Utumbulilu 32
32
Yakobo aliandaa kuhimangana na Esau
1Yakobo akajendalili na mwanja waki, na bhatumika bha kunani bhaka Chapanga bhakahimangini naku. 2Yakobo paakabhaweni, akapwaghike, “Haleli nde likambi laka Chapanga!” Bhela akapalohiki pandu panihapa Mahanaimu.
3Bhela, Yakobo akabhatumiki bhabholu palongi jaki kujenda kwaka Esau mbeli waki ku Seili, ku inchi ja Edomu. 4Yakobo akabhatumiki bhatumika bhundongulyaje, akapwaghaje, “Mukumpwaghila anana bambo wangu, Esau, ‘Mtumika waku Yakobo apwagha, nakabhili ndama papamu na Labani, na nakabhili konihoku mbaka sajenu. 5Mili na ng'ombi na maponda, mambeleli na imbuhe, bhatumika bha chikambaku na bha chimbomba. Henu nduma ubholu ghongoni kwaka bambo wangu nahuli mbata chihomu palongi jako.’ ”
6Bhabholu pabhakelawiki kwaka Yakobo, bhakumpwaghile, “Tukapiti kuhimangana na ndongu waku Esau, najombi ahika kukujopalela, akabhya na akanalomi mia ncheche.” 7Bhela, kwa lujoghopu na choghoi chikolongwa, Yakobo akabhagabhinyi bhandu bhabhakabhi papamu naku mabhongelu ghabheli, bhelabhela akagabhinyi mabhongelu gha mambeleli na imbuhe, na bhelabhela ng'ombi na ngamia. 8Yakobo akapwaghike, “Ngati Esau anahikiki na kuliyonanga libhongelu limu, libhongelu lengi liweza kutila.”
9Yakobo akalobhike, “Wenga wa Chapanga waka tati wangu Ibulahimu, Chapanga waka tati wangu Isaka, wenga wa Bambo Chapanga, weukambwaghili, ‘Ukelabhukaje ku inchi jaku na bhalongu bhaku, nanatu ananukutenda uneng'anyaje, 10nepani ngacheimbalika chihomu chaku na ulongwana waku wokapi ghounhengile nuntumika wako. Maghambu nakabhi na ndonga pela mumabhoku ghangu chikahi panalombwiki nkoka aghoghu wa Yoludani, nambu sajenu mili na mabhongelu aghagha ghabheli. 11Nukulobha ungengalyaje sajenu kuhuma mu makili ghaka ndongu wangu Esau, kwa ndandi nyoghopa kubha anahikaje kungoma, na bhelabhela kubhakoma akamabhu na bhana bhabhu. 12Nambu wehapa ukambwaghili anaunhengila mambu ghambone, na bhabhelakeka bhangu bhakubha bhamaheli ngati luhanga lwa mumaheku ja bahali ambalu ngachelubhalangika kwa ntundu molujolukile.’ ”
13Bhela, Yakobo akaghonili panipala ikilu jela. Na pachilanda ja hinyama yeakabhi nayu, akahawili nhupu kwa ndandi jaka Esau, ndongu wake. 14Akahawili imbuhi imbomba mia ibheli, na imbuhi mapongu ishiline, mambeleli mambomba mia ibheli, na mambeleli makambaku ishiline, 15ngamia yeijongeha selasini papamu na bhana bhabhu, ng'ombi imbomba alobaini, na ng'ombi mapongu komi, na maponda mambomba ishiline, na maponda makambaku komi. 16Akaibhekiki pahi ja ulingalilu wa bhatumika bhaki, kila libhongelu pakanjika jaki, na kubhapwaghila, “Ndongulyaje palongi jangu, na mkajileka mbekenyu pachilanda ja libhongelu na libhongelu.” 17Akundaghalaki mtumika wa kutumbula, akapwaghaje, “Chikahi ndongu wangu Esau paanahimangana na wehapa, aweza kukulalukila, ‘Bho, wehapa untumika waka nane? Ujenda kwako? Na hinyama heyeyi palongi jaku nde yaka nane?’ 18Ikupalika umpwaghilaje, ‘Hayeyi nde mali ghaka ntumika waku Yakobo, nayombi nde nhupu kwaka bambo wangu Esau. Na Yakobo mweni ahika kunyuma jito.’ ” 19Akundaghalaki kabhete wa kabhele, na wa katatu, na bhokapi bhabhakajengalile na mabhongelu ghabhu akapwaghaje, “Anana nde momwampwaghilaje Esau, chikahi anamuhimangini naku. 20Impalika kupwagha, ‘Mtumika waku Yakobo ahika kunyuma jito.’ ” Maghambu akaholalili, “Ananhweza kunheleya inyela yaki kwa nhupu hayeyi yenongukela, na pakujomukela ananhweza kumbona pamihu jaki, na pangi anaanyopalyaje.” 21Bhela, nhupu yaka Yakobo yakalongulili palongi jaki, nambu mweni akaghonili palikambi ikilu jela.
Yakobo akomana malimba na Chapanga
22Ikilu jela Yakobo akajumwiki na kubhatola akabhahanu bhaki bhabheli, bhatumika bhaki bhabheli bha chimbomba na bhana bhaki komi na jumu, na kulomboka nkoka Yaboki. 23Akabhatoliki, na kubhalombosha punkoka, na akalombwishi mali ghokapi ghaakabhi naghu. 24Bhela, Yakobo akahighalili kanjika jaki.
Na mundu jumu akakomini naku malimba mbaka lyobha palakabhi lipita. 25Mundu jola paakaweni kubha ngacheaweza kumuweza, akapagusiki pa lilombelu la lipaja na nyonga jaka Yakobo, najombi akatengwiki paakabhi akomana naku malimba. 26Panihapa mundu jola akapwaghike, “Unekaje nyendaje, maghambu kutenda kucha.”
Nambu Yakobo akayangike, “Nganakuleki ujendaje, panga kumbengalela.”
27Mundu jola akundalukile, “Bho, lihina laku wa nane?”
Akayangiki, “Yakobo.”
28Bhela, mundu jola akapwaghike, “Lihina laku ngawikubhi kabhete Yakobo, nambu Izilaeli, maghambu ukomini malimba na Chapanga, na bhandu bhelabhela, nanau uwezike.”
29Yakobo akundalukili, akapwaghaje, “Chondi umbwaghilaje lihina lako.”
Jombi akumpwaghile, “Bho, maghambu kiki unalukila lihina lango?” Panihapa akumpengali Yakobo.
30Yakobo akapalohiki pandu panipala Panieli, akapwaghaje, “Numbweni Chapanga pamihu kwa pamihu, na nakali matamu ghangu ghakengalike.” 31Lyobha lakabhi lipita chikahi Yakobo paakabhokiki ku Penueli, najombi akabhi achepalela kwa ndandi ja lipaja la chigholu chaki. 32Nde nandi mbaka lalenu Bhaizilaeli ngachebhakula nhwipa ghoubhi pahi ja lipaja mbaka lalenu, maghambu Chapanga akungusiki Yakobo pahi ja lipaja laki punhwipa wa chibhunu chaki.
Currently Selected:
Utumbulilu 32: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
