ᒨᓯᓯ ᐂᑉᐸᖏᑦ 29
29
ᒪᓕᒃᑕᐅᒋᐊᓖᑦ ᐂᕉᓂᐅᑉ ᐃᕐᓂᖏᑕᓗ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓂᖏᓐᓄᑦ
ᒨᓯᓯ ᐱᖓᔪᖏᑦ 8:1-36
1“ᐃᒫᒃ ᑕᕝᕙ ᐱᔪᒃᓴᐅᕗᑎᑦ ᐂᕉᓂᒧᑦ ᐃᕐᓂᖏᓐᓄᓪᓗ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᖁᓪᓗᒋᑦ ᑐᓂᔭᐅᖁᓪᓗᒋᓪᓗ ᐅᕙᓐᓄᑦ, ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ ᓰᐱᐅᓪᓗ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ ᖃᓄᐃᑦᔪᑎᖃᖏᑦᓯᐊᕐᑐᓂᒃ ᓇᒃᓴᕐᑐᒃᓴᐅᕗᑎᑦ. 2ᓂᐊᖂᔭᒃᓴᓂᓪᓗ ᐱᐅᓂᕐᐹᓂᑦ ᐱᓯᒪᔪᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᓂᐊᖂᔭᓂᒃ ᓇᒃᓴᕐᑐᒃᓴᐅᕗᑎᑦ, ᓂᐊᖂᔭᓂᒃ ᓇᒃᓴᕐᑐᒃᓴᐅᒋᕗᑎᑦ ᓇᐹᕐᑑᑉ ᐅᕐᓱᖓᓂᒃ ᐃᓚᓯᒪᔪᓂᒃ, ᓯᕙᓂᒡᓗ ᐸᓂᕐᑎᓯᒪᔪᓂᒃ ᐅᕐᓱᒧᑦ ᒥᖑᐊᕐᓯᒪᔪᓂᒃ. 3ᑕᒪᒃᑯᐊᓗ ᐃᕕᐅᔭᒧᑦ ᐴᕐᓗᒋᑦ ᑐᓂᔭᒃᓴᕆᕙᑎᑦ ᐅᕙᓐᓄᑦ ᑐᓂᕐᕈᓯᓕᕐᑎᓪᓗᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᓰᐱᐅᓪᓗ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ.
4“ᐂᕉᓂᒃᑯᓪᓗ ᐃᕐᓂᕇᑦ ᕾᖁᔭᒃᓴᕆᕙᑎᑦ ᑐᐱᐅᑉ ᓇᔪᒐᕆᔭᒪ ᐃᑎᕐᑕᕐᕕᖓᑕ ᐹᖓᓄᑦ, ᑕᕝᕙᓂᓗ ᐃᒥᕐᒧᑦ ᐅᐊᓴᖁᔭᒃᓴᕆᕙᑎᑦ ᑎᒥᓕᒫᒥᖕᓂᒃ ᐅᒃᐱᕐᓂᒃᑯᑦ ᓴᓗᒻᒪᕐᑕᐅᖁᓪᓗᒋᑦ. 5ᑕᕝᕙ ᐂᕉᓂ ᑐᓂᕐᕈᓯᕐᑎᑦᓯᔨᓯᐅᑎᓂᒃ ᑕᕝᕙᓂ ᐊᓐᓄᕌᕐᑎᑕᒃᓴᕆᕙᑦ; ᐱᒋᐊᕐᑎᓪᓗᒍ ᐃᓗᓪᓕᕐᒥᒃ ᐅᕕᓂᕈᕐᒥᒃ, ᑕᑭᔪᒥᒡᓗ ᐅᓕᒡᔪᐊᒥᒃ ᐊᑎᑎᓪᓗᒍ, ᑭᐊᑎᒥᒡᓗ ᐃᐹᑎᒥᒃ ᐊᑎᓕᖕᒥᒃ, ᓴᒡᕕᖕᒥᐅᑕᒥᒡᓗ, ᑕᑦᓯᕈᓯᕐᑎᓪᓗᒍᓗ ᖃᓪᓗᓈᕐᑕᒥᒃ. 6ᓇᓴᕐᓗᒍᓗ ᓂᐊᖁᖓᓄᑦ ᓂᒥᐅᑎᓯᒪᔪᒥᒃ, ᑕᕝᕗᖓᓗ ᕿᓚᒡᓗᒍ ᖃᐅᕈᑎᒃᓴᖓ ᓇᓗᓁᒃᑯᑕᖅ ᐃᑦᔪᕐᓁᑎᑕᐅᓂᕐᒧᑦ ᑎᑎᕋᕐᕕᒋᓯᒪᓗᓂ ‘ᐊᑕᓂᕐᒧᑦ ᑐᓂᕐᕈᑕᐅᓯᒪᔪᖅ.’ 7ᑕᕝᕙ ᓇᐹᕐᑑᑉ ᐅᕐᓱᖓ ᑎᒍᓗᒍ, ᓂᐊᖁᖓᓄᑦ ᑯᕕᔭᒃᓴᕆᕙᑦ, ᒥᖑᐊᕐᓗᒍᓗ ᑕᒪᑐᒧᖓ.
