ᒨᓯᓯ ᓯᕗᓪᓖᑦ 25
25
ᐂᑉᕋᕼᐋᒻ ᑭᖑᕚᕆᔭᖏᑕᑦᑕᐅᖅ ᐃᓚᖏᑦ
ᑯᕉᓂᑲ ᓯᕗᓪᓖᑦ 1:32,33
1ᐂᑉᕋᕼᐋᒻᓗ ᓄᓕᐊᓂᒃᑲᓐᓂᖅᐳᖅ, ᐊᑎᖃᖅᑐᒥᒃ ᑭᑑᕋᒥᒃ. 2ᑖᑦᓱᒪᓗ ᕿᑐᕐᖓᖅᑖᖅᑎᑉᐹ ᔨᒻᕋᓐᒥᒃ, ᔫᒃᓵᓐᒥᒡᓗ, ᒥᑖᓂᒥᒡᓗ, ᒥᑎᐊᓂᒥᒡᓗ, ᐃᓴᐸᒃᒥᒡᓗ, ᓱᐊᒥᒡᓗ. 3ᔫᒃᓵᓐ ᐊᑖᑕᒋᔭᐅᓚᐅᖅᐳᖅ ᓰᐸᒧᑦ ᑎᑖᓂᒧᓪᓗ, ᑎᑖᓂᓗ ᐃᕐᖕᓂᖃᖅᓗᓂ ᐊᓱᕆᒥᒃ, ᓕᑐᓯᒥᒡᓗ, ᓕᐅᒥᒥᒡᓗ. 4ᒥᑎᐊᓂᐅᓪᓕ ᐃᕐᖕᓂᖏᑦ ᐅᑯᐊᖑᕗᑦ ᐃᐸ, ᐃᐱᕆ, ᕼᐊᓅᒃ, ᐊᐰᑕ, ᐃᐅᓪᑖᓗ. ᑖᒃᑯᐊᓕᒫᓪᓗ ᑕᒪᕐᖕᒥᒃ ᑭᖑᕚᕆᔭᐅᕗᑦ ᑭᑑᕋᒧᑦ.
5ᐂᑉᕋᕼᐋᒻᓗ ᑕᒪᕐᖕᒥᒃ ᐱᖁᑎᓕᒫᓂ ᐂᓴᑭᒧᑦ ᑐᓂᕔᑦ; 6ᓄᓕᐊᖓᑕ ᐊᓯᐊᒍᑦ ᐃᕐᖕᓂᖅᑖᕆᓯᒪᔭᓂ ᑐᓂᓯᕕᒋᕔᑦ ᑐᓂᕐᕈᑎᓂᒃ, ᐃᓅᓂᕐᖕᒥᓂ ᓱᓕ ᑖᒃᑯᐊ ᐃᕐᖕᓂᓂ ᐊᐅᓪᓚᖅᑎᑉᐰᑦ ᐃᕐᖕᓂᕐᖕᒥᓄᑦ ᐂᓴᑭᒧᑦ ᑲᑎᒪᔭᐅᖁᓇᒋᑦ, ᓄᓇᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ.
