ᒨᓯᓯ ᐱᖓᔪᖏᑦ 15
15
ᓴᓗᒤᑦᑐᑦ ᒪᕿᓂᖅ–ᒪᕐᓴᕐᓂᖅ–ᐱᑦᔪᑎᒋᓪᓗᒍ
1ᐊᑕᓂᐅᑉ ᒨᓯᓯᓗ ᐂᕉᓂᓗ ᐅᖃᐅᑎᕚᒃ, 2ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ; ᐃᓄᒃ ᐅᓱᖕᒥᒍᑦ ᒪᕐᓴᕐᐸᑦ, ᒪᕿᖓ ᑕᕝᕙ ᓴᓗᒤᑦᑑᕗᖅ. 3ᒪᖀᓐᓇᐅᔭᕐᐸᓪᓘᓐᓃᑦ ᐅᓱᖓ ᒪᕿᔪᓐᓁᕐᑎᑕᐅᓯᒪᒃᐸᓪᓘᓐᓃᑦ, ᑖᓐᓇ ᓴᓗᒤᑦᑑᕗᖅ ᐃᒫᒃ ᑕᕝᕙ ᒪᕐᓴᕐᓂᖅ ᓴᓗᒤᑎᑦᓯᓂᐊᕐᐳᖅ. 4ᓯᓂᒡᕕᒃ ᐃᓅᑉ ᒪᕐᓴᕐᑑᑉ ᓇᓚᕕᒋᔭᖓ ᓴᓗᒤᑦᑑᕗᖅ, ᐃᒃᓯᕚᕐᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ. 5ᑭᓇᑐᐃᓐᓇᐅᑉ ᒪᕐᓴᕐᑑᑉ ᐃᒡᓕᖓ ᐊᒃᑐᕐᐸᒍ, ᐊᒃᑐᐃᔫᑉ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕐᓗᓂ ᐃᒥᕐᒧᑦ, ᑖᓐᓇ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 6ᓇᓪᓕᐊᑦᓗ ᐃᒃᓯᕚᕐᑐᖅ ᐊᖑᑎᐅᑉ ᒪᕐᓴᕐᑑᑉ ᐃᒃᓯᕚᕐᕕᕕᓂᖓᓂ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕐᓗᓂ ᐃᒥᕐᒧᑦ, ᑖᓐᓇᓗ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ. 7ᓇᓪᓕᐊᑦᓗ ᐊᒃᑐᕐᓯᔪᖅ ᐊᖑᒻᒥᒃ ᒪᕐᓴᕐᑐᒥᒃ ᐊᒃᑐᕐᓯᔫᑉ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐅᐊᓴᕆᐊᖃᕐᐹ, ᑖᓐᓇᓗ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 8ᐊᖑᑦ ᒪᕐᓴᕐᑐᖅ ᓴᓗᒪᔪᒧᑦ ᑭᓇᑐᐃᓐᓇᕐᒧᑦ ᐅᕆᐊᕐᐸᑦ, ᐃᓄᒃ ᑖᓐᓇ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐅᐊᓴᕆᐊᖃᕐᐹ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 9ᓱᓇᑐᐃᓐᓁᑦ ᐃᓅᑉ ᒪᕐᓴᕐᑑᑉ ᐃᒃᓯᕙᕕᒋᔭᖏᑦ ᓱᓇᒥᒃ ᐃᑭᒪᓗᓂᓘᓐᓃᑦ ᑖᒃᑯᐊ ᓴᓗᒤᑦᑑᓂᐊᕐᐳᑦ. 10ᓇᓪᓕᐊᑦᓗ ᑕᒪᒃᑯᐊ ᒪᕐᓴᕐᑑᑉ ᐊᑖᓃᖃᑦᑕᕐᓯᒪᔪᑦ ᐊᒃᑐᕐᐸᒋᑦ ᑖᓐᓇ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ; ᑕᒪᒃᑯᓂᖓᓗ ᑎᒍᓯᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕆᐊᖃᕐᐳᖅ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 11ᓇᓪᓕᐊᑦ ᐊᖑᒻᒥᒃ ᒪᕐᓴᕐᑐᒥᒃ ᐊᒃᑐᕐᓯᒃᐸᑦ ᐊᒡᒐᓂ ᐅᐊᓴᓚᐅᖏᓪᓗᒋᑦ ᐃᒥᕐᒧᑦ, ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᒥᓂᒡᓗ ᐅᐊᓴᕆᐊᖃᕐᐳᖅ ᐃᒥᕐᒧᑦ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 12ᐅᔭᕅᑦ ᐃᓗᓕᖁᑎᓕᐊᕆᓯᒪᔪᑦ ᐊᖑᑎᐅᑉ ᒪᕐᓴᕐᑑᑉ ᐊᒃᑐᕐᑕᖏᑦ ᓯᖁᒥᑕᐅᔭᕆᐊᖃᕐᐳᑦ, ᕿᔪᐃᓪᓗ ᓴᓇᓯᒪᔪᑦ ᐊᒃᑐᕐᑕᖏᑦ ᐃᒥᕐᒧᑦ ᐅᐊᓴᕐᑕᐅᔭᕆᐊᖃᕐᐳᑦ.
