ᒨᓯᓯ ᐱᖓᔪᖏᑦ 7
7
ᑐᓂᕐᕈᑎᒃᓴᖅ ᐸᓯᔭᒃᓴᐅᓂᖅ ᐱᓪᓗᒍ
1“ᐅᑯᐊ ᑕᕝᕙ ᒪᓕᒊᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᑦ ᑐᓂᕐᕈᑎᒃᓮᑦ, ᑕᒪᓐᓇᓗ ᐃᑦᔪᕐᓁᓐᓂᕐᐹᖑᓪᓗᓂ. 2ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᖅ ᑐᓂᕐᕈᑦ ᑐᖁᑕᐅᔪᒃᓴᐅᕗᖅ ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᑐᖁᑕᐅᕕᖓᓂ, ᐊᐅᖓᓗ ᓯᕐᐸᕐᓴᕈᑕᐅᓗᓂ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ. 3ᑐᓐᓄᓕᒫᖏᑦ ᑐᓂᕐᕈᑕᐅᔭᕆᐊᖃᕐᐳᑦ, ᐸᒥᐊᓪᓗᖓᑕᓗ ᑐᓐᓄᖓ, ᐃᕐᕋᕕᖏᑕᓗ ᑭᒃᓴᐅᑎᖏᑦ. 4ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᓪᓗ ᑐᓐᓄᐃᑦ ᑯᑦᓯᓂᖏᓐᓂ ᑐᓐᓄᐃᑦ ᑎᖑᖓᑕᓗ ᐃᒻᒧᑎᖓ ᑐᓐᓄᖅ, ᑕᒪᓐᓇ ᐱᖃᓯᐅᑎᔭᕆᐊᖃᕐᐳᖅ ᑕᕐᑐᖏᒃ ᐲᓕᕐᐸᑎᒃ. 5ᑐᓂᕐᕈᓯᕐᑎᑦᓯᔨᐅᑉ ᐃᑯᐊᓪᓚᒐᒃᓴᕆᕔᑦ ᑐᓂᕐᕈᓯᕐᕕᖕᒥ ᑐᓂᕐᕈᑎᒋᓗᒋᑦ ᐃᑯᐊᓪᓚᓗᒋᑦ ᐊᑕᓂᕐᒧᑦ. ᑍᒤᑦᑐᖅ ᑐᓂᕐᕈᑕᐅᖕᒪᑦ ᐸᓯᔭᒃᓴᐅᓂᕐᒧᑦ ᐊᑭᓕᐅᑕᐅᓪᓗᓂ. 6ᐊᖑᑎᓂᑦ ᑐᓂᕐᕈᓯᕐᑎᑦᓯᔨᐅᑉ ᐃᓚᖏᓐᓂᑦ ᓂᕆᔭᐅᔪᓐᓇᕐᐳᖅ, ᑭᓯᐊᓂᓕ ᐃᑦᔪᕐᓁᑦᑐᕕᖕᒥ ᓂᕆᔭᐅᔭᕆᐊᖃᕐᐳᖅ: ᑍᒤᑦᑐᑦ ᐃᑦᔪᕐᓁᓐᓂᕐᐹᖑᖕᒪᑕ. 7ᐱᖁᔭᖅ ᑕᒪᓐᓇ ᑐᕌᕐᐳᖅ ᐊᔪᕐᓂᖅ ᐱᓪᓗᒍ ᑐᓂᕐᕈᓯᕐᓂᕐᒧᑦ ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᒧᑦ ᑐᓂᕐᕈᓯᕐᓂᕐᒧᑦ: ᑐᓂᕐᕈᑎᕕᓃᑦ ᑐᓂᕐᕈᓯᕐᑎᑦᓯᔨᐅᑉ ᐱᒋᕔᑦ ᑐᓂᕐᕈᓯᕈᑦᔨᔨᐅᑉ ᐃᓄᖕᓂᒃ. 8ᑐᓂᕐᕈᓯᕐᑎᑦᓯᔨ ᐃᑯᐊᓚᒐᒃᓴᓂᒃ ᑐᓂᕐᕈᓯᕐᐸᒃᑐᖅ ᐆᒪᔫᑉ ᐊᒥᖏᑦ ᓇᖕᒥᓂᕐᑖᕆᓗᒋᑦ ᐱᑖᕆᔭᒃᓴᕆᕔᑦ. 