San Mateo 1

Jesukristupa yaya rukunkuna wañupa shutinkuna

(Lc 3.23-38)

1Kay killkami Jesusmanta riman, pay kachashkan wawa Diosmanta kan, Davidpa Abrahampapas miraynin karka. 2Abraham Isaakpa yayanmi karka, Isaak Jakobpa yayanmi karka, Jakob Judapa yayanmi karka, Judapa wawkinkunapapas yayanmi karka. 3Juda Farespa Zerapapas yayanmi karka, maman Tamar karka, Fares Esrompa yayanmi karka, Esrom Arampa yayanmi karka. 4Aram Aminadabpa yayanmi karka, Aminadab Nahasónpa yayanmi karka, Nahasón Salmonpa yayanmi karka. 5Salmón Boospa yayanmi karka, maman Rahab karka, Boos Obedpa yayanmi karka, maman Rut karka, Obed Isaipa yayanmi karka. 6Isaí atun Apu Davidpa yayanmi karka, Chay David Salomonpa yayanmi karka, Manara Davidpa warmin kashpanra Uríaspa warminmi karka.

7Salomón Roboampa yayanmi karka, Roboam Abiaspa yayanmi karka, Abias Asapa yayanmi karka. 8Asa Josafatpa yayanmi karka, Josafat Jorampa yayanmi karka, Joram Usíaspa yayanmi karka. 9Usías Jotampa yayanmi karka, Jotam Ajaspa yayanmi karka, Ajas Esekiaspa yayanmi karka. 10Esekías Manasespa yayanmi karka, Manasés Amonpa yayanmi karka, Amón Josíaspa yayanmi karka. 11Josías Jekoníaspa wawkinkunapapas yayanmi karka, Chay uras Babiloniamanta suntalukuna aparkakuna Israel runakunata sinchita kamachirishka kanankunapa Babilonia llaktapi.

12Babiloñapi apirishka kahushkankunapi, Jekonias warminta chichuchirka. Chay wawapa shutinka karka Salatiel, Salatiel Sorobabelpa yayanmi karka. 13Sorobabel Abiudpa yayan karka, Abiud karka Eliakimpa yayan, Eliakim karka Asorpa yayan. 14Asor Sadokpa yayanmi karka, Sadok Akimpa yayanmi karka, Akim Eliudpa yayanmi karka. 15Eliud Eliasarpa yayanmi karka, Eliasar Matanpa yayanmi karka, Matán Jakobpa yayanmi karka. 16Jakob Josepa yayanmi karka, José Mariapa kusanmi karka, Maria Jesuspa mamanmi karka, chay Jesustami rimarkakuna Kristu, ninayan kachashkan wawan Diosmanta. 17Yaya rukunchi Abrahammanta pacha apu Davidkama chunka chusku kuti mirashka karkakuna, Chay apu Davidmanta pacha yayarukunchi wañukunata Babilonia llaktama apashkankunakama, chunka chusku kuti mirashka runakunami karkakuna. Paykunata chay Babilonia llaktama, apashkankunamanta pacha Kristu wawayarishkankama chunka chusku kuti mirashka karkakuna.

Wawayarishkan Jesukristupa

(Lc 2.1-7)

18Jesukristupa wawayarishkanka karka kasnami: María Jesuspa maman karka kwintashka Josewa kasarananpa, manarapas kusanwashina kawsahushpanra, ña chichu karka Espíritu Santumanta. 19Joseka Mariata chichu kashkanta yachashpan, manaña munarkañachu payta pushanata warminrayku. Diospa shiminta kasuk kashkanrayku, chayrayku yuyarirka nima pita rimashpan payta sakinata, mana munarkachu pinkachinata.

20Chasna yuyarihushkanpi shuk tuta muskuyninpi shuk Yaya Diospa angelninka kunkaymanta rikurishpan rimarka: “José, Davidpa wawan ama manchaychu Mariata pushanata warmikirayku, chay wawaka kanmi Espiritu Santupa. 21Mariaka shuk kari wawata wawayanka. Maykantami shutiyachinki Jesús. Chasna Jesús rimashkanka kishpichikmi ninayan, payka kishpichinkami tukuy runakunata uchankunamanta”.

22Tukuy kay pasarka paktachirishka kananpa maykantami Yaya Dios rimarka chay profetapi:

23“Shuk shipas mana karita riksik chichunkami, shuk kari wawata wawayanka. Paytami shutiyachinka Emanuel. Emanuel ninayan: ‘Dios ñukanchiwa’.”

24Joseka puñuhushkanmanta llikcharishpan, rurarka maykantami chay Yaya Diospa Angelninka rimashka chaywasha Mariata pusharka warminrayku. 25Pushashkanwasha manara kawsarkachu warminwashina, wawayanankama. Wawayashkan washa Joseka shutiyachirka chay wawata Jesús.

Currently Selected:

San Mateo 1: QUP_B

Highlight

Copy