ᔪᐊᓇᓯᐅᑉ ᐊᒡᓚᖏᑦ 5
5
ᔩᓱᓯᐅᑉ ᐋᖅᑭᒃᓯᓂᖓ ᐱᓱᒍᓐᓇᖏᑦᑐᒥᒃ
1ᑕᒪᑐᒪ ᑭᖑᓂᖓᒍᑦ ᔩᓱᓯ ᔨᕉᓴᓕᒻᒧᐊᕐᐳᖅ, ᔫᑎᑦ ᓇᓪᓕᐅᓐᓂᕐᓯᐅᕐᒪᑕ. 2ᔨᕉᓴᓕᐅᓪᓕ ᐃᑎᕐᑕᕐᕕᖓᓂ ᑍᔭᐅᔪᒥ “ᓰᐲᑦ ᐃᑎᕐᑕᕐᕕᖓᓂᒃ” ᖃᓂᒋᔮᓂ ᑕᓯᑯᓗᒃᑕᖃᕐᐳᖅ, ᑕᓪᓕᒪᓂᒃ ᐃᒡᓗᕈᓯᓕᖕᒥᒃ; ᐄᑉᕉᑎᑐᑦ ᑍᔭᐅᔪᖅ ᐱᑎᔅᑕᒥᒃ. 3ᑖᒃᑯᓇᓂ ᐃᒡᓗᕈᓯᕐᓂ ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ ᐊᒥᓱᑦ ᓇᓚᕗᑦ, ᑕᐅᑐᖏᑦᑐᑦ, ᑐᓯᐊᑦᑐᑦ, ᓄᑭᖃᖏᑦᑐᓪᓗ. [ᑖᒃᑯᐊᓗ ᐅᑕᖅᑭᕗᑦ ᐃᒪᐅᑉ ᐊᐅᓚᑎᑕᐅᓂᐊᕐᓂᖓᓂᒃ. 4ᐊᑕᓂᐅᑉ ᐂᖏᓖᖓ ᑕᓯᕐᒧᐊᕐᐸᖕᒪᑦ ᐃᒪᖓᓂᒃ ᐊᐅᓚᑎᑦᓯᔭᕐᑐᕐᓗᓂ. ᓇᓪᓕᐊᓪᓗ ᓯᕗᓪᓕᕐᐸᐅᓪᓗᓂ ᐃᒫᓄᐊᕐᑐᖅ ᐊᐅᓚᑎᑕᐅᕋᑖᕐᑎᓪᓗᒍ ᐋᖅᑭᒃᑕᐅᕙᓚᐅᕐᐳᑦ ᖃᓄᐃᑦᑐᑐᐃᓐᓇᕐᒥᒃ ᖃᓂᒻᒪᓯᖃᕋᓗᐊᕐᐸᑦ.]#5:4 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ 5ᑕᕝᕙᓂᓕ ᐊᖑᑎᑕᖃᕐᐳᖅ, ᐊᕐᕌᒍᓂᒃ 38ᓂᒃ ᖃᓂᒻᒪᓯᓕᖕᒥᒃ. 6ᔩᓱᓯᐅᑉ ᓇᓚᔪᖅ ᑕᑯᒐᒥᐅᒃ, ᖃᐅᔨᒪᒐᒥᐅᒡᓗ ᐊᑯᓂᐊᓗᒃ ᖃᓂᒪᓪᓗᓂ ᑕᕝᕙᓂ ᓇᓚᖕᒪᑦ, ᐅᖃᐅᑎᕚ, “ᐋᖅᑭᒃᑕᐅᔪᒪᕖᑦ?”
7ᖃᓂᒪᔫᑉ ᑭᐅᕚ, “ᐊᑕᓃᖅ, ᐃᑲᔪᕐᑎᒃᓴᖃᖃᑦᑕᖏᓐᓇᒪ ᐃᒫᓄᐊᕐᑎᑦᓯᔨᒃᓴᓐᓂᒃ ᐃᒪᖅ ᐊᐅᓚᑎᑕᐅᔭᕌᖓᑦ, ᐃᒫᓄᐊᕋᓱᓕᕐᑎᓪᓗᖓ ᓯᕗᓕᐅᕐᑕᐅᖃᑦᑕᕐᐳᖓ.”