9ᓂᐊᖂᔭᒃᓮᑦ ᑐᓂᕐᕈᑕᐅᔪᑦ ᐃᒐᒧᑦ ᐆᓯᒪᔪᑦ, ᐃᒐᐅᑉ ᖄᖓᓂᓘᓐᓃᑦ ᐆᓯᒪᔪᑦ ᓵᑦᑑᔭᐅᑎᒥᓘᓐᓃᑦ ᐆᓯᒪᔪᑦ ᑐᓂᕐᕈᓯᕐᑎᑦᓯᔨᐅᑉ ᑖᑦᓱᒪ ᑐᓂᕐᕈᑎᒃᓴᓕᐅᕐᑑᑉ ᑖᒃᑯᐊ ᐱᒋᕔᑦ. 10ᓂᐊᖂᔭᒃᓮᑦ ᑐᓂᕐᕈᑕᐅᔪᑦ ᐅᕐᓱᒥᒃ ᐃᓚᖃᕐᐸᑕᓘᓐᓃᑦ ᐃᓚᖃᖏᒃᑲᓗᐊᕐᐸᑕᓘᓐᓃᑦ ᐂᕉᓂᐅᑉ ᐃᕐᓂᖏᑕ ᐱᒋᕔᑦ.”
ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᑦ
11“ᐅᑯᐊ ᑕᕝᕙ ᐱᖁᔧᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓮᑦ ᐱᓪᓗᒋᑦ ᐃᓅᑉ ᓇᓪᓕᐊᑐᐃᓐᓇᐅᑉ ᑐᓂᔪᓐᓇᕐᑕᖏᑦ ᐊᑕᓂᕐᒧᑦ. 12ᐃᓄᒃ ᑐᓂᕐᕈᑎᖃᕐᐸᑦ ᖁᔭᓕᔪᒪᓂᕐᒧᑦ, ᑐᓂᕐᕈᓯᕆᐊᓪᓚᒍᒪᒃᐸᓪᓗ ᖁᔭᓕᑦᔪᑎᒃᓴᒥᒃ ᑐᓂᓯᔪᒃᓴᐅᕗᖅ ᓂᐊᖂᔭᕐᒥᒃ ᐆᓯᒪᔪᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᕐᓱᒥᒡᓗ ᐃᓚᓯᒪᔪᒥᒃ, ᓯᕙᓕᐊᕆᓯᒪᔪᓪᓗ ᐳᕙᓪᓚᕐᓴᐅᑎᖃᖏᓪᓗᑎᒃ ᐅᕐᓱᒥᒃ ᒥᖑᐊᕐᓯᒪᓗᑎᒃ, ᓂᐊᖂᔭᕐᓗ ᓯᖃᓪᓕᑦᓯᐊᕐᓯᒪᔪᒥᒃ ᓂᐊᖂᔭᕐᒥᒃ ᐅᐊᕈᑦᓯᕐᓯᒪᔪᒃᓴᐅᕗᖅ ᐅᕐᓱᒥᒃ ᐃᓚᖃᕐᓗᓂ. 13ᐃᓚᒋᔭᐅᑦᓯᐊᕈᒪᓂᕐᒧᑦ ᖁᔭᓕᓂᖃᕐᓗᓂ ᑐᓂᕐᕈᓯᕐᑐᖃᕐᐸᑦ ᑐᓂᕐᕈᓯᒃᑲᓐᓂᕐᑐᒃᓴᐅᕗᖅ ᐆᓯᒪᔪᓂᒃ ᐳᕙᓪᓚᕐᓴᐅᑎᖃᕐᑐᓂᒃ. 14ᑖᒃᑯᐊ ᐊᑐᓂᑦ ᐊᑕᐅᓯᐅᓈᕐᑎᕐᓗᒋᑦ ᑐᓂᕐᕈᑎᒋᔭᒃᓴᕆᕔᑦ ᐊᑕᓂᕐᒧᑦ ᑐᓂᕐᕈᑎᒋᓗᒋᑦ; ᑐᓂᕐᕈᓯᕐᑎᑦᓯᔨᐅᑉ ᐊᐅᖕᒥᒃ ᓯᕐᐸᕐᓴᕈᑎᖃᕐᑑᑉ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᕐᒥᒃ, ᑖᑦᓱᒪ ᐱᒋᕔᑦ. 15ᓂᕿ ᑐᓂᕐᕈᑕᐅᓯᒪᔪᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᖁᔭᓕᓂᕐᒧᓪᓗ ᓂᕆᔭᐅᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ ᑐᓂᕐᕈᓯᕐᕕᐅᔪᒥ. ᐊᒥᐊᒃᑯᖃᕆᐊᖃᕋᓂᓗ ᐅᓪᓛᒥ ᐅᓪᓘᑉ ᐂᑉᐸᖓᓂ.
