ᓘᑲᓯᐅᑉ ᐊᒡᓚᖏᑦ 18
18
ᔩᓱᓯᐅᑉ ᐊᑦᔨᐅᑎᑕᖓ ᐅᐃᒡᒐᕐᓂᖅ ᐃᖅᑲᕐᑐᐃᔨᓗ
1ᔩᓱᓯᐅᑉ ᐃᓕᓐᓂᐊᕐᑎᓂ ᐊᑦᔨᐅᔪᒥᒃ ᐊᔪᕆᕐᑐᕐᐰᑦ, ᑐᒃᓯᐊᖏᓐᓇᖃᑕᖁᓪᓗᒋᑦ ᓴᐱᓕᕐᑍᓕᖁᓪᓗᒋᓪᓗ. 2ᐅᖃᐅᑎᕔᑦ, “ᓄᓇᓕᖕᓂ ᐃᖅᑲᕐᑐᐃᔨᑕᖃᓚᐅᕐᐳᖅ ᒎᑎᒥᒃ ᓯᕘᕋᖏᑦᑐᒥᒃ, ᐃᓄᖕᓂᒡᓗ ᐃᓕᕋᓱᒐᓂ. 3ᑕᕝᕙᓂ ᓄᓇᓕᖕᓂ ᐅᐃᒡᒐᕐᓂᕐᑕᖃᓚᐅᕐᐳᖅ ᑖᑦᓱᒪ ᐃᖅᑲᕐᑐᐃᔨ ᐅᐸᖃᑦᑕᕐᐹ ᐅᖃᐅᑎᖃᑦᑕᕐᖢᒍ, ‘ᓴᐳᑎᓚᐅᓐᖓ ᐊᑭᕋᕐᑐᕐᑎᓐᓂᑦ!’ 4ᐃᖅᑲᕐᑐᐃᔨ ᐊᑯᓂ ᐅᐸᓚᐅᓐᖏᓚᖅ; ᑭᖑᓂᖓᒍᓪᓕ ᐃᓱᒪᓕᕐᐳᖅ, ‘ᒎᑎᒥᒃ ᓯᕘᕋᖏᒃᑲᓗᐊᕐᐳᖓ ᐃᓄᖕᓂᒡᓗ ᐃᓕᕋᓱᖕᓇᖓ. 5ᐆᒪᓕ ᐅᐃᒡᒐᕐᓂᐅᑉ ᐸᒡᕕᓮᓐᓇᓕᕐᒪᖓ, ᐱᔪᒪᔭᖓᓂᒃ ᐱᓂᐊᕐᕕᒋᓚᐅᕐᓚᒍ, ᑲᒪᒋᖏᒃᑯᒃᑯ ᕾᖃᑦᑕᑐᐃᓐᓇᕐᓂᐊᕐᒪᑦ ᐃᕿᐊᓐᖑᓇᕐᓯᒻᒪᕆᒃᓗᓂ.’”
6ᐊᑕᓂᖅ ᐅᖃᕐᐳᖅ, “ᑐᓴᕐᐸᓯ ᐃᖅᑲᕐᑐᐃᔨᐅᑉ ᐅᒃᐱᖏᑦᑑᑉ ᐅᖃᐅᓯᖏᑦ. 7ᒎᑎᐅᓪᓖ ᐃᓄᖁᑎᓂ, ᕿᓄᐃᓐᓇᓕᕐᐸᑕ ᐅᓪᓗᒃᑯᑦ ᐅᓐᓄᐊᑯᓪᓗ ᐃᑲᔪᕐᑕᐅᔪᒪᓗᑎᒃ? ᐱᒋᐊᕐᓇᓵᕋᔭᕐᐹ ᐃᑲᔪᕐᑕᐅᔪᒪᑎᓪᓗᒋᑦ? 8ᐅᖃᐅᑎᕙᑦᓯ, ᐃᓄᖁᑎᓂ ᑕᕝᕔᓐᓇᖅ ᐃᑲᔪᕈᒪᒐᔭᕐᐰᑦ. ᐃᓅᑉ ᐃᕐᓂᖓ ᓄᓇᕐᔪᐊᕐᒧᑦ ᑎᑭᒃᑯᓂ, ᐅᒃᐱᕐᓂᖃᑦᓯᐊᕐᑐᓂᒃ ᓇᓂᓯᒐᔭᕐᐹ?”
