ᒨᓯᓯ ᓯᕗᓪᓖᑦ 19
19
ᓱᑑᒪᒥᐅᑦ ᐊᔪᖅᑐᓕᓂᖏᑦ
1ᐅᓐᓄᒃᑎᓪᓗᒍ ᐂᖏᓖᒃ ᒪᕐᕉᒃ ᓱᑑᒪᒧᑦ ᑎᑭᑉᐴᒃ, ᓘᑎᓗ ᓱᑑᒪᐅᑉ ᐃᑎᖅᑕᕐᕕᖓᓂ ᐃᒃᓯᕙᓚᐅᖅᐳᖅ. ᓘᑎᐅᓪᓗ ᑕᑯᒐᒥᒋᒃ, ᓂᑯᕕᓪᓗᓂ ᐸᕐᕆᐊᖅᐹᒃ. ᐅᑯᓪᓗᓂᓗ ᑮᓇᓂ ᐊᒃᑐᖅᓗᒍ ᓄᓇᒧᑦ. 2ᐅᖃᖅᐳᖅ, “ᐊᖓᔪᖅᑳᒃᑲᒃ ᐅᖃᐅᑎᕙᑦᓯᒃ ᑕᒪᐅᖓ ᓄᖅᑲᖁᓪᓗᓯᒃ, ᐱᔨᑦᓯᓗ ᐃᒡᓗᖓᓄᐊᖁᓪᓗᓯᒃ ᓯᓂᒃᑕᖅᓗᓯᒡᓗ, ᐃᑎᒐᓯᒡᓗ ᐅᐊᓴᖅᓗᒋᑦ. ᐅᓪᓛᕈᖅᓗᓯᒃ ᒪᑭᒃᑯᑦᓯᒃ ᐅᐸᒃᑕᑦᓯᖕᓄᑦ ᐊᐅᓪᓚᕐᖕᓂᐊᕋᑦᓯᒃ.”
ᑖᒃᑯᐊᒡᓕ ᑭᐅᕘᒃ, “ᐋᒃᑲᓕ, ᒫᓂ ᐃᒡᓗᒐᓴᒡᔪᐊᑦ ᐊᖅᑯᑎᖏᓐᓂ ᐅᓐᓄᐊᖅᓯᐅᕐᖕᓂᐊᖅᑐᒍᒃ.”
3ᑖᑦᓱᒪᓕ ᐊᔪᐃᓐᓈᕆᒐᒥᒋᒃ, ᑭᖑᓂᖓᒍᑦ ᐃᒡᓗᒥᓄᐊᖃᑎᒋᓕᖅᐹᒃ; ᓂᕆᔭᒃᓴᑦᑎᐊᕙᖕᓂᒡᓗ ᓂᕿᓕᐅᕈᑎᓪᓗᒋᒃ, ᓂᐊᖂᔭᓂᒡᓗ ᐳᕙᓪᓚᖅᓴᐅᑎᖃᖏᑦᑐᓂᒃ, ᓂᕆᓪᓗᑎᒡᓗ.
4ᑖᒃᑯᐊᒡᓕ ᓯᓂᒐᓱᓕᓚᐅᖅᑎᓐᓇᒋᒃ ᓱᓕ, ᐃᒡᓗᒐᓴᖕᒥᐅᑦ ᐊᖑᑎᑦ, ᓱᑑᒪᒥᐅᑦ ᐃᓅᓱᒃᑐᑦ ᐃᓄᑐᕾᓪᓗ, ᓘᑎᐅᑉ ᐃᒡᓗᖓ ᐃᓗᕚᑦ ᓯᓚᑖᓂᑦ. 5#ᐃᓗᐊᖅᓮᔩᑦ 19:22-24.ᓘᑎᓗ ᐅᖃᐅᑎᕚᑦ ᐅᖃᖅᓗᑎᒃ, “ᓇᐅᒡᓕ ᐊᖑᑎᑦ ᐅᓐᓄᒃ ᐃᒡᓗᖕᓄᐊᖅᑲᐅᔪᑦ? ᑖᒃᑯᐊ ᐅᕙᑦᑎᓐᓄᑦ ᐊᓂᑎᓚᐅᒃᑭᑦ! ᓄᓕᐊᕈᒪᒐᑦᑎᒍ.”
