ᒨᓯᓯ ᐱᖓᔪᖏᑦ 11
11
ᓂᕐᔪᑎᑦ ᓂᕆᔭᐅᔪᓐᓇᕐᑐᑦ
ᒨᓯᓯ ᑕᓪᓕᒪᖏᑦ 14:3-21
1ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, 2ᐃᓴᕆᐊᓕᒥᐅᑦ ᐅᖃᐅᑎᓯᒋᒃ: “ᓂᕐᔪᑎᓂᑦ ᓄᓇᒥᐅᑕᕐᓂᑦ ᐅᑯᐊ ᓂᕆᔪᓐᓇᕐᐸᓯ: 3ᓂᕐᔪᑎᓕᒫᓂᒃ ᓂᕆᔪᓐᓇᕐᐳᓯ ᑯᑭᖃᕐᑐᓂᒃ ᒪᕐᕉᓕᖅᑲᖓᔪᓂᒃ ᐊᕕᒃᓯᒪᔪᓂᒃ ᑕᒧᓗᕋᐅᔭᕐᐸᒡᓗᑎᒡᓗ. 4ᐱᑕᖃᕐᒥᖕᒪᑦ ᑕᒧᓗᕋᐅᔭᑐᐃᓐᓇᕐᐸᒃᑐᓂᒃ, ᐱᑕᖃᕆᓪᓗᓂᓗ ᑯᑭᖃᕐᑐᓂᒃ ᒪᕐᕉᓕᖅᑲᖓᔪᓂᒃ ᓇᓪᓕᐊᑦ ᑍᒤᑦᑐᑦ ᓂᕆᔭᒃᓴᕆᓐᖏᓚᓯ, ᐅᑯᐊ: ᑳᒥᓖᑦ ᑍᒤᑦᑐᑦ ᑕᒧᓗᕋᐅᔭᕐᐸᒃᑑᒐᓗᐊᑦ ᑯᑭᖏᓪᓕ ᕿᑎᖓᒍᑦ ᐊᕕᒃᓯᒪᖏᒻᒪᑕ, ᑍᒤᑦᑐᑦ ᓴᓗᒤᑦᑑᕗᑦ. 5ᓂᕐᔪᑏᑦ ᐹᑦᔪᕐᒥᒃ ᐊᑎᖃᕐᑐᑦ ᑕᒧᓗᕋᐅᔭᕐᐸᖕᒥᖕᒪᑕ ᑯᑭᖃᕐᓗᑎᒡᓗ ᒪᕐᕉᓕᖅᑲᖓᖏᑦᑐᓂᒃ ᑍᒤᑦᑐᑦ ᓴᓗᒤᑦᑑᕗᑦ. 6ᐅᑲᓖᓪᓗ ᑕᒧᓗᕋᐅᔭᕐᐸᖕᒥᔫᖓᓗᐊᑦ ᑯᑭᖃᕋᑎᒡᓗ ᒪᕐᕉᓕᖅᑲᖓᔪᓂᒃ ᑍᒤᑦᑐᑦ ᓴᓗᒤᑦᑑᕗᑦ. 7ᑰᒃᑰᓰᑦ, ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑭᓯᐊᓂᓕ ᑕᒧᓗᕋᐅᔭᕐᐸᖏᒻᒪᑕ ᑕᒪᒃᑯᐊ ᓴᓗᒤᑦᑑᕗᑦ. 8ᑍᒤᑦᑐᑦ ᓂᕿᖏᑦ ᓂᕿᒋᔭᒃᓴᕆᓐᖏᓚᓯ, ᑎᒥᖏᓪᓘᓐᓃᑦ ᑐᖁᖓᒃᐸᑕ ᐊᒃᑐᕆᐊᖃᓐᖏᓚᓯ; ᓴᓗᒤᒻᒪᑕ ᐃᓕᑦᓯᓐᓄᑦ.