ᐊᑦᔨᐅᔪᖅ ᐹᕆᓯᓗ ᕉᒪᒥᐅᓪᓗ ᑮᓇᐅᔧᕐᑎᑦᓯᔨᖓᑦ
9ᐊᑦᔨᐅᔪᒥᒃᑕᐅᖅ ᔩᓱᓯᐅᑉ ᐅᖃᐅᑎᕔᑦ ᐃᓄᐃᑦ ᐃᒻᒥᖕᓂᒃ ᖃᓄᐃᓐᓇᓱᒋᖏᑦᑐᑦ ᐊᓯᒥᖕᓂᒡᓗ ᓇᕐᕈᔪᑦ: 10“ᐊᖑᑏᖕᓂᒃ ᒪᕐᕉᖕᓂᒃ ᑐᒃᓯᐊᕐᕕᒡᔪᐊᕐᒧᑦ ᑐᒃᓯᐊᕆᐊᕐᑐᖃᓚᐅᕐᐳᖅ, ᐂᑉᐸᖓ ᐹᕆᓯ, ᐂᑉᐸᖓᓗ ᕉᒪᒥᐅᑦ ᑮᓇᐅᔧᕐᑎᑦᓯᔨᖓ. 11ᐹᕆᓯ ᐃᓄᑑᓪᓗᓂ ᓇᖏᕐᐳᖅ ᑐᒃᓯᐊᕐᓗᓂ, ‘ᒎᑏ, ᖁᔭᒋᕙᒋᑦ ᐊᓯᑦᑐᑦ ᑍᒤᖏᓐᓇᒪ, ᐱᔪᒪᑐᔪᐊᓗᒃᑎᑐᑦ, ᑎᒡᓕᑐᔪᐊᓗᒃᑎᑐᓪᓘᓐᓃᑦ, ᓄᓕᐊᒥᖕᓂᒃ ᐊᓯᓐᓂᐊᕐᐸᒃᑐᑎᑐᑦ, ᐆᑐᓇᖅ ᕉᒪᒥᐅᑦ ᑮᓇᐅᔧᕐᑎᑦᓯᔨᖓᑐᑦ. 12ᐱᓇᓱᐊᕈᓯᖅ ᒪᕐᕈᕕᒡᓗᒍ ᓂᕆᑦᑍᓕᕙᒃᐳᖓ, ᑮᓇᐅᔭᕐᑖᕆᔭᒪᓗ ᑕᓪᓕᒪᐅᔪᕐᑑᑦᔪᑎᖏᓐᓂᒃ ᑐᓂᓯᕙᒃᐳᖓ.’ 13ᕉᒪᒥᐅᓪᓕ ᑮᓇᐅᔧᕐᑎᑦᓯᔨᖓ, ᖃᓂᖏᑦᑐᒥ ᓇᖏᕐᐳᖅ, ᖁᒻᒧᓪᓘᓐᓃᑦ ᐋᕐᓗᕈᒪᖏᑦᑐᖅ, ᓴᒡᕕᓂᓗ ᐸᑎᒃᑕᕐᓗᒍ ᐅᖃᕐᐳᖅ, ‘ᒎᑎ ᓂᑲᒋᓚᐅᓐᖓ ᐊᔪᕐᑐᓕᔨᐊᓘᒐᒪ!’ 14#ᒫᑎᐅᓯ 23:12; ᓘᑲᓯ 14:11.ᐅᖃᐅᑎᕙᑦᓯ, ᑖᓐᓇ ᕉᒪᒥᐅᑦ ᑮᓇᐅᔧᕐᑎᑦᓯᔨᖓ ᒎᑎᒧᑦ ᓈᒻᒪᒋᔭᐅᓂᕐᓴᐅᓕᕐᓗᓂ ᐂᑉᐸᕆᔭᒥᓂᑦ ᐃᒡᓗᒥᓄᑦ ᐊᖏᕐᕋᓚᐅᕐᐳᖅ; ᓇᓪᓕᐊᑦ ᐃᒻᒥᓂᒃ ᐊᖏᔪᕈᕐᑎᑦᑐᖅ ᒎᑎᐅᑉ ᒥᑭᒡᓕᑎᕐᓂᐊᕐᐹ, ᐃᒻᒥᖕᓂᒡᓕ ᒥᑭᒡᓕᑎᕐᑐᖅ ᑖᓐᓇ ᐊᖏᔪᕈᕐᑎᑕᐅᓂᐊᕐᐳᖅ.”