8“ᐃᕐᓂᖏᑦᑕᐅᖅ ᑕᕝᕗᓐᖓᕐᑎᓪᓗᒋᑦ ᐅᕕᓂᕈᕐᑎᑕᒃᓴᕆᕙᑎᑦ; 9ᑕᑦᓯᕈᓯᕐᓗᒋᓪᓗ ᓇᓴᕐᓗᒋᓪᓗ ᓂᒥᕐᓗᒋᑦ. ᑍᒫᒃ ᑕᕝᕙ ᐂᕉᓂᒃᑯᑦ ᐃᕐᓂᕇᑦ ᑐᓂᕐᕈᓯᕐᑎᑦᓯᔨᓐᖑᕐᑎᑕᒃᓴᕆᕙᑎᑦ, ᑖᒃᑯᐊᓗ ᑭᖑᕚᖏᓪᓗ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᔨᑦᓯᖁᓪᓗᒋᑦ ᐅᕙᓐᓂᒃ ᑍᒪᓐᖓᑦ ᐃᓱᖃᖏᑦᑐᒧᑦ.
10“ᑕᕝᕙ ᐃᒻᒧᒃᓯᐅᒐᐅᑉ ᐸᖕᓂᖓ ᑕᕝᕗᓐᖓᕐᑎᑕᒃᓴᕆᕙᑦ ᑐᐱᐅᑉ ᐃᑎᕐᑕᕐᕕᖓᑕ ᐹᖓᓄᑦ ᐂᕉᓂᓗ ᐃᕐᓂᖏᓪᓗ ᐅᖃᐅᑎᔭᒃᓴᕆᕙᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᑕ ᓂᐊᖁᐊᓂᒃ ᐸᑎᒻᒥᓯᖁᓗᒋᑦ. 11ᑕᕝᕙᓂᓗ ᐃᒻᒧᒃᓯᐅᒐᐅᑉ ᐸᖕᓂᖓ ᑐᖁᑕᒃᓴᕆᕙᑦ ᐊᑕᓂᐅᑉ ᓵᖓᓂ, ᑐᐱᐅᑉ ᓇᔪᒐᕆᔭᒪ ᐃᑎᕐᑕᕕᖓᓂ. 12ᐸᖕᓂᐅᓪᓗ ᐊᐅᖓᑕ ᐃᓚᖓᓂᒃ ᐱᓗᑎᑦ ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᒃᑎᕐᑕᒃᓴᕆᕙᑎᑦ ᐊᒡᒐᖕᓄᑦ, ᐊᐅᓪᓕ ᐊᒥᐊᒃᑯᖓ ᑯᕕᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᑭᒡᓕᖓᓄᑦ. 13ᐃᕐᕋᕕᖏᑕ ᐃᓗᓕᒫᖏᑦ ᐲᔭᕐᑕᒃᓴᕆᕙᑎᑦ, ᑭᒃᓴᐅᑎᖓᓗ ᑎᖒᑉ ᖄᖓᓃᑦᑐᖅ, ᑕᕐᑐᖏᒃᑕᓗ ᐃᒡᓗᒃᑐᑦ ᑕᕐᑐᕈᑎᖏᑦ, ᑕᒪᕐᒥᒃ ᐃᑯᐊᓪᓚᒐᒃᓴᕆᕙᑎᑦ ᑐᓂᕐᕈᓯᕐᕕᖕᒥ ᑐᓂᕐᕈᑎᒋᓗᒋᑦ. 14ᐃᒻᒧᒃᓯᐅᒐᐅᓪᓕ ᓂᕿᖓ ᐃᑯᐊᓪᓚᒐᒃᓴᕆᕙᑦ, ᐊᒥᖓ ᐱᖃᓯᐅᑎᓗᒍ, ᐃᕐᕋᕕᖏᓪᓗ ᐱᖃᓯᐅᑎᓗᒋᑦ ᓄᓇᓖᑦ ᓯᓚᑖᓂ. ᑕᒪᒃᑯᐊ ᑐᓂᕐᕈᑎᒃᓴᐅᖕᒪᑕ ᑐᓂᕐᕈᓯᕐᑎᑦᓯᔩᑦ ᐊᔪᕐᓂᖏᑦ ᐱᓪᓗᒋᑦ.