9“ᑕᕆᐅᕐᒥᐅᑕᓂᒡᓗ ᐆᒪᔪᓂᒃ ᑰᖕᒥᐅᑕᓂᒡᓗ, ᓂᕆᔪᓐᓇᕐᐳᓯ ᐸᐱᕈᖃᕐᐸᑕ ᐊᖒᑎᖃᕐᓗᑎᒃ ᑲᕕᓯᖃᕐᓗᑎᒡᓗ. 10ᐆᒪᔪᓪᓕ ᑕᕆᐅᕐᒥᐅᑍᑦ ᑰᖕᒥᐅᑍᓪᓗ ᐸᐱᕈᖃᖏᑦᑐᑦ ᐊᖒᑎᖃᕋᑎᒡᓗ ᑲᕕᓯᖃᖏᑦᑐᑦ, ᑲᑎᒪᕙᒃᑐᑦ ᐃᒪᕐᒥᐅᑍᑦ ᐆᒪᔪᓪᓗ ᐃᒪᕐᒥᐅᑍᑦ, ᑍᒤᑦᑐᑦ ᐃᓕᑦᓯᓐᓄᑦ ᓇᕐᕈᓇᕐᐳᑦ. 11ᐃᓕᑦᓯᓐᓄᑦ ᓇᕐᕈᓇᕐᒪᑕ ᑕᒪᒃᑯᐊ ᓂᕆᔭᕆᐊᖃᓐᖏᓚᓯ, ᑐᖁᖓᒃᐸᑕᓗ ᑎᒥᖏᑦ ᐊᒃᑐᕆᐊᖃᓐᖏᓚᓯ ᓴᓗᒤᒻᒪᑕ ᐃᓕᑦᓯᓐᓄᑦ. 12ᐃᒪᕐᒥᐅᑍᑦ ᓱᓇᑐᐃᓐᓁᑦ ᐸᐱᕈᖃᖏᑦᑐᑦ ᐊᖒᑎᖃᕋᑎᒡᓗ ᑲᕕᓯᖃᕋᑎᒡᓗ ᐃᓕᑦᓯᓐᓄᑦ ᓇᖁᔭᕐᓇᕐᐳᑦ.
13“ᑎᖕᒥᐊᑦ ᐃᓚᖏᑦ ᓂᕆᔭᕆᐊᖃᓐᖏᓚᓯ ᓇᕐᕈᓇᕐᒪᑕ ᐃᒤᑦᑐᑦ: ᓇᒃᑐᕋᓖᑦ, ᓇᒃᑐᕋᓕᐅᔮᕐᑐᓪᓗ ᑭᒡᒐᕕᐊᕐᔪᐃᓪᓗ, 14ᑬᑦ, ᑭᒡᒐᕕᐊᕐᔪᐃᑦ ᑭᒡᒐᕕᐊᕐᔫᔮᕐᑐᓕᒫᓪᓗ, 15ᑐᓗᒊᓪᓗ ᐊᑦᔨᑲᓴᓕᒫᖏᓪᓗ. 16ᐅᓪᓚᒃᑏᓪᓗ ᑎᖕᒥᐊᑦ, ᓇᐅᔧᓪᓗ, ᕿᓐᓄᐊᔪᐊᓪᓗ, 17ᐅᒃᐱᒡᔪᐊᓪᓗ ᐊᑦᔨᒌᖏᑦᑐᑦ, ᑕᑎᒡᒐᕐᔪᐊᖑᔮᕐᑐᓪᓗ, 18ᐃᒪᕐᒥᐅᑍᓪᓗ ᑎᖕᒥᐊᑦ, ᓯᒡᒍᖕᒥᒍᓪᓗ ᐃᒃᐱᐊᕐᔪᓖᑦ ᐃᒪᕐᒥᐅᑍᑦ, ᑭᒡᒐᕕᐊᕐᔪᐃᓪᓗ ᐊᑦᔨᑲᓴᖏᑦ. 19ᓂᐅᑯᑖᓖᓪᓗ, ᕼᐃᕌᓃᓪᓗ ᐊᑦᔨᐸᓱᖏᓪᓗ, ᕼᐅᐳᐃᑦ, ᐅᓐᓄᐊᕐᓯᐅᑏᓪᓗ ᐃᓴᕈᓖᑦ.
