Bhalawi 18
18
Kuhimangana kihyegha chihanganyuma cha shelia
1Bambo Chapanga akumpwaghi Musa, 2Ubhapwaghila bhandu bha Izilaeli anana, “Nepani nde Bambo Chapanga, Chapanga winu. 3Ngamwitenda ngati mobhatende bhandu bha ku inchi ja Misili, pandu pamukabhi mtama, wala ngamwitenda ngati mobhatende bhandu bha ku inchi ja Kanaani, pandu panumpeleka. Ngamwijengalela matendu ghabhu ng'o. 4Mwehapa impalika kughakamula malaghalakilu ghangu, amuli yangu, na kuijengalela. Nepani nde Bambo Chapanga, Chapanga winu. 5Bhela, nkamulaje amuli yangu na shelia yangu, maghambu mundu joakamula anaatama kwa yeniheyi. Nepani nde Bambo Chapanga.”
6Mundu jokapi wa Izilaeli ngacheapalika kunheghalela ndongu waki wa pambipi nahuli kughone naku kihyegha. Nepani nde Bambo Chapanga.
7Ngawanhekatela utopelu tati waku kwa kughone kihyegha na mabhu waku wa kukubheleka. Jombi nde mabhu waku, bhela, ngawihenga naku kihengu chenihechi.
8Ngawighone kihyegha na nhwanu waka tati waku, kuhenga bhenibhela anakuhekata utopelu waka tati waku. 9Ngawighone chihyegha na ndombu waku, akubhi nde ndombu waku wa lutumbu lumu au ndombu waku kwaka mabhu jongi. 10Ngawighone kihyegha na nchokolu waku wa chimbomba, mwana waka mwana waku au kamwali waku, maghambu kuhenga bhenibhela unakuhekata utopelu waku. 11Ngawighone kihyegha na mwali joabhelakiki na mabhu waku najongi joatoghuliki na tati waku. Mwali jonihoju nde ndombu waku. 12Ngawighone kihyegha na anihenga waku, maghambu jonihoju nde ndombu waka tati waku. 13Ngawighone kihyegha na ndombu waka mabhu waku ng'o, maghambu jonihoju nde ndongu wa pambipi waka mabhu waku. 14Ngawighone kihyegha na nhwanu waka tati waku nkolongwa au waka tati waku nchoku, maghambu jonihoju nde mabhu waku. 15Ngawighone kihyegha na nhwanu waka mwana waku, maghambu jonihoju nde nhwanu waka mwana waku. Ngawihenga naku kihengu chenihechi. 16Ngawighone kihyegha na nhwanu waka mbeli waku, maghambu jonihoju nde ndamu waku. 17Ngawighone kihyegha na mbomba, kabhete na mwali waki. Ngawighone kihyegha na mwali waka mwana waki wa chikambaku au mwali waka mwali waki. Bhanihabha nde bhalongu bhaki bha pambipi. Kuhenga bhenibhela nde uhakau. 18Ngawantoghola ndombu waka nhwanu waku chikahi nhwanu waku akali mwomi, kuhenga bhenibhela anakuleta malochanu.
19Ngawanheghalela mbomba nahuli kuhimangana naku kihyegha chikahi cha machobha ghaki gha kumwehi. 20Ngawihimangana kihyegha na nhwanu waka njaku, na kulijeghe uhakau kwaki. 21Ngawamboha mwana waku jokapi jola kubha nyambiku kwaka kichapanga Moleki, maghambu kuhenga bhenibhela anaulitondula lihina langu nepani Chapanga waku. Nepani nde Bambo Chapanga, Chapanga waku. 22Ngawighone kihyegha na mwanalomi njaku, ngati mouhimanganila na mbomba, leniheli nde lihakalilu. 23Ngawighonela kihyegha na chinyama, na kulijeghe uhakau kwaki. Wala mbomba ngaalipeleka kwa chinyama nahuli kughone naku kihyegha, konihoku nde kuhobha.
24Ngamwalijeghe uhakau kwa indela jokapi jela kwa kuhenga mambu ghanihagha, maghambu mambu ghanihagha nde ghaghandenda nabhatopula bhandu bha inchi yeibhi palongi jinu, ndandi bhombi bhaghahenga ghanihagha na kulijeghe uhakau. 25Hata inchi jakajeghaliki uhakau, bhela nakajilapwili kwa mahoku ghaki, najombi inchi jakabhatapiki bhandu bhaki. 26Nambu mwehapa na bhagheni bhabhatama pachilanda jinu impalika kukamula amuli yangu na shelia yangu, wala ngamwihenga hata limu la mahakalilu ghanihagha. 27Kwa kubha mambu ghanihagha ghokapi ghakahengakiki na bhandu bhabhakatami mu inchi ja Kanaani mangani jinu, na inchi jakabhi jihakau. 28Bhela, mwehapa ngamwihenga mambu ghanihagha, nangabhela inchi jenjenu anajunkana ngati mojakabhakani bhandu bha inchi bhabhakabhi bhatama monihomu mangani jinu mwehapa. 29Kila mundu joanatendaje limu la mahakalilu ghanihagha, bhandu bhanihabha ibhapalika bhatengakika kutali na bhandu bhabhu.
30“Nkamula malaghalakilu ghangu, wala ngamwijengalela ntetu wa mahakalilu ghokapi ghala ghaghatendakiki mangani ngachemuhikiki mu inchi jenjenu, na kulijegha uhakau kwa ghanihagha. Nepani nde Bambo Chapanga, Chapanga winu.”
Currently Selected:
Bhalawi 18: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.