LUKA 24

Nkundwa eeki Yesu

(Lenda la nde Mat 28, 1-10; Mlk 16, 1-8; Yow 20, 1-10)

1La nte belonge, bɔkɔlɔ bontondo booki pɔsɔ, bainto batɛ nde ipoku, batombɛ behuku be mpimbo bɛɛbɔngyaki ibɔ. 2Bataanɛ ibɔkɔ ilipaki ipoku nde bokili. 3Anɛ yɔtwɛ, tabaɛnɛ ebembe eeki Yesu. 4Nko aiko eyatungya ibɔ la ikambo ikɔ, banto bape babaolelɛ, balɔti bihenda bipa lweya lɔmɔɔ lo nguya. 5La bɔɔmɔ bonkuma, bahuloyɛ bilongi nde nse. Banto baiko bape babaubɔlɛ: «Itina iitila nyo eka bawɛi bonto oobika nnɔ? 6Tayali anɛ, angokundwɛ. Lokanena ndenge elohangelaki nde elaka eyaki nde laino Ngalilaya. 7Ahangaki: “Etindama nko bakape Bona ooki Bonto nde bɛbɔ beeki banto ba bahumu, bangoobobaka nde ekulusu mpe nde buuna bo ehato, angookundwa.”»

8Ibɔ banɛ bakanenɛ baoyi batepelaki Yesu. 9Baumɛ nde ipoku; batɛ itohangela bɛnkomwa lyomu la ɔmɔɔ la ekambi enkuma eyalaki la ibɔ bakambo baiko bankuma. 10Bainto baayalaki aiko: Balia Bangandala, Yaane, Balia nyango eeki Yakobo la banɛ bankina bayalaki la ibɔ bahangelaki bɛnkɔmwa nko ndenge ɛmɔɔ. 11Lendaka bentomwa baɛnɛki mbo iiko ibahangelaki bainto baiko nko nga bitepela-tepela, mpe tababaumeya. 12Nkoka ngauko, Petelo aemalɛ mpe apuhwɛ lobango tii nde ipoku, ahunamɛ mpe aɛnɛ nko bitate bi bihenda biibolingaki ibɔ. Nkamba, ayaunoyɛ ekande, nko la nkimo nde iiko ilekaki.

Yesu aolelɛ baataki Emausu

(Lenda la nde Mlk 16, 12-13)

13Lolendaka, nko buuna buuko, bakɛndi la Yesu bape bataki ehe ɛmɔɔ lina Emausu, botale la Yelusalɛmɛ bo enga ngonga ipe i lɔkendɔ. 14Bayaki yotepelaka mbo inkuma yoyume yoleka. 15Nko aiko etepela ibɔ mpe ewa ibɔ la lɔmpɛnyɛ itina iiki bakambo bakɔ, Yesu ababatɛ mpe bahambolɛ. 16Babɔɛnɛ, yaa yomba ɛmɔ yahuya tabunwake yoweba. 17Yesu nde ɔnɛ obaubolɛ: «Ikɔ yaa nyo lowe lɔmpɛnyɛ booli boboko nnɔ?» Baemalɛ la ihɛi inkuma. 18Ɔmɔɔ okibɔ, lina ikinde Keleopasi, abounoyelɛ: «Nde banto banɛ bankuma bakihi Yelusalɛmɛ, wambɔ nko wɛ bonto opwebe bakambo banɛ baoyume yoleka biina bɛnɛ?» 19Yesu abaubolɛ: «Bakambo nnɔ?» Babohangelɛ: «Bakambo baalenda Yesu bohi Nazalɛti, ooyalaki ntepeli ɛmɔɔ e nguya, la nde byango la nde bitepelelo, ntondo eeki Ndjakomba mpe ntondo eeki banto bankuma, 20botindo bɔnɛ boookapɛ nkanga i benkondi la nkumu ikinso kela babopaa etumbo e iwa mpe botindo bɔnɛ bobakaki ibɔ nde ekulusu. 21Nso, tokambaki wambɔ nde bonto ongobikya Isalaɛlɛ. Lendaka, la iko inkuma, lɔlɔkɔ buuna bo behato ima elekɛ bakambo bakɔ. 22Yaa, bainto bankina bayalaka la nso bangotohahimolɛ mpendja: bambootu la nkɛhɛ e belonge nde ipoku, 23mpe tabaɛnɛ ebembe ekinde, bangoyɛ yohanga mbɔ bangwɛnɛ bentomwa beeki Ndjakomba mpe bangobahangelɛ abika. 24Baninga baakinso bankina bambootu la ibɔ nde ipoku mpe iimbaa bataane yɛli la iimba bainto bahange; Yaa nde tababoɛne!» 25Yesu ababelɛ: «Lopa mpendja la lyanya mpe betema beekinyo bepuumeye kwa bakambo baahangaki ntepeli. 26Tɛɛlɛmɛ mbɔ Masiya anyokwame ngauko kela aɔtwe nde lokumo lokinde?» 27Nkamba Yesu nde ɔnɛ oyobalimboyaka nde Bonkanda bo Ndjakomba inkuma yoolenda nde, ima nko Mose tii ntepeli inkuma.

