ngacheaningalila wichu ngati lichu na lakwichu. Nambu Chapanga waka tati wangu abhi papamu na nepani. 6Nanamu mmanyi kubha nuntumakili tati winu kwa makili ghangu ghokapi. 7Na tati winu atehi kungolowa na kung'anambula malepu ghangu mala komi. Nambu Chapanga ngacheakundekiki aniyonangaje. 8Tati winu paakapwaghiki, ‘Hinyama yeibhi na mabaka mabaka anaikubha malepu ghaku,’ bhela mabhongelu ghokapi ghakabheliki hinyama yeibhi na madoa madoa. Na kila paakapwaghiki, ‘Hinyama yeibhi na misitali anaikubha malepu ghaku,’ bhela mabhongelu ghokapi ghakabheliki hinyama yeibhi na misitali. 9Henu Chapanga atoliki mabhongelu gha hinyama yaka tati winu, na ambeki nepani.
10“Chikahi cha hinyama kubhelakana, nakajinwihi mihu ghangu na kubhona mu ndoto kubha mapongu ghaghakweliki hinyama yengi heyi ghakabhi na misitali, madoa madoa, na mabaka mabaka. 11Mtumika wa kunani kwaka Chapanga akambwaghi mu ndoto, ‘Yakobo!’ Nanatu nakayangike, ‘Naam.’ 12Najombi akapwaghike, ‘Ujinula mihu ghaku ubhonaje, mapongu ghokapi ghaghabhi na misitali, madoa madoa, na mabaka mabaka ghakweliki hinyama imbomba. Ndenda anana maghambu niweni ntundu Labani moakabhi akuhengela. 13Nepani nde Chapanga nenakakupitalili ku Beseli, kola koukajitili mahuta pa nguzu ja liganga, na pandu pala paukanapile. Sajenu ubhokaje mu inchi jenjenu manyata na ubhujaje ku inchi jeukabhelakike.’ ”
14Laheli na Lea bhakayangike, “Bho, tepani tuhighali le na pandu pokapi pa kupwelela kunyumba jaka tati wito? 15Bho, jombi ngacheatuweni tepani ngati bhaghene? Nga ngati atehi kutulombesa pela, nambu akuliki mbaka mbija hitu yokapi. 16Chakaka hindu yokapi yeatoliki Chapanga kuhuma kwaka tati witu nde hindu hitu na bhana bhito. Bhela, uhenga lijambu lokapi lela leakupwaghi Chapanga.”
17Panihapa Yakobo akabhokiki, na kubhakweha bhana bhaki na akabhahanu bhaki panani ja ngamia. 18Yakobo akaitoliki hinyama yaki yokapi, hindu yaki yokapi yeakabhi apatike, na hinyama yeakapatiki ku Padani Alamu kujenda nayu kwaka Isaka tati waki ku inchi ja Kanaani. 19Bhela, Labani paakapiti kughaheketa mangoma gha mambeleli ghaki, Laheli akapiti kujibha imong'umongu ya ichapanga yaka tati waki. 20Yakobo akunkolwi Labani, wa likabila la Bhaalamu, kwa kulepalela kumpwaghila kubha atenda kuntila. 21Bhela, Yakobo akatoliki hindu yaki yokapi yeakabhi nayu na kutila manyata. Paakaulombwiki Nkoka Eufulate akapiti ku inchi ja itombi ja ku Gileadi.
Labani anjengalela Yakobo
22Lichobha la katatu, Labani bhakumpwaghi kubha Yakobo atehi kutila. 23Bhela, Labani akabhatoliki bhalongu bhaki na kunjengalela Yakobo kwa machobha saba, na kunhimanila ku inchi ja itombi ja ku Gileadi. 24Chapanga akunhiki Labani, wa likabila la Bhaalamu, mu ndoto ja ikilu na kumpwaghila, “Ulilingalyaje ngawilongela lilobhi lokapi lela kwaka Yakobo, likubhi lamboni au lihakau.” 25Yakobo akabhi abhekiki lihema laki ku inchi ja itombi ja ku Gileadi chikahi Labani paakunhimanile, Labani na bhalongu bhaki nabhombi bhakabhekiki lihema labhu konihoku ku inchi ja itombi ja ku Gileadi.
