ᓘᑲᓯᐅᑉ ᐊᒡᓚᖏᑦ 7
7
ᔩᓱᓯᐅᑉ ᐋᖅᑭᒃᓯᓂᖓ ᕉᒪᒥᐅᑦ ᐅᓇᑕᕐᑐᒃᓴᖁᑎᖓᑕ ᐱᔨᖓᓂᒃ
ᒫᑎᐅᓯ 8:5-13
1ᔩᓱᓯ ᑕᒤᓐᓂᒃ ᐅᖃᓪᓚᒌᕋᒥ ᐃᓄᖕᓄᑦ ᑲᐲᕐᓂᐊᒧᐊᕐᐳᖅ. 2ᕉᒪᒥᐅᑦ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑦ ᑕᕝᕙᓂ ᐱᔨᖃᓚᐅᕐᐳᖅ ᐱᓐᓇᕆᔭᒥᓂᒃ, ᑖᓐᓇ ᐱᔨᖓ ᖃᓂᒪᕗᖅ ᑐᖁᓕᒑᓪᓗᓂ. 3ᔩᓱᓯᒥᒃ ᑐᓴᕋᒥ, ᔫᑎᑦ ᐊᖓᔪᖅᑳᖏᑦ ᑎᓕᕔᑦ; ᕾᖁᔭᐅᖁᓪᓗᒍ ᐱᔨᖓᓂᒃ ᐋᖅᑭᒃᓯᓂᐊᕐᒪᑦ. 4ᑖᒃᑯᐊ ᔩᓱᓯ ᐅᐸᒃᑲᒥᑦᔪᒃ ᐊᒃᓱᕈᕐᓗᑎᒃ ᕿᓄᕕᒋᕚᑦ ᐅᐸᒍᑎᖁᓪᓗᒍ, ᐅᖃᕐᓗᑎᒃ, “ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐃᓕᖕᓄᑦ ᐃᑲᔪᕐᑕᐅᔭᕆᐊᖃᒻᒪᕆᒃᐳᖅ, 5ᐃᓅᖃᑎᕗᑦ ᐱᓐᓇᕆᖕᒪᒋᑦ, ᐅᒃᐱᕐᓂᕐᒧᓪᓗ ᑲᑎᒪᕕᒃᓴᑦᑎᓐᓂᒃ ᓴᓇᔭᐅᑎᑦᓯᓯᒪᕗᖅ.”
6ᔩᓱᓯᐅᑉ ᑕᕝᕗᓐᖓᐅᖃᑎᒋᓕᕐᐰᑦ. ᐃᒡᓗᖓ ᖃᒡᓕᖕᒪᑦᔪᒃ, ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᐃᓚᓐᓇᕆᔭᒥᓂᒃ ᑎᓕᓯᕗᖅ, ᐅᖃᖁᓪᓗᒋᑦ, ᐃᒫᒃ, “ᐊᑕᓃᖅ, ᕾᔪᓐᓃᕆᑦ, ᓇᓗᖅᑯᑎᒐᒪ ᐃᓕᖕᓂᒃ ᐃᑎᖁᔨᔭᕆᐊᒃᓴᖅ ᐃᒡᓗᓐᓄᑦ; 7ᐃᓕᖕᓄᑦ ᐅᐸᒍᑎᔭᕆᐊᒃᓴᖅ ᓇᓗᖅᑯᑎᒋᕗᖓ. ᐅᖃᑐᐃᓐᓇᕆᓪᓕ, ᐱᖁᔨᓗᑎᑦ, ᐱᔨᒐ ᑕᕝᕙ ᐋᖅᑭᖕᓂᐊᕐᐳᖅ. 8ᐅᕙᖓᑦᑕᐅᖅ ᐊᖓᔪᖅᑳᖃᕋᒪ, ᐅᓇᑕᕐᑐᒃᓴᖁᑎᖃᕐᓗᖓᓗ ᓯᐊᓛᕆᔭᓐᓂᒃ; ᐃᓚᖓᓐᓄᑦ ᐅᖃᕈᒪ, ‘ᐃᑯᓐᖓᕆᑦ’ ᑍᑯᓐᖓᕐᐳᖅ ᑕᕝᕙ; ᐊᓯᐊᓄᓪᓗ ᐅᖃᕈᒪ ‘ᕾᒋᑦ,’ ᕾᕗᖅ ᑕᕝᕙ; ᐱᔨᓐᓄᑦ ᐅᖃᕈᒪ ‘ᐅᓇ ᓴᓇᓚᐅᕈᒃ, ᓴᓇᕚ ᑕᕝᕙ.’”