13ᐊᖑᑦ ᓴᓗᒻᒪᕐᐸᑦ ᐅᓱᐊᑕ ᒪᕐᓴᕐᓂᖓᓂᑦ ᐅᓪᓗᓂᒃ 7ᓂᒃ ᐅᑕᖅᑭᔭᕆᐊᖃᕐᐳᖅ ᓴᓗᒻᒪᕐᓴᕐᑕᐅᖏᓐᓂᕐᒥᓂ; ᑕᕝᕙ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐅᕕᓂᓕᒫᓂᓗ ᐃᒥᕐᒧᑦ ᓴᓗᒪᔪᒧᑦ, ᓴᓗᒻᒪᕐᓂᐊᕐᐳᖅ ᑕᕝᕙ. 14ᐅᓪᓗᑦ 8ᖓᓐᓂ ᐱᔭᕆᐊᖃᕐᐳᖅ ᑐᕕᖕᓂᒃ ᒪᕐᕉᖕᓂᒃ ᐅᕝᕙᓘᓐᓃᑦ ᒪᕐᕉᖕᓂᒃ ᐊᕿᒡᒋᐅᔮᕐᑑᖕᓂᒃ ᐱᑦᔭᓐᓂᒃ ᐱᐊᕋᕕᓃᖕᓂᒃ, ᕾᓗᓂᓗ ᐊᑕᓂᐅᑉ ᓵᖓᓄᑦ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓄ, ᑐᓂᓗᒋᓪᓗ ᑖᒃᑯᐊ ᑐᓂᕐᕈᓯᕐᑎᑦᓯᔨᒧᑦ. 15ᑐᓂᕐᕈᓯᕐᑎᑦᓯᔨᐅᑉ ᑖᒃᑯᐊ ᑐᓂᕐᕈᑎᒋᓂᐊᕐᐰᑦ, ᐱᖃᑖ ᑐᓂᕐᕈᑕᐅᓗᓂ ᐊᔪᕐᓂᖅ ᐱᓪᓗᒍ, ᐂᑉᐸᖓᓗ ᑐᓂᕐᕈᑕᐅᓗᓂ ᐃᑯᐊᓪᓚᒃᑕᐅᓗᓂ, ᑍᒫᒃ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ ᐊᑕᓂᕐᒧᑦ, ᐃᓄᒃ ᑖᓐᓇ ᐊᓂᐊᑦᓯᕙᒃᑐᖅ ᐅᓱᖕᒥᒍᑦ.
16ᐊᖑᑎᐅᑉ ᐅᓱᖓ ᒪᕿᒃᐸᑦ, ᑎᒥᓂ ᐅᕕᓂᖕᓂᐊᕆᐊᖃᕐᐹ ᐃᒥᕐᒧᑦ, ᑖᓐᓇᓗ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 17ᐊᓐᓄᕌᑦ ᓱᓇᑐᐃᓐᓁᑦ ᐆᒪᔫᓪᓘᓐᓃᑦ ᐊᒥᕕᓂᖏᑦ ᐅᓱᖕᒥᑦ ᒪᕿᕕᐅᓯᒪᔪᑦ ᐅᐊᓴᕐᑕᐅᔭᕆᐊᖃᕐᐳᑦ ᐃᒥᕐᒧᑦ ᓴᓗᒤᑦᑑᓂᐊᕐᓗᑎᒡᓗ ᐅᓐᓄᒃ ᑎᑭᓪᓗᒍ. 18ᐊᖑᓪᓗ ᐊᕐᓇᕐᓗ ᐃᓐᓇᖓᓗᑎᒃ ᐱᖃᑎᒌᒃᐸᑎᒃ ᐅᓱᐊᓗ ᒪᕿᒃᐸᑦ ᑕᒪᕐᒥᒃ ᐅᕕᓂᖕᓂᐊᕆᐊᖃᕐᐳᒃ ᐃᒥᕐᒧᑦ, ᓴᓗᒤᑦᑑᓂᐊᕐᐳᒡᓗ ᑕᒪᕐᒥᒃ ᐅᓐᓄᒃ ᑎᑭᓪᓗᒍ.