16“ᑭᓯᐊᓂᓕ ᑐᓂᕐᕈᑎᖃᕐᑐᖃᕐᐸᑦ ᐊᖏᕐᓯᒪᓂᓂ ᐱᑦᔪᑎᒋᓗᒍ, ᐅᕝᕙᓘᓐᓃᑦ ᑐᓂᕐᕈᓯᕆᐊᖃᕐᓂᕐᒧᑦ ᐃᓱᒪᒥᓂᒃ ᑐᓂᕐᕈᓯᕐᑐᖃᕐᐸᑦ, ᑐᓂᕐᕈᑎᖓ ᓂᕆᔭᐅᔭᕆᐊᖃᕐᐳᖅ ᐅᓪᓗᒥ ᑕᕝᕙᓂ, ᐊᒥᐊᒃᑯᖃᕐᐸᓪᓗ ᐅᓪᓘᑉ ᐂᑉᐸᖓᓂ ᓄᖑᑕᐅᔭᕆᐊᖃᕐᐳᖅ. 17ᓂᕿ ᑐᓂᕐᕈᑕᐅᓯᒪᔪᖅ ᐅᓪᓘᑉ ᐱᖓᔪᐊᑦ ᑎᑭᓪᓗᒍ ᓱᓕ ᐊᒥᐊᒃᑯᖃᕐᐸᑦ ᐃᑯᐊᓪᓚᒃᑕᐅᔭᕆᐊᖃᕐᐳᖅ. 18ᓂᕿ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᖅ ᐅᓪᓘᑉ ᐱᖓᔪᐊᓐᓂ ᓂᕆᔭᐅᒃᐸᑦ, ᑐᓂᕐᕈᑕᐅᓂᖓ ᐃᓚᓕᐅᕐᑕᐅᓂᐊᓐᖏᓚᖅ. ᑐᓂᕐᕈᓯᕐᑐᕕᓂᐅᓪᓗ ᑐᓂᕐᕈᓯᕐᓂᖓ ᐊᑐᕈᓐᓁᕐᓂᐊᕐᐳᖅ ᑍᒤᑦᑐᖅ ᐃᑦᔪᕐᓇᕐᓯᖕᒪᑦ, ᑍᒤᑦᑐᒥᒡᓗ ᓂᕆᔪᖅ ᐸᓯᔭᒃᓴᕈᕐᓂᐊᕐᐳᖅ ᑐᓂᕐᕈᓯᕐᑐᕕᓂᐅᑉ ᐸᓯᔭᒃᓴᐅᑦᔪᑎᖓᓂᒃ. 19ᓂᕿ ᐊᑐᕐᓯᒪᔪᖅ ᓱᓇᑐᐃᓐᓇᕐᒧᑦ ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒤᓐᓂᕋᕐᑕᐅᔪᒧᑦ ᓂᕆᔭᐅᔭᕆᐊᖃᓐᖏᓚᖅ ᐃᑭᑕᐅᔭᕆᐊᖃᕐᐳᓪᓕ. ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒪᓂᕋᕐᑕᐅᔪᑦ ᑕᒪᕐᒥᒃ ᓂᕆᔪᓐᓇᕐᐳᑦ. 20ᐃᓄᐃᓪᓕ ᓇᓪᓕᐊᑦ ᐅᒃᐱᕐᓂᐅᑉ ᐃᓕᖅᑯᓯᖓᒍᑦ ᓴᓗᒤᓐᓂᕋᕐᑕᐅᔪᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᒥᒃ ᐊᑕᓂᕐᒧᑦ ᓂᕆᒃᐸᑦ ᐃᓅᖃᑎᖏᓐᓄᑦ ᐊᕕᑕᐅᔪᒃᓴᐅᕗᖅ. 