ᒨᓯᓯ ᐂᑉᐸᖏᑦ 5
5
ᒨᓯᓯᐅᑉ ᐂᕉᓂᐅᓪᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᓵᖓᓃᓐᓂᖏᒃ
1ᑕᒪᑐᒪᓕ ᑭᖑᓂᖓᒍᑦ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᐊᕐᐴᒃ ᐅᖃᕐᓗᑎᒡᓗ, “ᐊᑕᓂᖅ ᐃᓴᕆᐊᓕᐅᑉ ᒎᑎᖓ ᐃᒫᒃ ᐅᖃᕐᐳᖅ, ‘ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᖁᕕᐊᓱᖃᑎᒌᒡᓗᑎᒃ ᐃᓄᖃᖏᑦᑐᒥ ᓂᕆᖃᑎᒌᒍᓐᓇᖁᓪᓗᒋᑦ ᐱᑦᔪᑎᒋᓗᖓ.’”
2ᐰᕉᓕ ᐅᖃᕐᐳᖅ, “ᐊᑕᓂᖅ ᖃᓄᐃᑦᑑᖕᒪᑦ, ᑖᑦᓱᒪ ᐱᖁᔨᓂᖓ ᓈᓚᒋᐊᖃᕋᔭᕈᒃᑯ ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᓯᔪᓐᓇᖁᓪᓗᖔ? ᑖᓐᓇ ᐊᑕᓂᐅᓂᕋᕐᑕᓯ ᖃᐅᔨᒪᓐᖏᓚᕋ, ᑍᒤᒻᒪᑦ ᐃᓴᕆᐊᓕᒥᐅᑦ ᐊᐅᓪᓚᖁᓂᐊᓐᖏᓚᒃᑲ.”
3ᑖᒃᑯᐊᒡᓕ ᑭᐅᕘᒃ, “ᐄᑉᕈᐃᑦ ᒎᑎᖓᑦ ᐅᕙᑦᑎᓐᓄᑦ ᓇᓗᓁᕐᓯᓚᐅᕐᐳᖅ; ᑍᒤᒻᒪᑦ ᐊᐅᓪᓚᕈᓐᓇᕐᑎᓚᐅᕐᑎᒍᑦ ᐅᓪᓗᓂᒃ ᐱᖓᓱᓂᒃ ᐃᖏᕐᕋᖁᓪᓗᑕ ᐃᓄᖃᖏᑦᑐᒧᑦ, ᑕᕝᕙᓂᓗ ᐊᑕᓂᕐᒧᑦ ᒎᑎᑦᑎᓐᓄᑦ ᑐᖁᑕᒃᓴᒥᒃ ᑐᓂᕐᕈᓯᕈᓐᓇᖁᓪᓗᑕ, ᑍᒤᓕᐅᕐᓂᐊᖏᒃᑯᑦᑕ ᖃᓂᒪᓇᕐᑐᒧᑦ ᑎᑭᑕᐅᑎᑐᐃᓐᓇᕆᐊᖃᕐᒪᑎᒍᑦ ᐅᕝᕙᓗ ᑐᖁᑕᐅᑎᓪᓗᑕ ᐅᓇᑕᕐᓂᒃᑯᑦ.”
4ᐄᑦᔨᑉᑎᒥᐅᓪᓕ ᐊᖓᔪᖅᑳᕐᔪᐊᖓᑦᑕ ᐅᖃᐅᑎᕚᒃ, “ᒨᓯᓰ ᐂᕉᓂᓗ, ᓱᖕᒪᑦ ᐃᓄᖕᓂᒃ ᓴᓇᔪᓂᒃ ᓄᖅᑲᕐᑎᑦᓯᓇᓱᒃᐱᓰᒃ? ᐱᓇᓱᐊᒃᓴᑦᓯᓐᓂᒃ ᐱᓇᓱᐊᕆᐊᕐᑐᖔᓕᕆᑦᑎᒃ.” 5ᐰᕉᓗ ᐅᖃᒃᑲᓐᓂᕐᐳᖅ, “ᐃᓕᑦᓯ ᐃᓅᖃᑎᒌᖑᔪᓯ ᐄᑦᔨᑉᑎᒥᐅᓂᑦ ᐅᓄᕐᓂᕐᓴᐅᓕᕐᐳᓯ. ᒫᓐᓇᓕ ᐊᒡᓛᑦ ᓴᓇᓂᖏᓐᓂᑦ ᓄᖅᑲᖁᓕᕐᐸᓯ!”