8ᔩᓱᓯᐅᑉ ᐅᖃᐅᑎᕚ, “ᒪᑭᒋᑦ, ᓇᓚᕖᑦ ᑎᒍᓗᒍ, ᐱᓱᓕᕆᑦ.” 9ᑕᕝᕙᑦᓮᓐᓇᖅ ᐊᖑᑦ ᐋᖅᑭᒃᑕᐅᕗᖅ, ᓇᓚᕝᕕᓂ ᑎᒍᓪᓗᓂᐅᒃ, ᐱᓱᓕᕐᐳᖅ.
ᐅᓪᓗᕐᓕ ᑖᓐᓇ ᓴᐸᑎᐅᕗᖅ. 10#ᓂᕼᐃᒤᐊ 13:19; ᔨᕆᒤᐊ 17:21.ᑕᕝᕙ ᔫᑎᑦ ᐊᖓᔪᖅᑳᖏᑕ ᐊᖑᑦ ᐋᖅᑭᒃᑕᐅᕋᑖᕐᑐᖅ ᐅᖃᐅᑎᕚᑦ, “ᐅᓪᓗᒥ ᓴᐸᑎᐅᕗᖅ, ᐱᖁᔭᑦᑎᓐᓂᒃ ᓈᓚᓐᖏᓚᑎᑦ ᓇᓚᕖᑦ ᐊᒡᔭᕋᕕᐅᒃ.”
11ᑖᓐᓇᓕ ᑖᒃᑯᓄᖓ ᑭᐅᕗᖅ, “ᐊᖑᑎᐅᑉ ᐋᖅᑭᒃᑲᒥᖓ ᐅᖃᐅᑎᖅᑲᐅᕚᖓ, ‘ᓇᓚᕖᑦ ᑎᒍᓗᒍ ᐱᓱᓕᕆᑦ.’”
12ᑖᒃᑯᐊ ᐊᐱᕆᕚᑦ, “ᑭᓇ ᐃᓕᖕᓄᑦ ᑍᒫᒃ ᐅᖃᕐᐸ, ‘ᓇᓚᕖᑦ ᑎᒍᓗᒍ ᐱᓱᓕᕆᑦ’?”
13ᐋᖅᑭᒃᑕᐅᔫᓪᓕ ᔩᓱᓯ ᖃᐅᔨᒪᓚᐅᓐᖏᓛ ᑭᓇᐅᖕᒪᖔᑦ, ᑕᕝᕙᓂ ᐃᓄᓕᐊᓘᓚᐅᕐᒪᑦ, ᔩᓱᓯ ᑕᕝᕙᓐᖓᑦ ᓅᒌᓚᐅᕐᒪᑦ.
14ᑭᖑᓂᖓᒍᑦ, ᔩᓱᓯᐅᑉ ᑲᑎᒐᒥᐅᒃ ᑐᒃᓯᐊᕐᕕᒡᔪᐊᕐᒥ, ᐅᖃᐅᑎᕚ, “ᑕᑯᒋᑦ, ᒫᓐᓇ ᖃᓄᐃᖏᑦᓯᐊᓕᕐᐳᑎᑦ! ᐊᔪᕐᑐᓕᒃᑲᓐᓂᕈᓐᓃᕆᑦ, ᐱᐅᖏᓐᓂᕐᓴᒧᑦ ᑎᑭᑕᐅᖁᓇᒃ.”
15ᐊᖑᑦ ᑕᕝᕙᓐᖓᑦ ᕿᒪᕉᑎᒐᒥ ᔫᑎᑦ ᐊᖓᔪᖅᑳᖏᑦ ᐅᖃᐅᑎᕔᑦ, ᐋᖅᑭᒃᓯᓚᐅᕐᑐᖅ ᔩᓱᓯᐅᓂᖓᓂᒃ. 16ᑍᒤᒻᒪᑦ ᔫᑎᑦ ᔩᓱᓯ ᐊᑭᕋᕐᑐᓕᕐᐹᑦ, ᐋᖅᑭᒃᓯᓚᐅᕐᒪᑦ ᓴᐸᑎᐅᑎᓪᓗᒍ. 17ᔩᓱᓯᐅᑉ ᑭᐅᕔᑦ, “ᐊᑖᑕᒐ ᑍᒪᓐᖓᑦ ᒫᓐᓇᒧᑦ ᐱᓇᓱᐊᕐᐳᖅ, ᐅᕙᖓᓗ ᐱᓇᓱᐊᕆᕗᖓ.”