20“ᖁᐱᕐᕈᓪᓗ ᐃᓴᕈᓖᑦ ᐱᓱᒃᐸᒃᑐᑦ ᓯᑕᒪᓂᒃ ᓂᐅᖃᕐᓗᑎᒃ, ᑕᒪᒃᑯᐊ ᐃᓕᑦᓯᓐᓄᑦ ᓇᕐᕈᓇᕐᑑᕗᑦ. 21ᐱᑕᖃᕆᕗᕐᓕ ᐃᓴᕈᖃᕐᑐᓂᒃ ᓯᑕᒪᓂᒡᓗ ᓂᐅᖃᕐᓗᑎᒃ ᐱᓱᓲᓂᒃ ᓂᕆᔪᓐᓇᕐᑕᑦᓯᓐᓂᒃ: ᓂᐅᒥᒃᑎᒍᑦ ᓇᒡᒍᐊᖃᕐᑐᓂᒃ ᐱᒡᓕᕐᑕᓲᓂᒡᓗ ᓄᓇᒥ. 22ᐅᑯᓇᓐᖓᑦ ᓂᕆᔪᓐᓇᕐᐳᓯ, ᐱᒡᓕᕐᑕᐅᔮᕐᑐᓂᒃ, ᐊᑦᔨᑲᓴᖏᓐᓂᒡᓗ ᑳᑎᑎᑦᒥᒃ ᐊᑎᖃᕐᑐᓂᒃ, ᑯᕆᑭᓯᓂᒡᓗ, ᐱᒡᓕᕐᑕᓂᒡᓗ ᒍᕌᔅᕼᐋᐸᓂᒃ. 23ᑕᒪᒃᑯᐊᓕ ᐊᓯᖏᑦ ᒥᑭᔫᑏᑦ ᐃᓴᕈᓖᑦ ᖁᐱᕐᕈᐃᑦ ᓯᑕᒪᓂᒡᓗ ᓂᐅᖃᕐᑑᖓᓗᐊᑦ ᓇᕐᕈᓇᕐᓂᖏᓐᓂᒃ ᖃᐅᔨᒪᔭᒃᓴᕆᕙᓯ.
24“ᐃᓕᑦᓯᓐᓂᒃ ᓴᓗᒤᓕᕐᑎᑦᓱᓐᓇᕐᐳᓯ ᑕᒪᒃᑯᑎᒎᓇᖅ, ᑐᖁᖓᔪᒥᒡᓗ ᖁᐱᕐᕈᕐᒥᒃ ᑍᒤᑦᑐᒥᒃ ᐊᒃᑐᐃᔪᖅ ᓴᓗᒤᓕᓂᐊᕐᐳᖅ ᐅᓐᓄᒃ ᑎᑭᓪᓗᒍ. 25ᓇᓪᓕᐊᑦ ᑎᒍᓯᔪᖅ ᖁᐱᕐᕈᒥᒃ ᑐᖁᖓᔪᒥᒃ ᓇᕐᕈᓇᕐᑐᒥᒃ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 26ᓂᕐᔪᑎᓕᒫᑦ ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑯᑭᖏᑦ ᐊᕕᒃᓯᒪᒻᒪᕆᖏᑦᑐᓂᒃ, ᑕᒧᓗᕋᐅᔭᕐᐸᖏᑦᑐᓪᓗ ᑕᒪᒃᑯᐊ ᐃᓕᑦᓯᓐᓄᑦ ᓴᓗᒤᑦᑑᕗᑦ: ᓇᓪᓕᐊᓪᓗ ᑍᒤᑦᑐᒥᒃ ᑐᖁᖓᔪᒥᒃ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ. 27ᓂᕐᔪᑏᑦ ᓯᑕᒪᓄᑦ ᐱᓱᒃᐸᒃᑐᑦ, ᐃᑎᒐᖕᒥᖕᓄᑦ ᐱᓱᒃᐸᒃᑐᑦ ᓴᓗᒤᑦᑐᐃᓐᓇᐅᕗᑦ ᐃᓕᑦᓯᓐᓄᑦ, ᑍᒤᑦᑐᒥᒡᓗ ᑐᖁᖓᔪᒥᒃ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 28ᓇᓪᓕᐊᑦ ᑍᒤᑦᑑᑉ ᑎᒥᖓᓂᒃ ᑐᖁᖓᔪᒥᒃ ᑎᒍᓯᔪᖅ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᐅᓐᓄᒡᓗ ᑎᑭᓪᓗᒍ ᓴᓗᒤᑦᑑᓂᐊᕐᐳᖅ. ᑍᒤᑦᑐᑦ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ.