6ᐅᓪᓗᒥᓗ ᑖᑦᓱᒪᓂᑦᓮᓐᓇᖅ ᐰᕉ ᐱᖁᔨᓕᕐᐳᖅ ᓴᓇᑎᑦᓯᔨᐅᔪᓂᒃ ᐊᖓᔪᖅᑳᕆᔭᐅᔪᓂᒡᓗ ᐅᖃᐅᑎᓪᓗᒋᑦ, 7“ᐃᓄᐃᑦ ᓴᓇᑎᑕᓯ ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᒋᖃᑦᑕᕈᓐᓃᕐᓯᒋᒃ, ᓇᖕᒥᓂᕐᓕ ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᕿᓂᕐᓗᑎᒃ ᑲᑎᑦᓯᖃᑦᑕᓕᕐᓕᑦ. 8ᐅᔭᕋᓕᐊᕆᕙᒃᑕᖏᑕᓕ ᐅᓄᕐᓂᖏᑦ ᑍᒫᑦᓮᓐᓇᖅ ᐅᓄᕐᓂᖃᕐᑎᓯᐅᒃ, ᖃᑦᓰᓐᓇᕈᕆᐊᕐᓂᐊᕐᓇᒋᑦ; ᓄᖅᑲᖓᕕᒃᓴᖃᖃᑦᑕᓗᐊᒧᑦ ᐊᒡᓛᑦ ᐅᖃᖃᑦᑕᓕᕐᒪᑕ, ‘ᑐᖁᑕᒃᓴᒥᒃ ᑐᓂᕐᕈᓯᕆᐊᕐᑐᕐᓗᑕ ᒎᑎᑦᑎᓐᓄᑦ ᐊᐅᓪᓚᕐᑎᑕᐅᓚᐅᕐᑕ.’ 9ᓴᓇᔭᒃᓴᖏᓪᓕ ᐊᒃᓱᕈᕐᓇᕐᓯᑎᒃᑲᓐᓂᕐᑎᓚᐅᕐᓯᐅᒃ ᐊᒃᓱᕈᕐᓗᑎᒃ ᐱᓇᓱᐊᖁᓪᓗᒋᑦ, ᐅᖃᐅᓯᕐᓂᒃ ᓱᓕᖏᑦᑐᓂᒃ ᓈᓚᖃᑦᑕᕈᓐᓃᖁᓪᓗᒋᑦ.”
10ᑕᕝᕙ ᓴᓇᑎᑦᓯᔨᐅᔪᑦ ᓴᓇᔪᓄᓪᓗ ᐊᖓᔪᖅᑳᕆᔭᐅᔪᑦ ᐃᓄᖕᓄᐊᕐᐳᑦ ᐅᖃᕐᓗᑎᒡᓗ, “ᐰᕉ ᐃᒫᒃ ᐅᖃᕐᐳᖅ, ‘ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᐅᖁᔪᓐᓃᕐᐸᑦᓯ. 11ᐃᓕᑦᓯᓐᓂᒡᓕ ᓇᖕᒥᓂᖅ, ᕿᓂᕐᓗᓯ ᑲᑎᑦᓯᓗᓯᓗ ᐂᒃᓯᖃᑦᑕᕐᓂᐊᓕᕐᐳᓯ; ᓴᓇᔭᒃᓴᓯᓕ ᒥᑭᒡᓕᒋᐊᕐᑕᐅᓂᐊᓐᖏᓚᑦ ᑍᒫᒃ ᐱᓇᓱᐊᒐᒃᓴᓂᒃ ᐱᑎᑕᐅᒐᓗᐊᕈᑦᓯ.’” 