18ᑍᒤᒻᒪᑦ ᔫᑎᑦ ᐊᖓᔪᖅᑳᖏᑕ ᔩᓱᓯ ᑐᖁᑕᐅᕕᒃᓴᕐᓯᐅᒃᑲᓐᓂᓕᕐᐹᑦ, ᓴᐸᑎᒥ ᐱᖁᔭᒥᒃ ᓈᓚᓚᐅᖏᓐᓂᖓ ᐱᑦᔪᑎᒋᑐᐃᓐᓇᕐᓇᒍ, ᐅᖃᕐᓯᒪᓂᖓᓄᓪᓕ ᒎᑎᒥᒃ ᓇᖕᒥᓂᕆᓪᓗᒍ ᐊᑖᑕᖃᕐᓂᕋᕐᒪᑦ, ᒎᑎᒥᒃ ᐃᒻᒥᓂᒃ ᑍᒤᓪᓗᐊᖃᕐᑎᖃᕋᓱᖕᓂᕋᕐᖢᓂᑦᔪᒃ.
ᐃᕐᓂᐅᑉ ᐱᔪᓐᓇᕐᓂᖃᕐᑎᑕᐅᓂᖓ
19ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐃᕐᓂᖅ ᐃᒥᓃᓐᓇᖅ ᐱᓇᓱᐊᕈᓐᓇᓐᖏᓚᖅ, ᐱᓇᓱᐊᕐᐳᕐᓕ ᐊᑖᑕᐅᑉ ᐱᓇᓱᐊᕐᑕᖏᓐᓂᒃ ᑕᑯᔭᒥᓂᒃ, ᐊᑖᑕᐅᑉ ᐱᓇᓱᐊᕐᑕᖓ ᐃᕐᓂᖓᑕᑦᑕᐅᖅ ᐱᓇᓱᐊᕆᕚ. 20ᐊᑖᑕᐅᑉ ᐃᕐᓂᓂ ᓇᒡᓕᒋᕚ, ᓇᖕᒥᓂᕐᓗ ᐱᓂᐊᕐᓂᓕᒫᓂ ᖃᐅᔨᒪᔭᐅᑎᑉᐰᑦ ᑖᑦᓱᒧᖓ; ᓱᓕᓗ ᐱᓂᐊᕐᓂᕐᓂᒃ ᐱᓪᓚᕆᐅᓂᕐᓴᓂᒃ ᑕᒪᒃᑯᓇᖓᑦ ᖃᐅᔨᑎᓐᓂᐊᕐᐹ, ᐃᓕᑦᓯᓗ ᑲᒪᓂᐊᕈᑎᒋᓂᐊᕐᐸᓯ. 21ᓲᕐᓗᑦᑕᐅᖅ ᐊᑖᑕᐅᑉ ᑐᖁᖓᔪᑦ ᒪᑭᑎᒻᒪᒋᑦ ᐆᒻᒪᕐᑎᓪᓗᒋᓪᓗ, ᑍᒫᒃᑕᐅᖅ ᐃᕐᓂᖅ ᐆᒻᒪᕐᑎᑦᓯᕗᖅ ᐆᒻᒪᕐᑎᑦᓱᒪᔭᒥᓂᒃ. 22ᐊᑖᑕ ᐃᖅᑲᕐᑐᐃᓐᖏᓚᖅ ᑭᓇᒥᒡᓘᓐᓃᑦ, ᐃᕐᓂᓂᓕ ᐃᖅᑲᕐᑐᐃᔪᓐᓇᕐᓂᕐᒥᒃ ᑐᓂᓯᕕᒋᓯᒪᕚ. 23ᐃᕐᓂᖅ ᑕᒤᓐᓄᑦ ᐅᐱᒋᔭᐅᑦᓯᐊᖁᓪᓗᒍ, ᓲᕐᓗ ᐊᑖᑕ ᐅᐱᒋᔭᐅᑦᓯᐊᕐᒪᑦ. ᐃᕐᓂᕐᒥᒃ ᐅᐱᒍᓱᖏᑦᑐᖅ ᐊᑖᑕᒥᒃᑕᐅᖅ ᐅᐱᒍᓱᓐᖏᓚᖅ ᑎᓕᔨᖓᓂᒃ.