26Bhela, Labani akumpwaghi Yakobo, “Bho, uhengiki kyane? Mbona ungolwihi na kubhatola akakamwali bhangu ngati mateka kungondo? 27Maghambu kiki utiliki kwa kulihiya? Maghambu kiki utehi kungolowa? Maghambu kiki ngachewambwaghile nahuli nukulaghilaje na ujendaje kwa chiheko, na nyembu, na ing'oma na lilimba? 28Wala ngachewanekiki nabhajobhatya bhachokolu bhangu na kubhalaghila akakamwali bhango? Chakaka uhengiki chindu cha king'ang'a! 29Nepani mi na uwezu wa kukuyonanga, nambu Chapanga waka tati waku akambitalili ikilu ja kujumukila lalenu, na kumbwaghila, ‘Ulilingalyaje, ngawampwaghila lilobhi lokapi lela Yakobo, likubhi lamboni au lihakau.’ 30Bhela, sajenu manyi kubha utiliki maghambu utokulili kubhuja kunyumba jaka tati waku. Nambu maghambu kike ujibhiki imong'umong'u ya ichapanga yango.”
31Yakobo akayangike, “Nakajowipi, maghambu nakaholali kubha ukabhya unyawile akakamwali bhaku kwa makile. 32Nambu ngati anaunhimani mundu jokapi joabhi na imong'umong'u ya ichapanga yaku, ngayikubha mwome. Palongi ja bhalongu bhitu abhabha, ulingaje wamwete ubhonaje ngati anakubhili na chokapi chechibhi chako pambani cheminachu nepani, na ngati anachibhili, uchitolaje.” Bhela Yakobo ngacheakamanyi kubha Laheli akabhi ajibhiki imong'umong'u ya ichapanga heyi.
33Bhela, Labani akajingili mu lihema laka Yakobo, na lihema laka Lea, na lihema la bhatumika bhaki bhabheli, wala ngacheaiwene. Akapitiki mu lihema laka Lea, na kujingila mu lihema laka Laheli. 34Bhela Laheli akabhi aitoliki imong'umong'u ya ichapanga yela na kuibheka pahi ja matandiku gha ngamia na kughatamila. Labani akailondiki mu lihema lokapi, nambu ngacheaiwene. 35Laheli akumpwaghi tati wake, “Chondi bambo, ngawihakalila, maghambu ngachenhweza kujema palongi jako, ndandi mili mu machobha ghango.” Bhela, Labani akailondiki imong'umong'u ya ichapanga yaki, nambu ngacheaiwene.
36Yakobo akayomiki na kulochana na Labani, akapwaghaje, “Bho, lihakau langu nepani libhi kwako?” Yakobo akundaluki Labani kwa inyela, “Bho, lihoku bhole lenhengiki nepani hata unyobhalela anana? 37Upapihi papihi hindu yangu yokapi, bho, chindu bhole cheuchiweni cha munyumba jako? Uchibheka apapa palongi ja bhalongu bhangu, na bhalongu bhako, nabhombi bhatemulaje pachilanda jito. 38Ndami na wehapa kwa chikahi cha hyaka ishiline. Mambeleli ghaku na imbuhi yaku, ngacheiyoningi itumbu, wala ngachenguliki mambeleli makambaku kuhuma mu mabhongelu ghako. 39Ngachenukuletili chinyama chechalumakiki na chinyama cha muchitengo, nambu nakalepili hasala heji namwete. Kabhete ukanaiki malepu kwa chokapi chechajibhakiki muhi au ikilu. 40Hajeji jakabhi hali jango, muhi lyobha lakanyochike, na imbepu ikilu, na lughonu lukamokiki mu mihu ghango. 41Hyaka hayeyi ishilini ndami munyumba jaku, nakakutumakili kwa hyaka komi na ncheche kwa ndandi ja akakamwali bhaku bhabheli, na hyaka sita kwa ndandi ja hinyama yako. Nambu wehapa ukang'anambwili malepu ghangu mala komi. 42Ngati Chapanga waka tati wangu, Chapanga waka Ibulahimu ambaju akuntendiki tati wangu Isaka kubhaghaja, ngaakabhili upambala wangu, chakaka ukabhya unekike moka mabhoku matopo. Nambu Chapanga akaghaweni mang'ahiku ghangu na mahengu ghanahengiki kwa mabhoku ghango, jombi akakulakalili ikilu ja kujumukila laleno.”