19ᐊᕐᓇᖅ ᑕᖅᑭᑕᒫᕐᓯᐅᑎᒥᒃ ᐊᐅᓈᕈᓂ, ᓴᓗᒤᑦᑑᓂᐊᕐᐳᖅ ᐅᓪᓗᓂᒃ 7ᓂᒃ, ᑭᐊᑐᐃᓐᓇᐅᓪᓗ ᐊᒃᑐᕐᐸᒍ ᐊᒃᑐᐃᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ. 20ᐊᕐᓇᐅᑉ ᓇᓚᕕᒋᔭᖏᑦ ᐊᐅᓈᕐᑎᓪᓗᒍ ᓴᓗᒤᑦᑑᓂᐊᕐᐳᑦ, ᐃᒃᓯᕙᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ. 21ᑭᓇᒧᓪᓘᓐᓃᑦ ᓯᓂᒡᕕᖓ ᐊᒃᑐᕐᑕᐅᒃᐸᑦ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᐊᒃᑐᕐᓯᔪᕕᓂᖅ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ. 22ᑭᐊᓘᓐᓃᑦ ᐃᒃᓯᕙᕕᖓᓂᒃ ᐊᒃᑐᕐᓯᒃᐸᑦ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕆᐊᖃᕐᐳᖅ ᓴᓗᒤᑦᑑᓂᐊᕐᓗᓂᓗ ᐅᓐᓄᒃ ᑎᑭᓪᓗᒍ. 23ᓯᓂᒡᕕᖓᓘᓐᓃᑦ ᐃᒃᓯᕙᕕᖓᓘᓐᓃᑦ, ᑭᓇᒧᑦ ᐊᒃᑐᕐᑕᐅᒃᐸᑕ, ᐊᒃᑐᕐᓯᔪᖅ ᓴᓗᒤᓐᓂᐊᕐᐳᖅ ᐅᓐᓄᒃ ᑎᑭᓪᓗᒍ. 24ᐊᖑᑎᐅᑉ ᐃᓐᓇᖓᖃᑎᒋᒃᐸᒍ ᐱᖃᑎᒋᒃᐸᒍᓗ ᐊᐅᓈᕐᑎᓪᓗᒍ, ᐊᖑᑦ ᓴᓗᒤᓐᓂᐊᕐᐳᖅ ᐅᓪᓗᓂᒃ 7ᓂᒃ, ᓇᓚᕕᒋᔭᓕᒫᖏᓪᓗ ᓴᓗᒤᑦᑑᓂᐊᕐᐳᑦ.
25ᐊᕐᓇᖅ ᐊᐅᓈᕐᐸᑦ ᐅᓪᓗᓂᒃ ᐅᓄᕐᑐᓂᒃ ᑕᖅᑭᑕᒫᕐᓯᐅᑎᖓᑕ ᐊᓯᐊᒍᑦ, ᐅᕝᕙᓘᓐᓃᑦ ᑕᖅᑭᑕᒫᑦ ᐊᐅᓈᕐᕕᖓᑕ ᐅᖓᑖᓄᑦ, ᑖᓐᓇ ᓴᓗᒤᑦᑑᓂᐊᕐᐳᖅ ᐊᐅᓈᕐᓂᕐᒥᓂ, ᓲᕐᓗᑦᑕᐅᖅ ᑕᖅᑭᑕᒫᑦ ᐊᐅᓈᕐᕕᖕᒥᑐᑦ. 26ᓯᓂᒡᕕᒃ ᓇᓚᕕᒋᔭᖓ ᐊᐅᓈᕐᑎᓪᓗᒍ ᓴᓗᒤᑦᑑᓂᐊᕐᐳᖅ ᓲᕐᓗᑦᑕᐅᖅ ᑕᖅᑭᑕᒫᕐᓯᐅᑎᒥᒃ ᐊᐅᓈᕈᓯᖓᑐᑦ. 27ᑭᐊᓘᓐᓃᑦ ᐊᒃᑐᕐᐸᒍ ᓯᓂᒡᕕᖓᓘᓐᓃᑦ ᐃᒃᓯᕙᕕᖓᓘᓐᓃᑦ ᓴᓗᒤᑦᑑᓕᕐᓂᐊᕐᐳᖅ, ᑖᑦᓱᒪ ᐊᓐᓄᕌᓂ ᐅᐊᓴᕆᐊᖃᕐᐰᑦ ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ. 