ئالەمنىڭ يارىتىلىشى 49
49
ياقۇپنىڭ ۋەسىيىتى
1ياقۇپ ئوغۇللىرىنى ئالدىغا چاقىرىپ، ئۇلارغا مۇنداق دېدى:
_ ھەممىڭلار ئالدىمغا كېلىڭلار، سىلەرگە كەلگۈسىدە يۈز بېرىدىغان ئىشلارنى ئاڭلىتاي!
2«ئەي ئوغۇللىرىم، ھەممىڭلار كېلىپ قۇلاق سېلىڭلار.
ئاتاڭلار ئىسرائىلنىڭ سۆزلىرىنى كۆڭۈل قويۇپ تىڭشاڭلار.
3ئەي رۇبېن، سەن تۇنجى ئوغلۇمسەن،
سەن كۈچ-قۇدرىتىمسەن.
قۇۋۋىتىمنىڭ تۇنجى مېۋىسىسەن،
ئوغۇللىرىم ئىچىدە ئەڭ غۇرۇرلۇقى ۋە كۈچلۈكى سەن.
4بىراق سەن كەلكۈندەك ئېقىپ، تۇتۇق بەرمىدىڭ!
سەن توقىلىم بىلەن بىر ئورۇندا يېتىپ،
تۆشىكىمنى بۇلغىدىڭ، ئەمدى كاتتا كىشى بولالمايسەن.
5شىمون بىلەن لاۋىي بىرلەشتى،
قىلىچلىرى رەھىمسىزلىك قىلدى.
6قوشۇلمايمەن ئۇلارنىڭ يامان نىيىتىگە،
قاتناشمايمەن ئۇلارنىڭ سۇيىقەستلىك پىلانىغا،
چۈنكى ئۇلار غەزەپلىنىپ ئادەم ئۆلتۈرۈپ،
خالىغانچە ئۆكۈزلەرنىڭ پېيىنى كەستى.
7ياغسۇن لەنەتلەر ئۇلارنىڭ غەزىپىگە،
شۇنداقلا رەھىمسىز ئۆچمەنلىكىگە.
تارقىتىۋېتەرمەن ئەۋلادلىرىنى ياقۇپنىڭ زېمىنلىرىغا،
چېچىۋېتەرمەن ئۇلارنى ئىسرائىللارنىڭ ئارىسىغا.
8ئەي يەھۇدا، قېرىنداشلىرىڭ سېنى ماختار.
سەن دۈشمەننىڭ گېلىنى سىقارسەن.
قېرىنداشلىرىڭ سېنىڭ ئالدىڭدا باش ئېگەر.
9يەھۇدا دۈشمىنىگە ياش شىردەك ئېتىلىدۇ.
ئۇلارنى مەغلۇپ قىلىپ، قايتىپ كېلىدۇ ئۇۋىسىغا.
سوزۇلۇپ ياتسا ئۇۋىسىدا،
كىممۇ جۈرئەت قىلار ئويغىتىشقا؟
10يەھۇدا تۇتار سەلتەنەت ھاسىسىنى،
ئۇنىڭ ئەۋلادلىرى يۈرگۈزەر ھاكىمىيەتنى.
كېيىن پۈتكۈل ئەل ئۇنىڭغا ئولپان تاپشۇرار،
پۈتكۈل خەلق ھەم تەزىم قىلار.#49: 10 ياكى: تاكى ھاكىمىيەت يۈرگۈزگۈچى كەلمىگۈچە، پۈتكۈل خەلق تەزىم قىلار ئۇنىڭغا.
11باغلاپ قويار ئۇ تەخىيىنى ئەڭ ياخشى ئۈزۈمگە،
غاجاپ قويسىمۇ ئۇ ئۈزۈمنى گەرچە،
ئۈزۈم شارابىدا يۇيار كىيىملىرىنى،
ئېسىل شارابتا تونلىرىنى.
12شارابتىن ھەم قارا كۆزلىرى،
سۈتتىن ھەم ئاپئاق چىشلىرى.
13زەبۇلۇن دېڭىز بويىدا تۇرار،
ئۇ يەر كېمە پورتى بولار،
زېمىنى سىدون تەرەپكە سوزۇلار.
14ئىسساكار گويا كۈچلۈك ئېشەك بولۇپ،
ئېغىلنىڭ ئىچىدە ياتار.
15كۆرگەندە ئۇ دەم ئېلىش ئورنىنىڭ ياخشىلىقىنى
ۋە ئۇ يەرنىڭ ھۇزۇرلۇقىنى،
ئارتىپ يۈكنىڭ ئېغىرىنى مۈرىسىگە،
قۇل بولۇپ، جاپالىق ئىشلەشكە مەجبۇر بولار.
16دانمۇ ئىسرائىل قەبىلىسىدىن بىرى بولار،
ئۇ ئۆز خەلقىگە ئادىل ھۆكۈم قىلار.
17ئۇ يىلاندەك يول بويلىرىدا،
زەھەرلىك يىلاندەك چىغىر يوللاردا،
چېقىپ ئاتنىڭ پۇتىنى،
يىقىتار ئاتلىقلارنى.
