ᒨᓯᓯ ᐱᖓᔪᖏᑦ 27
27
ᐱᖁᔧᑦ ᐊᑕᓂᕐᒧᑦ ᑐᓂᕐᕈᑏᑦ ᐱᓪᓗᒋᑦ
1ᐊᑕᓂᐅᑉ ᒨᓯᓯ ᐅᖃᐅᑎᕚ, 2“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓄᒃ ᐊᖏᕈᑎᒋᔭᒥᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ ᐃᓄᒃ ᑐᓂᔭᐅᓯᒪᑎᓪᓗᒍ, ᐃᓄᒃ ᐊᑭᓕᕐᑕᐅᔪᖅ ᕿᓚᕈᑦᔮᕐᑕᐅᔭᕆᐊᖃᕐᐳᖅ ᐊᑭᓪᓗᐊᖓᓂᒃ ᑮᓇᐅᔭᓂᒃ ᐊᑭᓕᕐᓗᒍ. 3ᐊᖑᑦ ᐊᕐᕌᒍᖃᕐᑐᖅ 20ᒥᑦ 60ᒧᑦ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 50ᓂᒃ ᓯᐅᓪᕕᕆᓂᒃ, ᐃᑦᔪᕐᓁᑦᑐᕕᐅᑉ ᑮᓇᐅᔭᖏᑦ ᒪᓕᒡᓗᒋᑦ. 4ᐊᕐᓇᕐᓕ ᐊᑭᖃᕆᐊᖃᕐᐳᖅ, ᑮᓇᐅᔭᓂᒃ 30ᓂᒃ ᓯᐅᓪᕕᕆᓂᒃ. 5ᐃᓅᓱᒃᑐᖅ ᐊᕐᕌᒍᓕᒃ 5ᒥᑦ 20ᒧᑦ, ᑮᓇᐅᔭᓂᒃ 20ᓂᒃ ᓯᐅᓪᕕᕆᓂᒃ, ᑍᒫᓪᓗᐊᖅ ᐊᕐᕌᒍᓕᒃ ᐊᕐᓇᖅ ᐊᑭᖃᕆᐊᖃᕐᐳᖅ 10ᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ. 6ᐊᖑᑦ ᑕᖅᑭᓕᒃ ᐊᑕᐅᓯᕐᒥᒃ ᑕᓪᓕᒪᓂᒃ ᐊᕐᕌᒍᓕᒧᑦ ᑎᑭᓪᓗᒍ ᐊᑭᖃᕆᐊᖃᕐᐳᖅ ᑕᓪᓕᒪᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ, ᐊᕐᓇᖅ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ ᐱᖓᓱᓂᒃ ᓯᐅᓪᕕᕆᓂᒃ. 7ᐃᓄᒃ ᐊᕐᕌᒍᖃᕐᐸᑦ 60ᓂᒃ ᐅᖓᑖᓄᓪᓗ, ᐊᖑᑕᐅᒃᐸᑦ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 15ᓂᒃ ᓯᐅᓪᕕᕆᓂᒃ, ᐊᕐᓇᐅᒃᐸᓪᓕ ᑍᒫᓪᓗᐊᖅ ᐊᕐᕌᒍᓕᒃ ᐊᑭᖃᕆᐊᖃᕐᐳᖅ ᑮᓇᐅᔭᓂᒃ 10ᓂᒃ ᓯᐅᓪᕕᕆᓂᒃ.
8“ᓇᓪᓕᐊᑦ ᐊᖏᕈᑎᖃᕋᓱᐊᕐᑐᖅ ᐊᔪᕐᓴᓗᐊᕐᐸᑦ, ᐃᓅᓪᓗ ᐊᑭᒋᔭᕆᐊᖃᕐᑕᖓᓂᒃ ᐊᑭᓖᔪᓐᓇᕋᓂ, ᐃᓄᒃ ᐊᑭᓕᕈᒪᔭᓂ ᑐᓂᕐᕈᓯᕐᑎᑦᓯᔨᒧᑦ ᐱᑎᑕᒃᓴᕆᕚ, ᑐᓂᕐᕈᓯᕐᑎᑦᓯᔨ ᐊᑭᖓᓂᒃ ᐋᖅᑭᒃᓯᒐᔭᕐᒪᑦ ᑖᑦᓱᒪ ᐊᑭᓕᕈᓐᓇᕐᑕᖓᓂᒃ.