21ᓇᓪᓕᐊᑦ ᐅᒃᐱᕐᓂᐅᑉ ᐃᓕᖅᑯᓯᖓ ᒪᓕᒡᓗᒍ ᓴᓗᒤᓐᓂᕋᕐᑕᐅᔪᒥᒃ ᐊᒃᑐᐃᒃᐸᑦ, ᐃᓅᑉ ᓴᓗᒤᓐᓂᕋᕐᑕᐅᓂᖓᓂᒡᓘᓐᓃᑦ ᐅᕝᕙᓘᓐᓃᑦ ᐆᒪᔪᒥᒃ ᓴᓗᒤᓐᓂᕋᕐᑕᐅᔪᒥᒃ, ᓱᓇᑐᐃᓐᓇᕐᒥᒡᓘᓐᓃᑦ ᓴᓗᒤᓐᓂᕋᕐᑕᐅᔪᒥᒃ, ᑍᒤᑦᑐᖅ ᓇᕐᕈᓇᕐᓯᕗᖅ, ᓂᕿᒥᒡᓗ ᓂᕆᒃᐸᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑕᐅᓯᒪᔪᒥᒃ ᐊᑕᓂᕐᒧᑦ, ᐃᓄᒃ ᑖᓐᓇ ᐃᓅᖃᑎᒥᓄᑦ ᐊᕕᑕᐅᔪᒃᓴᐅᕗᖅ.”
ᑐᓐᓄᐃᑦ ᐊᐅᓪᓗ ᓂᕆᔭᐅᔭᕆᐊᖃᖏᓐᓂᖓᑦ
22ᐊᑕᓂᐅᑉ ᒨᓯᓯ ᐅᖃᐅᑎᕚ, 23“ᐃᓴᕆᐊᓕᒥᐅᑦ ᐅᖃᐅᑎᒃᑭᑦ; ᓂᕆᔭᕆᐊᖃᓐᖏᓚᓯ ᐃᒻᒧᒃᓯᐅᒊᑦ, ᓰᐲᓪᓘᓐᓃᑦ ᒎᑦᓰᓪᓘᓐᓃᑦ ᑐᓐᓄᖏᓐᓂᒃ. 24ᐆᒪᔪᐃᑦ ᐃᒻᒥᖕᓂᒃ ᑐᖁᔪᕕᓃᑦ, ᐆᒪᔪᓄᓪᓘᓐᓃᑦ ᑐᖁᑕᐅᔪᕕᓃᑦ ᑐᓐᓄᖏᑦ ᓱᓇᑐᐃᓐᓇᕐᒧᑦ ᐊᑐᕐᑕᐅᔪᓐᓇᕐᐳᑦ, ᑭᓯᐊᓂᓕ ᓂᕆᔭᐅᔭᕆᐊᖃᓐᖏᓚᑦ. 25ᓇᓪᓕᐊᑦ ᑐᓐᓄᕐᒥᒃ ᓂᕆᔪᖅ ᐊᑕᓂᕐᒧᑦ ᐃᑯᐊᓪᓚᓗᒋᑦ ᑐᓂᕐᕈᑕᐅᔪᒥᑦ, ᐃᓅᖃᑎᒌᓄᑦ ᐊᕕᑕᐅᔪᒃᓴᐅᕗᖅ. 26#ᒨᓯᓯ ᓯᕗᓪᓖᑦ 9:4; ᒨᓯᓯ ᐱᖓᔪᖏᑦ 17:10-14; 19:26; ᒨᓯᓯ ᑕᓪᓕᒪᖏᑦ 12:16,23; 15:23.ᓇᓂᓗ ᓄᓇᖃᕋᓗᐊᕈᕕᑦ, ᑎᖕᒥᐊᑉ ᐆᒪᔫᓪᓘᓐᓃᑦ ᐊᐅᖓᓂᒃ ᐊᐅᒃᑐᕐᑐᒃᓴᐅᓐᖏᓚᑎᑦ. 27ᓇᓪᓕᐊᑦ ᐊᐅᒃᑐᕐᑐᖅ ᑖᓐᓇ ᐃᓅᖃᑎᒥᓄᑦ ᐊᕕᑕᐅᔪᒃᓴᐅᕗᖅ.”