15“ᓰᐱᐅᑉ ᐊᖑᓴᓪᓗᖓᑕ ᐂᑉᐸᖓ ᑕᒪᐅᓐᖓᐅᑎᓗᒍ, ᐂᕉᓂᒃᑯᑦ ᐃᕐᓂᕇᑦ ᐅᖃᐅᑎᔭᒃᓴᕆᔭᕙᑎᑦ ᓂᐊᖁᐊᓂᒃ ᐸᑎᒻᒥᒃᓯᖁᓗᒋᑦ. 16ᑕᕝᕙᓂᓗ ᑐᖁᑕᒃᓴᕆᕙᑦ, ᐊᐅᖓᓂᓪᓗ ᐱᓗᑎᑦ ᑯᕝᕕᕐᓴᐅᑎᒋᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᐊᕙᓗᖏᓐᓄᑦ ᓯᑕᒪᓄᑦ. 17ᓂᕿᖓᓗ ᑕᕝᕙᓂ ᐊᕕᒃᑐᕋᒃᓴᕆᕙᑦ ᓯᖁᑦᑎᕐᓗᒍ, ᐃᕐᕈᕐᑐᒐᓴᕆᕙᑎᓪᓗ ᐃᕐᕋᕕᖏᑦ ᓂᐅᖏᓪᓗ, ᓂᐊᖁᖓᑕᓗ ᖄᖓᓄᑦ ᐃᓕᓗᒋᑦ ᐊᒡᒍᕐᓯᒪᔪᓪᓗ ᐊᓯᖏᑦ ᑕᕝᕗᓐᖓᖃᓯᐅᑎᓗᒋᑦ, 18#ᐃᐱᓯ 5:2; ᐱᓕᐱ 4:18.ᑕᕝᕙ ᑐᓂᕐᕈᓯᕐᕕᖕᒥ ᐃᑯᐊᓪᓚᒃᑕᒃᓴᕆᕙᑎᑦ; ᐃᑯᐊᓚᑎᑕᐅᓂᒃᑯᑦ ᑐᓂᕐᕈᑎᐅᖕᒪᑦ ᐊᑕᓂᕐᒧᑦ; ᑎᐱᖓᓗ ᒪᒪᕐᑑᓪᓗᓂ ᐊᑕᓂᕐᒧᑦ, ᐃᑯᐊᓪᓚᒃᑕᐅᓪᓗᓂ ᑐᓂᕐᕈᑕᐅᖕᒪᑦ ᐊᑕᓂᕐᒧᑦ.
