Bhalawi 17
17
Kukanakiwa kula mwahi
1Bambo Chapanga akumpwaghi Musa, 2Umpwaghila Haluni na bhana bhaki, na bhandu bhokapi bha Bhaizilaeli amuli ayeyi: Haleli nde lealaghalakile Bambo Chapanga: 3Ngati mundu jokapi jola pachilanda ja Bhaizilaeli anabhohiki nyambiku ja lipongu la ng'ombi au mwanalimbeleli au imbuhi mkati ja likambi au kunja ja likambi, 4wala ngachealiletiki pundyangu wa Lihema Lihuhu, nahuli kuleta kubha ngati nyambiku kwaka Bambo Chapanga palongi ja Nyumba jaka Bambo Chapanga, mundu jonihoju anabhalangika kubha na mahoku gha kukoma, na mundu jonihoju anatengakika kutali na bhandu bhaki. 5Ndandi ja amuli jenjenu nde kubha Bhaizilaeli ibhapalika bhundetila Bambo Chapanga nyambiku ja kujochakeka yebhatenda sajenu pandu palanga kumighonda. Ibhapalika bhaletaje kwa bhapenganyambiku, yani kwaka Bambo Chapanga, pundyangu wa Lihema Lihuhu na kubhoha nyambiku ja kujochakeka ngati nyambiku ja kutama kwa lukwale. 6Najombi mpenganyambiku anamichila mwahi panani ja pandu pa kubhokeha nyambiku paka Bambo Chapanga, pundyangu wa Lihema Lihuhu, na kughajocha mahuta ghala, ghakubha unungilu unyahi wa kunyambiha Bambo Chapanga. 7Bhela Bhaizilaeli anabhakotuka kubhoha nyambiku kwa ichapanga nayengi yeilengana na imong'umong'u ya imbuhi, lijambu ambalu labhatendiki bhalepa kubha na ulongwana kwaka Bambo Chapanga. Hajeji anajikubha amuli ja mileli kwa ibheleku yabhu yokapi yeihika.
8Ubhapwaghilaje: Mundu jokapi jola pachilanda ja Bhaizilaeli au ngeni joatama pachilanda jabhu, joabhoha nyambiku ja kujochakeka au nyambiku yengi, 9panga kuleta pundyangu wa Lihema Lihuhu nahuli kubhoha nyambiku kwaka Bambo Chapanga, mundu jonihoju impalika atengakika kutali na bhandu bhaki.
10Ngati mundu jokapi jola pachilanda ja Bhaizilaeli au ngeni joatama pachilanda jabhu, anaakuliki mwahi, wa ntundu wokapi ghola, nepani ananunkana mundu jonihoju joakula mwahi, na kuntenga kutali na bhandu bhaki. 11Maghambu womi wa chiumbi ubhi mkati ja mwahi, nanatu numpekihi mwahi hoghu nahuli mtendilaje ujonganesu kwa ndandi jinu mabheti panani ja pandu pa kubhokeha nyambiku. Mwahi nde ghouhenga ujonganesu kwa ndandi ja matamu ghaka mundu. 12Kwa ndandi jeniheji, nabhapwaghi bhandu bha Izilaeli, “Njeta mundu hata jumu pachilanda jinu joapalika kula mwahi, wala ngeni joatama pachilanda jinu ngacheapalika kula mwahi.”
13Mundu jokapi jola pachilanda ja Bhaizilaeli au ngeni joatama pachilanda jabhu anapiti kubhenga chinyama au chijuni, chechipalika kula impalika ajitala mwahi pahi na kuyelalela kwa luhombi. 14Maghambu womi wa kila chiumbi ubhi mu mwahi waki. Nde ndandi nabhapwaghi bhandu bha Izilaeli, “Ngamwikula mwahi wa chiumbi chokapi chela ng'o, maghambu womi wa kila chiumbi ubhi mkati ja mwahi waki. Mundu jokapi jola joanakula mwahi impalika atengakika kutali na bhandu bhaki.”
15Mundu jokapi jola akubhi mbelekeka au ngeni, joanakula chindu chokapi chela chechiwi cheni, au chechikomakiki na chinyama cha muchitengu, impalika achapa ingobhu yaki na kujogha machi, najombi anakubha mhakau kwa ntundu wa ibada mbaka pakamihi, panihapa anakubha wichu. 16Nambu ngati ngacheachapiki ingobhu yaki na kujogha machi, mundu jonihoju anaimpalika kutemuliwa kwa lihoku laki.
Currently Selected:
Bhalawi 17: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.