29“ᓂᕐᔪᑎᑦᑕᐅᖅ ᓄᓇᒥᐅᑍᑦ ᓴᓗᒤᑦᑐᑦ ᐃᓕᑦᓯᓐᓄᑦ ᐃᒤᑦᑑᕗᑦ: ᑎᕆᐊᑦ, ᓄᓂᕙᒃᑬᑦ, ᐸᒥᐅᑯᑖᓖᓪᓗ ᑐᖑᔪᕐᑕᐅᓲᑦ ᓕᓴᕐᑦᒥᒃ ᐊᑎᓖᑦ ᐊᖏᔪᑦ, 30ᐊᑦᔨᖏᓪᓗ ᒥᑭᓐᓂᕐᓮᑦ, ᓄᓇᒥᓗ ᐹᕐᖑᕐᑐᑦ ᑯᕌᑲᑍᓕᒥᒃ ᐊᑎᓖᑦ, ᒥᑭᑦᑐᑯᓗᐃᓪᓗ ᐊᑦᔨᖏᑦ ᓱᒃᑲᓕᔪᑦ, ᐸᓂᕐᑐᒥᐅᑍᓪᓗ ᓕᓴᕐᑦᒥᒃ ᐊᑎᓖᑦ, ᑕᐅᑦᑐᖏᓪᓗ ᑕᕐᓴᖏᑦ ᐊᓯᑦᔨᓲᑦ ᑲᒦᓕᐊᓂᒥᒃ ᐊᑎᓖᑦ. 31ᓄᓇᒥ ᐹᕐᖑᕐᑐᓂ ᑕᒪᒃᑯᐊ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ, ᓇᓪᓕᐊᑦᑕ ᑐᖁᖓᑎᓪᓗᒋᑦ ᐊᒃᑐᕐᐸᒋᑦ, ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 32ᑖᒃᑯᐊᓗ ᓇᓪᓕᐊᑦ ᑐᖁᒃᐸᑦ ᑲᑕᒡᓗᓂᓗ, ᑐᕝᕕᒋᔭᖓ ᓱᓇᐅᒐᓗᐊᕐᐸᑦ ᓴᓗᒤᑦᑑᓂᐊᕐᐳᖅ, ᕿᔫᒃᐸᓪᓘᓐᓃᑦ, ᖃᓪᓗᓈᕐᑕᐅᒃᐸᒡᓘᓐᓃᑦ, ᐆᒪᔪᓪᓘᓐᓃᑦ ᐊᒥᕆᒃᐸᒍ, ᐃᒃᐱᐊᕐᔫᒃᐸᓪᓘᓐᓃᑦ, ᐃᒥᕐᒧᐊᕐᑕᐅᔪᒃᓴᐅᕗᖅ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ, ᑭᖑᓂᖓᒍᑦ ᑕᕝᕙ ᓴᓗᒻᒪᕐᓂᐊᕐᐳᖅ. 33ᓇᓪᓕᐊᓪᓗ ᐆᒪᔪᖅ ᑍᒤᑦᑐᖅ ᐃᒪᖃᐅᑎᒧᑦ ᐅᔭᕋᖕᒧᑦ ᑲᑕᒡᓗᓂ ᑐᖁᒃᐸᑦ, ᐃᒪᖃᐅᑎᐅᑉ ᐃᓗᓕᒫᖓ ᓴᓗᒤᓕᓂᐊᕐᐳᖅ, ᐃᒪᖃᐅᑎᓗ ᑕᕝᕙ ᓯᖁᒥᑕᐅᔭᕆᐊᖃᓕᕐᐳᖅ. 