ᒨᓯᓯ ᓯᕗᓪᓖᑦ 49
49
ᔧᑰᑉ ᑭᖑᓪᓕᕐᐹᒥᒃ ᐅᖃᐅᓯᖃᕐᓂᖓ
1ᑕᕝᕙ ᔧᑰᑉ ᐃᕐᓂᓂ ᐃᒻᒥᓄᑦ ᕾᖁᕔᑦ, ᐅᖃᐅᑎᓪᓗᒋᓪᓗ, “ᐃᓕᑦᓯᓐᓄᑦ ᑲᑎᓚᐅᕆᑦᓯ, ᓯᕗᓂᒃᓴᑦᓯᓐᓂ ᐃᓕᑦᓯᓐᓄᑦ ᐊᑑᑎᔪᒫᕐᑐᓂᒃ ᐅᖃᐅᑎᓂᐊᕋᑦᓯ.
2ᑲᑎᓗᓯ ᓈᓚᓚᐅᕐᓯᓐᖓ, ᔧᑯᒧᑦ ᐃᕐᓂᐅᔪᓯ,
ᓈᓚᑦᓯᐊᕐᓗᒍᓗ ᐃᓴᕆᐊᓕ ᐊᑖᑕᓯ.
3ᕉᐱᓃ, ᐃᕝᕕᑦ ᐊᖓᔪᒃᓯᕐᐹᖁᑎᒋᒐᒃᑭᑦ,
ᓄᑭᖃᑦᓯᐊᕐᑎᓪᓗᖓ ᐱᔪᓐᓇᑦᓯᐊᓕᕐᓗᖓᓗ ᕿᑐᕐᖓᕐᑖᕆᓚᐅᕐᐸᒋᑦ,
ᐅᐱᒪᑦᔪᑎᒋᓯᒪᕙᒋᑦ ᐊᖑᑎᕈᕐᐸᓪᓕᐊᓕᕐᓂᓐᓄᑦ
ᐅᐱᒪᑦᔪᑎᒋᓯᒪᓪᓗᑎᓪᓗ ᐱᔪᓐᓇᕐᓂᓐᓂᒃ.
4ᐃᒥᕐᑎᑐᑦ ᕿᑲᖏᑦᑐᑎᑐᑦ ᑍᒤᑉᐳᑎᑦ,
ᐱᓪᓚᕆᓐᖑᕐᓂᕐᒥ ᐃᓂᖃᕐᓂᐊᓐᖏᓚᑎᑦ,
ᐊᑖᑕᕕᑦ ᐃᓐᓇᓐᖓᕕᐊᓄᑦ ᐂᓚᐅᕋᕕᑦ;
ᑕᕝᕙᓂᓗ ᐊᑖᑍᑦ ᓇᕐᕈᓇᕐᓯᑎᓚᐅᕐᐸᑦ
ᓯᓂᒡᕕᓐᓄᑦ ᐂᓚᐅᕋᕕᑦ!
5ᓯᒥᐅᓂ ᓕᕔᓗ ᓄᑲᕇᒃᐳᓯᒃ;
ᓱᒋᐅᑎᖏᑦ ᓴᕕᒡᔪᐊᑦ ᑲᑉᐱᐊᓇᕐᐳᑦ.
6ᑖᒃᑯᐊᒃ ᐃᓱᒪᒃᓴᕐᓯᐅᕐᕕᖏᖕᓄᑦ ᐃᓚᐅᔪᒪᓐᖏᓚᖓ
ᐆ ᐊᓂᕐᓂᕋᓗ, ᐃᓚᒋᔭᐅᖁᖏᓐᓂᕙᕋ ᐃᓄᒋᐊᒃᑐᖁᑎᖏᓐᓂ;
ᓂᓐᖓᐅᒪᓪᓗᑎᒃ ᐊᖑᑎᓂᒃ ᑐᖁᑦᓯᕙᖕᒪᑎᒃ
ᐃᒻᒧᒃᓯᐅᒐᐅᓪᓗ ᐊᖑᓴᓪᓗᖏᓐᓂᒃ ᐱᓐᖑᐊᕈᑎᒋᓪᓗᒋᑦ ᓄᑭᖏᓐᓂᒃ ᑭᒃᑐᕋᕐᑎᑦᓯᔪᓐᓇᕐᓱᑎᒃ.
