Utumbulilu 35
35
Chapanga ampengalela Yakobo ku Beseli
1Bhela, Chapanga akumpwaghi Yakobo, “Ukwelaje ujenda ku muchi wa Beseli, ukatama konihoku na ukanjengilaje pandu pa kumokeha nyambiku nepani Chapanga waku nenukupitalile chikahi paukabhi untila Esau, ndongu wako.”
2Yakobo akabhapwaghili bhandu bha munyumba jake, na bhokapi bhabhakabhi papamu nako, “Mbohaje ichapanga ya kighene yeibhi pachilanda jino, mligholulaje na mng'anambulaje ingobhu hino. 3Bhela tubhokaje, tukwela ku Beseli, pandu panukunchengilaje Chapanga pandu pa kubhokeha nyambiku, jombi joakanyangatili mu lichobha la mang'ahiku ghango, joakabhi papamu na nepani pandu pokapi panakapite.” 4Panihapa, bhakumpeki Yakobo ichapanga ya kighene yokapi yebhakabhi nayu, na pete yeyakabhi mumakutu ghabho, na Yakobo akaitaghiki pahi ja nkongu wa mwaloni wa ku Shekemu hoku.
5Yakobo na bhana bhaki pabhakabhi bhabhoka, Chapanga akabhajeghi choghohi bhenei bha michi jokapi ja pambipe hata ngachebhalengiki kubhajengalela. 6Bhela, Yakobo na bhandu bhokapi bhabhakabhi papamu naku bhakahikiki ku muchi wa Luzu, yani Beseli, ghoubhi ku inchi ja Kanaani. 7Konihoku akachengiki pandu pa kubhokela nyambiku, na akapalohiki pandu pala Eli Beseli, maghambu konihoku Chapanga akumpitalile, chikahi paakabhi antila ndongu waki Esau. 8Chikahi chenjenu Debola, joakabhi angoha Lebeka paakabhi akali nchoku, akapotili na kutaghakika pahi ja nkongu wa mwaloni ghoubhi ku Beseli. Bhela, lihina la pandu panihapa pakalowakiki Aloni Bakusi, ndandi jaki, “Nkongu wa Chilelu.” 9Chikahi Yakobo paakabhi akelabhuka kuhuma ku Padani Alamu, Chapanga akumpitalili Yakobo kabhete na kumpengalela. 10Chapanga akumpwaghile, “Lihina laku nde Yakobo, ngawilowakeki kabhete Yakobo, nambu lihina laku anaulowakika Izilaeli.” Bhela, Chapanga akundohiki Yakobo lihina Izilaeli. 11Chapanga akumpwaghile, “Nepani nde Chapanga Nemili na Makile, ukabhelakaje na kujonjukeka. Litaifa na libhongelu likolongwa la bhandu bha mataifa analihuma kwaku wehapa, na bhakolongwa anabhahuma mu chibhunu chaku wehapa. 12Inchi jenakabhapeki Ibulahimu na Isaka ananukupekya wehapa, na lubheleku lwaku baada jaku wehapa ananabhapekya inchi jeniheje.” 13Paakajomwi kulongela na Yakobo, Chapanga akakweliki kunani. 14Yakobo akajemiki nguzu ja liganga pandu pala paakalongili na Chapanga, akajitili nyambiku ja chindu cha kunywa panani jaki, na bhelabhela akajitili na mahuta panani jaki. 15Yakobo akapalohiki pandu pala, Chapanga paakalongili naku, Beseli.
Kupotela kwaka Laheli
16Yakobo na bhalongu bhaki bhokapi bhakajendalili na mwanja kuhuma ku Beseli. Na pabhakabhi pambipi kuhika ku muchi wa Efulati, Laheli akakamuliki na mabhinilu, na mang'ahiku makolongwa gha kubheleka. 17Paakabhili mu mang'ahiku aghagha gha kulibhopola, mundu wa kubheleha akumpwaghile, “Ngawijoghopa, maghambu upatiki mwana jongi wa chikambaku.” 18Laheli paakabhi aheketa mbomu jaki ja kujomukela, kwa kubha akabhi atenda kupotela, akundohiki mwana hoju lihina laki Benoni, nambu tati waki akundohiki Benyamini.
19Bhela, Laheli akapotili, na kutaghakika pambipi na indela ja kujenda ku Efulati, yani Beselehemu. 20Yakobo akajemiki nguzu panani ja litengeli laka Laheli, lelimanyikana mbaka lalenu litengeli laka Laheli. 21Panihapa Izilaeli akajendalili na mwanja waki na kuchenga lihema laki palongi ja mnala wa Edeli.
Bhana bha chikambaku bhaka Yakobo
1 Mambu gha Chikahi 2:1-2
22Chikahi Izilaeli paakabhi atama mu inchi jeniheji, Leubeni mwana waki, akaghonili kihyegha na lidaba laka tati waki joalowakeka Biliha, najombi Izilaeli akajowini lijambu lenihele.
Izilaeli akabhili na bhana bha chikambaku komi na bhabheli. 23Bhana bhaka Lea bhakabhi, Leubeni, mbelakeka wa kutumbula waka Yakobo, Simeoni, Lawi, Yuda, Isakali na Zabuloni. 24Bhana bhaka Laheli bhakabhi Yusufu na Benyamini. 25Bhana bhaka Biliha, mtumika waka Laheli, bhakabhi Dani na Nafutali. 26Bhana bhaka Zilipa, mtumika waka Lea, bhakabhi Gadi na Asheli. Bhanihabha nde bhana bha chikambaku bhaka Yakobo, bhaakabhabheliki chikahi paakabhi atama ku Padani Alamu.
Kupotela kwaka Isaka
27Yakobo akabhokiki na kujenda kunyumba jaka tati waki Isaka ku Mamile hoku, pambipi na muchi wa Kiliasi Aliba, yani Hebuloni, pandu ambapu Ibulahimu na Isaka bhakatami ngati bhaghene. 28Henu Isaka akatami hyaka mia jimu na semanini. 29Bhela, Isaka akapomwili mbomu jaki ja kujomukela na kupotela, akabhonginwi papamu na bhandu bhaki akabya nseja wa hyaka yamaheli. Nabhombi Esau na Yakobo, bhana bhaki, bhakuntaghike.
Currently Selected:
Utumbulilu 35: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