9“ᐃᓅᑉ ᐊᖏᕈᑎᒋᔭᖓ ᓂᕐᔪᑎᐅᒃᐸᑦ, ᑐᓂᕐᕈᑎᒃᓴᐅᓗᓂ ᓈᒻᒪᑦᓯᐊᕐᓗᓂ ᐊᑕᓂᕐᒧᑦ, ᑍᒤᑦᑐᖅ ᐃᑦᔪᕐᓁᓕᕗᖅ ᐊᑕᓂᕐᒧᑦ. 10ᑕᕝᕙ ᑕᐅᕐᓰᑎᑦᓴᕆᐊᖃᕈᓐᓃᕐᐹ ᐊᓯᐊᓂᒡᓘᓐᓃᑦ ᑭᖑᕝᕕᕆᐊᖃᕐᓇᒍ ᐱᐅᓂᕐᓴᒥᒃ ᐱᐅᖏᓐᓂᕐᓴᒥᒡᓘᓐᓂᑦ ᐱᖔᕈᒪᓗᓂ, ᑕᐅᕐᓰᑦᔪᑎᒋᒍᓂᐅᒃ ᓂᕐᔪᑎᒧᑦ ᐊᓯᐊᓄᑦ ᓂᕐᔪᑏᒃ ᑕᕝᕙ ᑕᒪᖏᒃ ᐃᑦᔪᕐᓁᓕᕘᒃ. 11ᐊᖏᕈᑎᒋᔭᐅᔪᖅ ᐆᒪᔪᖅ ᑐᓂᕐᕈᑎᒋᔭᐅᓂᕐᒧᑦ ᓴᓗᒤᑦᑑᒃᐸᑦ, ᐊᑕᓂᕐᒧᓪᓗ ᑐᓂᕐᕈᑕᐅᓇᓱᐊᕐᓗᓂ ᐃᓚᓕᐅᕐᑕᐅᒐᔭᖏᑉᐸᑦ, ᓂᕐᔪᑎ ᐋᑕᐅᔭᕆᐊᖃᕐᐳᖅ ᑐᓂᕐᕈᓯᕐᑎᑦᓯᔨᒧᑦ, 12ᑐᓂᕐᕈᓯᕐᑎᑦᓯᔨᐅᑉ ᖃᐅᔨᓴᕐᓗᓂᐅᒃ ᐅᖃᕆᐊᖃᕐᐳᖅ ᑐᓂᕐᕈᑎᒋᔭᐅᔪᓐᓇᕐᒪᖔᑦ ᑐᓂᕐᕈᑎᒃᓴᐅᖏᒻᒪᖔᓪᓘᓐᓃᑦ, ᑐᓂᕐᕈᓯᕐᑎᑦᓯᔨ ᖃᓄᖅ ᐅᖃᕐᐸᑦ ᑕᕝᕙ ᑍᒤᑦᓴᕆᐊᖃᕐᐳᖅ. 13ᓂᕐᔪᑎᐅᑉ ᐃᓄᐊ ᐅᑎᕐᑎᑦᓯᔪᒪᒃᐸᑦ ᑖᑦᓱᒥᖓ, ᐊᑭᓖᔭᕆᐊᖃᕐᐳᖅ ᐊᑭᖓᑕ 20ᐳᓴᖓᓂᒃ.
14“ᓇᓪᓕᐊᑦ ᐃᒡᓗᒥᓂᒃ ᑐᓂᓯᔪᒪᒃᐸᑦ ᐊᑕᓂᕐᒧᑦ, ᑐᓂᕐᕈᓯᕐᑎᑦᓯᔨ ᖃᐅᔨᓴᕆᐊᖃᕐᐳᖅ ᐃᒡᓗ ᐱᐅᖕᒪᖔᑦ ᐱᐅᖏᒻᒪᖔᓪᓘᓐᓃᑦ, ᑐᓂᕐᕈᓯᕐᑎᑦᓯᔨ ᑕᕝᕙ ᐊᑭᖓᓂᒃ ᐋᖅᑭᒃᓯᔭᕆᐊᖃᕋᔭᕐᐳᖅ, ᐊᑭᖃᕐᑎᑕᖓᑐᓪᓗ ᑍᒤᓕᕐᓗᓂ. 15ᓇᓪᓕᐊᓪᓕ ᐃᒡᓗᒥᓂᒃ ᑐᓂᕐᕈᑎᖃᓚᐅᕐᓗᓂ, ᐅᑎᕐᑎᑦᓯᔪᒪᒃᐸᑦ 20ᐳᓴᖓᓂᒃ ᐊᑭᓕᒃᑲᓐᓂᕐᓗᓂᐅᒃ ᐅᑎᕐᑎᑦᓱᓐᓇᕐᐹ ᓇᖕᒥᓂᕆᓕᕐᒥᓗᓂᐅᒃ.