ᔩᓱᓯᐅᑉ ᑐᓐᖓᓱᒃᑕᐅᖃᑦᑕᖁᔨᓂᖓ ᓄᑕᕋᑯᓗᖕᓂᒃ
ᒫᑎᐅᓯ 19:13-15; ᒫᑯᓯ 10:13-16
15ᓄᑕᕋᑯᓗᖕᓂᒃᑕᐅᖅ ᔩᓱᓯᒧᐊᕈᑦᔨᕗᑦ ᑖᑦᓱᒧᖓ ᐸᑎᒻᒥᔭᐅᖁᓪᓗᒋᑦ; ᐃᓕᓐᓂᐊᕐᑎᖏᑕᓕ ᑕᑯᒐᒥᑦᔪᒃ, ᑖᒃᑯᐊ ᐃᓂᕐᑎᕐᐰᑦ. 16ᔩᓱᓯᐅᓪᓕ ᓄᑕᕋᑯᓗᐃᑦ ᕾᖁᕔᑦ ᐅᖃᕐᓗᓂ, “ᓄᑕᕋᑯᓗᐃᑦ ᐅᕙᓐᓄᑦ ᕾᑎᓯᐅᒃ, ᐃᓂᕐᑎᖏᓪᓗᒋᑦ; ᑍᒤᑦᑐᓄᑦ ᒎᑎᐅᑉ ᐊᑕᓂᐅᕕᖓ ᐱᒋᔭᐅᖕᒪᑦ. 17ᓱᓕᔪᒥᒃ ᐅᖃᐅᑎᕙᑦᓯ, ᒎᑎᐅᑉ ᐊᑕᓂᐅᕕᖓᓂᒃ ᓄᑕᕋᑯᓗᒃᑎᑐᑦ ᐃᓚᓕᐅᕐᓯᖏᑦᑐᖅ ᑖᓐᓇ ᑕᕝᕗᖓ ᐃᑎᕐᓂᐊᓐᖏᓚᖅ.”
ᐊᖑᑦ ᐊᔪᕐᓴᓐᖏᕐᑐ
ᒫᑎᐅᓯ 19:16-30; ᒫᑯᓯ 10:17-31
18ᔫᑎᑦ ᐊᖓᔪᖅᑳᖓᑦᑕ ᔩᓱᓯ ᐊᐱᕆᕚ, “ᐱᐅᔪᑎᑦ ᐊᔪᕆᕐᑐᐃᔩ, ᓱᓇᒥᒃ ᐱᓇᓱᐊᕆᐊᖃᕐᐳᖓ ᐃᓅᓯᕐᒥᒃ ᓄᖑᓱᐃᑦᑐᒥᒃ ᑭᖑᕐᖑᑦᔨᖁᓪᓗᖓ?”