7ᑖᒃᑯᐊᒃ ᓂᓐᖓᖕᓂᖏᒃ ᓯᕗᓂᕐᓗᓕᕐᓕᒃ, ᑲᑉᐱᐊᓇᕐᑐᐊᓘᖕᒪᑦ;
ᓂᓐᖓᐅᒪᓂᖏᒡᓗ ᐃᓖᔭᕐᓱᐃᓂᐅᓪᓗᑎᒃ!
ᑖᒃᑯᐊᒃ ᐊᒡᒍᕐᓂᐊᕐᐹᒃᑲᒃ ᔧᑰᑉ ᓄᓇᖓᓂ
ᓯᐊᒻᒪᕐᑎᓪᓗᒋᒡᓗ ᐃᓴᕆᐊᓕᐅᑉ ᓄᓇᖓᓂ.
8ᔫᑖ, ᖃᑕᓐᖑᑎᖕᓂᑦ ᓂᕐᑐᕐᑕᐅᔪᒫᕐᐳᑎᑦ;
ᐊᒡᒐᑎᓪᓗ ᐆᒥᒋᔨᕕᑦ ᖁᖓᓯᖏᓐᓂᒃ ᑎᒍᒥᐊᕈᒫᕐᐳᑦ;
ᐊᑖᑕᕕᓪᓗ ᐃᕐᓂᖏᑦ ᓵᖕᓂ ᐹᒻᒪᒃᑎᕈᒫᕐᐳᑦ.
9 #
ᒨᓯᓯ ᓯᑕᒪᖏᑦ 24:9; ᑕᑯᑎ 5:5. ᔫᑕ ᓛᔭᐅᑉ ᕿᑐᕐᖓᖏᑎᑐᑦ ᑍᒤᑉᐳᖅ;
ᓂᕆᔭᒃᓴᕐᓂᒃ ᑐᖁᑦᓯᓚᐅᕐᓗᑎᑦ, ᐃᕐᓃᒃ ᐊᖏᔪᕈᕐᐳᑎᑦ,
ᓛᔭᐅᑉ ᐊᕐᓇᓪᓗᖓᑐᑦ; ᑭᓇᒧᓪᓘᓐᓃᑦ ᑐᐹᕐᑕᐅᓂᐊᓐᖏᓚᑎᑦ.
10ᐊᖓᔪᖅᑳᕐᔪᐊᑉ ᐱᔪᓐᓇᐅᑎᖓᑕ ᓇᓗᓁᒃᑯᑕᖓ ᔫᑕᒥᑦ ᕿᒪᕉᑎᓂᐊᓐᖏᓚᖅ,
ᐊᐅᓚᑦᓯᔨᐅᓪᓗ ᐊᔭᐅᑉᐱᐊᖓ ᐃᑎᒐᖏᑕ ᐊᑯᕐᖓᓐᓂᑦ ᐲᕐᑕᐅᓂᐊᖏᓐᓂᕗᖅ,
ᐊᖓᔪᖅᑳᕐᔪᐊᖅ ᐱᖁᑎᓕᒃ ᑎᑭᓚᐅᖅᑳᕐᑎᓐᓇᒍ;
ᑖᓐᓇ ᐃᓄᖕᓄᑦ ᐅᐱᒋᔭᐅᔪᒫᕐᐳᖅ ᓈᓚᒃᑕᐅᔪᒫᕐᓗᓂᓗ.
11ᑖᑦᓱᒪ ᓄᕐᕋᖅ ᓯᐅᑎᖅᑯᑐᔪᖁᑎᓂ ᕔᓂᒃᓴᓕᖕᒧᑦ ᐃᐱᕈᒫᕐᐹ,
ᓯᐅᑎᖅᑯᑐᔪᖁᑎᖓᑕᓕ ᓄᕐᕋᖓ ᕔᓂᒃᓴᓂᑦ ᐱᐅᓂᕐᐹᖑᔪᒧᑦ ᐱᑎᑦᓱᒫᕐᐹ,
ᑖᑦᓱᒪ ᐊᓐᓄᕌᓂ ᐃᕐᕈᕐᑐᕈᒫᕐᐰᑦ ᕔᓂᒧᑦ
ᐊᓐᓄᕌᓂᓗ ᐃᕐᕈᕐᑐᕈᒫᕐᐰᑦ ᕔᓂᐅᑉ ᐊᐅᖓᓄᑦ;
12ᑖᑦᓱᒪ ᐃᔨᖏᒃ ᐊᐅᐸᕐᓯᔪᒫᕐᐴᒃ ᕔᓂᒧᑦ,
ᑭᒍᑎᖏᓪᓗ ᖃᑯᕐᓯᔪᒫᕐᐳᑦ ᐃᒻᒧᖕᒥᑦ.