19“ᑖᑦᓱᒪᓕ ᐂᑉᐸᖓ ᓰᐱᐅᑉ ᐊᖑᓴᓪᓗᖓ ᑕᒪᐅᓐᖓᕐᑎᑕᒃᓴᕆᒋᕙᑦ; ᐂᕉᓂᒃᑯᑦ ᐃᕐᓂᕇᑦ ᑖᑦᓱᒥᖓ ᓂᐊᖁᐊᒍᑦ ᐸᑎᒻᒥᓯᔪᒃᓴᐅᕗᑦ, 20ᑕᕝᕙᓂᓗ ᑖᓐᓇ ᑐᖁᑕᒃᓴᕆᕙᑦ, ᐊᐅᖓᑕᓗ ᐃᓚᖓᓂᒃ ᑕᕝᕙᓐᖓᑦ ᐱᓗᑎᑦ ᐂᕉᓂᐅᑉ ᓯᐅᑎᖓᑕ ᑕᓕᕐᐱᐊᑕ ᐳᕝᕙᖓ ᐊᐅᒃᑎᕐᑕᒃᓴᕆᕙᑦ ᐃᕐᓂᖏᑕᓗ ᓯᐅᑎᖏᑕ ᑕᓕᕐᐱᖏᑕ ᐳᕝᕙᖏᑦ ᑍᒤᓕᐅᕐᒥᓗᒋᑦ, ᑕᓕᕐᐱᖏᑕᓗ ᑯᓪᓗᖏᑦ ᐊᐅᒃᑎᕐᒥᓗᒋᑦ, ᑕᓕᕐᐱᖏᑕᓗ ᐳᑐᒍᖏᑎᒍᑦ ᐊᐅᒃᑎᕐᑕᒃᓴᕆᒋᕙᑎᑦ, ᐊᐅᓪᓕ ᐊᒥᐊᒃᑯᖓ ᑯᕝᕕᕐᓴᐅᑎᒋᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ ᓯᑕᒪᓄᑦ. 21ᐊᐅᓪᓕ ᐃᓚᖓ ᑐᓂᕐᕈᓯᕐᕕᖕᒦᑦᑐᖅ ᐱᔭᒃᓴᕆᕙᑦ; ᓇᐹᕐᑑᓪᓗ ᐅᕐᓱᖓᓂᒃ ᒥᖑᐊᕐᓯᒍᑎᒃᓴᒥᒃ ᐃᓚᓗᒍ, ᓯᕐᐸᕐᓴᐅᑎᒋᔭᒃᓴᕆᕙᑦ ᐂᕉᓂᒧᑦ ᐊᓐᓄᕌᖏᓐᓄᓪᓗ ᐃᕐᓂᖏᓐᓄᓪᓗ ᐃᕐᓂᖏᑕᓗ ᐊᓐᓄᕌᖏᓐᓄᑦ. ᑕᕝᕙ ᑖᒃᑯᐊᓕᒫᑦ ᐊᓐᓄᕌᖏᓪᓗ ᐱᖃᓯᐅᑎᓗᒋᑦ ᐃᑦᔪᕐᓁᕐᑎᑕᐅᓂᐊᕐᐳᑦ ᐊᑕᓂᕐᒧᑦ.
22“ᓰᐱᐅᑉ ᐊᖑᓴᓪᓗᖓᑕ ᑐᓐᓄᖏᑦ ᐲᕐᑕᒃᓴᕆᕙᑎᑦ, ᐸᒥᐊᓪᓗᐊᑕᓗ ᑐᓐᓄᖏᒃ, ᐃᕐᕋᕕᖏᑕᓗ ᐃᓗᖏᑦ, ᑎᖑᖓᑕᓗ ᐱᐅᓂᖓ, ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᑦ ᐱᖃᓯᐅᑎᓗᒋᑦ, ᒥᒥᖓᓗ ᑕᓕᕐᐱᐊ. (ᑎᓕᔭᐅᓂᕐᒧᑦ ᑖᓐᓇ ᓰᐱ ᑐᓂᕐᕈᑎᒋᔭᐅᖕᒪᑦ). 23ᐃᕕᐅᔭᕐᒥᑦ ᓂᐊᖂᔭᒃᑯᕕᖕᒥᑦ ᐳᕙᓪᓚᕐᓴᐅᑎᖃᖏᑦᑐᓂᒃ ᑐᓂᕐᕈᑕᐅᓯᒪᔪᓂᑦ ᐊᑕᓂᕐᒧᑦ; ᐱᔪᒃᓴᐅᕗᑎᑦ ᓂᐊᖂᔭᒥᒃ ᐊᑕᐅᓯᕐᒥᒃ, ᐆᓯᒪᔪᒥᒡᓗ ᓵᑦᑐᒥᒃ ᐅᕐᓲᑎᓕᖕᒥᒃ, ᓯᕙᒥᒡᓗ ᐸᓂᕐᑎᓯᒪᔪᒥᒃ; 24ᑕᒪᒃᑯᐊᓕᒫᓪᓗ ᐂᕉᓂᒧᑦ ᐃᕐᓂᖏᓐᓄᓪᓗ ᑐᓂᔭᒃᓴᕆᕙᑎᑦ, ᑖᒃᑯᐊ ᑎᒍᓯᓗᑎᒃ ᑖᒃᑯᓂᖓ ᐃᓴᐅᑎᓗᒋᑦ ᓄᓗᕋᕈᑎᒋᓗᒋᓪᓗ ᑐᓂᓯᖁᓪᓗᒋᑦ ᐊᑕᓂᕐᒧᑦ. 25ᑕᕝᕙ ᑭᖑᓂᖓᒍᑦ ᑖᒃᑯᓇᓐᖓᑦ ᑎᒍᓗᒋᑦ, ᑐᓂᕐᕈᓯᕐᕕᖕᒥ ᐃᑯᐊᓪᓚᒃᑎᑕᒃᓴᕆᕙᑎᑦ ᑐᓂᕐᕈᓯᐅᑎᒋᓗᒋᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᐅᔪᓄᑦ ᐃᓚᓕᐅᑎᖁᓪᓗᒋᑦ, ᑕᒪᒃᑯᐊ ᑎᐱᖏᑦ ᒪᒪᕐᑑᖕᒪᑕ ᐊᑕᓂᕐᒧᑦ; ᑐᓂᕐᕈᓯᕈᑎᐅᓪᓗᑎᒡᓗ ᐃᑯᐊᓚᑦᓯᓂᒃᑯᑦ ᐊᑕᓂᕐᒧᑦ.