9ᔩᓱᓯᐅᑉ ᑕᒪᓐᓇ ᑐᓴᕋᒥᐅᒃ ᑲᒪᓂᐊᕈᑎᒋᕚ, ᐃᓄᒋᐊᒃᑐᑦ ᒪᓕᒃᑎᓂ ᑕᑯᓴᕐᓗᒋᑦ ᐅᖃᐅᑎᕔᑦ, “ᐅᖃᐅᑎᕙᑦᓯ, ᐃᓴᕆᐊᓕᒥᐅᓂ ᑍᒫᒃ ᐅᒃᐱᕐᓂᖃᕐᑎᒋᔪᒥᒃ ᖃᐅᔨᓚᐅᓐᖏᓚᖓ.”
10ᑎᓕᔭᐅᓯᒪᔪᑦ ᐃᒡᓗᒧᑦ ᐅᑎᕋᒥᒃ, ᐱᔨ ᑕᑯᕚᑦ ᐋᖅᑭᒃᓯᒪᓕᕐᑐᖅ.
ᔩᓱᓯᐅᑉ ᐆᒻᒪᕐᑎᑦᓯᓂᖓ ᐅᐃᒡᒐᕐᓂᐅᑉ ᐃᕐᓂᖓᓂᒃ
11ᑭᖑᓂᖓᒍᑦ ᔩᓱᓯ ᓄᓇᓕᖕᓄᐊᕆᕗᖅ ᓁᓂᒥᒃ ᐊᑎᓕᖕᒧᑦ, ᐃᓕᓐᓂᐊᕐᑎᓂ ᐃᓄᒋᐊᒃᑐᓪᓗ ᐃᓚᒋᓪᓗᒋᑦ. 12ᓄᓇᓕᓄᑦ ᑎᑭᓕᕐᑎᓪᓗᒍ, ᑕᑯᒋᑦ, ᐃᓗᕕᕐᓯᔭᕐᑐᕐᑐᑦ ᑐᖁᖓᔪᒥᒃ ᐊᒡᔭᕐᓯᔪᑦ ᐊᓂᓕᕐᐳᑦ, ᐊᕐᓇᐅᑉ ᐃᕐᓂᑐᐊᖓᓂᒃ, ᑖᓐᓇ ᐅᐃᒡᒐᕐᓂᐅᓪᓗᓂ; ᐃᓄᒋᐊᒃᑐᑦ ᑕᕝᕙᓐᖓᑦ ᓄᓇᓕᖕᓂᑦ ᐃᓚᐅᕗᑦ. 13ᐊᑕᓂᐅᑉ ᐊᕐᓇᖅ ᑕᑯᒐᒥᐅᒃ, ᓇᒡᓕᒋᒻᒪᕆᒃᐹ ᐅᖃᐅᑎᓪᓗᒍ, “ᕿᐊᖏᓪᓗᑎᑦ.” 14ᐊᑭᕋᕐᑕᐅᔪᖅ ᐅᐸᒃᑲᒥᐅᒃ ᐊᒃᑐᕐᐹ, ᐊᑭᕋᕐᑐᑦ ᓄᖅᑲᕐᐳᑦ, ᔩᓱᓯ ᐅᖃᕐᐳᖅ, “ᐃᓅᓱᒃᑑᖅ, ᐅᖃᐅᑎᕙᒋᑦ ᒪᑭᑦᑎᑦ.” 15ᑐᖁᖓᔪᖅ ᐃᖏᑉᐳᖅ ᐅᖃᓪᓚᓕᕐᓗᓂ. ᔩᓱᓯᐅᑉ ᐊᓈᓇᖓᓄᐊᕐᑎᑉᐹ.
