Bhalawi 19
19
Shelia patali patali
1Bambo Chapanga akumpwaghi Musa, 2Ulongila na lipogha lokapi la bhandu bha Izilaeli anana, “Mkubha bhahuhu, maghambu nepani Bambo Chapanga, Chapanga winu, nde mhuhu. 3Kila jumu winu impalika antopila mabhu waki na tati waki, na impalika kuikamula Sabato yangu. Nepani nde Bambo Chapanga, Chapanga winu.”
4“Ngamwijojabhela imong'umong'u, wala ngamwalilenganakela ichapanga ya shaba. Nepani nde Bambo Chapanga, Chapanga winu.
5“Pamboha nyambiku ja chinyama ja kujochakeka na nyambiku ja kutama kwa lukwali kwaka Bambo Chapanga, mbohaje kwa ntundu ghoupalika nahuli mpata kujetakalewa. 6Nyambiku jeniheji nkula mu lichobha leleli lemboha au chilabhu jaki. Chokapi chechihighalyaje mbaka lichobha la katatu chipalika chijochakika kwa moto. 7Ngati pandu pokapi pala pa nyambiku heji anajilelakiki mu lichobha la katatu, chihengu chenihechi nde lihakalilu, na nyambiku heji ngajijetakalewi. 8Mundu jokapi jola joanakulaje inyama heji anakubha mhakau, kwa ndandi achihakihi chindu chechibhi chihuhu kwaka Bambo Chapanga. Mundu jonihoju ipalika atengakika kutali na bhandu bhaki.
9“Chikahi pauhuna mahunu ghaku gha inchi jaku, ngawihuna mbaka mu malindakanilu gha ngonda waku, wala ngawibhongana mahighalilu gha mahunu ghaku. 10Ngawikelabhukila mala ja kabheli mu ngonda waku wa mizabibu, wala ngawitondola zabibu yeihawiki pahi. Ilekaje kwa ndandi ja akahochu na bhagheni. Nepani nde Bambo Chapanga, Chapanga winu.
11“Ngawijibha, wala ngawikoloha, wala ngawipwaghani upuhe. 12Ngawilapa kwa upuhi kwa lihina langu, na bhela kulijeghe uhakau lihina laka Chapanga waku. Nepani nde Bambo Chapanga.”
13“Ngawitola chindu chaka njaku kwa makili, wala ngawanjibhi njaku. Ngawikamulakila malepu ghaka ntumika waku ikilu kelukelu mbaka lukela. 14Ngawampekeha masolu ngajowa, wala ngawibheka chihibhalakilu palongi jaka ngalola, nambu unjoghupa Chapanga waku. Nepani nde Bambo Chapanga.”
15“Paubhoha utemulu ubhohaje ngati moipalakila, ngawampendalela kahochu, wala kumpendalela joabhi na cheu, nambu untemula njaku ngati moipalakila.
16“Ngawijenda hakoku na kola koni ukalanda ukolukelu pachilanda ja bhandu bhaku. Ngawitenda chindu chokapi chela cha kughatenda matamu ghaka njaku kubha muhatali ja kupotela. Nepani nde Bambo Chapanga.
17“Ngawanhakalila njaku muntima waku, nambu ujongana na njaku chikahi chokapi nahuli ngawihika kutenda mahoku kwa ndandi jaki. 18Ngawikelabhukila uhakau kwa uhakau, wala kumuyomela jumu wa bhandu bhaku muntima waku, nambu umpala njaku ngati moulipali wamwete. Nepani nde Bamabo Chapanga.
19“Impalika kukamula amuli yangu. Ngawaileka hinyama yaku ya kudima ibhelakanaje na hinyama ya ntundu naghongi. Ngawipanda imbeju ya ntundu ubheli mu ngonda waku. Ngawiwata ingobhu jejilokakiwi kwa uzi wa langi ibheli patali patali.