ᐂᑉᕋᕼᐋᒻ ᑐᖁᓂᖓ ᐃᓗᕕᖅᑕᐅᓂᖓᓗ
7ᐅᑯᐊ ᑕᕝᕙ ᐂᑉᕋᕼᐋᒻ ᐅᓪᓗᖏᑦ ᐊᕐᕌᒍᖏᓪᓗ ᐃᓅᓯᕐᖕᒥᓂ, ᐊᕐᕌᒍᖃᓚᐅᖅᐳᖅ 175ᓂᒃ. 8ᐂᑉᕋᕼᐋᒻ ᐊᓂᕐᖕᓇᖏᓚᐅᖅᐳᖅ ᐃᑦᑐᐊᓘᓕᖅᓗᓂ, ᐃᓄᑐᖃᐅᓪᓗᓂ ᐊᕐᕌᒍᖏᑦ ᐅᓄᖅᑐᐊᓘᓕᖅᓗᑎᒃ, ᐃᓚᒋᓚᐅᖅᑕᒥᓄᓪᓗ ᐃᓚᓕᐅᑎᓪᓗᓂ. 9ᐃᕐᖕᓂᖏᒃᑕᓗ ᐂᓴᑭᐅᑉ ᐃᓯᒥᐅᓪᓗ ᐃᓗᕕᖅᐹᒃ ᕾᕈᓱᖕᒥ ᒪᒃ-ᐲᓚᒥ, ᐱᕈᖅᓰᕕᖃᖅᑐᒥ ᐃᐸᕋᓂᐅᑉ ᔪᕼᐊᕆᐅᑉ ᐃᕐᖕᓂᖓᑕ ᓄᓇᖁᑎᕕᓂᖓᓄᑦ ᕼᐃᑍᑎᒥᐅᑕᕐᖕᒧᑦ, ᒪᒻᕆᐅᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᒧᑦ. 10#ᒨᓯᓯ ᓯᕗᓪᓖᑦ 23:3-16.ᑖᓐᓇ ᐂᑉᕋᕼᐋᑉ ᐱᕈᖅᓰᕕᒃ ᓂᐅᕕᐊᕆᓚᐅᕐᖕᒪᒍ ᕼᐃᑍᑎᒥᐅᓂᑦ; ᐂᑉᕋᕼᐋᒻᓗ ᐃᓗᕕᖅᑕᐅᕗᖅ ᓄᓕᐊᓂ ᓵᕋ ᐃᓗᕕᖃᖃᑎᒋᓪᓗᒍ. 11ᐂᑉᕋᕼᐋᒻᓗ ᑐᖁᓯᒪᓕᖅᑎᓪᓗᒍ, ᐃᕐᖕᓂᖓ ᐂᓴᑭ ᒎᑎᐅᑉ ᓮᒻᒪᖅᑎᓚᐅᖅᐹ. ᐂᓴᑭᓗ ᓄᓇᖃᓚᐅᖅᐳᖅ ᐱᐊᕐ-ᓚᕼᐂ-ᕈᐂᒥ.
ᐄᓯᒥᐅᓪ ᑭᖑᕚᖏᑦ
ᑯᕉᓂᑲ ᓯᕗᓪᓖᑦ 1:28-31
12ᐅᑯᐊ ᑕᕝᕙ ᐃᓯᒥᐅᓪ ᑭᖑᕚᖏᑦ, ᐂᑉᕋᕼᐋᒻ ᐃᕐᖕᓂᖓᑕ, ᐂᒡᒐᐅᑉ ᐄᑦᔨᑉᑎᒥᐅᑕᐅᑉ ᓵᕋᐅᑉ ᓯᐊᓛᖓᑕ, ᐂᑉᕋᕼᐋᒻᒥᑦ ᐃᕐᖕᓂᖅᑖᕆᓚᐅᖅᑕᖓᑕ, 13ᐅᑯᐊ ᑕᕝᕙ ᐊᑎᖏᑦ ᐃᓯᒥᐅᑉ ᐃᕐᖕᓂᖏᑕ ᐊᖓᔪᒃᓯᕐᖕᓂᑦ ᐱᒋᐊᖅᓗᒋᑦ; ᓂᐰᐅᑎ ᐄᓯᒥᐅᑉ ᐊᖓᔪᒃᓯᖅᐹᖁᑎᖓ; ᑭᑕᕆ, ᐊᑉᑎᐅᓪ, ᒥᑉᓵᒻ, 14ᒥᔅᒪ, ᑑᒪ, ᒫᓴ, 