Umatiu 3
3
Ujọn angwu u wu bendi umbwo a kam kukwo
(Mak 1:1-8; Luk 3:1-18; Jọn 1:19-28)
1Nya he kunyọng kumen ana Ujọn angwu a maa wu bendi umbwo a be kpi kisọm Unim abun-ale he ugbaa-libeb he kubọng Ujudia le, 2“Bendi be shi beshi le he biban bibel likọye kiteng kusu lifung-atabe ki fel kpee-kpee.” 3Ufe na Azaya, utye-ugie kisọm Ada, a ma kọng gbe le he le:
“Undi u ba gaa le he ugbaa-libeb le,
‘Ma kam kukwo Atya-tyan ndọ he.
Ma shi kukwo ahwu ku nọng ndọ he u be gbe.’ ”#3:3 Azaya 40:3-5
4Ujọn a maa fa inditen angi be shi angi le indib inyia angi be ko le kizaaki a, u bwọ ukwob inyia he anyọng. Lizi lima li ma yi igwọm le ihwaa. 5Bendi be maa ba le he Ujeruselem le ashi Ujudia puu le ashi angi gwaa ha umbwo ukandi angwu be ko le Ujọdan ba hwaa le he. 6Be maa bun biban bibel kọng. Ujọn u wu abe umbwo he umbwo ukandi Ujọdan.
7Nyọng Ujọn a ma nde bendi gbam le he likwu Iferesis le Isadusis be be le u wu abe umbwo. A ma bii abe le: “Ayang a teb amen abe ma yi na ishii ibibi le ma buu hwaa le he ingyo Unim angi i ndu be ukpọ?” 8A mbee de le, ma kwu na ikwan angi i wum agbe anunung he men ma tyung le ma shi beshi le he biban bimen. 9Ma fel tan pwọm ungwu le gbe Ebraham u yi atyamen a ye. Ma ngye dang le Unim u yi le ikeb le u sha akọ anyin a bel bebwaa Ebraham mbee. 10Likee li yi ndọ nyọng li wob ikwan le idaa le idaa a. Ukwan uyang-yang angwu a wum agbe anunung ye, be ba wob he fa he kinde.
11Undi angwu u be-m le ha item a dyam hwo-m. Mi kpe le mi waa he ikwob le he abee ọ ye. “Mi wa amen umbwo gya he beshi ashele, ukpọ ufe u ba shwa amen le Ukatia Kunyọng le kinde. 12Men ma yi na iwit. Ufe u yi le kudiya kuma kwu he kubwo. U ba kam kipi u kpam iwit, u puu kung igyang angyel fa he libel, ukpọ u ba tie abia le he kipi a kpam iwit kung angi ting sha kinde ashi ki nim ye ngyọ igye kpam.”
Awole Ujeso umbwo
(Mak 1:9-11; Luk 3:21-22)
13Nya he kunyọng kumen ana, Ujeso a kung bo le he Ugalili le hwaa le Ujọn he umbwo ukandi Ujọdan le Ujọn u wu-e umbwo. 14Ujọn a maa kaa he u shi-e u gie ugim uma. Ujọn a bii he le, “Wo angwu hang wo wu-m umbwo, fe wo tem be le mi wa umbwo a?”
15Ujeso a de-e le, “Wu-m umbwo he kunyọng ahwun likọye kukwo kumen i na li shi ashi Unim a kee.” Ujọn a ha bọng.
16He kunyọng ahwu a wu Ujeso umbwo mbee, Ujeso a fem le he afee umbwo. Nya kukwo-kukwo, lifung-atabe li buu, Ujeso a nde Ukatia Kunyọng Unim a be na kalulu so-e he lishi. 17Be gyo lingbam Unim le he lifung-atabe le: “Angwun na u yi kiken Unwa-agi. Ki nyin mi le he, a kwun mi kigyọ kpatia.”
Currently Selected:
Umatiu 3: KUIL
Highlight
Share
Copy
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
