LUKA 23

Yesu eka Pilato

(Lenda la nde Mat 27, 1-2. 11-14; Mlk 15, 1-5; Yow 18, 28-38)

1Banto bankuma bayalaki nde ikoka baemalɛ mpe batombɛ Yesu eka Pilato. 2Ibɔ banɛ babangɛ yoboloba ngɔnɛ: «Tongotanɛ bonto ɔnɛ atika isɛngɛni nde ekolo ekinso. Nde bonto ohuka banto bapute mputi iiki Kaisalo mpe ayaeta Masiya, wambɔ Nkumu.» 3Pilato aubolɛ Yesu: «Wɛ oyali bonkondi booki Bayuda?» Yesu aunoyɛ: «Wɛ ootepela ngauko.» 4Pilato nde ɔnɛ ohangela nkanga i benkondi la boloy boyalaki aiko: «Emi mpwɛne nte ikambo i bobe iinga bonto ɔnɛ akelɛ.» 5Baayalaki aiko bakokomyɛ mpe bahangɛ: «Nde apa banto bɔtɛ boolo la balako baakinde baapa nde nde Yudeya lonkundu, ima nko ebangaki nde nde Ngalilaya tii anɛ»

Yesu eka Elode

6Anɛ eha Pilato aoka ngauko, aubolɛ kaki Yesu ayali bohi Ngalilaya. 7Aokɛ mbɔ ayali bonto o ehe eyali Elode bonkondi, ekɔiko abotindɛ eka Elode ooyalaki la nde Yelusalɛmɛ biina biiko. 8Anɛ ɛnɛki Elode Yesu, aokɛ bɔlɔti mpendja itina atilɛ aboɛne ima kala la wengi inɛ yoka nde batepela nde lina ikinde, mpe akambaki Yesu angoobokelela mpapo ɛmɔɔ. 9Abuubolɛ biibo buuke, Yesu tabopa la mbuto ɛmɔ. 10Nkanga i benkondi la balaki ba bobeko bayalaki aiko mpe batepelɛ nko mbo i bobe itina iiki bakoye Yesu. 11Elode la bahola baakinde baɔlɛ Yesu mpe babɔtɛbɔlɛ. Ibɔ banɛ babɔlɔɔtyɛ mbɛy e bonkoto mpe babuunoyɛ eka Pilato. 12Endaka buuna buuko, Elode la Pilato bakitɛ baninga, ibɔ baapa tambɔkɛndɛkɛ!

Bangokatelɛ Yesu etumbo e iwa

(Lenda la nde Mat 27, 15-26; Mlk 15, 6-15; Yow 18, 39-19, 16)

13Aiko ɛkɔ, Pilato aetɛ nkanga i benkondi, baome ba bihe la banto bankuma, 14mpe abahangelɛ: «Londjelaki bonto ɔnɛ mpe lohangɛ nde bonto otika isɛngɛni. Emi ngobuubolɛ bakambo buuke nde baiho baakinyo, ntiɛnɛ la ikambo imɔɔ yɛɛli la etumbo nde bakambo bankuma babolobaki nyo. 15La Elode mpe tabobata la ikambo i bobe, ɛkɔiko emba nde abunoye ekami. Elimbola wambɔ bonto ɔnɛ apa la ikambo imɔɔ ikelɛ nde mpe itinda abate etumbo e iwa. 16Ekɔiko ndanga babokule nko mpimbo, nkamba mbohene atu.» 17[Nde ntɛkɔ inkuma, Pilato amboobaolyelakɛ bonto ɔmɔɔ oyali nde bɔlɔkɔ.] 18Banto bankuma baayalaki aiko babobɛ la nguya: «Lyaka bonto uuko mpe otoolyele Balanabasi!» 19Balabasi atungamaki nde bɔlɔkɔ itina atikaki boyongo nde imonga (i Yelusalɛmɛ) mpe alyakaki bonto. 20Nga boyalaki nde la mpoha ahene Yesu, Pilato aunwɛ yobaubola. 21Ibɔ mpe baunwɛ yobola: «Baka nde nde ekulusu! Baka nde nde ekulusu!» 22Pilato abaubolɛ mbale ɛnɛ e ehato: «Ikambo nte i bobe ikelɛ nde nnɔ? Emi ntibobata la ikambo i bobe la imɔɔ yɛɛli abate etumbo e iwa. Ɛkɔiko babokule nko mpimbo, nkamba mbohene.» 23Nga la ibɔ, baunwɛ nko yoboba mpe batingamɛ nko babake Yesu nde ekulusu, mpe nde nsuki, oolekaki nko botingama bookiibɔ. 24Pilato nde ɔnɛ ooyaka yɔkɔhɔ meko bakele ndenge eelangaki ibɔ. 25Abaolyelɛ ɔnɛ we babutake nde bɔlɔkɔ itina i boyongo la yolyaka bonto, mpe apɛɛ Yesu kela bakele la ndenge eelangaki ibɔ.