6ᓘᑎᓗ ᐃᒡᓗᒥᑦ ᐊᓂᓪᓗᓂ ᐃᓄᖕᓄᑦ, ᐃᒡᓘᑉ ᐹᖓ ᒪᑐᕚ ᓯᓚᑖᓂᑦ. 7ᐅᖃᖅᓗᓂᓗ, “ᐃᓚᓐᓇᕆᔭᒃᑲ, ᕿᓄᕕᒋᕙᑦᓯ ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᖕᓂᐊᕋᓯ! 8ᑕᑯᒋᑦ, ᒪᕐᕉᖕᓂᒃ ᐸᓂᖃᖅᑐᖓ ᓱᓕ ᐊᖑᒻᒧᑦ ᐊᒃᑐᖅᑕᐅᓚᐅᖅᓯᒪᖏᑦᑑᖕᓂᒃ; ᑖᒃᑯᐊᒃ ᐃᓕᑦᓯᓐᓄᑦ ᐊᓂᑎᓚᐅᖅᓛᒃᑲᒃ, ᐃᓱᒪᖅᓲᑎᒋᓂᐊᕋᑦᓯᐅᒃ; ᐅᑯᐊᒡᓕ ᐊᖑᑏᒃ ᐱᓕᕆᐊᕆᓇᓱᐊᕐᖕᓂᐊᕋᓯᐅᒃ; ᐃᒡᓗᓐᓂ ᑖᒃᑯᐊ ᑐᔪᕐᖕᒥᐊᕆᒐᒃᑭᒃ.”
9ᑖᒃᑯᐊᓕ ᐅᖃᖅᐳᑦ, “ᐊᒡᕕᐊᕋᓱᓐᖏᓚᐅᕆᑦ, ᐅᓇ ᑕᒫᓂ ᓄᓇᖃᖅᑐᑐᖃᐅᖏᑦᑐᖅ, ᐅᕙᑦᑎᓐᓂᒃ ᐅᖃᐅᑦᔨᓇᓱᒃᑐᖅ! ᐱᐅᖏᓐᓂᖅᓴᒥᒃ ᐱᓇᓱᐊᕐᕕᒋᓂᐊᖅᐸᑦᑎᒋᑦ ᑖᒃᑯᓄᖓ ᐱᓇᓱᐊᕈᒪᔭᑦᑎᓐᓂᑦ.” ᓘᑎᓗ ᐊᔭᒃᐹᑦ ᐹᖓ ᓱᕋᒍᒪᓪᓗᒍ. 10ᐊᖑᑏᒡᓕ ᑖᒃᑯᐊᒃ ᐃᒡᓗᒦᑦᑑᒃ ᓘᑎ ᑎᒍᓪᓗᒍ ᐃᑎᖅᑎᑉᐹᒃ, ᐹᖓᓗ ᒪᑐᓪᓗᒍ. 11#ᐊᑕᓃᑦ ᐂᑉᐸᖏᑦ 6:18.ᐊᖑᑎᓪᓗ ᑕᐅᑐᒍᓐᓃᖅᑎᑉᐰᑦ, ᐹᖓᑕ ᓯᓚᑖᓃᑦᑐᑦ, ᐃᓅᓱᒃᑐᑦ ᐃᓄᑐᕾᓪᓗ, ᐃᒡᓘᑉ ᒪᑐᐊᓂᒃ ᓇᓂᓯᓇᓱᒡᓗᑎᒃ ᓴᐱᓕᖁᓪᓗᒋᑦ.
ᓘᑎᐅᑉ ᓱᑑᒪᒥᒃ ᕿᒤᓂᖓ
12ᐊᖑᑏᒡᓗ ᑖᒃᑯᐊᒃ ᓘᑎᒧᑦ ᐅᖃᖅᐴᒃ, “ᑕᕝᕙᓂ ᐊᓯᖕᓂᒃ ᐃᓚᖃᖅᐲᑦ? ᓂᖓᐅᖃᕈᕕᑦ, ᐃᕐᖕᓂᖃᕈᕕᑦ, ᐸᓂᖃᕈᕕᓪᓘᓐᓃᑦ, ᐊᓯᖏᓐᓂᒡᓘᓐᓃᑦ ᐃᓚᖃᕈᕕᑦ ᐃᒡᓗᒐᓴᖕᓂ, ᑖᒃᑯᐊ ᑕᕝᕙᓐᖓᑦ ᐊᐅᓪᓚᖅᑎᓕᒃᑭᑦ; 13ᑖᒃᑯᐊ ᓄᓇᓖᑦ ᐊᓯᕈᕐᖕᓂᐊᓕᕋᑦᑎᒍ, ᓂᐱᖃᕈᑕᐅᒻᒪᕆᓕᕐᖕᒪᑕ ᐊᔪᖅᑐᓕᓂᕋᖅᑕᐅᓪᓗᑎᒃ ᐱᐅᖏᑦᑐᕐᔪᐊᓂᒃ ᐊᑕᓂᐅᑉ ᓵᖓᓂ, ᐊᑕᓂᐅᓪᓗ ᑎᓕᕚᑎᒍᒃ ᐊᓯᕈᐃᖁᓪᓗᑕ ᑖᒃᑯᓂᖓ.”
