Utumbulilu 41
41
Yusufu ahyekula ndoto yaka nkolongwa Falao
1Payapetiki hyaka ibheli, Falao akalotiki ndoto, na kulibhona kubha ajemiki punkeghi ja nkoka Naili. 2Lingalyaje, akaweni ng'ombi saba, inyahi na yeinonike, yakakweliki kuhuma kunkoka, na kula manyonyole. 3Payapetiki yeniheyi, yakapitalili kabhete ng'ombi yengi saba, ihakau na yeikombile, yakakweliki kuhuma mu nkoka Naili, na kuhika kujema pambipi na ng'ombi inyahi na yeinoniki yela, punkeghi ja nkoka. 4Ng'ombi ihakau na yeikombili yela, yakaimemini ng'ombi inyahi na yeinoniki yela. Bhela Falao akajumwike. 5Paakaghoni kabhete, akalotiki kabhete ndoto ja kabhele. Lingalya, akaweni mapukutu saba makolongwa na manyahi, ghakameliki mu lipei limu. 6Palongi akaweni mapukutu saba mapepandau, na ghaghajomishwi na mpongu ghoupyopa kuhuma kolipita lyobha. 7Mapukutu mapepandau ghala ghakaghamiliki mapukutu saba makolongwa na manyahi ghala. Na panihapa Falao akajumwiki kuhuma mulughono, na kumanya kumbi jakabhi ndoto pela. 8Pakwahiki lukela, Falao akabhi na mang'ahiku namaa muntima waki, akabhalohiki bhaganga bhokapi bha Misili, na bhabhabhi na mbulau, na kubhapwaghila ndoto yaki, nambu njeta hata jumu wabhu joakaweziki kuhyekula ndandi ya ndoto heyi.
9Bhela nkolongwa wa kughoha hindu ya kunywa yaka Falao akumpwaghile, “Lalenu naghakombwiki mahakau ghango. 10Chikahi chenihechi Falao akabhayomili bhatumika bhaki, akangongiki nepani papamu na nkolongwa wa kujocha mabumunda munyumba jaka nkolongwa wa manjolinjoli. 11Ikilu jimu tukalotiki ndoto, kila jumu akalotiki ndoto jake, na kila ndoto jakabhi na ndandi jake. 12Bhela, nkombo wa Kiebulania joakabhi papamu na tepani konihoku, akabhili mtumika waka nkolongwa wa manjolinjoli. Tukumpwaghili ndoto yitu, najombi akatulandili ndandi ja ndoto yitu, kila jumu witu kulengana na ndoto jake. 13Mambu ghakabhi bhelabhela ngati moakatulandile: Nepani nakakelawiki mu lihengu langu, nambu nkolongwa wa kujocha mabumunda jola akakomakiki na kunjenjela pa nguzu ja nkongo.”
14Bhela, Falao akalaghalakili Yusufu alowakikaje, najombi akabhohakiki muchifungu manyata. Akamoghiki na kung'anambula ingobhu yake, na kujenda palongi jaka Falao. 15Falao akumpwaghi Yusufu, “Notiki ndoto, wala njeta mundu hata jumu joaweza kujihyekula. Nanatu nyowini malobhi panani jako, kubha anaujowini ndoto, uweza kujihyekula.”
16Yusufu akamuyangiki Falao, akapwaghaje, “Ngachenhweza kuhyekula, nambu Chapanga anaampekya Falao liyangu la lukwale.”