16ᐃᓄᓕᒫᑦ ᓯᕘᕋᓕᕐᐳᑦ; ᒎᑎ ᓂᕐᑐᕐᐹᑦ ᐅᖃᕐᓗᑎᒃ, “ᓇᓚᐅᑦᑍᔪᓪᓚᕆᖕᒥᑦ ᑎᑭᑕᐅᕗᒍᑦ! ᒎᑎᐅᑉ ᐃᓄᖁᑎᓂ ᐅᐸᒃᐰᑦ.”
17ᑕᒪᓐᓇ ᔩᓱᓯᐅᑉ ᐱᓂᐊᕐᓂᖓ ᐅᓂᒃᑲᐅᓯᐅᓕᕐᐳᖅ ᔫᑎᐊᒥ ᓄᓇᖃᕐᑐᓕᒫᓂᑦ, ᖃᓂᒋᔭᖓᓃᑦᑐᓕᒫᓂᓪᓗ.
ᔪᐊᓇᓯ ᐹᑉᑎᑎᕆᔨᐅᑉ ᐅᖃᕆᐊᕐᑐᕐᑎᑕᖏᑦ
ᒫᑎᐅᓯ 11:2-19
18ᔪᐊᓇᓯ ᐹᑉᑎᑎᕆᔨᐅᑉ ᐃᓕᓐᓂᐊᕐᑎᖏᑕ ᑕᒪᒃᑯᓂᖓ ᔪᐊᓇᓯ ᐅᓂᒃᑳᕐᕕᒋᕚᑦ. 19ᔪᐊᓇᓯ ᕾᖁᔨᕗᖅ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ, ᑎᓕᓪᓗᒋᒃ ᐊᑕᓂᕐᒧᑦ ᐊᐱᕆᔭᕐᑐᖁᓪᓗᒋᒃ ᑖᑦᓱᒥᖓ, ᐃᒫᒃ, “ᑍᓐᓇᐅᕖᑦ ᑎᑭᓐᓂᐊᕐᓂᕋᕐᑕᐅᓯᒪᔪᖅ, ᐅᕝᕙᓘᓐᓃᑦ ᐊᓯᖕᓂᒃ ᓂᕆᐅᒋᐊᖃᕐᐱᑖ?”
20ᑖᒃᑯᐊᒃ ᔩᓱᓯᒧᑦ ᑎᑭᓐᓇᒥᒃ ᐅᖃᕐᐳᒃ, “ᔪᐊᓇᓯ ᐹᑉᑎᑎᕆᔨᐅᑉ ᑎᓕᕚᑎᒃᑯᒃ ᐊᐱᕆᖁᓪᓗᓄᒃ ᐃᒫᒃ, ‘ᑍᓐᓇᐅᕖᑦ, ᑎᑭᓐᓂᐊᕐᓂᕋᕐᑕᐅᓯᒪᔪᖅ, ᐅᕝᕙᓘᓐᓃᑦ ᐊᓯᖕᓂᒃ ᓂᕆᐅᒋᐊᖃᕐᐱᑖ?’”