24“ᓱᓕᔪᒥᒃ ᐅᖃᐅᑎᕙᑦᓯ, ᐅᖃᐅᓯᓐᓂᒃ ᑐᓴᕐᑐᖅ ᐅᒃᐱᕆᓗᒍᓗ ᑎᓕᔨᒐ, ᑖᓐᓇ ᐃᓅᓯᖃᕐᐳᖅ ᓄᖑᓱᐃᑦᑐᒥᒃ; ᐃᖅᑲᕐᑐᕐᑕᐅᑦᔮᓇᓂᓗ, ᑐᖁᒥᓪᓕ ᓄᒃᑎᕐᓯᒪᓕᕐᐳᖅ ᐃᓅᓯᕐᒧᑦ. 25ᓱᓕᔪᒥᒃ ᐅᖃᐅᑎᕙᑦᓯ, ᐃᑲᕐᕋᖅ ᓇᓪᓕᐅᑎᓂᐊᕐᓯᒪᔪᖅ ᓇᓪᓕᐅᑎᔭᕇᕐᐳᖅ, ᑐᖁᖓᔪᑦ ᒎᑎᐅᑉ ᐃᕐᓂᖓᑕ ᓂᐱᖓᓂᒃ ᑐᓴᕐᕕᖓᑦ, ᑐᓴᕐᑐᑦ ᑖᒃᑯᐊ ᐃᓅᓂᐊᕐᐳᑦ. 26ᓲᕐᓗ ᐊᑖᑕ ᓇᖕᒥᓂᖅ ᐃᓅᓯᖃᕐᒪᑦ ᐃᒻᒥᒃᑯᑦ, ᑍᒫᒃᑕᐅᖅ ᐃᕐᓂᓂ ᑐᓂᓯᕕᒋᕚ ᐃᓅᓯᖃᖁᓪᓗᒍ ᐃᒻᒥᒃᑯᑦ. 27ᐃᕐᓂᓂ ᑐᓂᓯᕕᒋᕚ ᐱᔪᓐᓇᕐᓂᕐᒥᒃ ᐃᖅᑲᕐᑐᐃᔪᓐᓇᖁᓪᓗᒍ, ᐃᓅᑉ ᐃᕐᓂᕆᖕᒪᒍ. 28ᑕᒪᓐᓇ ᑲᒪᓂᐊᕈᑎᒋᓇᓯᐅᒃ; ᐃᑲᕐᕋᖅ ᓇᓪᓕᐅᑎᔪᒫᕐᒪᑦ ᑐᖁᖓᔪᑦ ᐃᓗᕕᕐᒦᑦᑐᑦ ᐃᓘᓐᓇᑎᒃ ᓂᐱᖓᓂᒃ ᑐᓴᕈᒫᕐᒪᑕ. 29#ᑖᓂᐊᓕ 12:2.ᐃᓗᕕᕐᒥᑦ ᐊᓂᓗᑎᒃ, ᐱᐅᔪᒥᒃ ᐃᓅᓯᖃᓚᐅᕐᑐᑦ, ᒪᑭᑦᓱᒫᕐᐳᑦ ᐃᓅᓂᐊᓕᕐᓗᑎᒃ, ᐱᐅᖏᑦᑐᒥᒡᓕ ᐃᓅᓯᖃᓚᐅᕐᑐᑦ, ᒪᑭᑦᓱᒫᕐᐳᑦ ᐃᖅᑲᑐᕐᑕᐅᓂᐊᓕᕐᓗᑎᒃ.”