28Bakitɛ ntute la ehe etaki ibɔ, Yesu akelɛ lonsai bonto olanga atu botale. 29Ibɔ banɛ babɔbɔndɛlɛ buuke, bahangɛ: «Yaka tokihe, itina ikɔlɔ yolinga mpe buuna bohula.» Ɛkɔiko eyaki Yesu yɔɔtwa kela bakihe. 30Anɛ ekihaki nde la ibɔ nde mesa kela bale, Yesu ɔkɔhɛ mampa, abɔndɛlɛ lɔbɔndɔ lo bokako; apupolɛ mampa mpe abakapelɛ. 31Mbala ɛmɔ, baiho baakiibɔ balipwɛ mpe baunwɛ yoboeba, mpe nko aiko alimwɛ nde baiho baakiibɔ. 32Bayaubolɛ: «Betema beekinso tabeyala ntyɛ ntyɛ anɛ eyaki nde yototepeyaka mpe yotolimboyelaka Benkanda beeki Ndjakomba?»

33Nko nde elaka iiko, baemalɛ mpe baunwɛ Yelusalɛmɛ; bataanɛ bakɛndi la Yesu lyomu la ɔmɔɔ bakihi nongi ɛmɔɔ ibɔ la baninga baakiibɔ. 34Babahangelɛ: «Hɔlɔ, Nkolo angokundwɛ, angoolelɛ Simo.» 35Ibɔ bape mpe baobahangela bakambo bankuma balekaki elaka eyalaki ibɔ nde ndjela mpe ndenge eyaki ibɔ yoboeba anɛ epupolaki nde mampa.

Yesu aolelɛ bakɛndi la nde

(Lenda la nde Mat 28, 16-20; Mlk 16, 14-18; Yow 20, 19-23; Bes 1, 6-8)

36Nko batepela, Yesu nde ɔnɛ ohwemala nde ngina la ngina ekiibɔ mpe ababelɛ: «Bɔlɔti booki Ndjakomba boyale la nyo.» 37Baokɛ nte bɔɔmɔ itina bakambaki bangwɛnɛ elima. 38Yesu ababelɛ: «Itina nnɔ yoka nyo bɔɔmɔ? Itina mpe iyali nyo la lɔmpɛnyɛ nde betema bekinyo nnɔ? 39Lolenda bakata la bekolo beekimi: emi nde ɔnɛ. Lombute mpe lolende; elima apoyalake la behuni, apoyalake la beehe, nga wɛnɛ nyo emi ndjali la bɛkɔ.» 40Aiko etepela nde, abaɛniɛ bakata la bekolo beekinde. 41Nga bopa tabɔhɔ laino yumeya lobo lo e ngauko mpe bayalaki la ibulwako imɔɔ bɔnɛnɛ mpe bakulaki bakoto. Yesu abaubolɛ: «Loyali la bona o yoomba yɔlɛ anɛ?» 42Babopɛ empulu e nsi e nkalanga. 43Akɔhɛ ɛkɔ mpe alɛ nde baiho baakiibɔ. 44Lombuha luuko ababelɛ: «Lolenda bakambo baalohangelaki emi elaka eyalaki emi laino la nyo: Bakambo bankuma bakɔtɔmɔki itina ikimi nde Bobeko booki Mose, nde benkanda beeki ntepeli mpe nde Nyembo, ɛlɛmɛki bakokyame.» 45Ngauko, abalipolɛ lyanya kela baebe yotingola mbo iikɔti nde Benkanda beeki Ndjakomba. 46Ababelɛ: «Bakɔtɔki ngɔnɛ: “Masiya angɔɔnyɔkwa mpe angookundwa buuna bo behato, 47mpe, nde lina ikinde, bangoolaka banto ba bikolo binkuma babɔngye betema kela babate boliboli bo bahumu, ima nko nde Yelusalɛmɛ.” 48Nyo wambɔ loyali nyɛni iiki bakambo baiko. 49Emi ngolotindela ɔnɛ ololakoyaki Ihe ekimi. Nga la nyo, loyalaka nko nde imonga i Yelusalɛmɛ tii enga lobate nguya enguuma nde liko.»

Yesu aulelɛ nde liko

(Lenda la nde Mlk 16, 19-20; Bes 1, 9-11)

50Nkamba Yesu abatombɛ ntute la imonga i Betani; bakite mpiko, aileyɛ bɛbɔ mpe abatɔmɛyɛ bokako. 51Nko aiko ebatɔmeya nde bokako, akapwɛ nde la ibɔ mpe babouleyɛ tii nde liko. 52Ibɔ, babokumamelɛ mpe baunwɛ Yelusalɛmɛ, la ibulwako imɔɔ i bɔnɛnɛ. 53Mpe mpiko, bambooyalake mbala la mbala nde Tɛmpɛlo yototya Ndjakomba.

Currently Selected:

LUKA 24: lol

Highlight

Compare

Copy