Utumbulilu 34
34
Dina ajingalika kihyegha kwa makile
1Bhela, Dina mwali waka Yakobo joakumbelakili Lea, akapitiki kunja na kujenda kubhabhona akakamwali bha inchi jenijela. 2Panihapa Shekemu, mwana waka Hamoli, wa likabila la Bhahivi, joakabhi mtawala wa inchi jenijela, paakumbweni Dina, akuntoliki, na kughonela naku kihyegha kwa makile. 3Nambu Shekemu akahutakiki namaa na Dina mwali waka Yakobo, akumpaliki mwali ajoju, na hata akatumbwili kulongela naku kwa malobhi manyahi. 4Panihapa Shekemu akumpwaghili Hamoli tati waki, akapwaghaje, “Chondi, unobhilaje mwali ajoju abya nhwanu wango.”
5Bhela Yakobo akajowini kubha Dina mwali waki, akabhi abhohakiki bikila na Shekemu. Chikahi chenihechi bhana bhaki bhakabhi papamu na hinyama yaki kumighonda. Yakobo akatumbili, mbaka pabhakelawiki panyumba. 6Panihapa Hamoli, tati waka Shekemu, akapiti kulongela na Yakobo. 7Na chikahi bhana bha chikambaku bhaka Yakobo pabhajowini pela mambu ghanihagha, bhakakelawiki kuhuma kumighonda kuleha hinyama yabhu. Jakabhabhiniki namaa mitima jabhu na bhakatweliwi na inyela namaa, maghambu Shekemu akabhi ahengiki lijambu la iyoni kwa Izilaeli kwa kughonela kihyegha na mwali waka Yakobo, chindu ambachu ngachechapaliki kubha bhenibhela. 8Nambu Hamoli akabhapwaghile, “Mwana wangu Shekemu ampala namaa mwali wino, chondi mumpekya antoghulaje. 9Mtoghulana na tepane, mwehapa mtutoghukya akakamwali bhinu, na tepani tuntoghukya akakamwali bhito. 10Muweza kutama pachilanda jito, na anamkubha bhakulijeka mu inchi jenjeno. Anamtamaje mu inchi jenjeno, na kuhemela na kulombesa momboni na kulipatila mali.”
11Bhelabhela Shekemu akumpwaghili tati waka Dina na bhalongu bhaki, “Chondi nundobha nyetakalyaje pamihu jino, nanatu ananumpekya chokapi chemwipwaghaje. 12Mbwaghilaje mali na nhupu yembalika kuleta, hata ngati anaibhi ngolongwa namaa, nepani ananundepa chokapi chemwipwaghaje, nambu mbekyaje pela mwali hajoju, abyaje nhwanu wango.”
13Bhana bhaka Yakobo bhakabhayangiki Shekemu na Hamoli tati waki kwa kukolowa, maghambu Shekemu akabhi antendi uhakau ndombu wabhu Dina. 14Bhakabhapwaghile, “Ngachetuweza kuhenga lijambu haleli, ngachetuweza kuntoghukela ndombu witu kwaka mundu jwangakuheketa jando. Anaikubha iyoni kwito. 15Nambu kwa lishaliti limu aleli pela tuweza kujongana na mwehapa, anambi ngati tepani kwa kuheketwa jando kila mwanalomi pachilanda jino. 16Panihapa anatumpekya akakamwali bhitu, natatu anatubhatoghula akakamwali bhino. Anatutama kwinu na anatukubha bhandu bhamu papamu na mwehapa. 17Nambu anankaniki kuheketwa jando, bhela, tepani anatuntola ndombu witu na kubhoka naku.”
18Malobhi ghabhu ghakabhi ghamboni palongi jaka Hamoli na Shekemu mwana wake. 19Nkombu jola ngacheakabhakile kuhenga lijambu leniheli, maghambu akanyambakiki namaa na mwali waka Yakobo. Bhelabhela Shekemu akabhi nde nkombu joakatopaliki namaa kupeta bhandu bhokapi bha munyumba jabhu.
20Bhela, Hamoli na Shekemu mwana waki, bhakapiti kundyangu wa kujingalila wa muchi, pandu pa kuhimanganila, na kulongela na bhandu bha muchi wabhu, bhakapwaghaje, 21“Bhandu abhabha bhabhi na lukwali na tepani, tubhajetakalyaje bhatamaje mu inchi jitu na kuhemela na kulombesa pambane, kwa ndandi inchi jenu nde ngolongwa ja kutujaghanila tepani na bhombe. Tuweza kubhatoghola akakamwali bhabhu, na kubhatoghukela akakamwali bhitu. 22Nambu bhandu bhanihabha anabhajetakya kutama na tepani ngati bhandu bhamu nabhu kwa lishaliti la kubha akanalomi bhitu bhahekatwa jando, ngati bhombe. 23Bho, ngachembona kubha mali ghabhu na hinyama yabhu yokapi anaikubha hito? Bhela, tujetanganya nabho, nabhombi anabhatama pachilanda jito.” 24Akanalomi bhokapi bhabhapitiki kunja ja ndyangu wa muchi bhakajetanganili na Hamoli na Shekemu mwana waki, bhela, kila mwanalomi mu muchi ghonighola akahekitwi jando.
25Paghapetiki machobha ghatatu, chikahi bhokapi bhakabya mu mabhinilu, bhana bhabheli bhaka Yakobo, yani Simeoni na Lawi, bhalongu bhaka Dina, bhakatoliki mapanga ghabhu, na kuulapula muchi kwa manyata, na kubhakoma akanalomi bhokapi. 26Bhakabhakomiki Hamoli na Shekemu mwana waki, kwa mapanga ghaghatema, na kumboha Dina munyumba jaka Shekemu, na kubhoka naku. 27Pabhakabhakomiki bhanihabha, bhana bhangi bha chikambaku bhaka Yakobo bhakajingili mu muchi ghonighola, na kujibhona mituhi, na kuutola mateka muchi hoghu, maghambu ndombu wabhu akabhi ahengakiwi uhakau. 28Bhakatoliki mambeleli ghabhu na imbuhi, ng'ombi na maponda, na kila chindu chechakabhi chabhu mu muchi ghonighola na kumighonda. 29Bhelabhela bhakatoliki mali ghabhu ghokapi papamu na akambomba na bhana bhabhu, na bhakatoliki mateka kila chindu chechakabhili mkati ja nyumba yabhu.
30Bhela, Yakobo akabhapwaghili Simeoni na Lawi, “Ndetiki mang'ahiku kwangu nepani kwa kundenda nungaje pachilanda ja bhandu bha inchi jenjenu ja Bhakanaani na Bhapelizi. Nepani ngachemi na bhandu bhamaheli, ngati anabhalombanishi makili ghabhu na kuhika kunapula, anabhangomaje nepani papamu na bhalongu bhango.”
31Nabhombi bhakayangike, “Bho, wichu lelo antendila ndombu witu ngati nkemi?”
Currently Selected:
Utumbulilu 34: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
