Utumbulilu 45
45
Yusufu alanda kubha jombi nde nane
1Panihapa Yusufu akalepalili kulihibhalila palongi ja bhokapi bhabhakabhi bhajemiki pambipi nako. Akajamalili na kupwagha, “Mumboha kila mundu palongi jango!” Bhela ngachepabhili na mundu jokapi jola papamu na Yusufu paakabhi alilandila kubha jombi nde nane palongi ja bhalongu bhake. 2Akaleliki kwa sauti ngolongwa, hata Bhamisili bhakajowine. Bhandu bha munyumba jaka Falao nabhombi bhakajowine. 3Yusufu akabhapwaghi bhalongu bhake, “Nepani nde Yusufu. Bho, tati wangu le akali mwome?” Nambu bhalongu bhaki ngachebhaweziki kumuyanga, maghambu bhakajingiwi na choghoi chikolongwa palongi jake. 4Yusufu akabhapwaghi bhalongu bhake, “Nhweghalyaje pambipi na nepane.” Pabhakaheghalile, akapwaghike, “Nepani nde ndongu winu Yusufu, jola jomwakundombisi ku Misili. 5Nambu sajenu, ngamwiyoma, wala ngamwalihakalila mabhete, kwa kunombesa kongone. Maghambu Chapanga nde joakanetiki kongoni nundongulyaje, nahuli kukengalela matamu gha bhandu. 6Chenjenu nde chaka cha kabhele kubha na injala ngolongwa pa inchi, kabhete kubhili na hyaka nhwanu ambayu bhandu ngabhiwezi kulema wala kuhuna mahunu. 7Nambu Chapanga akanongukili palongi jinu nahuli kughalenda mahighalilu ghinu pundema, na kunkengalela mwehapa kwa ukengaleku ukolongwa. 8Bhela nga mwehapa mwemnetiki kongone, nambu Chapanga. Jombi nde joandendiki kubha ngati atati kwaka Falao, na bambo mu nyumba jaki jokapi, na mtawala mu inchi jokapi ja Misili.
9“Henu ntenda manyata, nkelabhukaje kwaka tati wangu, na mukumpwaghilaje, lendenu nde leapwagha mwana waku Yusufu: ‘Chapanga andendiki nepani kubha bambo wa inchi jokapi ja Misili, bhela uhelalaje uhika kwango, wala ngawikabhakila. 10Nanawu anautamaje mu inchi ja Gosheni, anaukubha pambipi na nepani, wehapa na bhana bhaku, na bhachokolu bhaku, na mabhongelu ghaku gha mambeleli, imbuhi na ng'ombi, papamu na hindu yokapi yeubhi nayo. 11Ananungoha konihoko, maghambu ihighali hyaka yengi nhwanu yeihika ya injala ngolongwa. Nangabhela, wehapa na nyumba jaku, na bhokapi bhaubhi nabhu anabhapotila kwa injala ngolongwa.’ ”
12Yusufu akajendali kupwagha, “Mwehapa mabhete mbweni kwa mihu ghinu, na hata nnung'una wangu Benyamini aweni kwa mihu ghaki, kubha nde nepani Yusufu nenongela na mwehapa. 13Mukumpwaghila tati wangu panani ja utopelu wokapi ghombatiki koni ku Misili, na panani ja yokapi yemuiwene. Bhela mkatenda manyata kundeta tati wangu kongone.”
14Panihapa Yusufu akunjobhati Benyamini nnung'una waki na kulela, Benyamini najombi akunjobhatili, na kulela. 15Kabhete akabhajobhatili bhalongu bhaki bhokapi, na kulela nabhu. Na paghapetiki ghanihagha, bhalongu bhaki bhakatehi kulonge naku.
16Malobhi ghanihagha paghahikiki munyumba jaka Falao, kubha bhalongu bhaka Yusufu bhatehi kuhika, Falao na ihongozi bha pahi jake bhokapi bhakahekali namaa. 17Falao akumpwaghi Yusufu, “Ubhapwaghila bhalongu bhako, ‘Mtenda anana: Nkweha hibwahila panani ja maponda ghinu, na nkelabhukaje ku inchi ja Kanaani. 18Bhela mukuntolaje tati winu, na bhandu bha munyumba hinu bhokapi na kuhika nabhu kongone. Nepani ananumpekya pandu panyahi papabholalanile nakanope mu inchi jenjenu ja Misili, nanamu anamuhekalyaje unyahi wa inchi jeno.’ 19Bhelabhela andaghalakila, ‘Mtenda anana: Mtolaje kuhuma pambani pa Misili magali gha kuhutakika gha kubhaleta bhana bhinu bhachoku na akabhahanu bhinu, na mukuntola tati winu na kuhika naku pambane. 20Wala ngamwing'ahika panani ja hindu hino, maghambu ghamboni ghokapi gha inchi jenu ja Misili nde ghino.’ ”
21Bhela, bhana bhaka Izilaeli bhakahengiki bhenibhela. Yusufu akabhapeki magali gha kuhutakika ngati moakalaghalaki Falao, bhelabhela akabhapeki chilebhi kwa ndandi ja mwanja wabhu. 22Akabhapeki kila mundu ingobhu jahenu, nambu Benyamini, akumpeki ipandi mia tatu ya madini gha feza, na ingobhu nhwanu ya kung'anambula. 23Kabhete akumpelakili tati waki hindu hayeyi kwa ndandi ja mwanja wake: maponda komi ghaghatoliki hindu hinyahi ya ku Misili, maponda mambomba komi ghaghatotwi ilebhi, na mabumunda, na chilebhi chaka tati waki paikubha mu mwanja. 24Panihapa Yusufu akalaghini na bhalongu bhaki pabhakabhi bhabhoka, na kubhapwaghila, “Ngamwikomana mwindela.”
25Bhela, bhakabhokiki ku Misili, na kuhika ku inchi ja Kanaani kwaka Yakobo, tati wabhu. 26Bhakumpwaghi tati wabhu, “Yusufu akali mwome! Chakaka nde kubha jombi nde mtawala wa inchi jokapi ja Misili!” Panihapa mtima waka Yakobo ukazimie, na ngacheabhahobhalile.
27Nambu pabhakundandi mambu ghokapi ghaakapwaghiki Yusufu, na paakaghaweni magali gha kuhutakika Yusufu ghaakabhi ampelakile nahuli kuntola kujenda ku Misili, roho jaka Yakobo jakahyokike. 28Panihapa Izilaeli akapwaghike, “Nhobhalela! Mwanangu Yusufu akali mwome! Ananyenda kumbona mangane ngachembotile.”
Currently Selected:
Utumbulilu 45: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