21ᑕᕝᕙᓂ ᐃᑲᕐᕋᒥ ᔩᓱᓯ ᐃᓄᖕᓂᒃ ᐋᓐᓂᐊᔪᓂᒃ ᐊᒥᓱᓂᒃ ᐋᖅᑭᒃᓯᕗᖅ, ᐊᓂᕐᓂᕐᓗᖕᓂᒃ ᐃᓄᖕᓂᑦ ᐊᓂᑎᑦᓯᕗᖅ, ᑕᐅᑐᖏᑦᑐᑦ ᐊᒥᓱᑦ ᑕᐅᑐᓕᕐᑎᑉᐰᑦ. 22#ᐂᓮᐊᓯ 35:5,6; ᐂᓮᐊᓯ 61:1.ᑖᒃᑯᐊᒃ ᑭᐅᕚᒃ, “ᔪᐊᓇᓯ ᐅᖃᐅᑎᔭᕐᑐᕐᓯᒃᑯᒃ ᑕᑯᔭᑦᓯᖕᓂᒃ ᑐᓴᕐᑕᑦᓯᓐᓂᒡᓗ: ᑕᐅᑐᖏᑦᑐᑦ ᑕᐅᑐᓕᕐᐳᑦ, ᐱᓱᒍᓐᓇᖏᑦᑐᑦ ᐱᓱᒍᓐᓇᕐᓯᕗᑦ, ᐸᕐᑎᕐᑐᑦ ᑲᑉᐱᐊᒋᔭᐅᔪᒥᒃ ᐋᖅᑭᒃᑕᐅᕗᑦ, ᑐᓵᖏᑦᑐᓪᓗ ᑐᓵᓕᕐᐳᑦ, ᑐᖁᖓᔪᓪᓗ ᐆᒻᒪᕐᐳᑦ, ᐊᒃᖢᔪᑦ ᐅᖃᐅᑦᔭᐅᕗᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ. 23ᓮᒪᕐᑎᑕᐅᓯᒪᔪᒥᒃ ᐃᓅᓯᖃᕐᐳᖅ ᑖᓐᓇ ᐅᕙᓐᓂᒃ ᖁᓚᕈᑎᖃᖏᑦᑐᖅ.”
24ᔪᐊᓇᓯᐅᑉ ᑎᓕᓯᒪᔭᖏᒃ ᑕᕝᕙᓃᑦᓱᓐᓃᕐᒪᑎᒃ, ᔩᓱᓯ ᐃᓄᒋᐊᒃᑐᓄᑦ ᐅᖃᕐᐳᖅ ᔪᐊᓇᓯᒥᒃ ᐱᑦᔪᑎᖃᕐᓗᓂ, “ᔪᐊᓇᓯ ᑕᑯᔭᕐᑐᕋᑦᓯᐅᒃ ᐃᓄᖃᖏᑦᑐᒥ, ᖃᓄᐃᑦᑐᒥᒃ ᑕᑯᓂᐊᕋᓱᒋᓚᐅᕐᐱᓰ? ᐃᕕᒃᓱᒐᕐᔪᐊᒥᒃ ᐊᓄᕆᒧᑦ ᐊᐅᓚᑕᐅᔪᒥᒃ ᑕᑯᓂᐊᕋᓱᒋᓚᐅᕐᐱᓰ? 