16“ᐃᓄᒃ ᓄᓇᖁᑎᒥ ᐃᓚᖓᓂᒃ ᑐᓂᕐᕈᑎᖃᕐᐸᑦ ᐊᑕᓂᕐᒧᑦ, ᐊᑭᖓ ᐋᖅᑭᒃᑕᐅᔭᕆᐊᖃᕐᐳᖅ ᖃᓄᖅ ᐊᖏᑎᒋᔪᓂᒃ ᐱᕈᕐᓰᕕᐅᔪᓐᓇᕐᒪᖔᑦ, ᖁᓕᓂᒃ ᑮᓇᐅᔭᓂᒃ ᓯᐅᓪᕕᕆᓂᒃ 20ᑭᓗᒍᕌᒻᒥᒃ ᐅᖁᒤᓐᓂᓕᒃ ᓂᐊᖂᔭᒃᓴᖅ ᒪᓕᒡᓗᒍ. 17ᓄᓇᖁᑎᒋᔭᐅᔪᖅ ᑐᓂᕐᕈᑎᒋᔭᐅᒃᐸᑦ ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᓚᐅᕐᑎᓪᓗᒍ, ᐊᑭᒋᓚᐅᕐᑕᖓ ᑍᒫᒃ ᓱᓕ ᓱᖁᓯᕋᔭᓐᖏᓚᖅ. 18ᓄᓇ ᑐᓂᕐᕈᑎᒋᔭᐅᒃᐸᑦ ᐊᕐᕌᒎᑉ ᓴᑐᕐᓯᕕᐅᑉ ᑭᖑᓂᖓᓂ, ᑐᓂᕐᕈᓯᕐᑎᑦᓯᔨᐅᑉ ᐊᑭᖓ ᐋᖅᑭᖅᑳᕋᔭᕐᐹ ᐊᕐᕌᒍᑦ ᐅᓄᕐᓂᖏᑦ ᓴᑐᕐᓯᕕᖕᒧᑦ ᑎᑭᓪᓗᒋᑦ, ᐊᕐᕌᒍᑦ ᑖᒃᑯᐊ ᒪᓕᒡᓗᒋᑦ ᐊᑭᖃᓕᕋᔭᕐᐳᖅ. 19ᑐᓂᕐᕈᓯᕐᑐᕕᓂᐅᓪᓕ ᓄᓇ ᐅᑎᕐᑎᑦᓱᒪᓕᕈᓂᐅᒃ, ᐊᑭᓪᓗᐊᖓᓂᒃ ᐊᒻᒪᓗ 20ᐳᓴᓐᒥᒃ ᐃᓚᓗᒍ ᓂᐅᕕᐊᕆᒃᑲᓐᓂᕈᓐᓇᕐᐹ ᓇᖕᒥᓂᕆᓕᕐᒥᓗᓂᐅᒡᓗ. 20ᐱᖃᕐᑐᕕᓂᐅᑉ ᓄᓇ ᐅᑎᕐᑎᖏᑉᐸᒍ, ᐅᕝᕙᓘᓐᓃᑦ ᐊᓯᐊᓄᑦ ᓂᐅᕕᐊᕆᔭᐅᒃᐸᑦ, ᐱᖃᕐᑐᕕᓂᐅᑉ ᓴᑐᕈᓐᓁᓪᓕᒐᔭᕐᐹ. 21ᓄᓇ ᑍᒫᒃ ᑐᓂᕐᕈᑎᕕᓂᖅ ᓴᑐᕐᑕᐅᓯᒪᖏᑦᑐᖅ ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᒃᐸᑦ, ᓄᓇ ᑖᓐᓇ ᐃᑦᔪᕐᓁᑦᑑᓕᕐᐳᖅ, ᐊᑕᓂᕐᒧᓪᓗ ᑐᕌᓕᕐᓗᓂ; ᑐᓂᕐᕈᓯᕐᑎᑦᓯᔨᓂᑦ ᐱᒋᔭᐅᔭᕆᐊᖃᓕᕐᐳᖅ.