Babakɛ Yesu nde ekulusu

(Lenda la nde Mat 27, 32-44; Mlk 15, 21-32; Yow 19, 17-27)

26Aiko etombaki ibɔ Yesu, baponanɛ la Simo ɛnɛ e Silɛnɛ, aoyume nde ngonda. Babobilyɛ ekulusu lombuha looki Yesu. 27Banto buuke bayelaki Yesu, la bainto baolelake mpe baoyahabake itina ikinde. 28Yesu abaɛbwɛlɛ mpe ababelɛ: «Bainto ba Yelusalɛmɛ, talolelake itina ikimi, lolela itina ikinyo bamɛlɛ la iiki bana baakinyo. 29Itina nde biina bɛnɛ byoye, bangoohanga: “Ɛmɛngɔ la bikomba mpe la bainto baapa tababota mpe tabalɔmya bana babɛlɛ.” 30Nde biina biiko, bangoohangela ngomba: “Lɔtɔkɔyɛle” mpe bangoohangela byɔngɔ: “Lotokuke.” 31Itina kaki bote bɔnɛ bo boyoyo bolongola, engoyala ngamo itina iiki bote bonɛ boomɛ ?» 32Batombaki mpe banto bankina bape ba boyongo, kela batu itobalyaka ibɔ la Yesu. 33Anɛ ekitaki ibɔ nde ndye ɛnɛ etaka ibɔ Lɔbɛkɛ, bahola babakɛ Yesu nde ekulusu la nsɛtɛ nde nɔnge ɛkɔ, bɔlɔngɔ la banto bape ba boyongo, ɔmɔɔ nde lɔbɔ lo loome, ɔmɔɔ nde lɔbɔ lo lwali. 34Yesu ahangɛ: «Papa, obasabinye, itina bapwebe mbo ikela ibɔ.» Mpe babɛtɛ bɛbɛlɛ kela bakape bihenda bikinde. 35Banto ba ehe bayalaki aiko, balenda inkuma ikelama; baome ba bihe, ibɔ, babɔɔlɛ nko ntɔɔlɔ, bahangɛ: «Nde abikyɛ banto buuke, ayabikyake nde kiika kaki ayali mpendja Masiya, bonto ɔnɛ ɔhɔlɔki Ndjakomba.» 36Bahola mpe babɔɔlɛ nko ntɔɔlɔ; batutamɛ la nde kela babopaa baana ba bokai mpe babobelɛ: 37«Kaki wɛ oyali nkumu eeki Bayuda, yabikyaka wɛ kiika.» 38Nde liko i bɔtɛ booki Yesu, bakɔtɛ: «Bonto ɔnɛ ayali Nkumu eeki Bayuda.» 39Bonto ɔmɔɔ nde baiko bape ba boyongo babakemaki la Yesu nde bikulusu, abotolɛ: «Wɛ toyali Masiya? Yabikyaka wɛ kiika mpe otobikye la nso.» 40Yaa ɔnɛ ɔmɔɔ apɔndɔlɛ boninga mpe abobelɛ: «Wɛ opomange la Ndjakomba, nkya bonga wɛ obatɛ etumbo ndenge ɛmɔɔ la nde! 41Ekinso etumbo eyali nde ndjela: ɛɛli la besala be bobe beekinso; yaa nde apa la la lobo lɔmɔɔ lo bobe lokelɛ nde.» 42La lombuha luuko ahangɛ: «Yesu, onkanenaka elaka engokita wɛ nde Bonkumu bokiɛ.» 43Yesu abounoyelɛ: «Nhɔhɔlɔ nkobela, lɔlɔkɔ, okoyala la emi nde Paladisu.»

Iwa iiki Yesu

(Lenda la nde Mat 27, 45-56; Mlk 15, 33-41; Yow 19, 28-30)

44Ntute la ngina la ngina e buuna, la nkatala e waane, buulima bɔtwɛ nde bokili lonkundu tii nde ngonga ehato e ikɔlɔ, 45inyɛlɛ tayunwa yɛnia. Nde elaka iiko, ehenda iiko e mpipa eyalaka nde Tɛmpɛlo eatwɛ nde ngina la ngina. 46Yesu aulɛ ekola e waandje, abɔndɛlɛ: «Papa, nguunoyɛ bolimo bokimi nde bɛbɔ beekiɛ.» Mpe nko aoheye yotepela ngauko, akomɛ botema. 47Anɛ e ɛnɛ bonkondi booki bahola baaki Loma bakambo bankuma balekaki, atotyɛ Ndjakomba mpe atepelɛ: «Hɔlɔ, bonto ɔnɛ ayalaki mpendja sembo.» 48Banto bankuma bahokamaki aiko yolenda bakambo baaleka, anɛ e ɛnɛki ibɔ inkuma, bakulɛ nko bakoto mpe bayaunoyɛ la ihɛi nde betema. 49Banto bankuma baebaki Yesu la mpe bainto baambobayelakɛ ima Ngalilaya, baemalaki ekabɔ botale, balendake inkuma ileka.

Bakundɛ Yesu nde lyombo

(Lenda la nde Mat 27, 57-61; Mlk 15, 42-47; Yow 19, 38-42)

50Aiko ɛkɔ, nde boloy bo ba baome ba bihe baaki Bayuda, eyalaki la bonto ɔmɔɔ, lina ikinde Yosepu, bonto ɔmɔɔ o bɔlɔti mpe o sembo. 51Nde taimeya la meko la bikela biiki boloy buuko. Bohi Alimateyo, imonga imɔɔ iki Bayuda, mpe amboolilake eyeelo eeki Bonkondi booki Ndjakomba. 52Atɛ eka Pilato mpe abuubolɛ ebembe eeki Yesu. 53Nde ɔnɛ ohuloyɛ ebembe nde ekulusu, akelingɛ nde mendja ɛmɔɔ mpe aketikɛ nde ipoku iitondolaki ibɔ nde ibɔkɔ, ipa tabakundi la bonto ɔmɔɔ. 54Eyalaki mputu e sabata mpe sabata eko eyɛ ntute. 55Bainto baambooyelakɛ Yesu ima Ngalilaya bayelɛ Yosepu; baɛnɛ ipoku la mpe ndenge ebombaki ibɔ ebembe. 56Ibɔ banɛ baunuɛ ekabɔ mpe babongyɛ behuku be mpimbo la balahi. Buuna bo sabata, ibɔ banɛ baitiɛ, ndenge ɛnɛ etinda bobeko.

Currently Selected:

LUKA 23: lol

Highlight

Compare

Copy