Bhalawi 16
16
Lichobha la ujonganesu
1Bambo Chapanga akalongi na Musa baada ja kupotela kwa bhana bhabheli bhaka Haluni bhabhakapotili pabhakaheghalili palongi jaka Bambo Chapanga. 2Bambo Chapanga akumpwaghi Musa, “Umpwaghila ndongu waku Haluni ngayihika chikahi chokapi chela paapala jombi mkati ja Pandu Pahuhu Nakanopi, kunyuma ja lipazia kulongi ja chifuniku cha chiha, chechibhi panani ja Lisanduku la Lulaghilu, nangabhela anaapotilaje, kwa ndandi mbitalila mkati ja lihundi panani ja chifuniku cha chiha chela. 3Anana nde Haluni moanaimpalika kujingila Pandu Pahuhu Nakanopi: Atolaje litoli likambaku kwa ndandi ja nyambiku ja kubhoha mahoku, na limbeleli likambaku kwa ndandi ja nyambiku ja kujochakeka.”
4Inaimpalika kujogha machi, na kuhwata ingobhu jinyahi jihuhu. Anaajingala pandu panihapa koni akabya ahwati ingobhu ihuhu: Lijoho linyahi lihuhu, ingobhu ya mkati inyahi ihuhu, na koni akabya ahwati likanzu linyahi lihuhu, na kulikonga kwa ulamba wa ingobhu jihuhu muchibhunu chaki, na mbumbu jinyahi jihuhu kumutu jaki. 5Anaatola imbuhi mapongu ghabheli kuhuma kwa bhandu bha Izilaeli kwa ndandi ja nyambiku ja kubhoha mahoku na limbeleli likambaku kwa ndandi ja nyambiku ja kujochakeka.
6Haluni anaabhoha ng'ombi likambaku heli kwa ndandi ja nyambiku jaki ja kubhoha mahoku, nahuli atendaje ujonganesu kwa ndandi jaki mweni na bhandu bha munyumba jaki. 7Bhela, anaatola imbuhi mapongu ghabheli ghala na kughaleta palongi jaka Bambo Chapanga pundyangu wa Lihema Lihuhu. 8Anaalapula kula kwa ndandi ja imbuhi ibheli heyi, jimu kwa ndandi jaka Bambo Chapanga na jengi kwa ndandi ja kujipapakila mahoku na kupelekwa kwaka lijobhi Azazeli. 9Haluni anaaleta imbuhi lipongu lela lelihaghuliki kwa kula kwa ndandi jaka Bambo Chapanga, na kulibhoha kubha nyambiku ja kubhoha mahoku. 10Nambu imbuhi jejihaghuliki kwa kula kubha imbuhi jaka lijobhi Azazeli anajibhohakikaje koni jakabya jakali jomi palongi jaka Bambo Chapanga, nahuli jitumika kwa kutenda ujonganesu kwa kujileka jijendaje kulipololu, nahuli kubhoha mahoku gha bhandu bhokapi.
11Haluni anaaleta ng'ombi likambaku lela kwa ndandi ja nyambiku ja kubhoha mahoku ghaki mweni, nahuli kutenda ujonganesu kwa ndandi jaki na bhandu bha munyumba jaki, najombi analichinjaje likambaku la ng'ombi heli kwa ndandi ja nyambiku ja kubhoha mahoku ghaki mweni. 12Bhela anatola chetezu jejitwelili makalakala ghaghabhele moto kuhuma pandu pa kubhokeha nyambiku palongi jaka Bambo Chapanga na mahumbatu ghabheli gha ubani laini ghouyaghakiki na kunungi wichu, na kuipeleka kunyuma ja lipazia. 13Anaabheka ubani panani ja moto palongi jaka Bambo Chapanga, na lyohi la ubani anauyekalyaje chifuniku cha chiha chechibhi panani ja chiyekalelu cha Lisanduku la Lulaghilu, nahuli ngayihika kupotela. 14Anaatola pandu pachokapi pa mwahi wa ng'ombi likambaku lela na kujwiha lukonji lwaki na kumichila upambala wa kolipita lyobha panani ja chifuniku cha chiha, bhela anamichilaje palongi ja Lisanduku la Lulaghilu mala saba kwa lukonji lwaki.
15Bhela anaachinjaje lipongu la imbuhi ja nyambiku ja kubhoha mahoku jela kwa ndandi ja bhandu na kuupeleka mwahi wa lipongu heli kunyuma ja lipazia, na kutenda ngati moakatendi kwa mwahi wa likambaku la ng'ombi lela. Anamichilaje panani ja chifuniku cha chiha, upambala wa palongi jaki. 16Kwa indela ajeji anaatenda ujonganesu kwa ndandi ja Pandu Pahuhu Nakanopi kwa ndandi ja uhakau wabhu, kulepa kutii kwabhu Bhaizilaeli, na mahoku ghabhu ghokapi. Bhelabhela anaahenga bhenibhela kwa ndandi ja Lihema Lihuhu, ambalu libhi pachilanda ja bhandu bhanihabha bhahakau. 17Mundu jokapi ngacheapalika kubha mkati ja Lihema Lihuhu, kutumbula chikahi Haluni paajingila kutenda ujonganesu mu Pandu Pahuhu Nakanopi mbaka payipita kunja, chikahi anaajomwi kulitendela ujonganesu mweni, bhandu bha munyumba jaki papamu na lipogha lokapi la bhandu bha Izilaeli.