26“ᑖᑦᓱᒪᓕ ᑐᓂᕐᕈᑕᐅᔫᑉ ᓰᐱᐅᑉ ᐊᖑᓴᓪᓗᖓᑕ ᓴᑭᐊᖏᑦ ᐲᕐᓗᒋᑦ ᑐᓂᕐᕈᑎᒋᔭᒃᓴᕆᕙᑎᑦ ᐊᑕᓂᕐᒧᑦ ᐃᓴᐅᑎᓗᒋᑦ ᓄᓗᕋᐅᑎᒋᓗᒋᓪᓗ; ᑖᒃᑯᐊᓕ ᐃᕝᕕᑦ ᓂᕿᒃᓴᕐᑖᕆᔭᒃᓴᕆᕙᑎᑦ.
27“ᑖᒃᑯᐊᓗ ᓰᐱᐅᑉ ᐊᖑᓴᓪᓗᖓᑕ ᓴᑭᐊᖏᑦ ᑐᒃᓯᐅᑎᔭᒃᓴᕆᕙᑎᑦ ᐃᑦᔪᕐᓁᑎᑕᐅᖁᓪᓗᒋᑦ, ᒥᒥᖏᓪᓗ ᓂᕿᒃᓴᕆᔭᐅᖁᓪᓗᒋᑦ ᑐᓂᕐᕈᓯᕐᑎᑦᓯᔨᓄᑦ, ᐃᓴᐅᑎᔭᐅᓪᓗᑎᒃ ᓄᓗᕋᐅᑕᐅᓪᓗᑎᒡᓗ ᑐᓂᔭᐅᓯᒪᖕᒪᑕ, ᑐᓂᕐᕈᑎᐅᓯᒪᓪᓗᑎᒡᓗ ᑎᓕᔭᐅᓂᕐᒧᑦ, ᑕᒪᒃᑯᐊ ᓴᓂᕐᕙᒃᑕᐅᔪᒃᓴᐅᕗᑦ ᐂᕉᓂᐅᑉ ᐃᕐᓂᖏᑕᓗ ᓂᕿᒃᓴᕆᔭᕆᐊᖃᕐᒪᒋᑦ. 28ᑕᒪᓐᓇᓗ ᑍᒪᓐᖓᑦ ᓱᖁᓯᔪᐃᑦᑐᒥᒃ ᐂᕉᓂᒃᑯᑦ ᐃᕐᓂᖏᑕᓗ ᒪᓕᒐᕆᔭᒃᓴᕆᕚᑦ ᐃᓴᕆᐊᓕᒥᐅᑦ ᐃᓄᖏᑕ ᑐᓂᕐᕈᓯᖃᑦᑕᕐᓂᒃᓴᖓᑦ, ᑕᒪᓐᓇ ᑍᒤᑦᑐᖅ ᑐᓂᕐᕈᓯᕐᓂᖅ ᑐᓂᕐᕈᓯᕐᑎᑦᓯᔨᓄᑦ ᓂᕿᒃᓴᕆᔭᐅᔪᒃᓴᐅᕗᖅ ᐃᓴᕆᐊᓕᒥᐅᑦ ᐃᓄᖏᓐᓄᑦ ᑐᓂᔭᐅᖃᑦᑕᕆᐊᓕᒃ; ᐃᓚᒌᑦᓯᐊᓕᕐᓂᕐᒧᑦ ᑐᓂᕐᕈᓯᕐᓂᐅᖕᒪᑦ ᐊᑕᓂᕐᒧᑦ.