12ᑍᒤᒻᒪᑦ ᐃᓄᐃᑦ ᐄᑦᔨᑉᑎᐅᑉ ᓄᓇᖓᓂ ᓇᒧᑐᐃᓐᓇᖅ ᓯᐊᒻᒪᕐᓯᒪᖃᑦᑕᓕᓚᐅᕐᐳᑦ, ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑲᑎᑦᓯᓇᓱᐊᕐᓗᑎᒃ. 13ᓴᓇᑎᑦᓯᔨᐅᔪᓪᓕ ᑐᐊᕕᖁᔨᕗᑦ ᐅᖃᕐᓗᑎᒃ, “ᓴᓇᔭᒃᓴᓯ ᐅᓪᓗᒥ ᐱᔭᕇᕐᓯᐅᒃ, ᐃᕕᖕᓂᒃ ᐊᑐᐃᓐᓇᖃᕐᑎᑕᐅᓪᓗᓯ ᐱᓇᓱᐊᕐᓂᕆᕙᓚᐅᕐᑕᑦᓯᑐᑦ.” 14ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ, ᐰᕉᑉ ᓴᓇᑎᑦᓯᔨᖁᑎᖏᑕ ᐱᓇᓱᐊᕐᑕᐅᖁᔭᖏᓐᓂᒃ ᐱᔭᕇᖁᔭᖏᓐᓂᒡᓗ ᑎᓕᔭᐅᓯᒪᔪᑦ, ᐋᓐᓂᕐᓯᕐᑕᐅᕗᑦ, ᐅᖃᐅᑦᔭᐅᓪᓗᑎᒡᓗ, “ᓱᖕᒪᑦ ᐅᓪᓗᒥ ᓯᕗᓂᖓᓂᑐᑦ ᐱᓇᓱᐊᕐᓂᕆᕙᓚᐅᕐᑕᑦᓯᑐᑦ ᐅᔭᕋᓕᐊᕆᔭᕆᐊᖃᕐᑕᑦᓯᓐᓂᒃ ᐱᔭᕇᕐᓯᓯᒪᓐᖏᓚᓰ?”
15ᑕᕝᕙ ᓴᓇᔪᓄᑦ ᐃᓴᕆᐊᓕᒥᐅᓄᑦ ᐊᖓᔪᖅᑳᕆᔭᐅᔪᑦ ᐰᕉᒧᐊᕐᐳᑦ ᐊᒃᓱᕈᕐᓗᑎᒡᓗ ᓂᓪᓕᐊᓕᕐᐳᑦ, “ᓱᖕᒪᑦ ᐱᔨᒋᔭᕐᓄᑦ ᑍᒤᓕᐅᕐᐲᑦ? 16ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᐱᔨᒋᔭᑎᑦ ᐊᑐᐃᓐᓇᖃᕐᑎᑕᐅᓐᖏᓚᑦ, ᓱᓕᓕ ᐅᔭᕋᓕᐅᖁᔭᐅᕗᒍᑦ, ᐊᒡᓛᓪᓗ ᐱᔨᑎᑦ ᐋᓐᓂᕐᓯᕐᑕᐅᖃᑦᑕᕐᐳᑦ; ᐃᕝᕕᓪᓕ ᐃᓄᖁᑎᑎᓪᓗ ᑕᒪᑐᒧᖓ ᓵᑕᒃᓴᑑᕗᓯ.”