15ᕼᐊᑖᑦ, ᑎᒪ, ᔨᑖᕐ, ᓇᐱᔅ, ᑭᑎᒪᓗ. 16ᑖᒃᑯᐊ ᑕᕝᕙ ᐃᓯᒥᐅᑉ ᐃᕐᖕᓂᖏᑦ ᐊᑎᖏᓪᓗ, ᓄᓇᒋᔭᖏᑕ ᐊᑎᖅᑖᕆᓚᐅᖅᐰᑦ, ᓄᓇᖃᕐᕕᒋᕙᒃᑕᕕᓂᖏᓐᓄᓪᓗ ᐊᑎᕆᔭᐅᓪᓗᑎᒃ, 12ᓗᑎᒃ ᐊᖓᔪᖅᑳᖑᓚᐅᖅᐳᑦ ᑭᖑᕚᒥᖕᓄᑦ. 17ᐅᑯᐊ ᑕᕝᕙ ᐃᓯᒥᐅᑉ ᐊᕐᕌᒍᖏᑦ ᐃᓅᓚᐅᖅᐳᖅ 137ᓂᒃ ᐊᕐᕌᒍᓂᒃ; ᐊᓂᕐᖕᓇᖏᓚᐅᖅᐳᖅ ᑐᖁᓪᓗᓂ ᐃᓚᒋᓚᐅᖅᑕᒥᓄᓪᓗ ᐃᓚᓕᐅᑎᓪᓗᓂ. 18ᑐᖁᓚᐅᖅᐳᖅ ᐃᓚᓕᒫᓂ ᑲᑎᒪᓪᓗᓂᒋᑦ. ᑖᒃᑯᐊ ᓄᓇᖃᓚᐅᖅᐳᑦ ᕼᐊᕕᓚᒥᑦ ᓲᕆ ᑎᑭᓪᓗᒍ, ᐄᑦᔨᑉᑎᐅᑉ ᐃᑎᕕᐊᓂ ᐊᓯᕆᐊᒧᐊᕆᐊᑉ ᓇᓛᓂ; ᑖᒃᑯᐊᓗ ᓄᓇᖃᓚᐅᖅᐳᑦ ᐃᓅᖃᑎᑎᒃ ᓄᓇᖃᖃᑎᒋᓪᓗᒋᑦ.
ᐄᓴᐅᓪᓗ ᔧᑰᓪᓗ ᐃᓅᓕᕐᖕᓂᖏᒃ
19ᐅᑯᐊ ᑕᕝᕙ ᐂᓴᑭᐅᑉ ᑭᖑᕚᖏᑦ, ᐂᑉᕋᕼᐋᒻ ᐃᕐᖕᓂᖓᑕ; ᐂᑉᕋᕼᐋᒻ ᐂᓴᑭᐅᑉ ᐊᑖᑕᒋᓚᐅᖅᐹ. 20ᐂᓴᑭ ᓄᓕᐊᓂᓚᐅᖅᐳᖅ ᕇᐱᑲᒥᒃ ᐊᕐᕌᒍᖃᓕᖅᓗᓂ 40ᓂᒃ, ᐱᑐᐃᓕᐅᑉ ᐸᓂᖓᓂᒃ ᐊᕋᒥᐊᒥᐅᑕᒥᒃ#25:20 ᐊᕋᒥᐊ ᑍᔭᐅᖕᒥᔪᖅ ᓯᕆᐊᒥᒃ ᓄᓇᒥᑦ ᐸᑖᓐ-ᐊᕌᒻᒥ,#25:20 ᐸᑖᓐ-ᐊᕌᒻᒥ ᑍᔭᐅᖕᒥᔪᖅ ᒥᓱᐳᑍᒥᐊᒥᒃ ᓔᐸᓂᐅᑉ ᓇᔭᖓᓂᒃ ᐊᕋᒥᐊᒥᐅᑕᐅᑉ. 21ᐂᓴᑭᓗ ᑐᒃᓯᐊᓚᐅᖅᐳᖅ ᐊᑕᓂᕐᖕᒧᑦ, ᓄᓕᐊᖓ ᕿᑐᕐᖏᓱᐃᑦᑑᖕᒪᑦ; ᑐᒃᓯᐊᕐᖕᓂᖓᓗ ᐊᑕᓂᐅᑉ ᑐᓴᖅᐹ, ᓄᓕᐊᖓᓗ ᕇᐱᑲ ᓄᑕᕋᒃᓴᖃᓕᖅᐳᖅ. 22ᓄᑕᕋᒃᓵᒡᓗ ᐃᒻᒥᖕᓅᓕᖅᐴᒃ ᐃᓗᖓᓂ; ᕇᐱᑲᓗ ᐅᖃᖅᐳᖅ, “ᖃᓄᐃᖏᑉᐸᑎᒃ, ᓱᖕᒪᑦ ᑍᒤᒃᐳᖔ?” ᐊᑕᓂᕐᖕᒧᓪᓗ ᐊᐱᖅᓱᓕᖅᐳᖅ.
