Bhalawi 22
22
Uhuhu wa nhupu
1Bambo Chapanga akumpwaghi Musa: 2Umpwaghila Haluni na bhana bhaki bhapenganyambiku bhaitopilaje hindu ambayu Bhaizilaeli bhaibhekiki palongi jaka Chapanga, nahuli ngabhalijeghe uhakau lihina langu lihuhu. Nepani nde Bambo Chapanga. 3Ubhapwaghila anana: Mu hibheleku yeihika, anakubhi mundu jokapi jola pachilanda ja bhabhelakeka bhaku nde mhakau kwa ntetu wa kujojabhela, najombi anaajiheghali nyambiku jihuhu jebhaleta bhandu bha Izilaeli palongi jaka Bambo Chapanga, mundu jonihoju anaatengakika kutali na nepani. Nepani nde Bambo Chapanga.
4“Mundu jokapi jola mu chibheleku chaka Haluni anaabhi na chitamu cha ngozi chekijambukila, au ngati apitwa na uhila muhyegha, ngayiwezi kula nyambiku jihuhu mbaka agholulikaje. Bhelabhela anakubha mhakau ngati anaagusiki chindu chokapi chela chechibhi chihakau kwa kugusa mtuhi au mundu joapitikwi na imbeju yaki, 5au ngati anaagusiki chindu chokapi chela chechikwabha chechuntenda mundu kubha mhakau, au mundu jokapi joaweza kunjeghe uhakau, kwa uhakau wa ntundu wokapi ghola. 6Mundu joakamula chindu chokapi chela cha ntundu ghonihoghu anakubha mhakau mbaka pakamihe. Ngayikuli nyambiku jokapi jela jihuhu ng'o, mbaka akubha ajoghiki machi. 7Chikahi lyobha palijibhalaje panihapa anakubha wichu. Anajomwili kutenda ghanihagha anaweza kula ilebhi ihuhu, kwa ndandi chenihechi nde chilebhi chaki. 8Ngayikula ntuhi wa chinyama ng'o, wala chechikomakiki na chinyama cha muchitengu, ngayihika kujeghaleka uhakau kwa chenihechi. Nepani nde Bambo Chapanga.
9“Bhela bhapenganyambiku ibhapalika bhakamulaje malaghalakilu ghangu, nahuli ngabhikubha na mahakau, na kupotela kwa kughajojoha. Nepani nde Bambo Chapanga nenuntenda kubha bhahuhu.
10“Mundu jwangakubha wa lukolu lwaka mpenganyambiku ngacheapalika kula chilebhi chihuhu. Hata ngeni waka mpenganyambiku au muhengalihengu waki ngacheapalika kula. 11Nambu anakubhi mpenganyambiku anhemili ntumwa kwa mbija, au ntumwa abhelakiki munyumba jaka mpenganyambiku hoju, ntumwa hoju aweza kula chilebhi chaka mpenganyambiku hechi. 12Ngati mwali waka mpenganyambiku atoghuliki na mundu jwangakubha mpenyambiku, mwali hoju ngacheapalika kula nyambiku ja hindu ihuhu. 13Nambu anakubhi mwali waka mpenganyambiku aweliwi na ndomi au apekiwi baluwa ja kulekana, najombi ngachebhi na bhana, anaakelawiki kutama na bhalongu bhaka tati waki ngati chikahi cha umwali waki, mwali hoju aweza kula chilebhi chaka tati waki. Hata bhela, ngeni ngacheapalika kula chokapi chela mu chilebhi chenihechi.
14“Ngati mundu jokapi anakuliki nyambiku jihuhu panga kumanya, impalika abhohaje malepu gha nyambiku heji kwaka mpenganyambiku na kujonjukela pandu pa kahanu pa malepu gha nyambiku jeniheji. 15Bhapenganyambiku ngacheibhapalika kujihakaha nyambiku jihuhu jebhabhoha bhandu bha Izilaeli kwaka Bambo Chapanga, 16kwa kubhajetakela kula nyambiku jihuhu heji, na bhela kubhaletela mahakau gha kubhapalika malepu. Nepani nde Bambo Chapanga nenuntenda kubha bhahuhu.”