14ᑕᕝᕙ ᓘᑎ ᐊᓂᕗᖅ ᓂᖓᐅᒃᓴᓂ ᐅᖃᐅᑎᔭᖅᑐᖅᓗᒋᑦ, ᐸᓂᖏᑕ ᐅᐃᒃᓴᖏᑦ, ᐅᖃᐅᑎᓪᓗᒋᒡᓗ, “ᑐᐊᕕᖅᓗᓯᒃ ᑕᕝᕙᓐᖓᑦ ᐊᐅᓪᓚᓕᕆᑦᓯᒃ; ᐊᑕᓂᐅᑉ ᑖᒃᑯᐊ ᐃᒡᓗᒐᓮᑦ ᐊᓯᕈᕐᖕᓂᐊᓕᕐᖕᒪᒋᑦ.” ᓂᖓᐅᒃᓴᖏᓐᓄᓪᓕ ᓘᑎ ᐅᖃᖑᐊᑐᐃᓐᓇᖅᑑᔮᖅᐳᖅ.
15ᐅᓪᓛᖅ ᖃᐅᓕᖅᑎᓪᓗᒍ, ᐂᖏᓖᒃ ᓘᑎᒥᒃ ᑐᐊᕕᖅᓱᐃᓕᖅᐴᒃ, ᐅᖃᖅᓗᑎᒃ, “ᐸᕐᖕᓇᓕᕆᑦ! ᓄᓕᐊᑦ ᓇᒡᓴᖅᓗᒍ ᐸᓃᒃᑭᒡᓗ ᑕᕝᕙᓃᑦᑑᒃ, ᐊᐅᓪᓚᓕᕆᑦᓯ, ᐱᖃᓯᐅᑦᔭᐅᖁᓇᓯ ᐃᒡᓗᒐᓮᑦ ᐊᓯᕈᖅᑕᐅᓕᖅᐸᑕ.” 16#2 ᐲᑦᑐᕉᓯ 2:7.ᓘᑎᓕ ᓄᖅᑲᖓᓕᕐᖕᒪᑦ; ᐊᖑᑏᑦ ᐊᒡᒐᖏᑎᒍᑦ ᑎᒍᓪᓗᒋᑦ ᓄᓕᐊᖓᓗ ᐸᓂᖏᒡᓗ ᑕᓯᐅᖅᑕᐅᓕᖅᐳᑦ, ᐊᑕᓂᕐᖕᒧᑦ ᓂᑲᒋᔭᐅᖕᒪᑕ, ᑖᒃᑯᐊᓗ ᐊᐅᓪᓚᕈᑎᕚᑦ ᐃᒡᓗᒐᓮᑦ ᓯᓚᑖᓄᑦ. 17ᐊᐅᓪᓚᕈᑎᒐᒥᒋᓪᓗ, ᐂᖏᓖᒃ ᐅᖃᖅᐳᒃ, “ᕿᒫᒋᑦᓯ ᐃᓅᓂᐊᕋᑦᓯ; ᐅᑎᒧᑦ ᕿᕕᐊᕐᖕᓂᐊᕋᓯ ᓇᖅᓴᒥᓗ ᑕᒫᓂ ᓄᖅᑲᕐᖕᓂᐊᕋᓯ, ᖃᖅᑲᓄᓪᓕ ᕿᒫᒋᑦᓯ, ᑐᖁᖃᑕᐅᖁᓇᓯ.”