20“Ngati mwanalomi anaghonili kihyegha na mbomba ambaju nde kamwali ntumwa joabhohakiki hweku na mwanalomi jongi, nambu akali ngacheakombuliwi wala ngacheabhi wa kulijeka, ipalika pakubhaje na utemulu ghoupalika. Hata bhela ngabhikomakeka, maghambu mwali hoju akabhi akona ngacheabhekakiki wa kulijeka. 21Hata bhela mwanalomi jonihoju impalika aleta limbeleli likambaku pundyanu wa Lihema Lihuhu kwa ndandi ja nyambiku ja kubhoha mahoku kwaka Bambo Chapanga. 22Papamu na limbeleli likambaku la nyambiku ja kubhoha mahoku, mpenganyambiku anatenda ujonganesu kwa ndandi jaki palongi jaka Bambo Chapanga kwa ndandi ja mahoku ghaatendiki mundu hoju, najombi mundu hoju analekakiwaje mahoku ghaki.
23“Pamwijingala mu inchi heji na kupanda ntundu wokapi ghola wa mikongu ja mapambiku, ngamwikula mapambiku ghaki. Kwa chikahi cha hyaka itatu mughabhalanga mapambiku hagha kubha ngati ghatehi kukanakiwa, ngamwikula mapambiku ghanihagha. 24Mu chaka cha kachechi mapambiku ghokapi gha nkongu ghonihoghu anaghakubha mahuhu, kwa ndandi ja nyambiku ja kundumbalila Bambo Chapanga. 25Nambu mu chaka cha kahanu muweza kula mapambiku gha nkongu ghonihoghu. Anamtendiki bhenibhela mahunu ghinu anaghajonjukikaje. Nepani nde Bambo Chapanga, Chapanga winu.
26“Ngamwikula inyama jokapi jela jejibhi na mwahi mkati jaki. Ngamwilondola, wala ngamwihenga uhabhi. 27Majunju gha mmutu ngaghimoghakeka lipanki, wala kumogha munkeghi ja indehu hinu. 28Ngamwilemba nembu hyegha hinu kwa ndandi ja bhakuwa, wala ngamwichola alama jokapi jela yani tatuu panani ja hyegha hinu. Nepani nde Bambo Chapanga.
29“Ngawampoha lihamu mwali waku kwa kuntenda kubha nkemi, nangabhela inchi anajing'anambukya ukemi na kutwelela uhakau. 30Ukamulaje Sabato yangu, na kupatopela pandu pangu pahuhu. Nepani nde Bambo Chapanga.
31“Ngamwijenda kwa bhabhabhi na majobhi, wala bhahabhi, nahuli kubhalobha bhundondulyaje, na bhela kulijeghe uhakau. Nepani nde Bambo Chapanga, Chapanga winu.
32“Paukubha palongi jaka hokomundu ujemaje, kulangiha utopelu kwa bhacheya, nanau unjoghupa Chapanga waku. Nepani nde Bambo Chapanga.
33“Ngati anakubhi na ngeni mu inchi jaku ngawanhengela lihaha. 34Ngeni joatama papamu na wehapa ipalika unhengila ngati jumu wa bhabhelakeka bha inchi jaku. Umpala ngati moulipali wamwete, kwa ndandi nanau ukabhi ungeni ku inchi ja Misili. Nepani nde Bambo Chapanga, Chapanga winu.
35“Ngawitumila hipemu ya kukoloha paupema hipemu ya ulachu, paupema kutopa, wala paupema wamaheli. 36Utumila chipemu cha chakaka, maganga gha kupemela kutopa ghakubha gha chakaka, efa ja chakaka, na hini ja chakaka. Nepani nde Bhambo Chapanga, Chapanga winu, nenumbohiki kuhuma ku inchi ja Misili. 37Nkamulaje shelia yangu yokapi, na amuli yangu yokapi, na kuitenda. Nepani nde Bambo Chapanga.”
Currently Selected:
Bhalawi 19: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.