29“ᐂᕉᓂᐅᓪᓕ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐊᓐᓄᕌᖏᑦ ᐃᑦᔪᕐᓁᑎᑕᐅᓯᒪᔪᑦ ᐃᕐᓂᖏᓐᓄᑦ ᐱᔭᐅᔭᕆᐊᖃᕈᒫᕐᐳᑦ ᐂᕉᓂᐅᑉ ᑭᖑᓂᖓᓂ, ᒥᖑᐊᕐᑕᐅᓂᒃᑯᑦ ᑎᓕᔭᐅᓂᒃᑯᓪᓗ ᐱᒋᐊᕐᓂᖃᕐᓗᑎᒃ. 30ᐂᕉᓂᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᖑᕐᑐᖅ ᐂᕉᓂᒧᑦ ᐃᓇᖏᐅᑎᓗᓂ ᑐᐱᕐᒧᑦ ᑲᑎᒪᕕᐅᔪᒧᑦ ᐃᑦᔪᕐᓁᑦᑐᕕᖕᒧᑦ ᐱᔨᑦᓯᕆᐊᕐᑐᕐᓗᓂ ᐃᑎᕐᑐᒃᓴᖅ ᑖᓐᓇ ᐊᓐᓄᕌᓂᒃ ᐃᑦᔪᕐᓁᑎᑕᐅᓯᒪᔪᓂᒃ ᑖᒃᑯᓂᖓ ᐊᑐᕆᐊᖃᕐᐳᑦ ᐅᓪᓗᓂᒃ 7ᓂᒃ.
31“ᓰᐱᐅᑉ ᐊᖑᓴᓪᓗᖓᑕ ᓂᕿᖓ ᑎᓕᓯᓂᕐᒧᑦ ᑐᓂᕐᕈᑕᐅᔫᑉ ᐆᔪᓕᐊᖑᔪᒃᓴᐅᕗᖅ ᑕᕝᕙᓂ ᐃᑦᔪᕐᓁᑦᑐᕕᖕᒥ; 32ᐂᕉᓂᐅᓪᓗ ᐃᕐᓂᓂ ᐃᓚᒋᓗᒋᑦ ᓰᐱᐅᑉ ᐊᖑᓴᓪᓗᖓᑕ ᓂᕿᖓ ᓂᕆᔭᒃᓴᕆᕚᑦ ᓂᐊᖂᔭᓪᓗ ᐃᕕᐅᔭᕐᒦᑦᑐᑦ ᑐᓂᕐᕈᑎᒋᔭᐅᓯᒪᔪᑦ, ᑐᐱᐅᑉ ᐃᑎᕐᑕᕐᕕᖓᓂ. 33ᑖᒃᑯᐊ ᓂᕆᔪᒃᓴᐅᕗᑦ ᐃᓱᒪᒋᔪᓐᓁᕐᑕᐅᓂᒃᓴᒧᑦ ᑐᓂᕐᕈᑕᐅᓯᒪᔪᓂᒃ ᑎᓕᔭᐅᓕᕐᑎᓪᓗᒋᑦ ᐃᑦᔪᕐᓁᑎᑕᐅᓕᕐᑎᓪᓗᒋᓪᓗ ᑐᓂᕐᕈᑕᐅᓯᒪᔪᑦ, ᑐᓂᕐᕈᓯᕐᑎᑦᓯᔨᓄᓪᓕ ᑭᓯᐊᓂ ᓂᕆᔭᐅᔪᒃᓴᐅᕗᑦ ᐃᑦᔪᕐᓁᑎᑕᐅᓯᒪᖕᒪᑕ. 34ᓂᕿᓂᒡᓕ ᓂᐊᖂᔭᓂᒡᓗ ᑎᓕᓯᓂᕐᒧᑦ ᑐᓂᕐᕈᑕᐅᔪᑦ ᓱᓕ ᐊᒥᐊᒃᑯᖃᕐᑐᖃᕐᐸᑦ ᐅᓪᓛᖑᓕᑎᓪᓗᒍ, ᑕᕝᕙ ᑕᒪᒃᑯᐊ ᐃᑯᐊᓪᓚᒃᑕᐅᔪᒃᓴᐅᕗᑦ ᓄᖑᑕᐅᓗᑎᒃ; ᓂᕆᔭᐅᔪᒃᓴᐅᓐᖏᓚᑦ, ᐃᑦᔪᕐᓁᑦᑑᖕᒪᑕ.