25ᓱᓇᒥᒡᓕ ᑕᑯᔭᕐᑐᓚᐅᕐᐱᓰ? ᐊᖑᒻᒥᒃ ᐊᓐᓄᕌᑦᓯᐊᕐᓯᒪᔪᒥᒃ ᑕᑯᔭᕐᑐᓚᐅᕐᐱᓰ? ᑕᑯᒋᑦ, ᐊᓐᓄᕌᑦᓯᐊᕆᒃᑐᑦ ᐊᔪᕐᓴᖏᑦᑑᓪᓗᑎᒃ, ᐊᖓᔪᖅᑳᕐᔪᐊᑉ ᐃᒡᓗᖏᓐᓂ ᐃᓂᖃᓲᖑᕗᑦ. 26ᓱᓇᒥᒃ ᑕᑯᔭᕐᑐᓚᐅᕐᐱᓰ? ᓇᓚᐅᑦᑍᔪᒥᒃ ᑕᑯᓂᐊᕋᓱᒋᓚᐅᕐᐱᓰ? ᐃᓛᒃ ᑖᓐᓇ ᓇᓚᐅᑦᑍᔪᒥᑦ ᐱᓪᓚᕆᐅᓂᕐᓴᐅᕗᖅ. 27#ᒪᓚᑬ 3:1.ᔪᐊᓇᓯ ᐃᒫᒃ ᐅᖃᐅᓯᐅᓯᒪᕗᖅ, ‘ᑕᑯᒋᑦ, ᑎᓕᔭᕋ ᐱᓇᓱᐊᕆᐊᕐᑐᕐᑎᑉᐸᕋ, ᓯᕗᓂᕐᓂ ᐊᖅᑯᑎᒃᓴᕐᓂᒃ ᐋᖅᑭᒃᓱᐃᖁᓪᓗᒍ.’” 28ᓱᓕ ᐅᖃᕐᐳᖅ, “ᐅᖃᐅᑎᕙᑦᓯ, ᔪᐊᓇᓯ ᐹᑉᑎᑎᕆᔪᖅ ᐊᖏᓂᕐᓴᐅᕗᖅ ᐊᕐᓇᒧᑦ ᐃᕐᓂᐊᕆᔭᐅᓚᐅᕐᓯᒪᔪᓂᑦ ᑕᒤᓐᓂᑦ; ᑭᓯᐊᓂᓕ ᓇᓪᓕᐊᑦ ᒎᑎᐅᑉ ᐊᑕᓂᐅᕕᖓᓂ ᒥᑭᓐᓂᕐᐸᐅᔪᖅ ᑖᓐᓇ ᐊᖏᓂᕐᓴᐅᕗᖅ ᔪᐊᓇᓯᒥᑦ.”
29 #
ᒫᑎᐅᓯ 21:32; ᓘᑲᓯ 3:12. ᑐᓴᓚᐅᕐᑐᑦ ᑕᒪᕐᒥᒃ ᔪᐊᓇᓯᒥᒃ ᕉᒪᒥᐅᓪᓗ ᑮᓇᐅᔧᕐᑎᑦᓯᔨᖁᑎᖏᑦ ᓈᓚᓚᐅᕐᒪᑕ ᒎᑎᐅᑉ ᐊᑐᕐᑕᐅᖁᔭᖓᓂᒃ, ᔪᐊᓇᓯᒧᑦ ᐹᑉᑎᑕᐅᓚᐅᕐᐳᑦ; 30ᐹᕆᓯᓪᓕ ᐱᖁᔭᓂᒡᓗ ᐃᓕᓮᔩᑦ ᓱᓕᔪᕐᓴᓐᖏᓚᑦ ᒎᑎᐅᑉ ᐱᓇᓱᐊᕐᓂᖓᓂᒃ ᑖᒃᑯᓄᖓ, ᐹᑉᑎᑕᐅᔪᒪᓇᑎᒡᓗ ᔪᐊᓇᓯᒧᑦ.
