Bhalawi 13
13
Shelia kubhokana na itamu ya ngozi
1Bambo Chapanga akabhapwaghi Musa na Haluni, 2“Anakubhi mundu jokapi jola anachunhimbiki chindu au ikwanda au alama jihuhu panani ja ngozi jaki ambaju jiweza kubha chitamu cha ngozi cha kujambukila, ipalika aletakikaje kwaka Haluni mpenganyambiku au kwaka jumu wa bhana bhaki, joabhi bhapenganyambiku. 3Mpenganyambiku analingalya chinyuli hechi chechibhi panani ja ngozi jaka mundu hoju na ngati majunju gha pandu papabhi na chinyuli ghang'anambwiki kubha mahuhu, na anachibhi chinyuli chijingili mkati ja ngozi, bhela nde chitamu cha ngozi cha kujambukila, yani malohi. Chikahi mpenganyambiku anaandingalili, anaantangaza mundu hoju kubha nde mhakau kwa ntetu wa kujojabhela. 4Ngati chinyuli panani ja ngozi jaki nde chihuhu nambu ngachechibhonakini chijingi mkati nakanopi ja ngozi na majunju mu alama heji ngachejing'anambwiki kubha jihuhu, mpenganyambiku anaantenga mundu jonihoju pandu pakanjika kwa machobha saba. 5Lichobha la saba, mpenganyambiku anaandinga na ngati ngaibhoni ling'anambuku pa chinyuli chela na ngachechijaghanili panani ja ngozi, anaamtenga kwa machobha ghangi saba. 6Lichobha la saba mpenganyambiku anaandingalya kabheti, na ngati libaka liwiniki na ngachelijaghanili panani ja ngozi, mpenganyambiku anaantangaza mundu jonihoju kubha mnyahi, nde ikwanda pena. Impalika mundu hoju achapaje ingobhu yaki, najombi anakubha wichu. 7Nambu anakubhi chinyuli chela anachijaghani panani ja ngozi jaki paakajomwili kulilangiha kwaka mpenganyambiku na kutangazwa kubha abhi wichu, impalika ajendaje kabheti kwaka mpenganyambiku. 8Mpenganyambiku anaandinga na ngati ikwanda ijaghanili mu ngozi, anaantangaza kubha nde mhakau, nde chitamu cha ngozi cha kujambukila, yani malohi.
9“Ngati mundu jokapi anabhi na chitamu cha ngozi, impalika aletakika kwaka mpenganyambiku. 10Mpenganyambiku anaandingalyaje na ngati anachunhimbiki chindu chihuhu panani ja ngozi ambachu chuntendiki majunju kubha mahuhu na ngati kubhili na inyama jibhehi mkati ja chindu chechihimbiki hechi, 11chenihechi nde chitamu cha chikahi chilachu cha ngozi na mpenganyambiku anaantangazaje kubha mhakau. Ngaantengi kabheti, maghambu mundu jonihoju nde mhakau tayali.
12“Ngati chitamu hechi anachijaghani mu ngozi jaki jokapi ngati mpenganyambiku moanaweza kulola, kubha chijaghanili mu ngozi jokapi jaka mtamwa hoju kutumbu ku lutohutohu mbaka kulwaju, 13mpenganyambiku anaandingalya, na ngati chitamu hechi chijaghanili hyegha jokapi, anaantangaza mundu hoju kubha abhi wichu. Kwa kubha hyegha jokapi jibhi jihuhu, jombi abhi wichu. 14Nambu anakubhonakini mu hyegha jaka mundu hoju chilonda chibhehi, bhela mundu hoju anakubha mhakau. 15Mpenganyambiku analingalyaje chilonda chibhehi hechi na kuntangaza mundu hoju kubha mhakau, maghambu chenihechi nde chitamu cha malohi. 16Nambu chilonda hechi anaching'anabwiki kabheti kubha chihuhu, mundu hoju anajendaje kwaka mpenganyambiku. 17Mpenganyambiku anaandingalyaje, ngati chilonda hechi chibhi chihuhu, mpenganyambiku anaantangaza mundu hoju kubha abhi wichu.
18“Ngati mundu anaabhi na liputi, nalombi analilamiki, 19nambu pandu pala papakabhi na liputi anapahimbiki na kubha pahuhu au anapabhi pakeli, nambu pahuhu pachokopi, impalika kundangiha mpenganyambiku. 20Mpenganyambiku anaandingaje mundu hoju. Mpenganyambiku anaaweni pang'anambwiki kubha na libhomba na majunju gha pandu pala ghang'anambwiki kubha mahuhu, bhela mpenganyambiku anaantangaza mundu hoju kubha mhakau, chenihechi nde chitamu cha malohi ambaghu ghabhokini na liputi heli. 21Nambu ngati mpenganyambiku anaandingalili mundu hoju na kubhona kubha majunju gha pandu pala nga mahuhu na wala njeta libhomba, nambu patehi kuhiyala, bhela, anaantengaje mundu hoju kwa machobha saba. 22Ngati chitamu hechi anachijaghanila mu ngozi, bhela mpenganyambiku anaantangaza mundu hoju kubha mhakau, nde chitamu cha ngozi cha kujambukila. 23Nambu ngati pandu pala ngachepajaghanili, bhela, lenilela nde likumba la liputi pela. Mpenganyambiku anaantangazaje mundu hoju kubha abhi wichu.