ᔩᓱᓯᒥᒃ ᓇᓗᓁᕐᓯᓂᖅ
30“ᐅᕙᓐᓃᓐᓇᖅ ᐱᔪᓐᓇᕐᓂᓐᓄᑦ ᓱᓇᒥᒡᓘᓐᓃᑦ ᐱᓇᓱᐊᕈᓐᓇᓐᖏᓚᖓ; ᒎᑎᒥᑦ ᑐᓴᕐᑕᒃᑲ ᒪᓕᒃᓗᒋᑦ ᐃᖅᑲᕐᑐᐃᕗᖓ; ᑍᒤᒻᒪᑦ ᐃᖅᑲᕐᑐᐃᓂᕋ ᐊᑦᔨᒌᒃᑎᑦᓯᕗᖅ, ᓇᖕᒥᓂᖅ ᐱᔪᒪᔭᓐᓂᒃ ᐱᓇᓱᐊᖏᓐᓇᒪ ᑎᓕᔨᒪᓕ ᐱᔪᒪᔭᖓᓂᒃ ᐱᓇᓱᐊᕐᐳᖓ.
31“ᐅᕙᖓ ᓇᖕᒥᓂᓐᓂᒃ ᓇᓗᓁᕋᓱᐊᕈᒪ, ᓇᓗᓁᕐᓯᓂᕋ ᓱᓕᒐᔭᓐᖏᓚᖅ; 32ᐊᓯᒐᓕ ᐅᕙᓐᓂᒃ ᓇᓗᓁᕐᓯᕗᖅ, ᖃᐅᔨᒪᕗᖓᓗ ᐅᖃᐅᓯᖃᕐᓂᖓ ᐅᕙᓐᓂᒃ ᓱᓕᑦᓯᐊᕐᒪᑦ. 33#ᔪᐊᓇᓯ 1:19-27; 3:27-30.ᐊᐱᕆᔭᕐᑐᕐᑎᑦᓯᓚᐅᕐᐳᓯ ᔪᐊᓇᓯᒧᑦ, ᑖᓐᓇ ᓇᓗᓁᕐᓯᓚᐅᕐᐳᖅ ᓱᓕᔪᒥᒃ. 34ᓇᓗᓁᕐᑕᐅᓂᕋ ᐃᓄᖕᒥᑦ ᐱᓐᖏᓚᖅ; ᑕᒪᓐᓇᓕ ᐅᖃᐅᓯᕆᕙᕋ ᐱᐅᓕᔭᐅᖁᓪᓗᓯ. 35ᑖᓐᓇ ᓇᓂᕈᐊᑎᑐᑦ ᐃᑯᒪᓪᓗᓂ ᖃᐅᒪᔪᑎᑐᑦ ᑍᒤᑉᐳᖅ, ᐃᓕᑦᓯ ᓯᕕᑭᑦᑐᒥᒃ ᖁᕕᐊᓲᑎᖃᕈᒪᓚᐅᕐᐳᓯ ᑖᑦᓱᒪ ᖃᐅᒪᓂᖓᓂᒃ. 36ᐅᕙᖓᓕ ᓇᓗᓁᕐᓯᓂᖃᕐᐳᖓ ᔪᐊᓇᓯᐅᑉ ᓇᓗᓁᕐᓯᓂᖓᓂᑦ ᐊᖏᓂᕐᓴᒥᒃ; ᐱᓂᐊᕐᓃᑦ ᐱᓂᐊᕐᓂᕆᔭᒃᑲ, ᐊᑖᑕᒪ ᕾᓚᐅᕐᐰᑦ ᐅᕙᓐᓄᑦ ᐱᓇᓱᐊᕐᑕᐅᖁᓪᓗᒋᑦ, ᑕᒪᒃᑯᐊ ᐱᓇᓱᐊᕐᓃᑦ ᐅᕙᓐᓂᒃ ᓇᓗᓁᕐᓯᕗᑦ ᓴᖅᑭᑎᑦᓯᓪᓗᑎᒡᓗ ᐊᑖᑕᒧᑦ ᑎᓕᔭᐅᓯᒪᓂᓐᓂᒃ. 37#ᒫᑎᐅᓯ 3:17; ᒫᑯᓯ 1:11; ᓘᑲᓯ 3:22.ᐊᑖᑕᓗ ᑎᓕᔨᒐ ᐅᕙᓐᓂᒃ ᓇᓗᓁᕐᓯᕗᖅ. ᑖᑦᓱᒪ ᓂᐱᖓ ᑐᓴᓚᐅᕐᓯᒪᓐᖏᑕᓯ, ᖃᓄᐃᑦᑑᓂᖓᓗ ᑕᑯᓚᐅᕐᓯᒪᓇᒍ; 38ᐅᖃᐅᓯᖓᓘᓐᓃᑦ ᐃᓗᒥᐅᑕᕆᓐᖏᓚᓯ, ᑖᑦᓱᒪ ᑎᓕᓚᐅᕐᑕᖓ ᐅᒃᐱᕆᖏᓐᓇᑦᓯᐅᒃ. 39ᐊᒡᓚᖕᓂᒃ ᕿᓂᕐᐳᓯ, ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᓂᐊᕋᓱᒋᓪᓗᓯ ᑖᒃᑯᓇᖓᑦ; ᑖᒃᑯᐊᓕ ᐅᕙᓐᓂᒃ ᓇᓗᓁᕐᓯᕗᑦ; 40ᐅᕙᓐᓄᓪᓕ ᕾᔪᒪᓐᖏᓚᓯ ᐃᓅᓯᕐᑖᕐᕕᒋᔪᓐᓇᕐᑕᑦᓯᓐᓄᑦ.