31“ᓱᓇᒧᓪᓕ ᐅᑯᐊ ᐃᓄᐃᑦ ᒫᓐᓇ ᐊᑦᔨᐅᑎᑦᓱᓐᓇᕐᐸᒃᑳ? ᓱᓇᒥᒃ ᐊᑦᔨᖃᕐᐹᑦ? 32ᐊᑦᔨᖃᕐᐳᑦ ᓱᕈᓯᑯᓗᖕᓂᒃ ᓂᐅᕕᕐᕖᑦ ᓴᓂᐊᓂ ᐃᒃᓯᕙᔪᓂᒃ ᐃᒻᒥᖕᓄᑦ ᐅᖃᖃᑦᑕᐅᑎᔪᑎᑐᑦ, ‘ᓂᑦᔭᐅᓯᔭᕐᕕᒋᒐᓗᐊᕋᑦᓯ ᑖᓂᓯᓐᖏᓚᓯ; ᕿᒃᓵᒃᑐᕐᓯᐅᑎᓂᒃ ᓂᓪᓕᐊᒐᓗᐊᕋᑦᑕ ᕿᐊᓯᓐᖏᓚᓯ.’ 33ᔪᐊᓇᓯ ᐹᑉᑎᑎᕆᔨ ᑎᑭᓚᐅᕐᐳᖅ ᓂᕆᑦᑍᓕᕙᒡᓗᓂ, ᐅᐂᓂᒥᒃ ᐃᒥᕐᐸᒐᓂ; ᐅᖃᕐᐳᓯ, ‘ᑖᓐᓇ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᕗᖅ.’ 34ᐃᓅᑉ ᐃᕐᓂᖓ ᑎᑭᒻᒪᑦ ᓂᕆᑦᑍᓕᓇᓂ ᐃᒥᕐᑍᓕᓇᓂᓗ; ᐅᖃᕐᐳᓯ, ‘ᑕᑯᒋᑦ, ᐅᓇ ᓂᕆᑐᔪᐊᓗᒃ ᐋᖓᔮᕐᑎᐅᓪᓗᓂᓗ, ᕉᒪᒥᐅᑦ ᑮᓇᐅᔧᕐᑎᑦᓯᔨᖏᑕ ᐱᐅᖏᑦᑐᓕᔪᓪᓗ ᐃᓚᓐᓈᕆᔭᖓᑦ!’ 35ᓯᓚᑐᓂᐅᑉ ᓱᓕᑦᓯᐊᕐᓂᖓ ᓴᖅᑭᑎᑕᐅᕗᖅ ᕿᑐᕐᖓᓕᒫᖏᑎᒍᑦ.”#7:35 ᕿᑐᕐᖓᓕᒫᖏᑎᒍᑦ ᐅᕝᕙᓗ ᐃᓚᓕᐅᕐᓯᔪᓕᒫᑎᒍᑦ
ᔩᓱᓯᐅᑉ ᐳᓛᕆᐊᕐᓂᖓ ᓮᒨᓂᐅᑉ ᐹᕆᓯᐅᖕᒥᔫᑉ ᐃᒡᓗᖓᓄᑦ
36ᐹᕆᓯᑦ ᐃᓚᖓᑦᑕ ᔩᓱᓯ ᓂᕆᖃᑎᒋᔪᒪᓪᓗᒍ ᕾᖁᕚ ᐃᒡᓗᒥᓄᑦ, ᔩᓱᓯ ᑖᑦᓱᒪ ᐃᒡᓗᖓᓄᐊᕐᐳᖅ, ᓂᕆᕕᖓᓄᑦ ᐃᖏᓪᓗᓂ. 37#ᒫᑎᐅᓯ 26:7; ᒫᑯᓯ 14:3; ᔪᐊᓇᓯ 12:3.