17ᐰᕉᓕ ᐅᖃᕐᐳᖅ, “ᐃᕿᐊᓱᒃᑐᐊᓘᕗᓯ, ᓴᓇᔪᒪᖏᓐᓂᐊᓗᖕᒧᑦ ᐅᖃᕐᐳᓯ, ‘ᐊᐅᓪᓚᕈᓐᓇᕐᑎᓚᐅᕐᑎᒍᑦ ᐊᑕᓂᕐᒧᑦ ᑐᓂᕐᕈᓯᕆᐊᕐᑐᕐᓂᐊᕋᑦᑕ.’ 18ᐅᑎᕐᓗᓯ ᓴᓇᔭᕐᑐᓕᕆᑦᓯ; ᐃᕕᖕᓂᒡᓕ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᐅᓂᐊᓐᖏᓚᓯ, ᑭᓯᐊᓂᓕ ᓱᓕ ᑍᒫᓪᓗᐊᖅ ᐃᕕᖕᓂᒃ ᐊᑐᐃᓐᓇᖃᕐᑎᑕᐅᑎᓪᓗᓯ ᐅᔭᕋᓕᐅᕐᓂᕆᕙᓚᐅᕐᑕᑦᓯᑐᑦ ᐱᓇᓱᐊᕆᐊᖃᕐᓂᐊᕐᐳᓯ.” 19ᐃᓴᕆᐊᓕᒥᐅᓪᓕ ᓴᓇᔨᖏᓐᓄᑦ ᐊᖓᔪᖅᑳᖑᑎᑕᐅᔪᑦ ᖃᐅᔨᕗᑦ ᓯᕗᓂᖓᓂᑦ ᐅᖁᒤᓐᓂᕐᓴᒥᒃ ᐱᑎᑕᐅᓕᕐᓂᕐᒥᖕᓂᒃ, ᐅᖃᐅᑦᔭᐅᓚᐅᕋᒥᒃ ᓯᕗᓂᖓᓂᑐᑦ ᐃᕕᖕᓂᒃ ᐊᑐᐃᓐᓇᖃᖃᑦᑕᕐᓗᑎᒃ ᐅᔭᕋᓕᐅᕐᓂᕆᕙᓚᐅᕐᑕᒥᒃᑎᑐᑦ ᑍᒫᓪᓗᐊᖅ ᖃᐅᑕᒫᑦ ᐱᖁᔭᐅᓚᐅᕋᒥᒃ.
20ᑖᒃᑯᐊᓗ ᐰᕉᒥᓐᖔᕐᓗᑎᒃ ᒨᓯᓯᒥᒃ ᐂᕉᓂᒥᒡᓗ ᑲᑎᓯᕗᑦ, ᑖᒃᑯᓇᓐᖓᑦ ᐅᑕᖅᑭᔭᐅᓚᐅᕋᒥᒃ; 21ᐅᖃᕐᐳᓪᓗ, “ᐊᑕᓂᐅᑉ ᑕᑯᓐᓇᕐᐹᓯᒃ ᐊᑭᓂᐊᕐᓕᓯᒡᓗ ᖃᓄᐃᓕᐅᕐᑕᐅᑎᑦᓯᓂᑦᓯᖕᓂᒃ, ᐰᕉᒧᑦ ᐱᔨᒋᔭᖏᓐᓄᓪᓗ ᐊᑭᕋᕐᑐᕐᑕᐅᓕᕐᑎᑦᓯᒐᑦᓯᒃ ᐅᕙᑦᑎᓐᓂᒃ, ᑖᒃᑯᓄᖓᓗ ᑐᖁᑕᐅᑦᔪᑎᒃᓴᑦᑎᓐᓂᒃ ᐋᖅᑭᒃᓯᓯᒪᕗᓯ.”
ᒨᓯᓯᐅᑉ ᓈᒻᒪᒃᓴᖏᓐᓂᖓ ᐊᑕᓂᕐᒥᒃ
22ᑕᕝᕙ ᒨᓯᓯ ᐊᑕᓂᕐᒧᑦ ᓵᓕᕐᐳᖅ ᐅᖃᕐᓗᓂᓗ, “ᐊᑕᓃᖅ, ᓱᖕᒪᑦ ᐱᐅᖏᑦᑐᒥᒃ ᐱᓇᓱᐊᕐᑕᐅᑎᑦᓯᕖᑦ ᐅᑯᓄᖓ ᐃᓄᖕᓄᑦ? ᓱᖕᒪᓪᓗ ᑕᒪᐅᖓ ᑎᓕᓚᐅᕐᐱᖔ? 23ᑍᒪᓐᖓᑦ ᐰᕉᒧᑦ ᐅᖃᕆᐊᕐᑐᓚᐅᕐᓂᓐᓂᑦ ᐱᑦᔪᑎᒋᓪᓗᑎᑦ, ᐃᓄᖕᓄᑦ ᐅᑯᓄᖓ ᐱᑦᓯᐊᕈᓐᓃᒃᑲᓐᓂᑐᐃᓐᓇᕐᐳᖅ, ᐃᓄᖁᑎᑎᓪᓗ ᐊᐅᓪᓚᕐᑎᓚᐅᓐᖏᓚᑎᑦ ᐃᑲᔪᓚᐅᕐᓇᒋᓪᓘᓐᓃᑦ.”
Currently Selected:
ᒨᓯᓯ ᐂᑉᐸᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