18Bhela anaapitaje na kujenda pandu pa kubhokeha nyambiku jela jejibhi palongi jaka Bambo Chapanga na kutenda ujonganesu kwa ndandi jaki. Anaatolaje pandu pachokopi pa mwahi wa ng'ombi likambaku na pandu pachokopi pa mwahi wa lipongu la imbuhi, na kuupaka mu manyelu gha pandu pa kubhokeha nyambiku. 19Haluni anaamicha mwahi wakumu panani ja pandu pa kubhokeha nyambiku ja kujochakeka kwa lukonji lwaki mala saba nahuli kupagholola na kupabheka palongi jaka Bambo Chapanga kubhokana na uhakau wa bhandu bha Izilaeli.
Imbuhi ja Azazeli
20Haluni payikubha ajomwili kutenda ujonganesu kwa ndandi ja Pandu Pahuhu Nakanopi, Lihema Lihuhu na pandu pa kubhokeha nyambiku, anaaletaje palongi lipongu la imbuhi kwa ndandi jaka Azazeli, koni jakabya jomi. 21Haluni anaabheka mabhoku ghaki ghabheli panani ja mmutu wa imbuhi jejibhi jomi na kujetakela panani jaki uhakau wokapi, kulepa kutii kwa Bhaizilaeli, yani mahoku ghabhu ghokapi, nahuli kughabheka panani ja mmutu wa imbuhi heji. Panihapa anaajilekakya imbuhi heji nahuli jitililaje kulipololu, kwa kulolakewa na mundu joapekiwi lihengu leniheli. 22Anaajilekakya imbuhi jela jijendaje kulipololu, pandu pangakubha na bhandu, jakabya jitoliki mahoku ghokapi gha bhandu, na mundu jola anajilekakyaje likembalyaje kulipololu.
23“Bhela Haluni anajendaje mkati ja Lihema Lihuhu na kuhula ingobhu jinyahi jihuhu jela jeakahwatiki mangani ja kujingila Pandu Pahuhu Nakanopi, na kuileka panihapa. 24Anaajogha mkati mu Pandu Pahuhu na kuhwata ingobhu yaki. Bhela anaapitaji na kubhoha nyambiku ja kujochakeka kwa ndandi jaki mweni, na nyambiku ja kujochakeka kwa ndandi ja bhandu bha Izilaeli, nahuli kutenda ujonganesu kwa ndandi jaki mweni, na kwa ndandi ja bhandu bhokapi. 25Bhelabhela anaajocha mahuta gha chinyama cha nyambiku ja kujochakeka panani ja pandu pa kubhokeha nyambiku ja kujochakeka. 26Mundu jola joalihindaki lipongu la imbuhi laka Azazeli jola, kutumbula achapa ingobhu yaki, na kujogha machi, panihapa nde anaaweza kujingila mu likambi. 27Ng'ombi likambaku lela na lipongu la imbuhi yeyabhohakiki kwa ndandi ja nyambiku ya kubhoha mahoku, ambayu mwahi wabhu ukabhi uletakiki Pandu Pahuhu Nakanopi kwa ndandi ja kutenda ujonganesu, ipalika ipihakika kunja ja likambi. Ingokolu yabhu, inyama, na matumbu ghaki papamu na imahi anaijochikika kwa moto. 28Mundu jola joanayijochaje achapa ingobhu yaki, na kujogha machi, panihapa anaaweza kujingila mu likambi.
Uwangalalu wa ujonganesu
29“Haleli analikubha lilaghalakilu la mileli kwa ndandi jinu: Mu lichobha la komi la mwehi wa saba, impalika nkongaje, na ngamwihenga lihengu lokapi lela, akubhi mbelakeka au ngeni jokapi jola joatama pachilanda jinu, 30kwa ndandi lichobha leniheli ujonganesu anautendakikaje kwa ndandi jinu, nahuli kungolola. Bhela, mwehapa anamgholulikaje palongi jaka Bambo Chapanga, kubhokana na mahoku ghinu ghokapi. 31Lichobha leniheli nde Sabato ja kupomulela, impalika nkongaje, jeniheji nde amuli ja mileli. 32Mpenganyambiku joapakakiki mahuta na kubhekakeka palongi jaka Chapanga nahuli kutola pandu paka tati waki ngati mpenganyambiku nde joanatenda ujonganesu. Impalika ahwataje ingobhu jinyahi jihuhu, 33na kutenda ujonganesu kwa ndandi ja Pandu Pahuhu Nakanopi, Lihema Lihuhu na pandu pa kubhokeha nyambiku ya kujochakeka. Bhelabhela anaatenda ujonganesu kwa ndandi ja bhapenganyambiku, papamu na lipogha lokapi la bhandu bha Izilaeli.
34“Jeniheji anajikubha amuli ja mileli kwinu. Ujonganesu anautendakika mala punkamu pena kwa chaka kwa ndandi ja mahoku ghokapi gha bhandu bha Izilaeli.”
Bhenibhela nde mokwahengakike, ngati Bambo Chapanga moakundaghalaki Musa.
Currently Selected:
Bhalawi 16: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.