17Falao akumpwaghi Yusufu, “Mu ndoto jangu nakalotiki kubha nakajemiki munkeghi ja nkoka Naili, 18nakaiweni ng'ombi saba, hinyahi na yeinenipe, yakapitiki kuhuma munkoka na kula manyonyole. 19Payapetiki yeniheyi nakaiweni ng'ombi yengi saba, ihakau na yeikombile. Nepani ngachenabhali kuibhona ng'ombi ihakau ya ntundu ghonihoghu mu inchi jokapi ja Misili. 20Ng'ombi yela yeikombile, na ihakau, yakaimiliki ng'ombi saba yela yeinenipe yeyapitali pakutumbula yela. 21Nambu hata payajomwi kuimila yeinoniki yela, njeta mundu joakaweza kupwagha kubha itehi kula, maghambu yakabhonakini yakali ihakau ngati pakutumbula. Bhela nakajumwike kuhuma mulughono. 22Kabhete nakalotiki ndoto jenge, nakaweni mapukutu saba ghaghatwelili na manyahi, ghakapitaje mu lipei limu. 23Paghapetiki ghanihagha ghakapitiki kabhete mapukutu ghangi saba, ghaghanyalike, mapepandau na ghaghajomishwi na mpongo ghoupyopa kuhuma kolipita lyobha. 24Mapukutu saba mapepandau ghala ghakaghamiliki mapukutu saba ghaghatweli ghala. Bhela, nepani nakabhapwaghi bhaganga ndoto yeniheyi, nambu njeta hata jumu wabhu joakaweziki kuhyekula ndandi jaki kwangu nepani.”
25Panihapa Yusufu akumpwaghi Falao, “Ndoto yaka Falao heyi ibhi na ndandi jimu. Chapanga amuyekulili Falao lijambu leanahengaje henu kateki. 26Ng'ombi saba hinyahi nde hyaka saba, na mapukutu saba manyahi ghala nde hyaka saba. Ndoto heyi ibhi na ndandi jimu. 27Na ng'ombi saba yeikombili yela, na ihakau yeyabhonakini palongi yela nde hyaka saba, bhelabhela mapukutu saba matopu ghaghajomishwi na mpongu ghoupyopa kuhuma kolipita lyobha, ndandi jaki nde hyaka saba ya injala ngolongwa. 28Nde ngati monumpwaghi Falao, kubha Chapanga andangihi Falao mambu ghaanahengaje henu kateki. 29Anakukubha na hyaka saba ya kubha na mahunu ghamaheli mu inchi jokapi ja Misili. 30Nambu palongi jaki anaijengalya hyaka saba ya injala ngolongwa, na kutupila kwokapi anakujewakikaje mu inchi jokapi ja Misili, na injala heji anaijiyonanga inchi jenu. 31Wala kutupila kwokapi ngakwimanyikani mu inchi jenu, maghambu injala ngolongwa jeanajihikaje anajikubha ngolongwa namaa. 32Na kihengu cha ndoto jaka Falao kuhika mala pabheli, nde maghambu lijambu leniheli Chapanga ajomwi kuamula, na Chapanga anaalitenda lipitalyaje henu kateki.
33“Bhela, sajenu Falao na alondaje mundu joabhi na malangu na mbulau nahuli ambekaje kubha njemalela wa inchi jokapi ja Misili. 34Kabhete, Falao impalika abhahaghulaje bhajemalela bha inchi jenu, abhalaghalakya bhabhonganaje pandu pamu pa nhwanu ja mahunu ghokapi gha Misili, mu hyaka saba ayeyi ya kutupila. 35Bhabhonganaje chilebhi chokapi mu hyaka saba ayeyi ya kutupila yeihika na kuchighoha pahi ja lujiniku lwaka Falao, chikubha akiba ja chilebhi mu michi jokapi. 36Chilebhi chenihechi anachikubha akiba ja inchi jenu kwa ndandi ja hyaka saba yeihika ya injala ngolongwa heyi, jeanajihikaje mu inchi jenu ja Misili, nahuli inchi ngajiyonangeka kwa injala ngolongwa.”