35“ᑍᒫᒃ ᑕᕝᕙ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᑎᓕᓯᔪᒃᓴᐅᕗᑎᑦ ᐂᕉᓂᒥᒃ ᐃᕐᓂᖏᓐᓂᒡᓗ; ᐱᖁᔨᓯᒪᓂᕋ ᒪᓕᒡᓗᒍ; ᐅᓪᓗᓂᒃ 7ᓂᒃ, 36ᖃᐅᑕᒫᑦ ᑐᓂᕐᕈᓯᕐᑐᒃᓴᐅᕗᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐊᔪᕐᓃᑦ ᐃᓱᒪᒋᔪᓐᓁᕐᑕᖁᓪᓗᒋᑦ, ᑐᓂᕐᕈᓯᕐᕕᐅᓪᓗ ᓴᓗᒻᒪᕐᑕᐅᓂᒃᓴᖓᓄᑦ, ᑭᖑᓂᖓᒍᑦ ᑕᕝᕙ ᒥᖑᐊᕐᑕᒃᓴᕆᕙᑦ ᓇᐹᕐᑑᑉ ᐅᕐᓱᖓᓄᑦ ᐃᑦᔪᕐᓁᑦᑕᐅᓕᖁᓪᓗᒍ. 37ᑍᒤᓕᐅᕐᑐᒃᓴᐅᕗᑎᑦ ᖃᐅᑕᒫᑦ ᐅᓪᓗᓂᒃ 7ᓂᒃ, ᑕᕝᕙ ᑕᒪᑐᒪ ᑭᖑᕐᖓᒍᑦ ᑐᓂᕐᕈᓯᕐᕕᒃ ᐃᑦᔪᕐᓁᑎᑕᐅᒻᒪᕆᖕᓂᐊᕐᐳᖅ, ᓱᓇᑐᐃᓐᓇᕐᓗ ᑐᓂᕐᕈᓯᕐᕕᖕᒧᑦ ᐊᒃᑑᑎᔪᖅ ᑕᕝᕙ ᐃᑦᔪᕐᓁᓕᕐᓂᐊᕐᐳᖅ.”
ᖃᐅᑕᒫᑦ ᑐᓂᕐᕈᑕᐅᔭᕆᐊᓖᑦ
ᒨᓯᓯ ᓯᑕᒪᖏᑦ 28:1-8
38“ᑐᓂᕐᕈᓯᕐᕕᒥ ᐃᒤᑦᑐᓂᒃ ᑕᕝᕙ ᑐᓂᕐᕈᓯᕐᑐᒃᓴᐅᕗᑎᑦ; ᓰᐱᐅᑉ ᓄᕐᕋᖏᖕᓂᒃ ᒪᕐᕉᖕᓂᒃ ᐊᑕᐅᓯᕐᒥᒃ ᐊᕐᕌᒍᓖᖕᓂᒃ ᑐᓂᕐᕈᓯᖃᑦᑕᕐᑐᒃᓴᐅᕗᑎᑦ ᖃᐅᑕᒫᑦ ᑍᒫᓐᖓᓕᒫᖅ. 39ᐅᓪᓛᒃᑯᑦ ᓰᐱᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ ᑐᓂᕐᕈᓯᕐᑐᒃᓴᐅᕗᑎᑦ, ᐂᑉᐸᖓᓕ ᓰᐱᐅᑉ ᓄᕐᕋᖓ ᐅᓐᓄᒃᑯᑦ ᑐᓂᕐᕈᑎᒋᔭᒃᓴᕆᕙᑦ; 40ᓯᕗᓪᓕᖅ ᓰᐱᐅᑉ ᓄᕐᕋᖓ ᑐᓂᕐᕈᑎᒋᓕᕈᕕᐅᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐅᖁᒤᓐᓂᖃᕐᑐᒥᒃ 1ᑭᓗᒍᕌᒻᒥᒃ ᐃᓚᔭᒃᓴᕆᕙᑦ ᓇᐹᕐᑑᓪᓗ ᐅᕐᓱᖓᓂᒃ ᐃᓚᓗᒍ 1ᓖᑕᒥᒃ. ᐸᐅᕐᖎᓪᓗ ᐃᑦᑎᖓᓂᒃ 1ᓖᑕᒥᒃ ᐊᖏᓂᓕᖕᒥᒃ ᖄᖓᒍᑦ ᑯᕝᕕᕆᔭᒃᓴᕆᕙᑦ. 