18ᓘᑎᐅᓪᓕ ᐅᖃᐅᑎᕚᒃ, “ᑍᒤᓕᐅᖅᑎᑦᓯᖏᓪᓗᓯᒃ, ᐊᑕᓃᒃᑳᒃ; 19ᑕᑯᒋᑦ ᐱᔩᑦ ᖁᕕᐊᒋᔭᐅᖕᒪᑦ ᓵᖕᓂ, ᐊᖏᔪᒥᒃ ᐱᑦᓯᐊᕐᕕᒋᒐᕕᖓ ᐃᓅᓕᐊᕆᓪᓗᖓ; ᖃᖅᑲᓄᓪᓕ ᕿᒫᓇᓱᐊᕈᒪᓐᖏᓚᖓ, ᐊᓯᕈᖅᑕᐅᓇᖅᑐᒧᑦ ᑎᑭᖁᓇᖓ, ᑐᖁᓗᖓᓗ. 20ᑕᑯᒋᑦ, ᐃᒃᑯᐊ ᓄᓇᓖᑦ ᒥᑭᔪᑦ ᐊᕙᓃᑦᑐᑦ ᖃᓂᒻᒪᑕ ᕿᒫᕕᒋᔪᓐᓇᖅᑕᒃᑲ, ᒥᑭᔫᓪᓗᑎᒡᓗ, ᑍᑲᓂ ᐊᓐᓇᒃᑲᔭᖅᐳᖓ!”
21ᑖᑦᓱᒪ ᑭᐅᕚ, “ᑕᑯᒋᑦ ᑍᒫᒃ ᐱᔪᓐᓇᖅᑎᒃᑭᕙᒋᑦ, ᑖᒃᑯᐊ ᐃᒡᓗᒐᓮᑦ ᐅᖃᐅᓯᕆᔭᑎᑦ ᐊᓯᕈᕐᖕᓂᐊᓐᖏᓚᒃᑲ. 22ᐊᑏ, ᑐᐊᕕᖅᓗᓯ, ᑍᑯᖓ ᕿᒫᓕᕆᑦᓯ; ᖃᓄᐃᓕᐅᕈᓐᓇᖏᓐᓇᒪ ᑍᑯᖓ ᑎᑭᓚᐅᖏᓐᓂᑦᓯᓐᓂ.”
ᑍᒤᒻᒪᑦ ᐃᒡᓗᒐᓮᑦ ᑍᔭᐅᓕᓚᐅᖅᐳᖅ ᔪᐊᕆᒥᒃ.#19:22 ᔪᐊᕆ ᐄᑉᕉᑎᑐᑦ ᑐᑭᖃᖅᑑᔮᖅᑐᖅ ᒥᑭᔪᒥᒃ
ᓱᑑᒪᐅᑉ ᒍᒨᕋᐅᓪᓗ ᐊᓯᕈᖅᑕᐅᓂᖏᒃ
23ᓯᕿᓂᕐᓗ ᖁᑦᑎᒃᓯᓚᐅᖅᐳᖅ ᓘᑎᒃᑯᑦ ᓄᓇᓕᖕᓄᑦ ᔪᐊᕆᒧᑦ ᑎᑭᑎᓪᓗᒋᑦ, 24#ᒫᑎᐅᓯ 10:15; 11:23,24; ᓘᑲᓯ 10:12; 17:29; 2 ᐲᑦᑐᕉᓯ 2:6; ᔫᑎᐅᑉ 1:7.ᑕᕝᕙᓕ ᐊᑕᓂᖅ ᑲᑕᒐᖅᑎᑦᓯᓕᖅᐳᖅ ᐃᒃᑭᕆᒃᑐᓂᒃ ᐃᑯᒪᒥᒡᓗ ᐃᒡᓗᒐᓴᖕᓄᑦ ᓱᑑᒪᒧᑦ ᒍᒨᕋᒧᓪᓗ ᐊᑕᓂᕐᖕᒥᑦ ᕿᓚᖕᒥᑦ ᐱᔪᓂᒃ. 25ᑖᒃᑯᐊᓗ ᐃᒡᓗᒐᓮᑦ ᐊᓯᕈᖅᐰᑦ, ᓇᖅᓴᓕᒫᕐᓗ, ᐃᓄᖏᓪᓗ ᑕᒪᕐᖕᒥᒃ ᐃᒡᓗᒐᓴᖕᓃᑦᑐᑦ, ᐱᕈᖅᑐᓕᒫᓪᓗ ᓄᓇᒥ. 26#ᓘᑲᓯ 17:32.ᓘᑎᐅᓪᓕ ᓄᓕᐊᖓ ᐅᑎᒧᑦ ᑕᑯᓴᕋᒥ, ᑕᕆᐅᓐᖑᖅᓗᓂ ᓇᐸᔫᓕᖅᐳᖅ.