Lulaghilu pachilanda jaka Yakobo na Labani
43Labani akamuyangiki Yakobo, “Akambomba abhabha nde akakamwali bhango, bhana abhabha nde bhana bhango na mabhongelu aghagha nde mabhongelu ghango. Nambu bho, lalenu nhweza kuhenga lijambu bhole kubhatenda bhahighalyaje akakamwali bhangu abhabha na bhana bhabhu abhabha? 44Bhela, sajenu uhikaje tuhengaje lulaghilu, wehapa na nepani, na libya ngati ulandilu pachilanda jitu.”
45Yakobo akatoliki liganga na kulijemeka ngati nguzo. 46Yakobo akabhapwaghi bhalongu bhake, “Mbonganaje maganga.” Bhela bhakatoliki maganga na kughabhongana na kubha lituhi, na bhakakuliki chilebhi pambipi na lituhi la maganga heli. 47Labani akalohiki lituhi la maganga heli Yegali Sahaduta, nambu Yakobo akapalohiki Galeedi. 48Labani akapwaghike, “Lituhi aleli la maganga nde ulandilu pachilanda jaku na nepani laleno.” Nde ndandi lakalohakiki lihina laki Galeedi. 49Bhelabhela pakalowakiki Misipa, maghambu akapwaghiki, “Bambo Chapanga atulingalyaje pachilanda jaku wehapa na nepani, chikahi kila jumu witu paakubha kutali na njake.” 50Ngati anaubhang'ahiki akakamwali bhangu, au anautowili akakamwali bhangi nakanopi ja akakamwali bhangu, hata ngati njeta mundu joabhi papamu na tepani, ukombuka kubha Chapanga nde mlandilu pachilanda jangu nepani na wehapa. 51Labani akumpwaghi Yakobo, “Ulingaje lituhi aleli la maganga na nguzu jenyemiki pachilanda jangu na wehapa. 52Lituhi aleli nde ulandilu na nguzu ajeji nde ulandilu, kubha nepani nganipeti lituhi aleli kuhika kwaku wehapa kukuyonanga, nanau ngawipeti lituhi aleli na nguzu ajeji kuhika kwangu nepani kuniyonanga. 53Chapanga waka Ibulahimu, na Chapanga waka Naholi, na Chapanga waka tati wabhu, na atemulaje pachilanda jito.” Bhela, Yakobo akalapiki kwaka Chapanga joakuntendiki Isaka tati waki, kubhaghaja. 54Panihapa Yakobo akachinjiki nyambiku pachitombi, akabhalohiki bhalongu bhaki bhahikaje kula chilebhe, nabhombi bhakakuliki, na kutama ikilu jokapi kuchitombi hoku. 55Chilabhu jaki Labani akabhokiki lukela pachibhombu, akabhajobhatili bhachokolu bhaki na akakamwali bhaki na kubhapengalela. Na panihapa Labani akabhokiki, na kukelabhuka kunyumba jaki.
Currently Selected:
Utumbulilu 31: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