23 #
ᕉᒪᒥᐅᓄᑦ 9:12. ᐊᑕᓂᐅᓪᓗ ᐅᖃᐅᑎᕚ,
“ᐃᓅᖃᑎᒌᒡᔪᐊᓂᒃ ᒪᕐᕈᐃᓂᒃ ᐃᓗᒥᐅᑕᖃᖅᐳᑎᑦ ᐃᒡᓕᐊᕐᖕᓂ,
ᐃᓅᒃ ᒪᕐᕉᒃ, ᐃᕐᖕᓂᐊᕆᒍᕕᒋᒃ, ᐃᓅᖃᑎᒌᒍᓐᓇᕈᒫᓐᖏᓚᒃ;
ᐂᑉᐸᖓ ᓴᓐᖏᓂᖅᓴᐅᔪᒫᖅᐳᖅ ᐂᑉᐸᕐᖕᒥᓂᑦ,
ᐊᖓᔪᒃᓯᕐᓗ ᐱᔨᑦᓯᕈᒫᖅᐳᖅ ᓄᑲᕐᖕᒥᓂᒃ.”
24ᕿᑐᕐᖏᕕᒃᓴᖓᓗ ᓇᓪᓕᐅᑎᖕᒪᑦ, ᑕᑯᒋᑦ, ᒪᕐᕈᓕᕗᖅ. 25ᓯᕗᓪᓕᐅᓪᓗᓂ ᐊᓂᔪᖅ ᐊᐅᐸᖅᑐᒥᒃ ᐅᕕᓂᖃᖅᐳᖅ, ᒥᖅᑯᕐᖕᒥᒡᓗ ᐅᓕᒃᓯᒪᔫᔮᖅᓗᓂ; ᑍᒤᓐᓂᖓᓄᑦ ᐊᑎᖃᖅᑎᑕᐅᓕᓚᐅᖅᐳᖅ ᐄᓴᒥᒃ. 26ᑭᖑᓪᓕᐅᓪᓗᓂ ᐊᓂᔪᖅ, ᑎᒍᒥᐊᓚᐅᖅᐳᖅ ᐄᓴᐅᑉ ᑭᖕᒥᐊᓂᒃ; ᐊᑎᖃᖅᑎᑕᐅᕗᕐᓗ ᔧᑯᒥᒃ. ᐂᓴᑭᓗ ᐊᕐᕌᒍᖃᓕᓚᐅᖅᐳᖅ 60ᓂᒃ ᐃᕐᖕᓂᖏᒃ ᐃᓅᓕᖅᑎᓪᓗᒋᒃ.
ᐄᓴᐅᑉ ᓂᐅᕐᕈᑎᖃᕐᖕᓂᖓ ᐊᖓᔪᒃᓯᐅᓂᕐᖕᒥᓂᒃ
27ᑖᒃᑯᐊᒡᓗ ᓄᑲᑉᐱᐊᒃ ᐱᕈᕋᒥᒃ, ᐄᓴ ᐊᔪᖏᑦᑑᓪᓗᓂ ᐆᒪᔪᖅᓯᐅᖅᑎᐅᓚᐅᖅᐳᖅ, ᓯᓚᒥᐅᑕᐅᓪᓗᓂᓗ, ᔧᑯᓕ ᐃᓱᒪᒃᓴᖅᓯᐅᖅᑎᓚᐅᖅᐳᖅ, ᑐᐱᕐᖕᒥᐅᑕᐅᓪᓗᓂ. 28ᐂᓴᑭᐅᓪᓗ ᓇᒡᓕᒋᓚᐅᖅᐹ ᐄᓴ, ᐆᒪᔪᖅᑕᕕᓂᖏᓐᓂᒃ ᓂᕆᖃᑦᑕᕋᒥ; ᕇᐱᑲᐅᓪᓕ ᔧᑯ ᓇᒡᓕᒋᕚ.