41“ᐃᓄᖕᓄᑦ ᓂᕐᑐᕐᑕᐅᓇᓱᐊᓐᖏᓚᖓ. 42ᖃᐅᔨᒪᕗᖓᓕ ᒎᑎᐅᑉ ᓇᒡᓕᖕᓂᖓᓂᒃ ᐃᓗᒥᐅᑕᖃᖏᓐᓇᑦᓯ. 43ᐊᑖᑕᒪ ᐊᑎᖓᒍᑦ ᑎᑭᓚᐅᕐᐳᖓ, ᐃᓕᑦᓯᓕ ᐃᓚᓕᐅᓐᖏᓚᑦᓯᓐᖓ; ᐊᓯᒐᓕ ᑎᑭᑉᐸᑦ ᓇᖕᒥᓂᖅ ᐱᔪᓐᓇᕐᓂᕐᒥᒍᑦ, ᑖᓐᓇ ᐃᓚᓕᐅᕋᔭᕐᐸᓯ. 44ᖃᓄᖅ ᐅᒃᐱᕈᓐᓇᕐᐱᓰ? ᐃᓅᖃᑎᑦᓯᓐᓄᑦ ᓂᕐᑐᕐᑕᐅᔪᒪᓂᕐᒥᒃ ᐱᓇᓱᐊᖃᑦᑕᕐᓗᓯ ᒎᑎᒧᓪᓗ ᓂᕐᑐᕐᑕᐅᓂᒃᓴᑐᐊᖅ ᕿᓂᕐᓇᒍ. 45ᐃᓱᒪᓂᐊᕋᓯ ᐊᑖᑕᐅᑉ ᓵᖓᓂ ᐸᓯᒃᓯᕐᓂᐊᕋᓱᒋᓗᖓ ᐃᓕᑦᓯᓐᓂᒃ; ᒨᓯᓯᐅᓪᓕ ᓂᕆᐅᖕᓂᕐᒥᒃ ᑐᓐᖓᕕᖃᕐᕕᒋᓇᓱᐊᕐᑕᑦᓯ, ᑖᑦᓱᒪ ᐸᓯᔪᒫᕐᐹᓯ. 46ᒨᓯᓯ ᐅᒃᐱᕆᒍᑦᓯᐅᒃ, ᐅᕙᓐᓂᒃ ᐅᒃᐱᕋᔭᕐᐳᓯ, ᑖᓐᓇ ᐅᕙᓐᓂᒃ ᑎᑎᕋᐅᓯᖃᓚᐅᕐᒪᑦ. 47ᑖᑦᓱᒪᓕ ᑎᑎᕋᓚᐅᕐᑕᖏᑦ ᐅᒃᐱᕆᖏᒃᑯᑦᓯᐅᒃ, ᖃᓄᕐᓕ ᐅᖃᐅᓯᕆᔭᓐᓂᒃ ᐅᒃᐱᕈᓱᒐᔭᕐᐱᓰ?”
Currently Selected:
ᔪᐊᓇᓯᐅᑉ ᐊᒡᓚᖏᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
