Bhalawi 20
20
Utemulu kwa ndandi ja mahoku
1Bambo akumpwaghi Musa, 2Ubhapwaghila Bhaizilaeli anana, “Muizilaeli jokapi jola au ngeni joatama mu Izilaeli, joanaamboha jokapi pachilanda ja bhana bhaki kubha nyambiku kwa kichapanga Moleki, mundu jonihoju impalika kukomakeka. Bhenehi bha inchi jeniheji anabhunkoma kwa kundapu maganga. 3Nepani ananiyomaje kwa ndandi jaka mundu jonihoju, na kuntenga kutali na bhandu bhaki. Kwa ndandi akumbohiki jumu wa bhana bhaki kubha nyambiku kwaka kichapanga Moleki, na bhela kupahakaha pandu pangu pahuhu, na kulijeghe uhakau lihina langu lihuhu. 4Ngati bhenehi bha pandu panihapa ngabhantemuli mundu jonihoju kwa kunkoma, chikahi paanaamboha jumu wa bhana bhaki na kumpekeha kichapanga Moleki, 5nepani namweti ananimuyomila mundu hoju papamu na bhandu bha munyumba jaki. Ananabhatenga kutali na bhandu bhabhu, jombi papamu na bhandu bhokapi bhabhatendiki ukemi na kichapanga Moleki.
6“Mundu jola joabhajendela bhabhabhi na majobhi, na bhahabhi, nahuli kulobha ujangatilu kwabhu, ananimuyomilaje mundu hoju, na kuntenga kutali na bhandu bhaki. 7Bhela, muligholulaje, nanamu anamkubha bhahuhu, maghambu nepani nde Bambo Chapanga, Chapanga winu. 8Nkamulaje amuli yangu na kuitenda. Nepani nde Bambo Chapanga, nenuntenda mwehapa kubha bhahuhu.”
9Anakubhi mundu jokapi andobhela masolu tati waki au mabhu waki, impalika akomakikaje. Ampekihi masolu tati waki au mabhu waki, bhela mwahi waki anaukubha panani jaki mweni.
10Ngati mwanalomi anatenda ugone na nhwanu waka njaki, ibhapalika bhokapi bhabheli bhakomakikaje.
11Mwanalomi anaghonile kihyegha na nhwanu waka tati waki, ngacheantopili tati waki. Mwanalomi jonihoju na mbomba jonihoju bhokapi bhabheli bhakomakikaje. Mwahi wabhu anaukubha panani ja mimutu jabhu bheni. 12Ngati mwanalomi jokapi jola anaghoni kihyegha na nhwanu waka mwana waki, bhokapi bhabheli ibhapalika bhakomakikaje. Chebhatendiki nde chihakau namaa, na mwahi wabhu anaukubha panani ja mimutu jabhu bheni.
13Ngati mwanalomi anaghoni kihyegha na mwanalomi njaki ngati bhela mwanalomi moatendela kwaka mbomba, akanalomi bhokapi bhabheli habha bhatendiki lelibhi lihakalilu namaa. Chakaka ibhapalika bhakomakikaje, na mwahi wabhu anaakubha panani ja mimutu jabhu bheni. 14Ngati mwanalomi anaantowili mwali papamu na mabhu waka mwali hoju, ghonihoghu nde uhakau. Bhokapi bhatatu ibhapalika bhajochakika kwa moto, nahuli ngakwikubha na uhakau pachilanda jinu. 15Ngati mwanalomi anaghoni kihyegha na chinyama, mwanalomi hoju impalika akomakikaje, bhelabhela na chinyama hechi ipalika chikomakikaje. 16Ngati mbomba anaachiheghalili chinyama na kughonela nachu kihyegha, munkoma mbomba hoju papamu na chinyama hechi. Ipalika mbomba hoju akomakikaje na chinyama chikomakikaje, na mwahi wabhu anaukubha panani ja mimutu jabhu.
17“Ngati mwanalomi jokapi jola anaantowi ndombu waki, mwali joabhelakiki na tati waki au mabhu waki, nabhombi anabhaghoni kihyegha, leniheli nde lihakalilu. Ibhapalika kutengakeka kutali na bhandu bhabhu. Mwanalomi hoju ampohiki lihamu ndombu waki, bhela anatemulikaje kwa lihoku leniheli. 18Ngati mwanalomi anaghoni kihyegha na mbomba joabhi mu lichobha la ntetu wa kimbomba, bhokapi bhabheli ibhapalika kutengakeka kutali na bhandu bhabhu, maghambu mwanalomi hoju aghoni na mbomba joabhi mu lichobha la ntetu wa chimbomba, na mbomba hoju aghoni na mwanalomi akabya mu lichobha la ntetu wa chimbomba.
19“Ngawighone kihyegha na ndombu waka mabhu waku, wala nihenga waku, kwa ndandi leniheli analabhapoha lihamu bhandu bha pambipi jaku. Bhokapi bhabhahenga bhenibhela anabhatemuliwaje kwa ndandi ja uhakau wabhu. 20Ngati mwanalomi anaghoni kihyegha na nihenga waki, jonihoju ampohiki lihamu ndomi waka nihenga waki. Nabhombi anabhatemulikaje kwa lihoku leniheli, bhokapi bhabheli anabhapotilaje panga kubheleka mwana. 21Ngati mwanalomi anaantowili nhwanu waka ndongu waki, leniheli nde litendu lihakau, na ampohiki lihamu ndongu waki, bhokapi bhabheli anabhapotilaje panga kubheleka mwana.
22“Bambo Chapanga akapwaghike, ‘Impalika kutii amuli yangu yokapi, na shelia yangu yokapi, na kuijengalela, nahuli inchi jenundeta kutama ngajunkana. 23Ngamwitama kwa kujengalela mitetu ja bhandu bha inchi nayengi bhanabhatopola palongi jinu. Maghambu bhombi bhakahengiki mambu ghanihagha, nanatu nakabhahakali namaa. 24Nambu nukumpwaghi mwehapa, “Anamtama mu inchi jabhu, nanatu ananumpekya mwehapa kubha inchi jinu, inchi jinyahi kwa kulema na kudima.” Nepani nde Bambo Chapanga, Chapanga winu, nenuntengiki kuhuma kwa bhandu bha inchi nayengi. 25Bhela, impalika kuhaghula pachilanda ja hinyama hinyahi na hinyama ihakau, bhelabhela pachilanda ja hijuni hinyahi na hijuni ihakau. Ngamwalijeghe uhakau kubhokana na chinyama chokapi chela, au chijuni, wala chindu chokapi chela chechikwabha panani ja inchi, yela yenitengiki kubha nde ihakau kwa ndandi jinu. 26Anankubha bhahuhu kwangu, maghambu nepani Bambo Chapanga, nde mhuhu, nanatu nuntengiki kuhuma kwa bhandu bha inchi nayengi nahuli mkubha mabhandu bhangu.
27“ ‘Mwanalomi au mbomba jokapi jola joabhi nhwabhi, impalika akomakikaje kwa kulapulika na maganga. Mubhalapula kwa maganga, na mwahi wabhu anaukubha panani ja mimutu jabhu bheni.’ ”
Currently Selected:
Bhalawi 20: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.