19ᔩᓱᓯᐅᑉ ᐅᖃᐅᑎᕚ, “ᓱᖕᒪᑦ ᐱᐅᔪᒥᒃ ᑍᕕᖔ? ᒎᑎᐅᑉ ᐊᓯᐊᓂᒃ ᐱᐅᔪᕐᑕᖃᓐᖏᓚᖅ. 20#ᒨᓯᓯ ᐂᑉᐸᖏᑦ 20:14; ᒨᓯᓯ ᑕᓪᓕᒪᖏᑦ 5:18; ᒨᓯᓯ ᐂᑉᐸᖏᑦ 20:13; ᒨᓯᓯ ᑕᓪᓕᒪᖏᑦ 5:17; ᒨᓯᓯ ᐂᑉᐸᖏᑦ 20:15; ᒨᓯᓯ ᑕᓪᓕᒪᖏᑦ 5:19; ᒨᓯᓯ ᐂᑉᐸᖏᑦ 20:16; ᒨᓯᓯ ᑕᓪᓕᒪᖏᑦ 5:20; ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16.ᐱᖁᔧᑦ ᖃᐅᔨᒪᕙᑎᑦ: ‘ᓄᓕᐊᓖᑦ ᐅᐃᓖᓪᓗ ᐊᓯᓐᓂᐊᕐᑐᒃᓴᐅᓐᖏᓚᑦ, ᐱᔮᕆᓗᑎᑦ ᐃᓄᐊᕐᑐᒃᓴᐅᓐᖏᓚᑎᑦ, ᑎᒡᓕᒃᑐᒃᓴᐅᓐᖏᓚᑎᑦ; ᐃᓅᖃᑎᖕᓂᒃ ᓱᓕᖏᑦᑐᒥᒃ ᐅᖃᐅᓯᖃᕐᑐᒃᓴᐅᓐᖏᓚᑎᑦ; ᐊᑖᑕᖕᓂᒃ ᐊᓈᓇᖕᓂᒡᓗ ᐅᐱᒍᓱᑦᓯᐊᕐᑐᒃᓴᐅᕗᑎᑦ!’”
21ᑖᑦᓱᒪ ᑭᐅᕚ, “ᑕᒪᒃᑯᐊ ᑍᒪᓐᖓᑦ ᐃᓅᓱᒃᑑᓂᓐᓂᑦ ᐱᖁᔧᑦ ᒪᓕᒃᐸᒃᑲ.”
22ᔩᓱᓯᐅᑉ ᑐᓴᕋᒥᐅᒃ, ᐅᖃᐅᑎᕚ, “ᓱᓕ ᐊᑕᐅᓯᕐᒥᒃ ᐱᓯᒪᓐᖏᓚᑎᑦ. ᐱᖁᑎᓕᒫᑎᑦ ᓂᐅᕐᕈᑎᒋᔭᕐᑐᒃᑭᑦ ᑮᓇᐅᔭᑖᕆᔮᑎᓪᓗ ᑐᓂᐅᖃᐅᑎᒋᓗᒋᑦ ᐊᔪᕐᓴᕐᑐᓄᑦ, ᕿᓚᖕᒥ ᑕᕝᕙ ᐱᖁᑎᖃᑦᓯᐊᕐᓂᐊᕐᐳᑎᑦ; ᕾᓗᑎᑦ ᒪᓕᓐᖓ.” 23ᐊᖑᓪᓕ ᑕᒪᑐᒥᖓ ᑐᓴᕋᒥ ᖁᕕᐊᓱᒍᓐᓃᕐᐳᖅ; ᐊᔪᕐᓴᓐᖏᑦᑐᐊᓘᒐᒥ.
24ᔩᓱᓯᐅᑉ ᖁᕕᐊᓱᒍᓐᓃᕐᑐᖅ ᑕᑯᒐᒥᐅᖅ ᐅᖃᕐᐳᖅ, “ᐱᔭᕐᓂᖏᑦᑑᖕᒪᑦ ᐊᔪᕐᓴᓐᖏᑐᓄᑦ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕋᓱᐊᕐᓂᐊᕐᓗᓂ! 25ᐱᔭᕆᐊᑭᓐᓂᕐᓴᐅᕗᖅ ᑳᒥᓕᐅᑉ#18:25 ᑳᒥᓕ ᐅᕝᕙᓗ ᐱᑯᓕᒃ ᐃᑎᕋᓱᐊᕋᔭᕐᓂᖓᓂᑦ ᒥᖅᑯᑎᐅᑉ ᐃᔨᖓᒍᑦ#18:25 ᔨᕉᓴᓕᐅᑉ ᐊᕙᓗᕐᔪᐊᖓᓂ ᐅᒃᑯᐊᕐᑕᖃᓚᐅᕐᒪᑦ ᐊᑎᖃᕐᑐᒥᒃ ᒥᖅᑯᑎᐅᑉ ᐃᔨᖓᓂᒃ ᐊᔪᕐᓴᖏᑦᑑᑉ ᐃᑎᕋᓱᐊᕋᔭᕐᓂᖓᓂᑦ ᒎᑎᐅᑉ ᐊᑕᓂᐅᕕᖓᓄᑦ.”