41ᐂᑉᐸᖓᓕ ᓰᐱᐅᑉ ᓄᕐᕋᖓ ᑐᓂᕐᕈᑎᒋᔭᒃᓴᕆᕙᑦ ᐅᓐᓄᒃᑯᑦ, ᑐᓂᕐᕈᑎᒋᓕᕈᕕᐅᒃ ᑍᒫᑦᓮᓐᓇᖅ ᓂᐊᖂᔭᒃᓴᒥᒃ ᓯᖃᓪᓕᕐᓯᐊᕐᓯᒪᔪᒥᒃ ᐃᓚᔭᒃᓴᕆᕙᑦ, ᓇᐹᕐᑑᓪᓗ ᐅᕐᓱᖓᓂᒃ ᑍᒫᑦᓮᓐᓇᖅ, ᐸᐅᕐᖎᓪᓗ ᐃᑦᑎᖓᓂᒃ ᑍᒫᑦᓮᓐᓇᖅ ᐅᓪᓛᒃᑯᑦ ᑐᓂᕐᕈᑎᒋᖅᑲᐅᔭᕐᑐᑦ, ᑕᒪᑐᒪ ᑎᐱᖓ ᒪᒪᕐᑑᕗᖅ ᐊᑕᓂᕐᒧᑦ ᑐᓂᕐᕈᑕᐅᔪᖅ ᐃᑯᐊᓚᑎᑕᐅᓪᓗᓂ. 42ᑕᒪᓐᓇᓗ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᓂᖅ ᑍᒫᓐᖓᑦ ᑲᔪᓯᑎᑕᐅᔪᒃᓴᐅᕗᖅ ᑭᖑᕚᓯᓐᓄᑦ ᑐᐱᐅᑉ ᐃᑎᕐᑕᕐᕕᖓᓂ ᐊᑕᓂᐅᑉ ᓵᖓᓂ, ᑕᕝᕙᓂ ᐃᓕᖕᓄᑦ ᕾᔪᒪᕗᖓ, ᑕᕝᕙᓂᓗ ᐅᖃᖃᑎᒋᓗᑎᑦ. 43ᑕᕝᕙᓂ ᐃᓴᕆᐊᓕᒥᐅᑦ ᐃᓄᖏᑦ ᑲᑎᔪᒪᕙᒃᑲ, ᑖᓐᓇᓗ ᐃᑦᔪᕐᓁᑎᑕᐅᓂᐊᕐᐳᖅ ᓇᔫᑎᓂᕐᒪ ᖃᐅᒻᒪᕆᖕᓂᖓᓄᑦ. 44ᑐᐱᕐᓗ ᑐᓂᕐᕈᓯᕐᕕᓕᒫᓪᓗ ᐃᑦᔪᕐᓁᑦᑐᓐᖑᕐᑎᓐᓂᐊᕐᐸᒃᑲ; ᐂᕉᓂᓗ ᐃᕐᓂᖏᓪᓗ ᐃᑦᔪᕐᓁᑦᑐᓐᖑᕐᑎᓪᓗᒋᑦ ᓴᓂᕐᕙᒃᑕᐅᑎᓐᓂᐊᕐᐸᒃᑲ ᑐᓂᕐᕈᓯᕐᑎᑦᓯᔨᐅᓕᖁᓪᓗᒋᑦ ᐅᕙᓐᓄᑦ. 45ᐃᓴᕆᐊᓕᒥᐅᓪᓗ ᐃᓄᖏᓐᓂ ᐃᓂᖃᕈᒪᕗᖓ ᑖᒃᑯᓄᖓᓗ ᒎᑎᒋᔭᐅᔪᒪᓪᓗᖓ. 46ᖃᐅᔨᓂᐊᕐᐳᓪᓗ ᐅᕙᖓ ᐊᑕᓂᐅᒐᒪ ᒎᑎᒋᔭᖓᑦ, ᑖᓐᓇ ᑖᒃᑯᓂᖓ ᐊᓂᑎᑦᓯᓚᐅᕐᑐᖅ ᐄᑦᔨᑉᑎᒥᐅᓂᑦ ᑖᒃᑯᓇᓂ ᐃᓂᖃᕈᓐᓇᖁᓪᓗᖓ; ᐅᕙᖓ ᐊᑕᓂᐅᒐᒪ ᒎᑎᒋᔭᖓᑦ.”
Currently Selected:
ᒨᓯᓯ ᐂᑉᐸᖏᑦ 29: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