22“ᐃᓄᒃ ᓄᓇᒥᒃ ᐱᕈᕐᓰᕕᖕᒥᒃ ᓂᐅᕕᐊᕆᕋᑖᕐᑕᒥᓂᒃ ᑐᓂᕐᕈᓯᕐᐸᑦ ᐊᑕᓂᕐᒧᑦ, ᐃᓚᒋᔭᖏᑕ ᓄᓇᖁᑎᖓᑕ ᐊᓯᐊᒍᑦ, 23ᑐᓂᕐᕈᓯᕐᑎᑦᓯᔨᐅᑉ ᐊᑭᖓ ᐋᖅᑭᒋᐊᖃᕐᐹ ᐊᕐᕌᒍ ᓴᑐᕐᓯᕕᒃ ᑎᑭᓪᓗᒍ, ᐃᓄᒃ ᑖᓐᓇ ᐊᑭᓖᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ ᓄᓇᐅᑉ ᐊᑭᓪᓗᐊᖓᓂᒃ, ᑮᓇᐅᔭᓪᓗ ᐊᑕᓂᐅᑉ ᐱᖁᑎᒋᕔᑦ. 24ᐊᕐᕌᒍ ᓴᑐᕐᓯᕕᒃ ᓇᓪᓕᐅᑎᒃᐸᑦ, ᓄᓇ ᐱᕈᕐᓰᕕᒃ ᐅᑎᕐᑎᑕᐅᔭᕆᐊᖃᓕᕐᐳᖅ ᐱᖃᖅᑳᕐᑐᕕᓂᕐᒧᑦ, ᑭᖑᕚᖓᓄᓪᓘᓐᓂᑦ.
25“ᑮᓇᐅᔧᑦ ᒪᓕᒋᐊᖃᕐᐳᑦ ᐃᑦᔪᕐᓁᑦᑐᕕᐅᑉ ᑮᓇᐅᔭᖓ ᒪᓕᒡᓗᒍ.
26“ᓂᕐᔪᑎᐅᑉ ᕿᑐᕐᖓᕐᑖᕆᐅᕈᑎᖓ, ᐃᑦᔪᕐᓁᓕᑎᑕᐅᔪᓐᓇᓐᖏᓚᖅ, ᕿᑐᕐᖓᕐᑖᕐᖓᐅᑎᑦ ᐊᑕᓂᐅᑉ ᐱᒋᔭᕇᕐᒪᒍ, ᐃᒻᒧᒃᓯᐅᒐᕐᓘᓐᓃᑦ ᓰᐱᐅᒃᐸᓪᓘᓐᓃᑦ. 27ᓂᕐᔪᑎ ᓴᓗᒤᑦᑑᒃᐸᑦ ᐃᓄᐊᑕ ᐅᑎᕐᑎᑦᓱᓐᓇᕐᐹ ᐊᑭᒋᖁᔭᐅᓯᒪᔪᒥᒃ ᐊᑭᖃᕐᓗᓂ ᐃᓚᓗᒍᓗ 20ᐳᓴᓐᒥᒃ, ᐃᓄᐊᑕ ᐅᑎᕐᑎᑦᓱᒪᖏᑉᐸᒍ, ᓂᐅᕕᐊᖑᔪᓐᓇᕐᐳᖅ ᐊᑭᒋᖁᔭᐅᓯᒪᔪᒥᒃ ᐊᑭᖃᕐᓗᓂ.