34ᓂᖀᓪᓘᓐᓃᑦ ᓂᕿᒃᓮᑦ ᐃᒥᕐᒥᒃ ᑯᕕᕕᐅᒃᐸᑕ, ᐃᒪᖃᐅᑎᐅᑉ ᑍᒤᑦᑑᑉ ᐃᒪᖓᓄᑦ ᓴᓗᒤᓕᕗᑦ, ᐃᒥᕐᓗ ᐃᒪᕕᓂᖓ ᑕᕝᕙ ᓴᓗᒤᓕᕗᖅ. 35ᐆᒪᔪᑦ ᑖᒃᑯᐊ ᓇᓪᓕᐊᑦᑕ ᑲᑕᒡᕕᒋᔭᖓ ᓴᓗᒤᓕᕗᖅ: ᐃᒐᓘᓐᓃᑦ ᐃᒐᑦᔪᑎᓪᓘᓐᓃᑦ ᓱᓇᑐᐃᓐᓇᖅ ᑕᕝᕙ ᓯᖁᒥᑕᐅᔭᕆᐊᖃᓕᕐᐳᖅ, ᓴᓗᒤᑦᑑᓕᕐᒪᑕ, ᐃᓕᑦᓯᓗ ᓴᓗᒤᑦᑑᓂᖏᓐᓂᒃ ᐅᑦᔨᕈᓱᑦᓯᐊᕆᐊᖃᕐᐳᓯ. 36ᐃᒥᕐᓕ ᑰᒃᑐᖅ ᐃᒥᕐᑕᕐᕕᒡᓘᓐᓃᑦ ᑰᒡᕕᐅᔪᖅ ᑲᑕᒡᕕᐅᒐᓗᐊᕈᓂ ᓴᓗᒤᑦᑑᓕᕈᓐᓇᓐᖏᓚᖅ, ᐃᓄᐃᓪᓕ ᓇᓪᓕᐊᑦ ᐆᒪᔪᒥᒃ ᑍᒤᑦᑐᒥᒃ ᐊᒃᑐᐃᔪᖅ ᑖᓐᓇ ᓴᓗᒤᓕᕗᖅ. 37ᐆᒪᔪᕐᓕ ᑐᖁᖓᔪᖅ ᑲᑕᒃᐸᑦ ᐱᕈᕐᓯᐊᒃᓴᓄᑦ ᐃᓕᐅᕋᕐᑕᐅᔪᒃᓴᓄᑦ, ᑖᒃᑯᐊ ᓴᓗᒤᓕᕈᓐᓇᓐᖏᓚᑦ. 38ᐱᕈᕐᓯᐊᒃᓮᓪᓕ ᐃᒻᒥᕐᑕᐅᒃᐸᑕ ᐆᒪᔪᕐᓗ ᑐᖁᖓᔪᖅ ᐃᓗᐊᓄᑦ ᑲᑕᒃᐸᑦ, ᑕᕝᕙ ᑍᒤᑦᑐᖅ ᓴᓗᒤᑦᑑᓕᕐᐳᖅ ᐃᓕᑦᓯᓐᓄᑦ.
39“ᓂᕐᔪᑎᓪᓕ ᓂᕆᔪᓐᓇᕐᑕᓯ ᑐᖁᒃᐸᑦ, ᓇᓪᓕᐊᑦ ᑖᑦᓱᒥᖓ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 40ᓇᓪᓕᐊᓪᓗ ᓂᕆᔪᖅ ᑖᑦᓱᒪ ᐃᓚᖓᓂᒃ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. ᓇᓪᓕᐊᓪᓗ ᑐᖁᖓᔪᒥᒃ ᑖᑦᓱᒥᖓ ᐊᒡᔭᕐᓯᔪᖅ ᐊᓐᓄᕌᓂ ᐃᕐᕈᕐᑐᕆᐊᖃᕐᐰᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.