28ᐊᑕᓂᐅᑉ ᒨᓯᓯ ᐅᖃᐅᑎᕚ, 29“ᐃᓴᕆᐊᓕᒥᐅᑦ ᐃᒫᒃ ᐅᖃᐅᑎᒃᑭᑦ; ᓇᓪᓕᐊᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᐸᑦ ᐊᑕᓂᕐᒧᑦ ᑐᓂᕐᕈᑎᒋᔭᒥ ᐃᓚᖓᓂᒃ ᐊᑕᓂᕐᒧᑦ ᑐᓂᓯᔪᒃᓴᐅᕗᖅ. 30ᓇᖕᒥᓂᖅ ᑎᒍᒥᐊᕐᓗᓂ ᑐᓂᕐᕈᑎᒃᓴᒥᒃ ᐃᑯᐊᓚᑎᑕᒃᓴᒥᒃ ᑐᓂᕐᕈᓯᕆᐊᕐᑐᕆᐊᖃᕐᐳᖅ ᐊᑕᓂᕐᒧᑦ ᐃᑯᐊᓚᑦᓯᕕᖕᒧᑦ; ᑐᓐᓄᖏᖕᓂᒃ ᑐᓂᕐᕈᑎᒃᓴᖃᕆᐊᖃᕐᐳᖅ, ᓴᑭᐊᖏᒡᓗ ᐱᖃᓯᐅᑎᓗᒋᒃ, ᐆᒪᔫᑉ ᓴᑭᐊᖏᑦ ᐊᐅᓪᓚᕐᑎᑕᒃᓴᐅᓗᑎᒃ ᑐᓂᕐᕈᑕᐅᓂᕐᒧᑦ ᐊᑕᓂᐅᑉ ᓵᖓᓂ. 31ᑐᓂᕐᕈᓯᕐᑎᑦᓯᔨᐅᑉ ᑐᓐᓄᐃᑦ ᐃᑯᐊᓚᑎᑕᒃᓴᕆᕔᑦ ᑐᓂᕐᕈᓯᕐᕕᖕᒥ, ᐆᒪᔫᓪᓕ ᓴᑭᐊᖏᑦ ᐂᕉᓂᐅᑉ ᐃᕐᓂᖏᑕᓗ ᐱᑖᕆᓂᐊᕐᐹᑦ. 32ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕈᕕᑦ ᑐᓂᕐᕈᑎᕕᑦ ᒥᒥᖓ ᑕᓕᕐᐱᒃ ᑐᓂᔭᒃᓴᕆᕙᑦ ᑐᓂᕐᕈᓯᕐᑎᑦᓯᔨᒧᑦ ᐃᑲᔪᕈᑎᒋᓗᒍ. 33ᐂᕉᓂᐅᓪᓗ ᐃᕐᓂᖓᑕ ᐃᓚᖓᑦ ᐊᐅᖕᒥᒃ ᑐᓐᓄᕐᒥᒡᓗ ᑐᓂᕐᕈᑎᖃᕐᑐᖅ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᒃᓴᒥᑦ, ᓂᕿᑖᕆᐊᖃᕐᐳᖅ ᐆᒪᔫᑉ ᒥᒥᖓᓂᒃ ᑕᓕᕐᐱᖕᒥᒃ. 34ᐃᓴᕆᐊᓕᒥᐅᑦ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᑎᖏᓐᓂᑦ, ᐆᒪᔫᑉ ᑐᓂᕐᕈᑎᐅᑉ ᓴᑭᐊᖏᒃ ᐊᐅᓪᓚᕐᑎᑕᒃᓴᐅᔫᑉ ᐊᑕᓂᐅᑉ ᓵᖓᓂ, ᐆᒪᔫᓪᓗ ᒥᒥᖓ ᑕᓕᕐᐱᒃ ᑐᓂᕐᕈᑕᐅᔪᖅ ᑖᒃᑯᐊ ᑐᓂᕙᒃᑲ ᐂᕉᓂᒧᑦ ᑐᓂᕐᕈᓯᕐᑎᑦᓯᔨᒧᑦ ᐃᕐᓂᖏᓐᓄᓪᓗ ᑍᒤᑦᑐᓂᒃ ᐱᑎᑕᐅᖁᓪᓗᒋᑦ ᐃᓴᕆᐊᓕᒥᐅᓂᑦ.” 