26ᐃᓄᐃᑦ ᑐᓵᔪᑦ ᐊᐱᕆᕚᑦ, “ᑭᓇᓕ ᑍᒪ ᐱᐅᓕᔭᐅᔪᓐᓇᕐᓂᐊᕐᐹ?”
27ᔩᓱᓯᐅᑉ ᐅᖃᐅᑎᕔᑦ, “ᐃᓄᖕᓄᑦ ᐊᔪᕐᓇᕐᑐᑦ ᒎᑎᒧᑦ ᐊᔪᕐᓇᓐᖏᓚᑦ.”
28ᐲᑦᑐᕉᓯ ᐅᖃᕐᐳᖅ, “ᑕᑯᒋᑦ, ᐊᖏᕐᕋᕗᑦ ᕿᒪᓚᐅᕐᐸᕗᑦ ᐃᓕᖕᓂᒃᓗ ᒪᓕᓕᕐᓗᑕ.”
29ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᐊᖏᕐᕋᒥᓂᒃ ᕿᒤᔪᖅ ᓄᓕᐊᒥᓂᒃ, ᖃᑕᓐᖑᑎᒥᓂᒡᓗ ᐊᖓᔪᖅᑳᒥᓂᒡᓗ ᕿᑐᕐᖓᒥᓂᒡᓘᓪᓃᑦ, ᒎᑎᐅᑉ ᐊᑕᓂᐅᕕᖓ ᐱᑦᔪᑎᒋᓗᒍ, 30ᐊᖏᓂᕐᓴᒻᒪᕆᐊᓗᖕᒥᒃ ᑐᓂᓯᕕᐅᓛᕐᐳᖅ ᒫᓐᓇ ᐃᓅᑎᓪᓗᒍ, ᐃᓅᓯᒃᓴᒥᒡᓗ ᓄᖑᓱᐃᑦᑐᒥ ᐱᔪᒫᕐᑐᒥ.”
ᔩᓱᓯᐅᑉ ᐱᖓᔪᖓᓐᓂᒃ ᐅᖃᐅᓯᖃᕐᓂᖓ ᑐᖁᑕᐅᓛᕐᓂᕐᒥᓂᒃ
ᒫᑎᐅᓯ 20:17-19; ᒫᑯᓯ 10:32-34
31ᔩᓱᓯᐅᑉ ᐃᓕᓐᓂᐊᕐᑎᓂ 12 ᐃᓄᑑᑎᓪᓗᒋᑦ ᐅᖃᐅᑎᕔᑦ, “ᑕᑯᒋᑦ ᔨᕉᓴᓕᒻᒧᐊᓕᕐᐳᒍᑦ, ᐅᖃᐅᓯᐅᓯᒪᔪᑦ ᑕᒪᕐᒥᒃ ᓇᓚᐅᑦᑍᔪᓂ ᐃᓅᑉ ᐃᕐᓂᖓᑕ ᒥᒃᓵᓄᑦ ᑲᔪᓯᑎᑕᐅᓂᐊᕐᐳᑦ. 32ᔫᑎᐅᖏᑦᑐᓄᑦ ᑐᓂᔭᐅᔪᒫᕐᐳᖅ, ᑖᒃᑯᐊ ᒥᑕᐅᑎᒋᔪᒫᕐᐹᑦ, ᑲᓐᖑᓲᑎᓐᓇᕐᑐᒥᒃ ᐱᓇᓱᐊᕐᕕᐅᔪᒫᕐᐳᖅ, ᑎᕝᕗᓗᒃᑕᐅᓗᓂᓗ; 33ᑏᒐᕐᑐᕈᒫᕐᐹᑦ ᑐᖁᓪᓗᒍ, ᐅᓪᓗᐃᓪᓕ ᐱᖓᔪᐊᓐᓂᒃ ᒪᑭᑦᓱᒫᕆᕗᖅ.”