41“ᐆᒪᔪᐃᑦ ᒥᑭᔪᑦ ᓄᓇᒥ ᐹᕐᖑᕐᑐᓕᒫᑦ ᐃᑦᔪᕐᓇᕐᐳᑦ; ᓂᕆᔭᐅᔭᕆᐊᖃᕋᑎᒡᓗ. 42ᓂᕆᔭᕆᐊᖃᓐᖏᓚᓯ ᐆᒪᔪᒥᒃ ᓄᓇᒥ ᐹᕐᖑᕐᑐᒥᒃ, ᓈᕐᒥᓄᓪᓘᓐᓃᑦ ᐹᕐᖑᕐᑎᐅᒃᐸᑦ, ᓯᑕᒪᓄᓪᓘᓐᓃᑦ ᐱᓱᒃᑎᐅᒃᐸᑦ, ᐅᓄᕐᑐᓂᒡᓗ ᐃᑎᒐᖃᕐᐸᑦ: ᑍᒤᑦᑐᑦ ᐃᑦᔪᕐᓇᕐᐳᑦ. 43ᐆᒪᔪᓄᑦ ᑍᒤᑦᑐᓄᑦ ᐃᓕᑦᓯᓐᓂᒃ ᐃᑦᔪᕐᓇᕐᓯᑎᓐᓂᐊᕋᓯ. ᐃᓕᑦᓯᓐᓂᒃ ᓴᓗᒤᓕᕐᑎᓐᓂᐊᕋᓯ ᑕᒪᒃᑯᐊ ᐱᑦᔪᑎᒋᓗᒋᑦ, ᑕᒪᒃᑯᓄᖓᓘᓐᓃᑦ ᓴᓗᒤᓕᕐᑎᑕᐅᓂᐊᕋᓯ. 44#ᒨᓯᓯ ᐱᖓᔪᖏᑦ 19:2; 1 ᐲᑦᑐᕉᓯ 1:16.ᐊᑕᓂᐅᒐᒪ ᒎᑎᓯ; ᐃᓕᑦᓯᓐᓂᒃ ᑐᓂᓕᕆᑦᓯ ᐃᑦᔪᕐᓁᓕᕐᓗᓯᓗ, ᐅᕙᖓ ᐃᑦᔪᕐᓁᓐᓇᒪ. ᐃᓕᑦᓯᓐᓂᒃ ᓴᓗᒤᓕᕐᑎᓐᓂᐊᕋᓯ ᐆᒪᔪᐃᑦ ᐹᕐᖑᕐᑐᑦ ᓄᓇᒥ ᐱᑦᔪᑎᒋᓗᒋᑦ. 45ᐅᕙᖓ ᐊᑕᓂᐅᒐᒪ ᐄᑦᔨᑉᑎᒥᑦ ᐃᓕᑦᓯᓐᓂᒃ ᐊᐅᓪᓚᕐᑎᑦᓯᓚᐅᕐᑐᖅ ᐃᓕᑦᓯᓐᓄᑦ ᒎᑎᒋᔭᐅᔪᒪᓪᓗᖓ; ᑍᒤᒻᒪᑦ ᐃᑦᔪᕐᓁᒋᑦᓯ, ᐅᕙᖓ ᐃᑦᔪᕐᓁᓐᓇᒪ.
46“ᑖᒃᑯᐊ ᑕᕝᕙ ᐱᖁᔧᑦ ᓂᕐᔪᑎᑦ, ᑎᖕᒥᐊᓪᓗ, ᐃᒪᕐᒥᐅᑍᓪᓗ, ᓄᓇᒥᐅᑍᓪᓗ ᐱᓪᓗᒋᑦ. 47ᐅᑦᔨᕐᓱᑦᓯᐊᕆᐊᖃᕐᐳᓯ ᓇᓪᓕᐊᑦ ᓴᓗᒤᑦᑑᖕᒪᖔᑕ ᓇᓪᓕᐊᓪᓗ ᓴᓗᒪᖕᒪᖔᑕ, ᓇᓪᓕᐊᓪᓗ ᐆᒪᔪᑦ ᓂᕆᔭᐅᔭᕆᐊᖃᕐᒪᖔᑕ, ᓇᓪᓕᐊᓪᓗ ᓂᕆᔭᐅᔭᕆᐊᖃᖏᒻᒪᖔᑕ.”
Currently Selected:
ᒨᓯᓯ ᐱᖓᔪᖏᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.