28ᐊᐅᓈᕈᓐᓃᕈᓂ ᐊᕐᓇᖅ ᐅᑕᖅᑭᔭᕆᐊᖃᕐᐳᖅ ᐅᓪᓗᓂᒃ 7ᓂᒃ, ᑭᖑᓂᖓᒍᑦ ᐊᑐᕐᑕᐅᔭᕆᐊᓕᒃ ᒪᓕᒡᓗᒍ ᓴᓗᒪᓂᕋᕐᑕᐅᓕᕐᓂᐊᕐᐳᖅ. 29ᐅᓪᓗᑦ 8ᖓᓐᓂ ᑑᕖᖕᓂᒃ ᒪᕐᕉᖕᓂᒃ ᐅᕝᕙᓘᓐᓃᑦ ᐊᕿᒡᒋᐅᔮᕐᑑᖕᓂᒃ ᐱᑦᔭᓐᓂᒃ ᒪᕐᕉᖕᓂᒃ ᐱᐊᕋᕕᓃᖕᓂᒃ ᓇᒃᓴᕆᐊᖃᕐᐳᖅ, ᑐᓂᕐᕈᓯᕐᑎᑦᓯᔨᒧᓪᓗ ᑐᓂᓗᒋᒃ ᑐᐱᐅᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ. 30ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕆᐊᖃᕐᐳᖅ ᑎᖕᒥᐊᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ, ᐂᑉᐸᖓᓗ ᑐᓂᕐᕈᑎᒋᓗᒍ ᐃᑯᐊᓪᓚᓗᒍ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐃᓱᒪᒋᔪᓐᓁᕐᕕᐅᑎᓐᓂᐊᕐᐹ ᐊᑕᓂᕐᒧᑦ ᓴᓗᒤᑦᑐᖅ ᐊᐅᓈᕐᓂᕆᓚᐅᕐᑕᖓ ᐱᓪᓗᒍ.
31ᐃᓴᕆᐊᓕᒥᐅᖑᔪᓯ ᐊᕕᑎᓯᒪᔭᕆᐊᖃᕐᐸᓯ ᓱᓇᑐᐃᓐᓁᑦ ᓴᓗᒤᓕᕈᑕᐅᔪᓐᓇᕐᑐᑦ, ᑐᖁᖁᓇᒋᑦ ᓴᓗᒤᓕᑎᑕᐅᓂᕐᒧᑦ, ᐃᑦᔪᕐᓁᑦᑐᕕᖁᑎᓐᓂ ᓇᔪᒐᓐᓂᒃ ᐃᑦᔪᕐᓇᕐᓯᑎᑦᓯᒃᐸᑕ, ᑖᒃᑯᓄᖓ ᓇᔫᑎᓂᕆᔭᓐᓂ ᑐᖁᑕᐅᔪᒃᓴᐅᖕᒪᑕ.
32ᐅᓇ ᑕᕝᕙ ᐱᖁᔭᖅ ᐊᖑᑦ ᖃᐹᕿᔪᖅ ᐱᑦᔪᑎᒋᓪᓗᒍ, ᓴᓗᒤᓕᑎᑕᐅᔪᓪᓗ ᖃᐹᕿᓂᕐᒧᑦ. 33ᐊᕐᓇᐅᓪᓗ ᐊᐅᓈᕐᑑᑉ ᑕᖅᑭᑕᒫᕐᓯᐅᑎᖓ ᐱᓪᓗᒍ, ᐊᖑᓪᓘᓐᓃᑦ ᐊᕐᓇᕐᓘᓐᓃᑦ ᖃᐹᕿᔪᖅ ᐱᓪᓗᒍ, ᐊᖑᓪᓗ ᐊᕐᓇᒥᒃ ᓴᓗᒤᑦᑐᒥᒃ ᐱᖃᑎᖃᕐᑐᖅ ᐱᓪᓗᒍ.
Currently Selected:
ᒨᓯᓯ ᐱᖓᔪᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.