24“Ngati mundu anapi moto pa ngozi jaki na kupitalila alama jejibhi na ukeli na uhuhu, au alama jihuhu jibhonakini pa inyama jibhehi pala papapile, 25mpenganyambiku anaapalingaje. Ngati anaapaweni kubha majunju ghang'anambwiki kubha mahuhu na pabhi na libhomba, bhela, chenihechi nde chitamu cha ngozi cha kujambukila ambachu chipitalili panani ya likumba la moto. Mpenganyambiku anaantangazaje mundu hoju kubha mhakau, kwa ndandi abhi na chitamu cha ngozi cha kujambukila. 26Nambu ngati mpenganyambiku anaaweni kubha majunju gha pandu pala nga mahuhu na njeta libhomba nambu patei kuhiyala, bhela, mpenganyambiku anaantengaje mundu hoju kwa machobha saba. 27Lichobha la saba mpenganyambiku anaandinga kabheti na ngati ujaghananila mu ngozi, mpenganyambiku anaantangazaje mundu hoju kubha mhakau, nde chitamu cha ngozi cha kujambukila. 28Nambu, ngati alama jela ngachejang'anambwiki na wala ngachejijaghanile mu ngozi na pombi patei kuhiyala, panihapa pahimbiki kubhokana na kupa moto, bhela mpenganyambiku anaantangazaje mundu hoju kubha abhi wichu, kwa ndandi leniheli nde likumba kubhokana na kupa moto.
29“Anakubhi mwanalomi au mbomba abhi na chilonda panani ja mmutu au pa chileu, 30mpenganyambiku anaachilingaje chilonda hechi na ngati anaaweni kubha chijingi mkati na majunju ghaghabhi panani jaki nde njano na ipepandahu, mpenganyambiku anaantangazaje mundu hoju kubha mhakau, kwa ndandi nde ikwanda, chenihechi nde chitamu cha ngozi cha kujambukila cha mmutu au chileu. 31Nambu ngati mpenganyambiku analingalili ntundu ghonihoghu wa chilonda, anakibhonakini kubha ngachekibhi na libhomba na njeta majunju mapili panani jaki, panihapa antengaje mundu hoju kwa machobha saba. 32Lichobha la saba mpenganyambiku anaandinga chilonda hechi, ngati ikwanda ngacheijaghanili na ngacheabhi na majunju gha manjanu panani jaki wala nga libhomba lokapi lela, 33mundu hoju impalika anamoghakikaje, nambu amoghakika pela pandu papabhili na chitamu, najombi mpenganyambiku anaantenga kwa machobha ghangi saba. 34Lichobha la saba mpenganyambiku anaandingalyaje kabheti chikwanda chela. Na ngati mpenganyambiku anaaweni kubha ikwanda heyi ngacheijaghanili mu ngozi na wala ngacheijingili mkati ja ngozi, bhela mpenganyambiku anaantangazaje mundu hoju kubha abhili wichu. Mundu hoju anaimpalika kuchapa ingobhu yaki, najombi anaakubha wichu. 35Nambu anakubhi ikwanda ijaghanili panani ja ngozi paakajomwili kuntangaza kubha abhi wichu, 36mpenganyambiku anaandingalyaje, na ngati ikwanda ijaghanili mu ngozi, mpenganyambiku ngaikubhi na ndandi ja kulingalila ngati kubhi na majunju gha manjanu, mundu jonihoju nde mhakau. 37Nambu anangati mpenganyambiku anaaweni kubha ikwanda heyi ilamiki na majunju mapili ghameliki pandu panihapa, bhela, hilonda heyi ilamike, bhela mundu hoju abhi wichu. Mpenganyambiku anaantangazaje mundu hoju kubha abhi wichu.
38“Anakubhi mwanalomi au mbomba abhi na alama jihuhu panani ja ngozi jaki, 39mpenganyambiku andingalyaje mundu hoju, anangati mpenganyambiku anaaweni kubha alama heji nde jihuhu pachokopi, yeniheyi nde hikwanda ya kuhiyala, mundu jonihoju abhi wichu.