ᑕᕝᕙᓂ ᓄᓇᓕᖕᓂ ᐊᕐᓇᕐᑕᖃᕐᐳᖅ ᐊᔪᕐᑐᓕᔨᒥᒃ, ᑖᓐᓇ ᑐᓴᕋᒥ ᔩᓱᓯ ᓂᕆᖃᑕᐅᖕᒪ ᐹᕆᓯᐅᑉ ᐃᒡᓗᖓᓂ, ᐳᓪᓚᐅᔭᒥᒃ ᓇᒃᓴᕐᓗᓂ ᑕᕝᕗᓐᖓᕐᐳᖅ ᑎᐱᑦᓯᐊᕆᓴᐅᒻᒥᒃ ᐃᒪᓕᖕᒥᒃ. 38ᔩᓱᓯᐅᑉ ᑐᓄᐊᓂ ᓇᖏᕐᐳᖅ ᐃᑎᒐᖏᑕ ᓴᓂᐊᓂ, ᕿᐊᓪᓗᓂ, ᖁᕝᕕᒥᓄᑦ ᐃᑎᒐᖏᑦ ᖃᐅᓯᓕᕐᑎᕐᐰᑦ, ᐊᓪᓚᕐᑎᕐᓗᒋᓪᓗ ᓄᔭᕐᒥᓄᑦ, ᐃᑎᒐᖏᓪᓗ ᑯᓂᒃᐰᑦ, ᑎᐱᑦᓯᐊᕆᒃᑐᒥᒃ ᑯᕝᕕᕆᓪᓗᒋᑦ. 39ᐹᕆᓯᐅᑉ ᕾᖁᔨᓯᒪᔫᑉ ᑖᓐᓇ ᑍᒤᓕᐅᕐᓂᖓ ᑕᑯᒐᒥᐅᒃ, ᐃᓱᒪᓕᕐᐳᖅ, “ᐅᓇ ᓱᓕᔪᒥᒃ ᓇᓚᐅᑦᑍᔫᒍᓂ, ᖃᐅᔨᒐᔭᕐᐳᖅ ᐊᕐᓇᖅ ᖃᓄᐃᑦᑑᖕᒪᖔᑦ ᐊᒃᑐᐊᔨᒋᔭᓂ; ᐊᔪᕐᑐᓕᔨᐅᓂᖓᓂᒃ ᖃᐅᔨᒐᔭᕐᐹ.”
40ᔩᓱᓯᐅᑉ ᓂᓪᓕᐅᑎᕚ ᐅᖃᐅᑎᓪᓗᒍ, “ᓮᒨᓃ, ᐃᓕᖕᓄᑦ ᐅᖃᐅᓯᒃᓴᖃᕋᒪ.”
ᑖᑦᓱᒪ ᑭᐅᕚ, “ᖃᓄᖅ ᐊᔪᕆᕐᑐᐃᔩ.”
41“ᒪᕐᕉᖕᓂᒃ ᐊᖑᑎᑕᖃᓚᐅᕐᐳᖅ ᐊᑭᓕᒃᓴᖃᕐᑑᖕᓂᒃ ᐊᑐᓂᑦ ᑮᓇᐅᔭᓂᒃ ᐊᑐᕐᑎᑦᓯᔨᒧᑦ; ᐂᑉᐸᖓ ᐊᑭᓕᒃᓴᖃᓚᐅᕐᐳᖅ 500ᓂᒃ, ᐂᑉᐸᖓᓗ 50ᓂᒃ. 42ᑖᒃᑯᐊᒃ ᐊᑐᓂᑦ ᐊᑭᓕᐅᑎᒃᓴᖃᖏᒻᒪᑎᒃ ᐊᑭᓕᒃᓴᖃᕐᕕᒋᔨᖏᒃᑕ ᐊᑭᓖᖁᔪᓐᓃᕐᓗᒋᒃ ᐃᓱᒪᒋᔪᓐᓁᕐᕕᒋᕚᒃ. ᓇᓪᓕᐊᒡᓕ ᑍᒪ ᐊᑭᓕᒃᓴᖃᕐᕕᒋᔭᒥᓂᒃ ᓇᒡᓕᒍᓱᖕᓂᕐᓴᐅᒐᔭᕐᐹ?”
43ᓮᒨᓂ ᑭᐅᕗᖅ, “ᐃᓱᒪᕗᖓ ᐅᓄᕐᓂᕐᓴᓂᒃ ᐊᑭᓕᒃᓴᖃᓚᐅᕐᑐᖅ.”