13ᓯᐳᓗᓂ ᓄᓇᖃᕈᒫᕐᐳᖅ ᑕᕆᐅᑉ ᑭᒡᓕᖓᓂ;
ᐅᒥᐊᕐᔪᐊᓄᑦ ᑭᓴᕐᕕᑦᓯᐊᖑᔪᒫᕐᐳᖅ,
ᓄᓇᖓᑕᓗ ᑭᒡᓕᖓ ᓮᑐᓂᒧᑦ ᑎᑭᐅᑎᓯᒪᔪᒫᕐᐳᖅ.
14ᐃᓴᑳᕆ ᓯᐅᑎᖅᑯᕐᑐᔫᕗᖅ ᓴᓐᖏᔪᖅ,
ᐹᒻᒪᖓᕗᖅ ᓰᐲᑦ ᐅᓄᕐᑐᑦ ᑲᑎᓐᖓᔪᑦ ᐊᑯᕐᖓᓐᓂ;
15ᑕᑯᓚᐅᕋᒥᐅᒃ ᑕᕾᕐᓯᕐᕕᐅᑉ ᐱᐅᓂᖓ, ᓄᓇᓗ ᓮᓕᓇᕐᓗᓂ;
ᑕᕝᕙ ᐅᑯᕗᖅ ᓇᖕᒥᕐᑕᐅᔪᒪᓪᓗᓂ,
ᓯᐊᓛᕐᑕᕆᔭᐅᓪᓗᓂᓗ ᐊᒃᓱᕉᑦᔭᐅᓪᓗᓂ ᐱᓇᓱᐊᕐᑎᑕᐅᓕᕐᐳᖅ.
16ᑖᓐ ᐃᓄᖁᑎᒥᓂᒃ ᐊᐅᓚᑦᓯᔪᒫᕐᐳᖅ
ᐃᓴᕆᐊᓕᐅᑉ ᑭᖑᕚᖏᓐᓄᑦ ᐃᓚᒋᔭᐅᔪᑎᑐᑦ.
17ᑖᓐ ᖁᒡᓗᒋᐊᑎᑐᑦ ᑍᒤᑦᓱᒫᕐᐳᖅ ᐊᖅᑯᑎᒥ,
ᐊᖅᑯᑎᐅᑉ ᓴᓂᐊᓂ ᖁᒡᓗᒋᐊᑎᑐᑦ ᑐᖁᓐᓇᕐᑐᓕᒃᑎᑐᑦ,
ᕿᒻᒥᕐᔪᐊᑦ ᑭᖕᒥᖏᑎᒍᑦ ᑮᖃᑦᑕᕈᒫᕐᐰᑦ,
ᐃᑭᒪᔪᑦ ᓂᕕᕐᓗᑎᒃ ᑲᑕᖃᑦᑕᖁᓪᓗᒋᑦ.
18ᐊᑕᓃᖅ, ᐱᐅᓕᒃᓯᓃᑦ ᐅᑕᖅᑭᕙᕋ.
19ᒑᑎ ᕿᒻᒥᕐᔪᐊᒦᑦᑐᓄᑦ ᓵᓚᖃᕆᐊᕐᑐᕐᑐᓄᑦ ᑎᑭᑕᐅᔪᒫᕐᐳᖅ,
ᑖᑦᓱᒪᓕ ᑭᖕᒥᖏᑎᒍᑦ ᐱᒋᐊᕐᓗᓂᒋᑦ ᓵᓚᒋᔪᒫᕐᐰᑦ.
20ᐋᓱᕆᒥᑦ ᓂᕿᒃᓴᑦ ᒪᒪᕐᑐᐊᓘᔪᒫᕐᐳᑦ,
ᓂᕿᒃᓴᓕᐅᕈᒫᕐᐳᕐᓗ ᐊᖓᔪᖅᑳᕐᔪᐊᑉ ᒪᒪᕆᔭᖏᓐᓂᒃ.
21ᓈᑉᑕᓕ ᑐᒃᑑᔭᑎᑐᑦ ᐊᕐᓇᓪᓗᒃᑎᑐᑦ ᐸᖓᓕᒃᑐᑐᑦ ᑍᒤᑉᐳᖅ,
ᕿᑐᕐᖏᐅᕐᓗᓂᓗ ᓄᕐᕋᕐᓂᒃ ᓇᒡᓕᖕᓇᕐᑐᓂᒃ.