40“Ngati mwanalomi apatiki lupanja, jombi abhi wichu, maghambu abhi na lupanja pena. 41Ngati lupanja holu lutumbwi kutumbula kunyuma mbaka palongi mundu hoju abhi na lupanja pena, na abhi wichu. 42Nambu ngati anaabhi na chilonda chechibhi na ukeli na uhuhu pa mmutu waki ghoubhi na lupanja au palongi ja pamihu, chenihechi nde chitamu cha ngozi cha kujambukila chechipitalila pamutu au palongi ja pamihu jaki. 43Mpenganyambiku anaandingaje, na ngati chilonda chechihimbiki panani ja mmutu waki au palongi ja pamihu jaki nde chikeli au chihuhu ngati chitamu cha ngozi cha kujambukila, 44bhela, mundu jonihoju nde mtamwa na jombi nde mhakau. Mpenganyambiku anaantangaza mundu hoju kubha nde mhakau kwa ndandi ja chilonda cha pamutu jaki.
45“Mundu joabhi na chitamu ngati chenihechi cha kujambukila impalika ahwata ingobhu yeikachwiki, ngawammogha majunju ghaki, uyekalyaje pandu pa pahi ja pamihu jaki na alapula njobhela, ‘Nepani nde mhakau! Nepani nde mhakau!’ 46Kwa chikahi chokapi cheanakubha na chitamu hechi cha kujambukila anahighalya kubha nde mhakau. Impalika atama kanjika jaki, jonihoju impalika atengakikaje kunja ja likambi.
Ingobhu yeibhi na ikwanda
47“Ngati ingobhu jokapi jela jibhi na majambukilu gha ikwanda, anakubhi ingobhu jejilenganakiki kwa mangoma gha limbeleli au ingobhu jinyahi jihuhu, 48jokapi jela jejilokakiki au kupotwa anajibhi ja ingobhu jinyahi jihuhu au ja mangoma gha limbeleli, chingokolu chokapi chela au chokapi chechilenganakiki kwa chingokolu, 49ngati madoa hagha ghabhi na langi ja mahamba au jikeli mu ingobhu jeniheji, bhela, ghanihagha nde madoa ghaghajaghanila na impalika mpenganyambiku aibhonaje. 50Mpenganyambiku anaalingalya madoa ghanihagha na kujibheka punkeghi ingobhu heji kwa machobha saba. 51Lichobha la saba mpenganyambiku anaalingalya madoa ghanihagha, na ngati madoa anaghajaghanili mu ingobhu heji, anakubhi ja kulokakeka au ja kupotwa au ja chingumba au ja chingumba cha ntundu wokapi ghola, ingobhu heji jibhi na malohi. Bhela ingobhu heji nde jihakau. 52Mpenganyambiku anaajijocha moto ingobhu heji, jikubhi ja mangoma gha limbeleli au ja kulokakeka, au ingobhu jinyahi jihuhu au kupotwa, au chombu chokapi chela cha ngozi chechibhi na majambukilu, kwa ndandi nde ikwanda yeijonanga, chombu chokapi chela chipalika chijochakika moto.
53“Nambu chikahi mpenganyambiku paachilingaje na kubhona kubha madoa ghala ngacheghajaghanili mu ingobhu jejilokakike au kupotwa, au hindu ya ingokolu, 54anaalaghalakya kubha chindu chechibhi na majambukilu chigholulikaje. Bhela anaachitengaje kwa machobha saba. 55Mpenganyambiku anaalingalya ingobhu heji anajichapakike. Ngati alama ngachejing'anambwiki langi jaki hata ngati madoa ngacheghajaghanili, bhela, ingobhu heji nde jihakau. Ingobhu heji ujijocha moto, hata ngati alama ja madoa anaghabhi kunyuma au kulongi ja ingobhu heji. 56Ngati mpenganyambiku anaaweni kubha alama jela jitei kuhiyala hata ngati ingobhu heji jitehi kuchapakika, bhela akachulaje pandu papajambukiwi pa ingobhu au chingumba au chindu chechilokakiki au kupotwa. 57Bhela, anangati alama jibhonakini kabheti panakatahi jaki mu ingobhu jejilokakiki au jejipotwiki au mu chindu chokapi cha ngozi, bhela madoa ghatei kujaghanila. Panihapa ingobhu heji ujijocha moto. 58Ingobhu, au chindu chechilokakiki au kupotwa, au chindu chokapi cha chingokolu ambachu chigholuliki na kubhohakeka madoa, ipalika chigholulika kabheti, nachombi anachikubha wichu.”
59Jeniheji nde shelia kubhokana na majambukilu gha madoa mu ingobhu yeilenganakiki kwa mangoma gha limbeleli au ingobhu inyahi ihuhu, yeilokakiki au kupotwa, au chindu chokapi cha chingokolu, kwa ndandi ja kuitangaza kubha ibhi wichu au ihakau.
Currently Selected:
Bhalawi 13: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.