ᔩᓱᓯᐅᑉ ᐅᖃᐅᑎᕚ, “ᓱᓕᕗᑎᑦ.” 44ᐊᕐᓇᒧᑦ ᑕᑯᓴᕋᒥ ᓮᒨᓂ ᐅᖃᐅᑎᕚ, “ᐅᓇ ᐊᕐᓇᖅ ᑕᑯᕕᐅᒃ? ᐃᒡᓗᖕᓄᑦ ᐃᑎᕋᒪ, ᐃᒥᕐᒥᒃ ᕾᑦᓯᓚᐅᓐᖏᓚᕐᒪ ᐃᑎᒐᓐᓄᑦ ᐅᐊᓴᐅᑎᒃᓴᓐᓂᒃ, ᑖᑦᓱᒪᓕ ᐃᑎᒐᒃᑲ ᖃᐅᓯᓕᕐᑎᕐᐰᑦ ᖁᕝᕕᒥᓄᑦ ᐊᓪᓚᕐᑎᕐᓗᒋᓪᓗ ᓄᔭᕐᒥᓄᑦ. 45ᑐᓐᖓᓱᒃᑎᓪᓗᖓ ᑯᓂᓚᐅᓐᖏᓚᕐᒪ, ᑖᑦᓱᒪᓕ ᑍᒪᓐᖓᑦ ᐃᑎᕋᒥ ᐃᑎᒐᒃᑲ ᑯᓂᒃᓮᓐᓇᕐᐰᑦ. 46ᓂᐊᖁᕋ ᑯᕝᕕᕆᓚᐅᓐᖏᓚᑦ ᓇᐹᕐᑑᑉ ᐅᕐᓱᖓᓄᑦ, ᑖᑦᓱᒪᓕ ᐃᑎᒐᒃᑲ ᑯᕝᕕᕆᕔᑦ, ᑎᐱᑦᓯᐊᕆᒃᑐᒧᑦ. 47ᑍᒤᒻᒪᑦ ᐅᖃᐅᑎᕙᒋᑦ, ᐊᕐᓇᐅᑉ ᐱᐅᖏᑦᑐᓕᓂᖏᑦ ᐊᒥᓱᑦ ᐃᓱᒪᒋᔪᓐᓃᕐᑕᐅᕗᑦ, ᑍᒤᒻᒪᑦ ᐊᖏᔪᒥᒃ ᓇᒡᓕᖕᓂᕐᒥᒃ ᓴᖅᑭᑎᑦᓯᕗᖅ; ᒥᑭᔪᒥᒡᓕ ᐱᐅᖏᑦᑐᓕᓯᒪᔪᖅ ᐃᓱᒪᒋᔪᓐᓃᕐᕕᐅᔪᖅ, ᒥᑭᔪᒥᒃ ᓇᒡᓕᖕᓂᖃᕐᐳᖅ.”
48ᔩᓱᓯᐅᑉ ᐊᕐᓇᖅ ᐅᖃᐅᑎᕚ, “ᐊᔪᕐᓂᑎᑦ ᐃᓱᒪᒋᔭᐅᔪᓐᓃᕐᐳᑦ.”
49ᑕᕝᕙ ᓂᕆᔭᕐᑐᕐᓯᒪᔪᑦ ᐃᒻᒥᖕᓄᑦ ᐅᖃᓕᕐᐳᑦ, “ᑭᓇᐅᒐᒥᐅᓇ ᐊᔪᕐᓂᕐᓂᒃ ᐊᒡᓛᑦ ᐃᓱᒪᒋᔪᓐᓃᕐᓯᔪᓐᓇᕐᐹ?”
50ᔩᓱᓯᐅᑉ ᐊᕐᓇᖅ ᐅᖃᐅᑎᕚ, “ᐅᒃᐱᕐᓂᕕᑦ ᐱᐅᓕᕚᑎᑦ; ᐃᓱᒪᔮᖏᓪᓗᑎᑦ ᐊᓂᓕᕆᑦ.”
Currently Selected:
ᓘᑲᓯᐅᑉ ᐊᒡᓚᖏᑦ 7: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