35ᑍᒫᒃ ᑕᕝᕙ ᐊᑕᓂᕐᒧᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᐅᑉ ᐃᓚᖓᓂᒃ ᑐᓂᓯᕕᐅᔭᕆᐊᖃᕐᑎᑕᐅᕗᑦ ᐃᑦᔪᕐᓁᑎᑕᐅᓂᖏᑕ ᐅᓪᓗᖓᓂᑦ ᐱᒋᐊᕐᓗᒋᑦ ᐂᕉᓂ ᐃᕐᓂᖏᓪᓗ ᐊᑕᓂᕐᒧᑦ ᑐᓂᔭᐅᓯᒪᖕᒪᑕ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᔨᑦᓯᕐᑎᐅᖁᔭᐅᓪᓗᑎᒃ. 36ᐅᓪᓗᒥ ᑍᑦᓱᒪᓂ ᐅᕐᓱᒥᒃ ᓇᓗᓁᒃᑯᓯᕐᑕᐅᖕᒪᑕ ᓂᕈᐊᕐᑕᐅᓂᖏᓐᓂᒃ, ᐊᑕᓂᖅ ᐱᖁᔨᓚᐅᕐᐳᖅ ᐃᓴᕆᐊᓕᒥᐅᓂᒃ ᑍᒤᑦᑐᓂᒃ ᐂᑦᑐᕐᑕᐅᖃᑦᑕᖁᓪᓗᒋᑦ ᑭᖑᕚᒃᓴᖏᑦ ᑐᓂᕐᕈᓯᕐᑎᑦᓯᔩᑦ ᑍᒫᒃ ᑐᓂᔭᐅᖃᑦᑕᑯᓪᓗᒋᑦ.
37ᐅᑯᐊ ᑕᕝᕙ ᐱᖁᔧᑦ ᑐᓂᕐᕈᑎᒃᓮᑦ ᐃᑯᐊᓚᒐᒃᓮᑦ ᐱᓪᓗᒋᑦ, ᓂᐊᖂᔭᓂᒃ ᑐᓂᕐᕈᓯᕐᓂᕐᒥᒃ, ᐊᔪᕐᓂᖅ ᐱᓪᓗᒍ ᑐᓂᕐᕈᓯᕐᓂᕐᒥᒃ, ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒥᒃ ᑐᓂᕐᕈᓯᕐᓂᕐᒥᒃ, ᑎᓕᔭᐅᓂᖅ ᐱᓪᓗᒍ ᑐᓂᕐᕈᓯᕐᓂᕐᒥᒃ, ᐊᒻᒪᓗ ᐃᓚᒋᔭᐅᑦᓯᐊᕈᒪᓂᕐᒧᑦ ᑐᓂᕐᕈᓯᕐᓂᕐᒥᒃ, 38ᑖᒃᑯᐊ ᐊᑕᓂᐅᑉ ᒨᓯᓯᒧᑦ ᑐᓂᓚᐅᕐᐰᑦ ᖃᖅᑲᒥ ᓮᓁᒥ, ᐅᓪᓗᒥ ᑕᕝᕙᓂ ᐃᓴᕆᐊᓕᒥᐅᑦ ᑐᓂᕐᕈᓯᖃᑦᑕᖁᒐᒥᒋᑦ ᐊᑕᓂᕐᒧᑦ, ᓄᓇᒥ ᓯᐅᕅᓐᓇᕐᒥ ᓮᓁᒥ.
Currently Selected:
ᒨᓯᓯ ᐱᖓᔪᖏᑦ 7: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.