22ᔫᓯᐱ ᐊᑭᕉᕗᖅ ᐸᐅᕐᖓᖃᑦᓯᐊᕐᑐᖅ,
ᐊᕙᓚᖓᔪᖅ ᐸᐅᕐᖓᖃᑦᓯᐊᕐᑐᖅ ᐃᒥᕐᑕᕐᕕᐅᑉ ᓵᓂᐊᓂ;
ᑖᑦᓱᒪ ᐊᕙᓚᖓᔪᖏᑦ ᓴᓂᕋᕐᔪᐊᑉ ᐅᖓᑖᓄᐊᖓᕗᑦ.
23ᐱᓯᒃᓴᕐᑏᑦ ᓂᑲᒍᓱᒐᑎᒃ ᑖᑦᓱᒥᖓ ᐱᒋᐊᕐᐳᑦ,
ᐱᓯᒃᑖᕐᐹᑦ, ᐊᒃᓱᕉᑎᓪᓗᒍ;
24ᑖᑦᓱᒪᓕ ᐱᑎᒃᓯᖓᑕ ᓴᓐᖏᓂᖓ ᓱᕐᕋᒃᑕᐅᓐᖏᓚᖅ,
ᑖᑦᓱᒪ ᑕᓕᖏᒃ ᐃᕾᓕᑎᑕᐅᓯᒪᖕᒪᑎᒃ ᐊᔪᒐᖃᖏᑦᑑᑉ ᐊᒡᒐᖏᓐᓄᑦ ᔧᑰᑉ ᒎᑎᖓᓄᑦ
ᓰᐱᓕᕆᔨᐅᑉ ᐊᑎᖓᓂᑦ, ᐃᓴᕆᐊᓕᐅᑉ ᕾᕐᑐᖓᓂᑦ,
25ᐊᑖᑕᕕᑦ ᒎᑎᖓᑕ ᐃᑲᔪᕈᒫᕐᐹᑎᑦ,
ᐊᔪᒐᖃᖏᑦᑑᓪᓗ ᑖᑦᓱᒪ ᒎᑎᐅᑉ ᓮᒻᒪᕐᑎᑦᓱᒫᕐᐹᑎᑦ
ᓮᒻᒪᕐᑎᑦᓯᓂᕐᒧᑦ ᕿᓚᖕᒥᑦ ᖁᑦᓯᒃᑐᒥᑦ ᐱᔪᒧᑦ,
ᓮᒻᒪᕐᑎᑦᓯᓂᕐᒧᑦ ᐃᑎᔪᒧᑦ ᐃᓗᐊᓂ ᐃᑎᔪᒥ ᐃᓂᖃᕐᑐᒧᑦ,
ᓮᒻᒪᕐᑎᑦᓯᓂᕐᒧᑦ ᐃᕕᐊᖏᕐᓂᑦ ᐃᒡᓕᐊᕐᓂᓪᓗ ᐱᔪᒧᑦ.
26ᐊᑖᑕᕕᑦ ᓮᒻᒪᕐᑎᑦᓯᓂᖓ ᐊᔪᖏᓐᓂᕐᓴᐅᕗᖅ ᖃᖅᑲᑐᖄᓗᐃᑦ ᐃᓱᖃᖏᑦᑐᒧᑦ ᓮᒻᒪᕐᑎᑦᓯᓂᖓᓂᑦ,
ᐃᓱᖃᖏᑦᑐᒧᑦ ᐱᖑᐊᓗᐃᑦ ᐱᒃᓴᖃᕐᓂᐊᓗᖏᓐᓂᑦ;
ᑖᒃᑯᐊ ᔫᓯᐱᐅᑉ ᓂᐊᖁᖓᓃᑦᓴᕆᐊᖃᕐᐳᑦ,
ᖃᐅᖓᓃᓪᓗᑎᒡᓗ ᖃᑕᓐᖑᑎᒥᓂᑦ ᐊᕕᓯᒪᓚᐅᕐᑐᒥᑦ.
27ᐱᓐᔭᒥᓂ ᐊᒪᕉᕗᖅ ᐃᕐᓯᓇᕐᑐᖅ,
ᐅᓪᓛᒃᑯᑦ ᑐᖁᑕᒥᓂᒃ ᓂᕆᔪᑐᑦ,
ᐅᓐᓄᖕᒪᑦ ᐱᔭᕕᓂᕐᒥᓂᒃ ᑐᓂᐅᖅᑬᔪᑐᑦ.”