34ᐃᓕᓐᓂᐊᕐᑎᖏᑦ ᐅᖃᐅᓯᕐᓂᒃ ᑖᒃᑯᓂᖓ ᑐᑭᓯᓐᖏᓚᑦ; ᐅᖃᐅᓯᖏᑕ ᑐᑭᖏᑦ ᐃᔨᕐᓯᒪᓚᐅᕐᒪᑕ ᑖᒃᑯᓄᖓ, ᑐᑭᓯᓚᐅᓐᖏᓚᑦ ᖃᓄᖅ ᔩᓱᓯ ᐅᖃᕋᓗᐊᕐᒪᖔᑦ.
ᔩᓱᓯᐅᑉ ᑕᐅᑐᓕᕐᑎᑦᑎᓂᖓ ᑐᒃᓯᕋᑎᒥᒃ ᑕᐅᑐᖏᑦᑐᒥᒃ
ᒫᑎᐅᓯ 20:29-34; ᒫᑯᓯ 10:46-52
35ᔩᓱᓯ ᔨᕆᑰᒧᑦ ᖃᒡᓕᓕᕐᑎᓪᓗᒍ, ᑕᐅᑐᖏᑦᑐᒥᒃ ᐃᒃᓯᕙᔪᖃᕐᐳᖅ ᐊᖅᑯᑎᐅᑉ ᓴᓂᐊᓂ, ᑮᓇᐅᔭᓂᒃ ᑐᒃᓯᕋᕐᑎᒥᒃ. 36ᐃᓄᒋᐊᒑᓗᐃᑦ ᓴᓂᖅᑯᑦᑐᑦ ᑐᓵᒐᒥᒋᑦ, ᐊᐱᕆᕗᖅ, “ᓱᔪᖃᓕᕐᒪᑦ?”
37ᐅᖃᐅᑦᔭᐅᕗᖅ, “ᔩᓱᓯ ᓈᓴᕇᑎᒥᐅᖅ ᐊᖅᑯᓵᓕᕐᒪᑦ.”
38ᓂᓪᓕᐊᓕᕐᐳᖅ, “ᔩᓱᓯ, ᑍᕕᑎᐅᑉ ᐃᕐᓂᖓ, ᓂᑲᒋᓐᖓ!”
39ᓯᕗᓪᓕᐅᔪᑦ ᐃᓂᕐᑎᕆᓕᕐᐳᑦ ᑖᑦᓱᒥᖓ ᓂᐱᖃᖁᓇᒍ; ᓂᐱᖅᑯᕐᑐᓯᕙᓪᓕᐊᑐᐃᓐᓇᕐᐳᕐᓕ, “ᑍᕕᑎᐅᑉ ᐃᕐᓂᖓ, ᓂᑲᒋᓐᖓ!”
40ᔩᓱᓯ ᓄᖅᑲᕐᐳᖅ, ᑕᐅᑐᖏᑦᑐᖅ ᕾᑎᑕᐅᖁᕚ, ᖃᒡᓕᓕᕐᒪᑦ ᐊᐱᕆᕚ, 41“ᓱᓇᒥᒃ ᐅᕙᓐᓄᑦ ᐱᓂᐊᕐᕕᐅᔪᒪᕖᑦ?”
ᐅᖃᕐᐳᖅ, “ᐊᑕᓃᖅ ᑕᐅᑐᓕᕐᑎᑕᐅᔪᒪᕗᖓ.”
42ᔩᓱᓯᐅᑉ ᐅᖃᐅᑎᕚ, “ᑕᐅᑐᓕᕆᑦ; ᐅᒃᐱᕈᓱᖕᓂᕐᓄᑦ ᐋᖅᑭᒃᑕᐅᕗᑎᑦ.”
43ᑕᕝᕔᓐᓇᖅ ᑕᐅᑐᓕᕐᐳᖅ ᔩᓱᓯ ᒪᓕᓕᕐᓗᒍ, ᒎᑎᓗ ᓂᕐᑐᕐᐹ; ᐃᓄᓕᒫᑦ ᑕᒪᑐᒥᖓ ᑕᑯᒐᒥᒃ, ᒎᑎ ᓂᕐᑐᓕᕐᐹᑦ.
Currently Selected:
ᓘᑲᓯᐅᑉ ᐊᒡᓚᖏᑦ 18: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