17Bambo Chapanga akumpwaghi Musa, 18Umpwaghila Haluni na bhana bhaki bhapenganyambiku anana: Ngati jumu winu, joabhi Muizilaeli au ngeni joatama mu inchi ja Izilaeli, anabhoha nyambiku jaki, jikubhi ja kubhoha nazili, au ja kupala mweni ja kumbokeha Bambo Chapanga kwa kujochakeka, 19impalika mboha chinyama chikambaku changakubha na chilema ikubhi ng'ombi, imbuhi au limbeleli nahuli chiweza kujetakalewa kwa ndandi jaki. 20Ngawibhoha chindu chokapi chela chechibhi na chilema ng'o, kwa ndandi ngachijetakalewi kwa ndandi jaku. 21Mundu jokapi paambokeha Bambo Chapanga nyambiku ja kutama kwa lukwali nahuli kubhoha nazili au nyambiku ja kupala mweni kuhuma mu lipogha laki la hinyama, nahuli ajetakaliwaje, chipalika chibya chinyama chikamilifu, chinyama hechi ngachikubha na chilema chokapi chela. 22Ngawambokeha Bambo Chapanga chinyama chechibhi ngalola ng'o, au chechipotakiki wala chechibhi na chilema, au chokapi chela chechibhi na uhimba, au chechibhi na hikwanda au hilonda yeipiha uhila. Chokapi cha ntundu ghonihoghu ngachibhekakeka panani ja pandu pa kubhokeha nyambiku ya kujochakeka ng'o, nahuli kubha nyambiku jejibhohakike kwaka Bambo Chapanga ja kujochakeka kwa moto. 23Nambu uweza kupala na kubhoha nyambiku ja kupala wamweti, ng'ombi au limbeleli lelibhi na chilema au leliyakatali, nambu jeniheji ngajijetakalewi nahuli kubha nyambiku ja kubhoha nazili. 24Ngawambokeha Bambo Chapanga chinyama ambachu chiungu chaki cha chikambaku chitehi kupotakeka, au chihekitwi ntondola, au chipekiwi libhanga, au chitehi kuheketwa. Ngamwihenga bhenibhela mu inchi jinu mabheti ng'o.
25Wala ngawijopa kuhuma kwaka ngeni hinyama ya ntundu ghonihoghu na kumokeha nepani Chapanga waku kubha chilebhi. Hinyama yeniheyi ngayijetakalewi kwa ndandi jaku, maghambu ibhi na chilema.
26Bambo Chapanga akumpwaghi Musa, 27“Chikahi litoli likambaku la ng'ombi au mwanalimbeleli au mwanambuhi paibhelakeka, anaihighalya na nyongolu waki kwa machobha saba. Kutumbula lichobha la nane na kujendelela aweza kujetakelewa kubha nyambiku jejibhowakiki kwa Bambo Chapanga kwa kujochakeka kwa moto. 28Nambu ngawajichinja ng'ombi na litoli lake, au limbeleli na mwana waki, yokapi ibheli mu lichobha limu. 29Chikahi paumbohakela Bambo Chapanga nyambiku ja kunchengula, ujibhohaje kwa ntundu ghoupalika, nahuli jipata kujetakalewa kwa ndandi jaku. 30Inyama ja chinyama hechi ipalika jikulakikaje mu lichobha lelalela, ngamwihighakila mbaka chilabhu jaki lukela. Nepani nde Bambo Chapanga.
31“Nkamulaje malaghalakilu ghangu na kughajengalela. Nepani nde Bambo Chapanga. 32Ngamwalijeghe uhakau lihina langu lihuhu. Nambu ipalika mbata utopelu pachilanda ja bhandu bha Izilaeli. Nepani nde Bambo Chapanga nenuntenda kubha bhahuhu, 33na nenumbohiki kuhuma ku inchi ja Misli, nahuli ngubha Chapanga winu. Nepani nde Bambo Chapanga.”
Currently Selected:
Bhalawi 22: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.