28ᑖᒃᑯᐊ ᑕᕝᕙ ᐃᓴᕆᐊᓕᐅᑉ ᑭᖑᕚᖏᑦ 12, ᐊᑖᑕᖓᑕᓗ ᑍᒫᒃ ᐅᖃᓪᓚᒡᕕᒋᓚᐅᕐᐰᑦ ᓮᒻᒪᕐᑎᓐᓇᒥᒋᑦ; ᑕᒪᕐᒥᒡᓗ ᓮᒻᒪᕐᑎᓚᐅᕐᐰᑦ ᐊᑐᓂᑦ ᐃᒻᒥᒃᑯᑦ ᐊᑐᒐᒃᓴᖏᓐᓂᒃ.
ᔧᑰᑉ ᑐᖁᓂᖓ ᐃᓗᕕᕐᑕᐅᓂᖓᓗ
29ᑕᕝᕙ ᐱᖁᓪᓗᒋᑦ ᐅᖃᐅᑎᕔᑦ, “ᐃᓕᔭᐅᔭᕆᐊᖃᕐᐳᖓ ᐃᓅᖃᑎᒋᓚᐅᕐᑕᑦᑎᓐᓄᑦ; ᐃᓗᕕᓛᕐᐸᑦᓯᓐᖓ ᓯᕗᓕᕆᓚᐅᕐᑕᒪ ᐃᓗᕕᕐᑕᐅᕕᒋᓯᒪᔭᖓᓄᑦ ᕾᕈᓱᖕᒧᑦ ᐃᐸᕋᓂᐅᑉ ᕼᐃᑍᑎᒥᐅᑦ ᐱᕈᕐᓰᕕᖓᓄᑦ. 30#ᒨᓯᓯ ᓯᕗᓪᓖᑦ 23:3-20.ᕾᕈᓱᖕᒧᑦ ᐱᕈᕐᓰᕕᖕᒧᑦ ᒪᒃ-ᐲᓚᒦᑦᑐᒧᑦ, ᓄᓇᐅᑉ ᒪᒻᕆᐅᑉ ᖃᓂᒋᔭᖓᓃᑦᑐᒧᑦ, ᑬᓇᓂᐅᑉ ᓄᓇᖓᓃᑦᑐᒧᑦ, ᐂᑉᕋᕼᐋᒻ ᓂᐅᕕᐊᕆᓚᐅᕐᑕᖓᓄᑦ ᐃᓗᕕᖃᕐᕕᒃᓴᐅᖁᓪᓗᒍ ᑭᖑᕚᒥᓄᓪᓗ ᐃᐸᕋᓂᐅᑉ ᕼᐃᑍᑎᒥᐅᑦ ᐱᕈᕐᓰᕕᖓᓂ. 31#ᒨᓯᓯ ᓯᕗᓪᓖᑦ 25:9,10; ᒨᓯᓯ ᓯᕗᓪᓖᑦ 35:29.ᑕᕝᕙᓂ ᐂᑉᕋᕼᐋᒻ ᐃᓗᕕᕐᑕᐅᓯᒪᖕᒪᑦ ᓵᕋᓗ ᑖᑦᓱᒪ ᓄᓕᐊᖓ; ᑕᕝᕙᓂᓗ ᐂᓴᑭ ᐃᓗᕕᕐᑕᐅᓯᒪᒋᓪᓗᓂ ᓄᓕᐊᖓᓗ ᕇᐱᑲ; ᑕᕝᕙᓂᓗ ᐃᓗᕕᓚᐅᕆᕙᕋ ᓕᐊ. 32ᑖᓐᓇ ᐱᕈᕐᓰᕕᑦ ᕾᕈᓱᖓᓗ ᑕᕝᕙᓃᑦᑐᖅ ᓂᐅᕕᕐᑕᐅᓯᒪᖕᒪᑦ ᕼᐃᑍᑎᒥᐅᓂᑦ.” 33#ᐋᐴᓯᑕᓖᑦ 7:15.ᔧᑰᓪᓗ ᐃᕐᓂᓂ ᐱᖁᔨᓂᕆᔭᒥᓂᒃ ᐅᖃᐅᑎᔭᕇᕋᒥᒋᑦ, ᐃᑎᒐᓂ ᐃᒡᓕᕐᒧᐊᕐᑎᑉᐰᑦ, ᐊᓂᕐᓇᒋᕐᓗᓂᓗ, ᐃᓚᓕᐅᑎᓪᓗᓂᓗ ᐃᓅᖃᑎᕕᓂᕐᒥᓄᑦ.
Currently Selected:
ᒨᓯᓯ ᓯᕗᓪᓖᑦ 49: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