28 #
ᒨᓯᓯ ᓯᑕᒪᖏᑦ 18:14. “ᐃᓄᒃ ᐱᖁᑎᒥᓂᒃ ᑐᓂᕐᕈᑎᖃᕐᐸ ᐊᑕᓂᕐᒧᑦ, ᐃᓄᖕᒥᒡᓘᓐᓃᑦ ᓂᕐᔪᑎᒥᒡᓘᓐᓃᑦ, ᓄᓇᒥᒡᓘᓐᓃᑦ, ᑕᒪᒃᑯᐊ ᓂᐅᕕᐊᖑᔪᓐᓇᓐᖏᓚᑦ ᐅᑎᕐᑎᑕᐅᔪᓐᓇᕋᑎᒡᓗ, ᑍᒤᑦᑐᑦ ᐃᑦᔪᕐᓁᑦᑑᓕᖃᑦᑕᕐᒪᑕ ᐊᑕᓂᐅᑉ ᐱᒋᓕᕐᒪᒋᑦ. 29ᐃᓄᒃ ᐊᑕᓂᕐᒧᑦ ᓱᓕᑦᓯᐊᕐᓗᓂ ᑐᓂᕐᕈᑎᒋᔭᐅᔪᖅ ᐅᑎᕐᑎᑕᐅᔪᓐᓇᓐᖏᓚᖅ, ᑖᓐᓇ ᑐᖁᑕᐅᔭᕆᐊᖃᕐᐳᖅ.
30 #
ᒨᓯᓯ ᓯᑕᒪᖏᑦ 18:21; ᒨᓯᓯ ᑕᓪᓕᒪᖏᑦ 14:22-29. “ᓱᓇᑐᐃᓐᓁᑦ ᓄᓇᒥᑦ ᐱᕈᕐᑐᑦ, ᓂᐊᖂᔭᒃᓮᑦ ᓱᓇᑐᐃᓐᓁᑦ, ᐸᐅᕐᖎᓪᓗ ᓇᐹᕐᑐᓂᑦ ᐱᔪᑦ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ, ᑕᒪᒃᑯᐊ ᐃᑦᔪᕐᓁᑦᑑᕘᑦ ᐊᑕᓂᕐᒧᑦ. 31ᐃᓄᒃ ᑕᓪᓕᒪᐅᔪᐃᕈᑎᒥᓂᒃ ᐅᑎᕐᑎᑦᓯᔪᒪᒃᐸᑦ ᐊᑭᒋᖁᔭᐅᓯᒪᔪᖅ ᒪᓕᒡᓗᒍ ᐊᑭᖃᕆᐊᖃᕐᐳᑦ ᐃᓚᒃᑲᓐᓂᕐᓗᒍᓗ 20ᐳᓴᓐᖓᓂᒃ. 32ᓂᕐᔪᑎᑦ ᐆᒪᔪᑎᖁᑎᒋᔭᐅᔪᑦ ᓱᓇᑐᐃᓐᓇᐅᒃᐸᑕ ᑕᓪᓕᒪᐅᔪᖏᑦ ᐊᑕᓂᐅᑉ ᐱᒋᕔᑦ. ᓂᕐᔪᑎᑦ ᓈᓴᕐᑕᐅᒃᐸᑕ ᖁᓕᐅᓕᕌᖓᑕ ᐊᑕᐅᓯᖅ ᐃᑦᔪᕐᓁᑦᑑᓪᓗᓂ ᐊᑕᓂᐅᑉ ᐱᒋᕚ. 33ᓂᕐᔪᑎᖁᑎᖃᕐᑐᖅ ᐱᐅᓂᕐᓴᒥᒃ ᐱᐅᖏᓐᓂᕐᓴᒥᒡᓘᓐᓃᑦ ᓂᕈᐊᕐᑐᒃᓴᐅᓐᖏᓚᖅ ᐊᑕᓂᕐᒧᑦ ᑐᓂᕐᕈᑎᒃᓴᒥᒃ ᑕᐅᕐᓯᐅᑦᔨᒃᐸᓪᓕ, ᑕᒪᖏᒃ ᓂᕐᔪᑏᒃ ᐃᑦᔪᕐᓁᑦᑑᓕᕐᐴᒃ ᐅᑎᕐᑎᑕᐅᔭᕆᐊᖃᕈᓐᓁᕐᓗᑎᒡᓗ.”
34ᑕᒪᒃᑯᐊ ᑕᕝᕙ ᐱᖁᔧᑦ ᐊᑕᓂᐅᑉ ᒨᓯᓯᒧᑦ ᑐᓂᓚᐅᕐᑕᖏᑦ ᖃᖅᑲᒥ ᓮᓁᒥ ᐃᓴᕆᐊᓕᓄᑦ ᐃᓕᖓᖁᓪᓗᒋᑦ.
Currently Selected:
ᒨᓯᓯ ᐱᖓᔪᖏᑦ 27: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.