18ئى پەرۋەردىگارىم، قۇتقۇزۇشۇڭنى كۈتمەكتىمەن!
19گاد قاراقچىلارنىڭ ھۇجۇمىغا ئۇچرار.
لېكىن ئۇ كېيىن ھۇجۇمغا ئۆتۈپ، زەربە بېرەر.
20ئاشېرنىڭ زېمىنى بەئەينى مول ئاشلىق ئامبىرى بولۇپ،
پادىشاھلارنى ئۇ تەمىنلەر خاس لەززەتلىك تائاملىرى بىلەن.
21نافتالى ئەركىن ئانا كېيىكتۇر،
ئۇ تۇغار سۆيۈملۈك بالا كېيىكلەرنى.
22يۈسۈپ مېۋىلىك دەرەختۇر.
ئۇ بۇلاققا يېقىندۇر.
ئۇنىڭ شاخلىرى ھالقىپ ئۆتەر تامدىن.
23شىددەتلىك ھۇجۇم قىلار ئوقياچىلار ئۇنىڭغا،
ئوقيالار دەھشەتلىك ئېتىلار ئۇنىڭغا،
24لېكىن يۈسۈپ تايانغاچقا ياقۇپ ئېتىقاد قىلغان قادىر خۇداغا،
يەنى ئىسرائىلنىڭ پادىچىسىغا، قورام تېشىغا.
ئۇنىڭ يايى مەزمۇت، قوللىرى كۈچلۈك يەنىلا.
25ئاتاڭ ئىبادەت قىلغان خۇدا ساڭا ياردەم قىلار،
ھەممىگە قادىر خۇدا سېنى بەختلىك قىلار.
ئۇ ساڭا خاسىيەتلىك يامغۇر ياغدۇرۇپ،
يەردىكى بۇلاقلارنى ئاتا قىلار.
چارۋا ماللىرىڭنى ھەم ئاۋۇتۇپ،
ئەۋلادلىرىڭنى ھەسسىلەپ كۆپەيتەر.
26ئاتاڭ خۇدادىن ئېرىشكەن بۇ بەخت،
قەدىمكى تاغ چوققىلىرىدىنمۇ،
ئېدىرلىقلاردىكى بايلىقلاردىنمۇ بۈيۈكتۇر.
مانا بۇ بەخت-سائادەت يۈسۈپنىڭ بېشىغا،
يەنى قېرىنداشلىرىنىڭ ئىچىدىكى ئەڭ شەرەپلىكىگە قونار.
27بىنيامىن گويا يىرتقۇچ بۆرىدۇر،
ئۇ ئەتىگىنى تۇتقىنىنى يالماپ يۇتار،
كېچىسى ئولجىلارنى بۆلۈشەر.»
28بۇ سۆزلەر ياقۇپ دۇئا قىلغاندا ھەربىر ئوغلىغا لايىق ئېيتقان سۆزلەردۇر. ياقۇپنىڭ بۇ 12 ئوغلى ئىسرائىل خەلقىنىڭ 12 قەبىلىسىنىڭ بوۋىلىرى بولدى.
ياقۇپنىڭ ۋاپاتى
29ياقۇپ ئوغۇللىرىغا مۇنداق دەپ تاپىلىدى:
_ مېنىڭ ئالەمدىن ئۆتىدىغان ۋاقتىمغا ئاز قالدى. سىلەر مېنى ئاتا-بوۋىلىرىمنىڭ يېنىغا، يەنى خىتلاردىن بولغان ئەفروننىڭ ئېتىزلىقىدىكى ئۆڭكۈرگە دەپنە قىلىڭلار. 30بۇ ئۆڭكۈر كەنئاندىكى مامرەنىڭ شەرق تەرىپىدىكى ماكپېلا دېگەن يەردە بولۇپ، ئىبراھىم بۇ ئۆڭكۈر بىلەن يەرنى خىتلاردىن بولغان ئەفروندىن قەبرە قىلىش ئۈچۈن سېتىۋالغانىدى. 31ئىبراھىم ۋە ئايالى سارە ئۇ يەرگە دەپنە قىلىندى. ئىسھاق ۋە ئايالى رىبەقامۇ ئۇ يەرگە دەپنە قىلىندى. مەن لېياھنىمۇ ئۇ يەرگە دەپنە قىلدىم. 32ئۇ يەر بىلەن ئۆڭكۈر خىتلاردىن سېتىۋېلىنغان بولۇپ، سىلەر مېنىمۇ شۇ يەرگە دەپنە قىلىڭلار. 33ياقۇپ ئوغۇللىرىغا بۇ سۆزلەرنى تاپىلىغاندىن كېيىن، يېتىپلا نەپىسى توختاپ، ئالەمدىن ئۆتتى.
Currently Selected:
ئالەمنىڭ يارىتىلىشى 49: HZUT
Highlight
Share
Copy
Want to have your highlights saved across all your devices? Sign up or sign in
Uyghurche Muqeddes Kitab Jemiyiti