29ᐅᓪᓗᐃᑦ ᐃᓚᖓᓐᓂ ᔧᑰᑉ ᓂᕿᓕᐅᓚᐅᖅᐳᖅ ᖃᔪᓕᐅᖅᓗᓂ ᐃᓚᖃᐅᖅᑐᒥᒃ, ᐄᓴᓗ ᑎᑭᑉᐳᖅ ᐆᒪᔪᖅᓯᐅᖅᑐᕕᓂᐅᓪᓗᓂ, ᑳᓕᖅᓯᒪᓪᓗᓂᓗ. 30ᐄᓴᓗ ᔧᑯᒧᑦ ᐅᖃᖅᐳᖅ, “ᑳᒃᑐᐊᓘᒐᒪ; ᑕᕝᕙᓐᖓᑦ ᐊᐅᐸᖅᑐᒥᑦ ᓂᕆᑎᓚᐅᓐᖓ.” (ᑍᒤᒻᒪᑦ ᐄᓴ ᐊᑎᖃᖅᑎᑕᐅᓕᓚᐅᖅᐳᖅ ᐄᑐᒥᒥᒃ.)#25:30 ᐄᑐᒥ ᐄᑉᕉᑎᑐᑦ ᑐᑭᖃᖅᑑᔮᖅᑐᖅ ᐊᐅᐸᖅᑐᒥᒃ
31ᔧᑰᑉ ᑭᐅᕚ, “ᓯᕗᓪᓕᕐᖕᒥᒃ ᐊᖓᔪᒃᓯᐅᓃᑦ ᐊᑭᓕᐅᑎᓚᐅᕈᒃ ᐅᕙᓐᓄᑦ.”
32ᐄᓴᓗ ᐅᖃᖅᐳᖅ, “ᐱᖅᓕᖅᓗᖓ ᑐᖁᑐᐃᓐᓇᕆᐊᖃᓕᕋᒪ; ᓱᓇᒧᓪᓕ ᐊᑐᕋᔭᓕᖅᐹ ᐊᖓᔪᒃᓯᐅᓂᖅ?”
33 #
ᐄᑉᕈᐃᓄᑦ 12:16. ᔧᑰᑉ ᑭᐅᕚ, “ᐅᖃᕕᖅᑳᓚᐅᕆᑦ ᐅᕙᓐᓄᑦ.”
ᐄᓴᓗ ᐅᖃᕕᒃᐳᖅ, ᐊᖓᔪᒃᓯᐅᓂᓂ ᐊᑭᓕᐅᑎᒋᔪᒪᓪᓗᒍ ᔧᑯᒧᑦ. 34ᑕᕝᕙ ᔧᑰᑉ ᐄᓴ ᓂᐊᖂᔭᒥᒃ ᑐᓐᓂᕆᕚ ᖃᔪᓕᐊᒥᓂᒡᓗ ᐱᕈᖅᑐᓂᒃ ᓕᓐᑎᓪᓯᓂᒃ ᐊᑎᖃᖅᑐᒥᒃ ᐃᓚᓕᖕᒥᒃ, ᓂᕆᕗᖅ ᐃᒥᖅᓗᓂᓗ, ᒪᑭᓐᓇᒥ ᑕᕝᕙᓐᖓᑦ ᐅᐸᒃᑕᒥᓄᐊᕆᓪᓗᓂ. ᑍᒫᒃ ᐄᓴᐅᑉ ᐊᖓᔪᒃᓯᐅᓂᓂ ᖁᔭᓈᓚᐅᖅᐹ.
Currently Selected:
ᒨᓯᓯ ᓯᕗᓪᓖᑦ 25: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