27ᐅᓪᓛᒻᒪᕆᒃᑯᓪᓕ ᖃᐅᑎᓪᓗᒍ ᐂᑉᕋᕼᐋᒻ ᐅᐸᒃᓯᒪᓚᐅᖅᑕᒥᓄᐊᖅᐳᖅ ᐊᑕᓂᐅᑉ ᓇᔪᓚᐅᖅᑕᖓᓄᑦ. 28ᐳᖅᑐᔪᒥᑦ ᐊᒻᒧᑦ ᑕᑯᓐᓇᕋᒥᒋᑦ ᓱᑑᒪ ᒍᒨᕋᓗ ᓄᓇᓕᒫᕐᓗ ᓇᖅᓴᖅ, ᑕᑯᕚ ᐳᔪᖅ ᖁᒻᒧᐊᒃᑐᖅ ᓲᕐᓗ ᐃᑯᐊᓚᑦᓯᕕᐊᓗᖕᒥᑦ ᐳᔫᖅᑐᖅ. 29ᐃᒤᓚᐅᖅᐳᖅ, ᒎᑎᐅᑉ ᐃᒡᓗᒐᓮᑦ ᐊᓯᕈᕋᒥᒋᑦ ᓇᖅᓴᒦᑦᑐᑦ, ᒎᑎᐅᑉ ᐂᑉᕋᕼᐋᒻ ᐃᖅᑲᐅᒪᓚᐅᖅᐹ, ᓘᑎ ᐊᐅᓪᓚᖅᑎᓪᓗᒍ ᓄᖑᑕᐅᔪᑦ ᐊᑯᕐᖓᓐᓂᑦ, ᓄᖑᓐᓂᐊᓕᕋᒥᒋᑦ ᐃᓗᒐᓮᑦ ᓘᑎᐅᑉ ᓄᓇᖃᕐᕕᒋᔭᖏᑦ.
ᒧᐊᐱᒥᐅᑦ ᐊᒧᓁᑎᓪᓗ ᐱᒋᐊᕐᖕᓂᖏᑦ
30ᓘᑎᓕ ᔪᐊᕆᒥᑦ ᐊᐅᓪᓚᕋᒥ, ᓄᓇᖃᓚᐅᖅᐳᖅ ᖃᖅᑲᓂ ᐸᓃᖕᓂ ᒪᕐᕉᒃ ᐃᓚᒋᓪᓗᒋᒃ, ᑲᑉᐱᐊᓱᓚᐅᕋᒥ ᔪᐊᕆᒥ ᓄᓇᖃᕆᐊᒃᓴᖅ; ᕾᕈᓱᖕᒥᐅᑕᓕᖅᓗᑎᒃ ᐸᓃᖕᓂ ᒪᕐᕉᒃ ᐃᓚᒋᓪᓗᒋᒃ. 31ᐸᓂᖓᓕ ᐊᖓᔪᒃᓕᖅ ᓄᑲᕐᖕᒥᓄᑦ ᐅᖃᖅᐳᖅ, “ᐊᑖᑕᕗᒃ ᐃᓄᑐᖃᐅᓕᕐᖕᒪᑦ, ᐊᖑᑎᑕᖃᕋᓂᓗ ᓄᓇᒥ ᐅᕙᑦᑎᓐᓂᒃ ᓄᓕᐊᕈᓐᓇᖅᑐᒥᒃ ᓄᓇᕐᔪᐊᕐᖕᒥᐅᑦ ᐱᐅᓯᖏᑦ ᒪᓕᒡᓗᒋᑦ. 32ᕾᒋᑦ, ᐊᑖᑕᕗᒃ ᐃᒥᖅᑎᓚᐅᖅᓚᕗᒃ ᕔᓂᒥᒃ, ᐃᓐᓇᖓᖃᑎᒋᓂᐊᕋᑦᑎᒃᑯᒃ, ᕿᑐᕐᖓᖅᑖᕐᖕᓂᐊᕋᓐᓄᒃ ᐊᑖᑕᑦᑎᓐᓄᑦ ᑭᖑᕚᓕᐅᖅᑐᒃᓴᒥᒃ.” 33ᑕᕝᕙ ᑍᑦᓱᒪᓂ ᐅᓐᓄᒥ ᕔᓂᒥᒃ ᐃᒥᖅᑎᑉᐹᒃ; ᐸᓂᖓᑕᓗ ᐊᖓᔪᒃᓕᐅᑉ ᓄᓕᐊᕐᖕᓂᒃᑯᑦ ᐊᑖᑕᓂ ᐱᖃᑎᒋᕚ; ᐊᑖᑕᖓᓕ ᖃᐅᔨᓚᐅᓐᖏᓚᖅ ᖃᖓ ᐃᓐᓇᕐᖕᓂᕐᖕᒪᖔᑦ ᖃᖓᓗ ᒪᑭᓐᓂᕐᖕᒪᖔᑦ.