Yusufu apekewa lujiniku ku Misili
37Lilobhi leniheli lakabhi lambone palongi jaka Falao, na palongi ja bhatumika bhaki bhokapi. 38Bhela Falao akabhalaluki bhatumika bhaki, “Bho, tuweza le kumpata mundu jongi ngati ajoju, joabhi na Roho waka Chapanga mkati jake?” 39Panihapa Falao akumpwaghi Yusufu, “Kwa kubha Chapanga akuyekulili mambu aghagha ghokapi, njeta mundu jongi joabhi na malangu na mbulau ngati wehapa. 40Bhela, wehapa anaukubha njemalela wa nyumba jangu, na bhandu bhangu bhokapi anabhakubha pahi ja amuli yaku wehapa. Nepani pela nde nunkolongwa kupeta wehapa maghambu ndamila chitehu cha kikolongwa. 41Falao akumpwaghi Yusufu, ‘Lingalyaje, sajenu nukubheka kubha njemalela panani ja inchi jokapi ja Misili.’ ” 42Panihapa Falao akahuliki peti ja muhuli kuhuma mulukonji lwaki na kunhwatika mulukonji lwaka Yusufu. Akunhwatiki na ingobhu hinyahi, na kunhwatika mkufu wa zahabu muhingu jake. 43Falao akunkwehiki Yusufu pa ligali laki la kabheli la kuhutwa na falasi ngati njangatila waki. Na bhandu bhakalongulili palongi jaka Yusufu koni bhakajamalyaje, na kubhagha, “Nchikamaje pahi!” Bhenibhela nde Falao moakumbekili Yusufu kubha na lujiniku lukolongwa panani ja inchi jokapi ja Misili. 44Bhela Falao akumpwaghi Yusufu, “Nepani nde Falao, nambu panga lilobhi laku, mundu ngayijinula chiwoku au chigholu chaki mu inchi jokapi ja Misili.” 45Falao akundohiki Yusufu lihina la Kimisili, Sefenati Panea. Akuntoghukili Asenati mwali waka Potifela, mpenganyambiku wa muchi wa Oni, kubha nhwanu wake. Bhela, Yusufu akatumbwili kujenda mu inchi jokapi ja Misili. 46Yusufu akabhili na ukolongwa wa hyaka selasini, chikahi paakajemiki palongi jaka Falao nkolongwa wa Misili. Najombi Yusufu akabhokiki palongi jaka Falao, na kujenda mu inchi jokapi ja Misili. 47Mu hyaka saba ya kutupila yela, inchi jakapihiki mahunu ghamahdeli namaa. 48Yusufu akabhongini chilebhi chokapi hyaka saba yela mu inchi ja Misili. Mu kila muchi kukabhekakiki chilebhi chechapatakini mu mighonda jokapi jejiyongolota muchi ghonihoghu. 49Yusufu akabhongini ilebhe ngati luhanga lwa mumaheku, yamaheli namaa, hata bhakalepalili kubhalanga, maghambu chakabhi ngakuweza kubhalangika.
50Mangani ja kutumbula kwa hyaka ya injala ngolongwa yela, Asenati mwali waka Potifela, mpenganyambiku wa muchi wa Oni, akabhi ambelakile Yusufu bhana bhabheli bha chikambako. 51Yusufu akundohiki mwana waki wa kutumbula Manase, akapwaghaje, “Chapanga andendiki nyewaje mang'ahiku ghangu ghokapi na bhandu bhokapi bha munyumba jaka tati wango.” 52Mwana wa kabheli akundohiki Efulahimu, akapwaghaje, “Chapanga ambekihi lubheleku mu inchi ja mang'ahiku ghango.”
53Hyaka saba ya kutupila ku Misili yela yakajomwike. 54Na kutumbula hyaka saba ya injala ngolongwa, ngati bhela Yusufu moakapwaghile. Kukabhili na injala ngolongwa ku inchi yokapi, nambu mu inchi jokapi ja Misili kukabhili na chilebhe. 55Chikahi inchi jokapi ja Misili pajakamuliki na injala ngolongwa, bhandu bhakundelili Falao abhapekya chilebhe. Falao akabhapwaghi Bhamisili bhokapi, “Njendanyaje kwaka Yusufu, na lijambu lokapi leampwaghilaje, mlihengaje.” 56Injala pajajaghanili ku inchi jokapi ja Misili, Yusufu akahowili gholu ya ilebhe na kubhalombasela Bhamisili chilebhe, maghambu injala jakabhi ngolongwa namaa mu inchi jokapi ja Misili. 57Bhelabhela inchi yengi yokapi yakahikiki ku Misili kuhemela chilebhe kuhuma kwaka Yusufu, maghambu injala jakabhi ngolongwa namaa kundema wokapi.
Currently Selected:
Utumbulilu 41: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