34ᖃᐅᑎᓪᓗᒍᓕ, ᐊᖓᔪᒃᓕᐅᑉ ᓄᑲᓂ ᐅᖃᐅᑎᕚ, “ᑕᑯᒋᑦ, ᐅᓐᓄᒃ ᐃᓐᓇᖓᖃᑎᒋᓚᐅᖅᐸᕋ; ᐅᓐᓄᒃ ᓱᓕ ᕔᓂᒥᒃ ᐃᒥᖅᑎᒃᑲᓐᓂᓚᐅᕐᖕᓂᐊᖅᐸᕗᒃ, ᐅᐸᒡᓗᒍ ᐱᖃᑎᒋᓂᐊᕋᕕᐅᒃ; ᑭᖑᕚᒃᓴᖃᕐᖕᓂᐊᕋᑦᑕ ᐊᑖᑕᑦᑎᒍᑦ.” 35ᑍᒤᒻᒪᑦ ᐊᑖᑕᑎᒃ ᕔᓂᒥᒃ ᐃᒥᖅᑎᒃᑭᕚᒃ, ᓄᑲᖅᓕᐅᑉ ᐅᐸᒃᓗᒍ, ᐃᓐᓇᖓᖃᑎᒋᕚ; ᐊᑖᑕᖓᓗ ᖃᐅᔨᓚᐅᓐᖏᓚᖅ ᖃᖓ ᐃᓐᓇᕐᖕᓂᕐᖕᒪᖔᑦ ᖃᖓᓗ ᒪᑭᓐᓂᕐᖕᒪᖔᑦ. 36ᑕᕝᕙ ᓘᑎᐅᑉ ᐸᓂᖏᒃ ᑕᒪᕐᖕᒥᒃ ᐊᑐᓂᑦ ᓄᑕᕋᒃᓴᖃᓕᓚᐅᖅᐴᒃ ᐊᑖᑕᒥᖕᓂᑦ. 37ᐸᓂᖓᓗ ᐊᖓᔪᒃᓕᖅ ᐃᕐᖕᓂᖅᑖᖅᐳᖅ, ᑖᓐᓇᓗ ᐊᑦᓯᖅᐹ ᒧᐊᐱᒥᒃ.#19:37 ᒧᐊᐱ ᐄᑉᕉᑎᑐᑦ ᑐᑭᖃᖅᑐᒋᔭᐅᔪᖅ “ᐊᑖᑕᓐᓂᑦ ᐱᓯᒪᔪᒥᒃ.” ᑖᓐᓇᓗ ᓯᕗᓕᕆᔭᐅᕗᖅ ᐅᓪᓗᒥᒧᑦ ᑎᑭᓪᓗᒍ ᒧᐊᐱᒥᐅᓂᑦ. 38ᐸᓂᖓᑦᑕᐅᖅ ᓄᑲᕐᓕ ᐃᕐᖕᓂᖅᑖᓚᐅᕆᕗᖅ, ᑖᓐᓇᓗ ᐊᑦᓯᖅᐹ ᐱᓐ-ᐋᒥᒥᒃ.#19:38 ᐱᓐ-ᐋᒥ ᐄᑉᕉᑎᑐᑦ ᑐᑭᖃᖅᑐᖅ “ᐃᓚᒋᔭᓐᓂᑦ ᐃᕐᖕᓂᖅᑖᕆᔭᕋ.” ᑖᓐᓇᓗ ᓯᕗᓕᕆᔭᐅᕗᖅ ᐅᓪᓗᒥᒧᑦ ᑎᑭᓪᓗᒍ ᐊᒧᓁᑎᓂᑦ.
Currently Selected:
ᒨᓯᓯ ᓯᕗᓪᓖᑦ 19: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
